Eclesiastés 5 - Li Santil hu

Ma̱cꞌaꞌ na-oc cuiꞌ li a̱tinac chi ma̱cꞌaꞌ rajbal

¹ Nak texxic saꞌ lix templo li Dios cheqꞌuehak retal chi us chanru le̱ naꞌleb. Incꞌaꞌ te̱qꞌue e̱chꞌo̱l xqꞌuebal li cꞌatbil mayej joꞌ nequeꞌxba̱nu li ma̱cꞌaꞌeb xnaꞌleb. Eb aꞌan incꞌaꞌ nequeꞌxqꞌue retal nak incꞌaꞌ us yo̱queb xban nak incꞌaꞌ nequeꞌxtau ru lix ya̱lal li yo̱queb chixba̱nunquil. Cheqꞌuehak ban e̱chꞌo̱l chixtzolbal lix ya̱lal.

² Moco yalak cꞌaꞌru ta te̱ye chi incꞌaꞌ te̱cꞌoxla chi us. Incꞌaꞌ tex-oc xyechiꞌinquil re li Dios li cꞌaꞌru incꞌaꞌ naru te̱qꞌue xban nak li Dios saꞌ choxa cuan ut la̱ex saꞌ ruchichꞌochꞌ cuanquex. Cheba̱nuhak cue̱nt re nak incꞌaꞌ tex-a̱tinak nabal.

³ Incꞌaꞌ us nak yo̱kex chi cꞌoxlac chirix li cꞌaꞌak re ru, xban nak cui yo̱kex chi cꞌoxlac, yalak cꞌaꞌru tixcꞌut rib che̱ru saꞌ le̱ matcꞌ. Ut cui junes a̱tinac nequeba̱nu, yo̱quex chixba̱nunquil joꞌ nequeꞌxba̱nu li ma̱cꞌaꞌeb xnaꞌleb.

⁴ Cui cꞌaꞌru te̱raj xyechiꞌinquil re li Dios, cheba̱nuhak chi junpa̱t xban nak li Dios incꞌaꞌ nacuulac chiru nak incꞌaꞌ nequeba̱nu li cꞌaꞌru nequeyechiꞌi re.

⁵ Kꞌaxal us nak ma̱cꞌaꞌ te̱yechiꞌi cui nequecꞌoxla nak incꞌaꞌ naru te̱ba̱nu.

⁶ Cheqꞌuehak retal li cꞌaꞌru te̱ba̱nu re nak incꞌaꞌ texma̱cobk xban li cꞌaꞌru te̱yechiꞌi. Ma̱re mokon te̱ye re laj cꞌanjel chiru li Dios nak xma̱cꞌaꞌil e̱naꞌleb xeba̱nu cuiꞌ. Li Dios naru nasach ru li ac xeba̱nu. ¿Cꞌaꞌut nak te̱chikꞌ xjoskꞌil li Dios riqꞌuin li cꞌaꞌru nequeye?

⁷ Joꞌcan nak cui la̱ex junes matqꞌuec nequeba̱nu ut junes a̱tinac nequeba̱nu, aꞌan ma̱cꞌaꞌ na-oc cuiꞌ. Li cꞌaꞌru tento xba̱nunquil, aꞌan xxucuanquil ru li Ka̱cuaꞌ Dios.

Ma̱cꞌaꞌ aj e nak cua̱nk nabal kabiomal saꞌ ruchichꞌochꞌ

⁸ Misach e̱chꞌo̱l chirilbal nak saꞌ junak tenamit yo̱k xba̱nunquil raylal reheb li nebaꞌ. Nabal raylal nequeꞌxba̱nu ut incꞌaꞌ nequeꞌrakoc a̱tin saꞌ ti̱quilal xban nak li cuan saꞌ xcuanquil taklanbil xban li nim xcuanquil chiru aꞌan. Ut li jun, li nim xcuanquil, taklanbil ajcuiꞌ xban jun chic kꞌaxal nim xcuanquil.

⁹ ¿Ma incꞌaꞌ ta biꞌ nacꞌanjelac re chixjunileb chixjunil li acui̱mk li na-el saꞌ li chꞌochꞌ? Li acui̱mk li na-el saꞌ li chꞌochꞌ nacꞌanjelac ajcuiꞌ re li rey.

¹⁰ Li ani cuan xtumin, toj naraj nabal xtzꞌakob. Ut li ani cuan nabal lix biomal, incꞌaꞌ natzꞌakloc re. Toj ta̱raj cuiꞌchic xtzꞌakob. Chixjunil aꞌin ma̱cꞌaꞌ na-oc cuiꞌ.

¹¹ Li ani cuan nabal cꞌaꞌru re, nabal ajcuiꞌ naxsach. ¿Cꞌaꞌru naxra nak cuan nabal cꞌaꞌru re? Ma̱cꞌaꞌ, xban nak yal naril nak na-osoꞌ chiru.

¹² Li ani nacꞌanjelac, sa nacuar, usta natzacan chi us usta incꞌaꞌ. Abanan li biom incꞌaꞌ nacuar chixcꞌoxlanquil li cꞌaꞌru cuan re.

¹³ Cuan jun chic li chꞌaꞌajquilal ninqꞌue retal arin saꞌ ruchichꞌochꞌ kꞌaxal ra rilbal. Aꞌan li xxocbal nabal li biomal yal re nak tixcꞌul chꞌaꞌajquilal mokon.

¹⁴ Cui incꞌaꞌ teꞌxnau rilbal lix biomal, ma̱re tixsach chixjunil chi ma̱cꞌaꞌ rajbal ut ma̱cꞌaꞌ chic ta̱cana̱k reheb li ralal xcꞌajol.

¹⁵ Nak nayoꞌla li cristian, tꞌustꞌu. Ma̱cꞌaꞌ cuan re. Joꞌcan ajcuiꞌ nak ta̱ca̱mk. Ma̱cꞌaꞌ naru tixcꞌam chirix. Incꞌaꞌ naru naxcꞌam li cꞌaꞌru re li ac xcꞌanjela.

¹⁶ Aꞌin chꞌaꞌaj xcꞌoxlanquil nak nayoꞌla li cristian ma̱cꞌaꞌ cuan re. Joꞌcan ajcuiꞌ nak nacam. Ma̱cꞌaꞌ naxcꞌam chirix. Riqꞌuin aꞌin nakaqꞌue retal nak ma̱cꞌaꞌ aj e nak naxcamsi rib chi cꞌanjelac.

¹⁷ Li ani naxnumsi lix yuꞌam chi ma̱cꞌaꞌ rajbal chanchan saꞌ kꞌojyi̱n cuan. Nabal li raylal xcꞌul ut nabal li chꞌaꞌajquilal ut yajel.

¹⁸ Riqꞌuin chixjunil aꞌin la̱in xinqꞌue retal nak li cꞌaꞌru us tixba̱nu li cui̱nk, aꞌan cuaꞌac ut ucꞌac ut xyalbal xsahil li quixcꞌanjela ru nak cuan arin saꞌ ruchichꞌochꞌ. Lix yuꞌam quiqꞌueheꞌ re xban li Dios. Tento ta̱cꞌanjelak xban nak ac tenebanbil saꞌ xbe̱n.

¹⁹ Cui li Dios naxqꞌue xbiomal li junju̱nk, naxqꞌue re nak ta̱ru̱k ta̱cuaꞌak ut ta̱ucꞌak ut tixyal xsahil lix cꞌanjel ut ta̱sahokꞌ saꞌ xchꞌo̱l nak yo̱ chi cꞌanjelac. Aꞌin aꞌan jun ma̱tan naxqꞌue li Dios.

²⁰ Li Dios naxqꞌue li sahil chꞌo̱lej re. Joꞌcan nak incꞌaꞌ nacꞌoxlac chirix li cꞌaꞌru naxcꞌul saꞌ lix yuꞌam saꞌ ruchichꞌochꞌ.