Eclesiastés 3 - Li Santil huCuan li ho̱nal nak nacꞌulman chixjunil saꞌ ruchichꞌochꞌ 1 Cuan li ho̱nal nak nacꞌulman chixjunil li cꞌaꞌak re ru saꞌ li ruchichꞌochꞌ aꞌin. 2 Cuan li ho̱nal re li yoꞌla̱c ut cuan li ho̱nal re li ca̱mc. Cuan xkꞌehil li a̱uc, ut cuan ajcuiꞌ xcutanquil lix michꞌbal li aubil. 3 Cuan li ho̱nal re camsi̱nc ut cuan li ho̱nal re banoc. Cuan xcutanquil li sachoc, ut cuan ajcuiꞌ xcutanquil xcuaclesinquil cuiꞌchic li ac tꞌanenak. 4 Cuan li ho̱nal re ya̱bac, ut cuan li ho̱nal re seꞌec. Cuan li ho̱nal re rahil chꞌo̱lej, ut cuan xcutanquil li ninkꞌei̱c. 5 Cuan xcutanquil li paji̱nc pec, ut cuan xcutanquil re xchꞌutubanquil li pec. Cuan li ho̱nal nak naru tixkꞌalu rib li junju̱nk, ut cuan ajcuiꞌ li ho̱nal nak incꞌaꞌ naru naxkꞌalu rib li junju̱nk. 6 Cuan xcutanquil li sicꞌoc, ut cuan li ho̱nal re sachoc. Cuan li ho̱nal re xococ, ut cuan li ho̱nal re tzꞌekoc. 7 Cuan li ho̱nal re pejoc tꞌicr, ut cuan li ho̱nal re xiti̱nc. Cuan li ho̱nal re a̱tinac, ut cuan li ho̱nal nak incꞌaꞌ naru a̱tinac. 8 Cuan li ho̱nal re rahoc, ut cuan li ho̱nal re tzꞌekta̱na̱nc. Cuan xcutanquil li pletic riqꞌuin junak tenamit, ut cuan xcutanquil li cua̱nc saꞌ usilal riqꞌuin junak tenamit. 9 ¿Ma cuan ta biꞌ cꞌaꞌru naxra li cui̱nk nak naxcamsi rib chi cꞌanjelac? 10 La̱in xinqꞌue retal nak kꞌaxal cau li cꞌanjel li quixqꞌue li Dios saꞌ xbe̱neb li cui̱nk re teꞌxba̱nu. 11 Li Dios naxyi̱b chixjunil chi cha̱bil saꞌ xkꞌehil joꞌ naraj aꞌan. Xqꞌue saꞌ li kachꞌo̱l xra̱bal ru xnaubal li cꞌaꞌru ta̱cꞌulma̱nk. Abanan incꞌaꞌ nakatau ru chixjunil li cꞌaꞌru quixba̱nu chak li Dios saꞌ xticlajic toj chalen saꞌ rosoꞌjic. 12 La̱in ninnau nak li cꞌaꞌru us tixba̱nu li cui̱nk, aꞌan nak ta̱sahokꞌ saꞌ xchꞌo̱l ut tixba̱nu li us nak toj cua̱nk saꞌ ruchichꞌochꞌ. 13 Ut ninnau ajcuiꞌ nak yal kama̱tan xban li Dios nak nococuaꞌac ut noco-ucꞌac ut nakayal xsahil li cꞌaꞌru nakacꞌanjela. 14 Ut ninqꞌue ajcuiꞌ retal nak chixjunil li naxba̱nu li Dios ta̱cua̱nk chi junelic. Chixjunil li cꞌaꞌru quixba̱nu incꞌaꞌ naru xqꞌuebal xtzꞌakob chi moco naru xjepbal. Li Dios quixba̱nu chi joꞌcaꞌin re nak chixjunileb teꞌxxucua ru. 15 Ma̱cꞌaꞌ ta̱cꞌulma̱nk chi incꞌaꞌ ta ac xcꞌulman junxil. Ma̱cꞌaꞌ cꞌaꞌru cuan chi incꞌaꞌ ta ac cuan ajcuiꞌ chak junxil. Li Dios naba̱nun re, nak nacꞌulman chi joꞌcaꞌin. Saꞌ ruchichꞌochꞌ ma̱ ani naxba̱nu saꞌ ti̱quilal li cꞌaꞌak re ru 16 La̱in ninqꞌue retal nak saꞌ ruchichꞌochꞌ junes raylal ut ma̱usilal nequeꞌxba̱nu saꞌ eb li naꞌajej li nequeꞌrakoc cuiꞌ a̱tin. Aran raj nequeꞌrakoc a̱tin saꞌ ti̱quilal. 17 Joꞌcan nak quinye saꞌ inchꞌo̱l: —Li ani ti̱c xchꞌo̱l ta̱rakekꞌ a̱tin saꞌ xbe̱n xban li Dios, ut ta̱rakekꞌ ajcuiꞌ a̱tin saꞌ xbe̱n li naxba̱nu ma̱usilal xban nak ac xakabanbil li ho̱nal aꞌan xban li Dios nak ta̱rakekꞌ a̱tin saꞌ kabe̱n riqꞌuin li cꞌaꞌru nakaba̱nu ut riqꞌuin li cꞌaꞌru nakacꞌul.— 18 Quinye ajcuiꞌ saꞌ inchꞌo̱l: —Li Dios yo̱ chixba̱nunquil reheb chi joꞌcan yal re xyalbal rixeb ut re ajcuiꞌ xcꞌutbal chiruheb nak chanchaneb li xul.— 19 Relic chi ya̱l nak eb li cui̱nk ut eb li xul juntakꞌe̱t nequeꞌxcꞌul. Li xul nacam. Joꞌcaneb ajcuiꞌ eb li cristian nequeꞌcam. Junaj ajcuiꞌ li ikꞌ naxmusikꞌa li xul riqꞌuineb li cristian. Moco kꞌaxal ta us li cui̱nk chiru li xul xban nak chixjunil li cuan saꞌ ruchichꞌochꞌ ma̱cꞌaꞌ na-oc cuiꞌ. 20 Nak nequeꞌcam li xul nequeꞌsukꞌi chꞌochꞌ. Joꞌcan ajcuiꞌ li cristian. Nak nequeꞌcam nequeꞌsukꞌi chꞌochꞌ. Chꞌochꞌ oquenakeb ut nak teꞌca̱mk, nequeꞌsukꞌi cuiꞌchic chꞌochꞌ. 21 ¿Ma cuan ta biꞌ junak nanaꞌoc re chi tzꞌakal nak lix musikꞌeb li cristian nequeꞌxic saꞌ choxa ut lix musikꞌ li xul nequeꞌosoꞌ rubel chꞌochꞌ? 22 Riqꞌuin aꞌin ninqꞌue retal nak li us tixba̱nu li cui̱nk, aꞌan nak ta̱sahokꞌ saꞌ xchꞌo̱l riqꞌuin lix cꞌanjel xban nak aꞌan li tento tixba̱nu. Ut ma̱ ani ta̱ru̱k ta̱cꞌamok chak re chi rilbal li cꞌaꞌru ta̱cꞌulma̱nk mokon xban nak ac camenak chic. |
© 2019, Wycliffe Bible Translators. All rights reserved.
Wycliffe Bible Translators, Inc.