Eclesiastés 2 - Li Santil hu

Ma̱cꞌaꞌ na-oc cuiꞌ xsicꞌbal nabal sahil chꞌo̱lej saꞌ ruchichꞌochꞌ

¹ Ut quinye cuiꞌchic saꞌ inchꞌo̱l: —Tinyal xba̱nunquil li cꞌaꞌak re ru re ta̱sahokꞌ saꞌ inchꞌo̱l ut tincua̱nk chi ma̱cꞌaꞌ tincꞌoxla, chanquin. Abanan xinqꞌue ajcuiꞌ retal nak aꞌan ma̱cꞌaꞌ na-oc cuiꞌ.

² Joꞌcan nak quinqꞌue retal nak li seꞌec, aꞌan yal to̱ntil naꞌleb. Ut li sahil chꞌo̱lej saꞌ ruchichꞌochꞌ ma̱cꞌaꞌ na-oc cuiꞌ.

³ Xban nak junes xsicꞌbal innaꞌleb yo̱quin, quincꞌoxla nak tintau xsahil inchꞌo̱l riqꞌuin li cala̱c. Joꞌcan nak quin-oc chi ucꞌac re rilbal ma aꞌan li us tixba̱nu li cui̱nk joꞌ najtil ta̱cua̱nk saꞌ ruchichꞌochꞌ.

⁴ Nabal li cꞌanjel quinba̱nu. Nabaleb li cab quinyi̱b chokꞌ cue. Ut quicuau ajcuiꞌ li uvas.

⁵ Ut quinyi̱b ajcuiꞌ xnaꞌajeb li cuacui̱mk ut quicuau nabal pa̱y ru li cheꞌ li nau̱chin. Ut quinyi̱b ajcuiꞌ xnaꞌaj li cuutzꞌuꞌuj ut quicuau li utzꞌuꞌuj aran.

⁶ Ut quinyi̱b ajcuiꞌ nabal xnaꞌajeb li haꞌ re xtꞌakresinquil li acui̱mk li quicuau.

⁷ Nabaleb inlokꞌbil mo̱s joꞌ cui̱nk joꞌ ixk, ut cuanqueb ajcuiꞌ inmo̱s queꞌyoꞌla saꞌ li cuochoch. Queꞌcuan nabal incuacax ut nabaleb lin carner. La̱in li nabal cꞌaꞌru cue chiruheb li rey li queꞌcuan Jerusalén xbe̱n cua chicuu la̱in.

⁸ Quinchꞌutub li plata ut li oro li queꞌxqꞌue cue li rey ut li jalan xtenamiteb. Nabaleb laj bichanel li nequeꞌqꞌuehoc xsahil inchꞌo̱l, joꞌ cui̱nk joꞌ ixk. Ut nabal pa̱y ru li cuajb li nequeꞌxchꞌeꞌ re xqꞌuebal xsahil inchꞌo̱l. Ut nabaleb ajcuiꞌ li ixk queꞌcuan cuiqꞌuin re xqꞌuebal xsahil inchꞌo̱l.

⁹ La̱in li rey li kꞌaxal nim incuanquil chiruheb chixjunileb li rey li queꞌcuan Jerusalén. Usta kꞌaxal nim incuanquil, abanan incꞌaꞌ quintzꞌekta̱na lin naꞌleb.

¹⁰ Chixjunil li sahil chꞌo̱lej li quicuaj, quinba̱nu. Ma̱ jun sut incꞌaꞌ ta quinba̱nu li cꞌaꞌru quinrahi ru. Ut quisahoꞌ saꞌ inchꞌo̱l riqꞌuin lin cꞌanjel li quinba̱nu. Li sahil chꞌo̱lej quincꞌul, aꞌan re̱kaj li cꞌanjel quinba̱nu.

¹¹ Nak quin-oc chi cꞌoxlac chirix li cꞌanjel li quinba̱nu, quinqꞌue retal nak ma̱cꞌaꞌ na-oc cuiꞌ li cꞌanjel li quinba̱nu. Caꞌaj cuiꞌ raylal naxqꞌue. Riqꞌuin aꞌin nacꞌutun nak ma̱cꞌaꞌ xinra chirix li cꞌanjel li xinba̱nu saꞌ ruchichꞌochꞌ.

¹² Chirix aꞌin quin-oc chi cꞌoxlac chirix li naꞌleb li cha̱bil ut chirix li naꞌleb li incꞌaꞌ us, li ma̱cꞌaꞌ na-oc cuiꞌ. ¿Cꞌaꞌru tixba̱nu li rey li ta̱oc nak ma̱ anihakin chic la̱in? Ma̱cꞌaꞌ. Tixba̱nu joꞌ xinba̱nu la̱in.

¹³ La̱in xinqꞌue retal nak kꞌaxal us li cha̱bil naꞌleb chiru li naꞌleb ma̱cꞌaꞌ na-oc cuiꞌ, joꞌ li cutan kꞌaxal us chiru li kꞌojyi̱n.

¹⁴ Li ani cuan xnaꞌleb naxnau cꞌaꞌru ta̱cha̱lk saꞌ xbe̱n. Ut li ma̱cꞌaꞌ xnaꞌleb incꞌaꞌ naxnau cꞌaꞌru ta̱cha̱lk saꞌ xbe̱n. Abanan juntakꞌe̱t tixcꞌul li cuan xnaꞌleb riqꞌuin li ma̱cꞌaꞌ xnaꞌleb.

¹⁵ Ut quinye saꞌ inchꞌo̱l: —Cui la̱in li cuan innaꞌleb tincꞌul joꞌ tixcꞌul li ma̱cꞌaꞌ xnaꞌleb, ¿cꞌaꞌ ta cuiꞌ ru aj e nak cuan innaꞌleb?— Joꞌcan nak quinye nak chixjunil li cꞌaꞌru nakaba̱nu ma̱cꞌaꞌ na-oc cuiꞌ.

¹⁶ Nak telajeꞌnumekꞌ li cutan ma̱ ani chic ta̱cꞌoxla̱nk re li cuan xnaꞌleb joꞌ ajcuiꞌ li ma̱cꞌaꞌ xnaꞌleb. Ta̱sachk ban saꞌ xchꞌo̱leb chi junaj cua. Ta̱ca̱mk li cuan xnaꞌleb ut ta̱ca̱mk ajcuiꞌ li ma̱cꞌaꞌ xnaꞌleb.

Ma̱cꞌaꞌ na-oc cuiꞌ cui li junju̱nk naxcamsi rib chi cꞌanjelac

¹⁷ Joꞌcan nak xicꞌ chic nacuil lin yuꞌam arin saꞌ ruchichꞌochꞌ xban nak chixjunil li na-uxman arin saꞌ ruchichꞌochꞌ junes chꞌaꞌajquilal naxqꞌue saꞌ inbe̱n. Chixjunil li na-uxman, ma̱cꞌaꞌ na-oc cuiꞌ. Junes raylal naxqꞌue.

¹⁸ Ut xicꞌ ajcuiꞌ quicuil li cꞌanjel li quinba̱nu saꞌ ruchichꞌochꞌ xban nak quinnau nak ta̱cana̱k chokꞌ re li ta̱oc chokꞌ cue̱kaj.

¹⁹ Ma̱ ani nanaꞌoc re ma cuan xnaꞌleb malaj ut ma̱cꞌaꞌ li ta̱oc chokꞌ cue̱kaj. Incꞌaꞌ ninnau ma cuan xnaꞌleb li ta̱e̱chani̱nk re li cꞌaꞌru cue li xinqꞌue inchꞌo̱l xcꞌanjelanquil riqꞌuin lin naꞌleb. Joꞌcan nak chixjunil li cꞌaꞌru xinba̱nu, ma̱cꞌaꞌ na-oc cuiꞌ.

²⁰ Ra raj chic quicuecꞌa nak quinqꞌue retal nak cau quincꞌanjelac saꞌ ruchichꞌochꞌ chi ma̱cꞌaꞌ rajbal.

²¹ Joꞌcaꞌin li cꞌanjelac saꞌ ruchichꞌochꞌ. Li cui̱nk nacꞌanjelac chi cau ut cuan xnaꞌleb chixcꞌoxlanquil chanru tixba̱nu. Abanan, nak nacam naxcanab chixjunil li quixba̱nu chokꞌ re jalan li moco xcꞌulub ta xcꞌulbal xban nak incꞌaꞌ xcꞌanjela rix. Joꞌcan nak li cꞌanjel li naxba̱nu nacana chi ma̱cꞌaꞌ rajbal.

²² Riqꞌuin aꞌin nacꞌutun nak li cui̱nk ma̱cꞌaꞌ naxra nak naxcamsi rib chi cꞌanjelac saꞌ ruchichꞌochꞌ.

²³ Nak li cui̱nk cuan saꞌ ruchichꞌochꞌ junes raylal naxcꞌul ut junes chꞌaꞌajquilal. Incꞌaꞌ nahilan chiru kꞌojyi̱n xban li cꞌoxlac. Chixjunil aꞌin ma̱cꞌaꞌ na-oc cuiꞌ.

²⁴ Li cꞌaꞌru us tixba̱nu li cui̱nk, aꞌan cuaꞌac ut ucꞌac ut xyalbal xsahil li cꞌaꞌru tixcꞌanjela. Ut la̱in xinqꞌue retal nak chixjunil li cꞌaꞌru cuan ke li Dios naqꞌuehoc re.

²⁵ ¿Ani ta biꞌ ta̱ru̱k ta̱cuaꞌak ut ta̱sahokꞌ saꞌ xchꞌo̱l cui ta li Dios incꞌaꞌ tixqꞌue li cꞌaꞌru re?

²⁶ Li Dios naxqꞌue xnaꞌleb li ani nacuan saꞌ ti̱quilal ut naxqꞌue xsahil xchꞌo̱l ut naxtenkꞌa re nak tixtau ru lix ya̱lal. Abanan laj ma̱c naxcanab chi cꞌanjelac chi cau re nak tixxoc nabal li cꞌaꞌru re, ut ta̱qꞌuehekꞌ re jalan li cuan saꞌ ti̱quilal chiru li Dios. Joꞌcan ajcuiꞌ aꞌin, ma̱cꞌaꞌ na-oc cuiꞌ. Junes raylal naxqꞌue.