Eclesiastés 6 - Li Santil hu

¹ Ut cuan cuiꞌchic jun li chꞌaꞌajquilal ninqꞌue retal nacꞌulman rajlal saꞌ ruchichꞌochꞌ.

² Cuanqueb li nequeꞌqꞌueheꞌ xbiomal ut xlokꞌal xban li Dios. Chixjunil cuan reheb. Ma̱cꞌaꞌ napaltoꞌ chiruheb. Abanan li Dios incꞌaꞌ naxqꞌueheb chixyalbal xsahil lix biomaleb. Jalan ban chic aj e nacana cuiꞌ. Aꞌin ma̱cꞌaꞌ na-oc cuiꞌ. Aꞌan jun raylal ut chꞌaꞌajquilal chokꞌ reheb li cristian.

³ Junak cui̱nk naru nacuan jun cientak li ralal xcꞌajol. Ut naru ajcuiꞌ nacuan nabalak chihab saꞌ ruchichꞌochꞌ. Usta kꞌaxal najt rok lix yuꞌam saꞌ ruchichꞌochꞌ, ma̱cꞌaꞌ na-oc cuiꞌ cui incꞌaꞌ naxyal xsahil li cꞌaꞌru cuan re chi moco namukeꞌ saꞌ xya̱lal. La̱in nincꞌoxla nak kꞌaxal us junak li cꞌulaꞌal yal nanumeꞌ chiru li cui̱nk aꞌan.

⁴ Usta li cꞌulaꞌal aꞌin li yal quinumeꞌ incꞌaꞌ quiyoꞌla saꞌ xya̱lal, quicana yal chi joꞌcan. Chanchan quicana saꞌ kꞌojyi̱n chi ma̱cꞌaꞌ xcꞌabaꞌ.

⁵ Li cꞌulaꞌal aꞌan incꞌaꞌ qui-iloc cutan chi moco quixnau ru li cua̱nc saꞌ ruchichꞌochꞌ. Abanan kꞌaxal us quixcꞌul li cꞌulaꞌal aꞌan chiru li quixcꞌul li cui̱nk xban nak co̱ chi hila̱nc.

⁶ Li cui̱nk aꞌin xru raj xcuan cuibak mil chihab saꞌ ruchichꞌochꞌ. Abanan cui incꞌaꞌ xyal xsahil li cꞌaꞌru cuan re, ma̱cꞌaꞌ na-oc cuiꞌ. ¿Ma incꞌaꞌ ta biꞌ ta̱ca̱mk li cui̱nk joꞌ nak quicam li cꞌulaꞌal?

⁷ Li cui̱nk naxcamsi rib chi cꞌanjelac yal re tixtzaca. Abanan incꞌaꞌ nacꞌojla xchꞌo̱l riqꞌuin chixjunil li naxsicꞌ.

⁸ ¿Ma kꞌaxal us ta biꞌ cuanqueb li cristian li cuanqueb xnaꞌleb chiruheb li ma̱cꞌaꞌeb xnaꞌleb? Ut, ¿ma kꞌaxal us ta biꞌ cuanqueb li nebaꞌ xban nak xeꞌxnau cua̱nc saꞌ xya̱nkeb li cuanqueb saꞌ ruchichꞌochꞌ?

⁹ Kꞌaxal us nak tixcꞌojob xchꞌo̱l riqꞌuin li joꞌ qꞌuial cuan re chiru nak yo̱k chi cꞌoxlac chirix nabal xtzꞌakob li cꞌaꞌru re xban nak aꞌan ma̱cꞌaꞌ na-oc cuiꞌ. Junes raylal naxqꞌue.

¹⁰ Li cꞌaꞌru nacꞌulman anakcuan ac chꞌolchꞌo nak joꞌcan ta̱cꞌulma̱nk. Joꞌcan nak incꞌaꞌ naru xcuechꞌinquil rix li cꞌaꞌru naxba̱nu li Dios.

¹¹ Li ani nacuulac chiru cuechꞌi̱nc, ma̱cꞌaꞌ na-oc cuiꞌ li naxba̱nu. Usta nabal li a̱tin naxye, ma̱cꞌaꞌ naxra nak naa̱tinac nabal.

¹² ¿Ma cuan ta biꞌ junak nanaꞌoc re cꞌaꞌru li us chokꞌ re li cui̱nk nak cuan arin saꞌ ruchichꞌochꞌ? Lix yuꞌam nanumeꞌ saꞌ junpa̱t chi ma̱cꞌaꞌ rajbal. Ut, ¿ma cuan ta biꞌ junak ta̱yehok re cꞌaꞌru ta̱cꞌulma̱nk nak acak xcam?