Eclesiastés 7 - Li Santil hu

Kꞌaxal us nak cua̱nk a̱naꞌleb chiru nak ma̱cꞌaꞌak a̱naꞌleb

¹ Kꞌaxal us nak cha̱bil ta̱yehekꞌ chirix li junju̱nk xban nak cha̱bil lix naꞌleb. Aꞌan kꞌaxal us chiru li sununquil ban. Ut kꞌaxal us li ca̱mc chiru li yoꞌla̱c.

² Kꞌaxal us nak toxic chi yoꞌlec camenak chiru nak toxic chi ninkꞌei̱c. Li ani toj yoꞌyo, tento nak cua̱nk saꞌ xchꞌo̱l lix camic xban nak aꞌan li rosoꞌjic li junju̱nk.

³ Kꞌaxal us li ya̱bac chiru li seꞌec xban nak li raylal naxtenkꞌa junak chixtaubal xnaꞌleb.

⁴ Li ani cuan xnaꞌleb nacꞌoxlac chirix li ca̱mc. Ut li ani ma̱cꞌaꞌ xnaꞌleb caꞌaj cuiꞌ li ninkꞌei̱c naxcꞌoxla.

⁵ Kꞌaxal us nak tokꞌusekꞌ xbaneb li cuanqueb xnaꞌleb chiru nak ta̱qꞌuehekꞌ kalokꞌal xbaneb li ma̱cꞌaꞌeb xnaꞌleb.

⁶ Lix sahil xchꞌo̱leb li ma̱cꞌaꞌeb xnaꞌleb yal nanumeꞌ. Ma̱cꞌaꞌ na-oc cuiꞌ. Chanchan li chaj li yal naxhum rib.

⁷ Cui cuan junak cuan xnaꞌleb tixrahobtesi li ras ri̱tzꞌin, li jun aꞌan yo̱ chixba̱nunquil joꞌ naxba̱nu li ma̱cꞌaꞌ xnaꞌleb. Ut cui cuan junak naxqꞌue rib chi tumina̱c ru, li jun aꞌan naxpoꞌ lix naꞌleb.

⁸ Kꞌaxal us nak ta̱choy li cꞌanjel li ac xatiquib xba̱nunquil chiru nak ta̱tiquib xba̱nunquil jun chic cꞌanjel ut incꞌaꞌ ta̱choy xba̱nunquil. Ut kꞌaxal us li cuyuc ib chiru li nimobresi̱nc ib.

⁹ Ut incꞌaꞌ tatjoskꞌokꞌ saꞌ junpa̱t joꞌ nequeꞌxba̱nu li ma̱cꞌaꞌeb xnaꞌleb. Eb aꞌan nequeꞌjoskꞌoꞌ saꞌ junpa̱t.

¹⁰ Incꞌaꞌ ta̱ye: —¿Cꞌaꞌut nak eb li cutan li ac xeꞌnumeꞌ kꞌaxal useb chiruheb li cutan anakcuan?— Incꞌaꞌ ta̱ye chi joꞌcan xban nak caꞌaj cuiꞌ li ma̱cꞌaꞌeb xnaꞌleb nequeꞌxye chi joꞌcan.

¹¹ Li cha̱bil naꞌleb kꞌaxal us chokꞌ reheb chixjunileb li cuanqueb saꞌ ruchichꞌochꞌ. Aꞌan joꞌ jun li ma̱tan qꞌuebil reheb.

¹² Li naꞌleb naxtenkꞌa li junju̱nk. Joꞌcan ajcuiꞌ li tumin naxtenkꞌa li junju̱nk. Abanan li ani cuan xnaꞌleb naxnau xcolbal rix lix yuꞌam.

¹³ Cheqꞌuehak retal li cꞌaꞌru naxba̱nu li Dios. ¿Ma cuan ta biꞌ junak naru tixti̱cobresi rix junak li cꞌaꞌak re ru li ac xyi̱b li Dios chi yocos rix?

¹⁴ Chisahokꞌ saꞌ e̱chꞌo̱l nak nequex-el chi us riqꞌuin li cꞌaꞌru nequeba̱nu. Ut cui nachal li raylal saꞌ e̱be̱n, cheqꞌuehak retal nak li Dios naqꞌuehoc sahil chꞌo̱lej ut naxqꞌue ajcuiꞌ li rahil chꞌo̱lej. Ma̱ ani naxnau cꞌaꞌru ta̱cha̱lk chiru mokon.

¹⁵ Usta ma̱cꞌaꞌ na-oc cuiꞌ lin yuꞌam, abanan xinqꞌue retal li cuib chi naꞌleb aꞌin: Cuan nak eb li ti̱queb xchꞌo̱l nequeꞌcam nak toj sa̱jeb. Ut cuan nak eb li incꞌaꞌ useb xnaꞌleb najt nequeꞌcuan saꞌ ruchichꞌochꞌ.

¹⁶ Cha̱bilakex, abanan incꞌaꞌ chinumta̱k le̱ cha̱bilal. Chicua̱nk e̱naꞌleb, abanan incꞌaꞌ chinumta̱k le̱ naꞌleb. ¿Cꞌaꞌru aj e nak te̱sach e̱rib e̱junes?

¹⁷ Cheqꞌuehak retal cꞌaꞌru te̱ba̱nu re nak incꞌaꞌ ta̱numta̱k le̱ ma̱usilal saꞌ e̱be̱n. Ut me̱ba̱nu to̱ntil naꞌleb. ¿Cꞌaꞌru aj e nak texca̱mk chi toj ma̱jiꞌ nacuulac xkꞌehil?

¹⁸ Us nak te̱ba̱nu li cꞌaꞌru nequecꞌoxla xba̱nunquil, abanan incꞌaꞌ chinumta̱k li cꞌaꞌru te̱ba̱nu xban nak li ani naxxucua ru li Dios, us na-el riqꞌuin li cꞌaꞌru li naxba̱nu.

¹⁹ Li ani cuan xnaꞌleb naqꞌueheꞌ xcacuilal xban lix naꞌleb ut cau rib chiru laje̱b chi cui̱nk li cuanqueb xcuanquil.

²⁰ Relic chi ya̱l ma̱ jun cuan saꞌ ruchichꞌochꞌ li kꞌaxal ta ti̱c xchꞌo̱l chi incꞌaꞌ ta ta̱ma̱cobk.

²¹ Ma̱pa̱b chixjunil li cꞌaꞌru nequeꞌxye li cristian re nak incꞌaꞌ ta̱cuabi nak yo̱k chi a̱tinac cha̱cuix la̱ mo̱s.

²² Xban nak la̱at nacanau nak nabal sut ajcuiꞌ xat-a̱tinac chirixeb jalan.

²³ Quin-oc xtzꞌilbal rix li cꞌaꞌak re ru aꞌin xban nak cuan innaꞌleb. Abanan quicuecꞌa nak incꞌaꞌ tzꞌakal lin naꞌleb chixba̱nunquil.

²⁴ Incꞌaꞌ quinru xtzꞌilbal rix li cꞌaꞌak re ru aꞌin xban nak kꞌaxal chꞌaꞌaj xtaubal ru. Ma̱ ani naru xtaubal ru li cꞌaꞌak re ru aꞌin.

²⁵ Joꞌcan nak quin-oc xsicꞌbal xya̱lal chanru nak tintau xtzꞌakob lin naꞌleb re nak tintau ru chixjunil li cꞌaꞌak re ru aꞌin. Quicuaj xtaubal ru cꞌaꞌut nak na-uxman li ma̱usilal ut li to̱ntil naꞌleb saꞌ ruchichꞌochꞌ.

²⁶ Nak yo̱quin chixtzꞌilbal rix chixjunil li cꞌaꞌak re ru aꞌin, quintau jun li chꞌaꞌajquilal kꞌaxal ra chiru li ca̱mc. Aꞌan li ixk li incꞌaꞌ us xnaꞌleb. Naxkꞌunbesi li cui̱nk toj retal natꞌaneꞌ saꞌ rukꞌ. Caꞌaj cuiꞌ li cui̱nk li naxqꞌue xlokꞌal li Dios naru naxcol rib chiru li ixk aꞌan. Abanan, laj ma̱c tzꞌakal natꞌaneꞌ saꞌ rukꞌ aꞌan.

²⁷ Nak yo̱quin xtzꞌilbal rix li cꞌaꞌak re ru aꞌin, quintau li naꞌleb aꞌin, la̱in li ninnau a̱tinac chi cha̱bil.

²⁸ Nak toj ma̱jiꞌ nintau li yo̱quin chixsicꞌbal, quintau jun li cui̱nk cha̱bil xnaꞌleb saꞌ xya̱nkeb li jun mil chic. Abanan ma̱ jun li ixk quintau cha̱bil ta xnaꞌleb saꞌ xya̱nkeb chixjunileb li ixk.

²⁹ Nak yo̱quin xtzꞌilinquil rix li cꞌaꞌak re ru aꞌin, quinqꞌue retal nak li Dios quixyi̱b li cui̱nk chi cha̱bil ut chi tzꞌakal re ru. Abanan, eb aꞌan aꞌ chic li ma̱usilal queꞌraj xba̱nunquil.