Eclesiastés 4 - Li Santil hu

¹ Ut quinqꞌue ajcuiꞌ retal chixjunil li ra xi̱cꞌ li nequeꞌxba̱nu saꞌ ruchichꞌochꞌ. Eb li rahobtesinbileb yo̱queb chi ya̱bac xban li raylal nequeꞌxcꞌul. Ut ma̱ ani nacꞌojoban xchꞌo̱leb. Eb li nequeꞌrahobtesin reheb cuanqueb xcuanquil saꞌ xbe̱neb. Ut ma̱ ani natenkꞌan reheb li yo̱queb chi cꞌuluc raylal.

² Joꞌcan nak quinye: —Us xak reheb li ac camenakeb. Eb aꞌan saheb saꞌ xchꞌo̱leb chiruheb li toj yoꞌyo̱queb saꞌ ruchichꞌochꞌ.—

³ Abanan kꞌaxal cuiꞌchic us chokꞌ reheb li toj ma̱jiꞌ nequeꞌyoꞌla, xban nak toj ma̱jiꞌ nequeꞌril li ma̱usilal li na-uxman saꞌ ruchichꞌochꞌ.

⁴ Ut quinqꞌue ajcuiꞌ retal nak li ani nacꞌanjelac chi cha̱bil ut chi cau, aꞌan nacakali̱c. Ut chixjunil aꞌin ma̱cꞌaꞌ na-oc cuiꞌ. Junes raylal naxqꞌue.

⁵ Li cui̱nk li ma̱cꞌaꞌ xnaꞌleb naxkꞌalu li rukꞌ saꞌ rochoch. Ma̱cꞌaꞌ cuan re xban nak incꞌaꞌ nacꞌanjelac.

⁶ Us nak naxba̱nu chi joꞌcan. Us nak kꞌalkꞌo rukꞌ saꞌ rochoch chiru nak tixcamsi rib chi cꞌanjelac chi ma̱cꞌaꞌ rajbal xban nak aꞌan junes raylal naxqꞌue.

⁷ Ut quinqꞌue ajcuiꞌ retal nak cuan cuiꞌchic cꞌaꞌak re ru na-uxman saꞌ ruchichꞌochꞌ li ma̱cꞌaꞌ na-oc cuiꞌ.

⁸ Junak cui̱nk ma̱ ani cuan re, ma̱cꞌaꞌ rami̱g, chi moco ralal xcꞌajol, chi moco cuan ras ut ri̱tzꞌin. Li cui̱nk aꞌan incꞌaꞌ nahilan chi cꞌanjelac chi moco nahilan chixcꞌoxlanquil lix biomal. Incꞌaꞌ naxcꞌoxla cꞌaꞌut nak naxcamsi rib chi cꞌanjelac chi moco naxcꞌoxla cꞌaꞌut nak incꞌaꞌ naxyal xsahil li cꞌaꞌru naxcꞌanjela. Joꞌcan nak ma̱cꞌaꞌ rajbal nak tixcamsi rib junak chi cꞌanjelac.

⁹ Kꞌaxal us nak teꞌcꞌanjelak cuib, chiru nak ta̱cꞌanjelak junak xjunes xban nak cui teꞌcꞌanjelak saꞌ cuibal us ta̱e̱lk lix cꞌanjeleb chiruheb.

¹⁰ Cui li jun ta̱tꞌanekꞌ, li jun chic tixtenkꞌa chi cuacli̱c. Ra chokꞌ re li nacuan xjunes xban nak cui ta̱tꞌanekꞌ, ma̱ ani ta̱tenkꞌa̱nk re chi cuacli̱c.

¹¹ Joꞌcan ajcuiꞌ cui cuanqueb cuib teꞌoc chi cua̱rc chi lakꞌlo, teꞌxkꞌixna rib saꞌ cuibal. Aban cui jun ajcuiꞌ ta̱oc chi cua̱rc xjunes, ¿chan ta cuiꞌ ru nak tixkꞌixna rib xjunes?

¹² Cui jun ajcuiꞌ ta̱pletik, naru teꞌnumta̱k saꞌ xbe̱n. Abanan cui cuibeb, naru teꞌxcuy xsumenquil. Joꞌcan ajcuiꞌ li cꞌa̱m li oxib ru naxcuy. Incꞌaꞌ natꞌupeꞌ saꞌ junpa̱t.

¹³ Kꞌaxal us junak al toj sa̱j cuan xnaꞌleb, usta nebaꞌ, chiru junak rey ac che̱c, ma̱cꞌaꞌ xnaꞌleb ut incꞌaꞌ naraj naqꞌueheꞌ xnaꞌleb.

¹⁴ Junak sa̱j al naru ta̱oc chokꞌ rey, usta saꞌ tzꞌalam ta̱e̱lk chak malaj ut saꞌ nebaꞌil.

¹⁵ Chixjunileb li tenamit teꞌoque̱nk chirix li sa̱j al li ta̱oc chokꞌ re̱kaj li rey.

¹⁶ Kꞌaxal cuiꞌchic nabaleb li tenamit li queꞌoquen chirix nak qui-oc chokꞌ rey. Abanan li tenamit li teꞌcua̱nk mokon incꞌaꞌ chic sahakeb xchꞌo̱l riqꞌuin. Joꞌcan ajcuiꞌ aꞌin ma̱cꞌaꞌ na-oc cuiꞌ. Junes raylal naxqꞌue.