Eclesiastés 12 - Li Santil hu

¹ Nak toj cuancat saꞌ la̱ sa̱jilal, chijulticokꞌ a̱cue li Dios li quiyoꞌobtesin a̱cue. Chijulticokꞌ a̱cue li Dios nak toj ma̱jiꞌ nacuulac li cutan nak cuan nabal li chꞌaꞌajquilal ut nak ma̱jiꞌ nacuulac li chihab nak ta̱ye: —Ma̱cꞌaꞌ chic nasahoꞌ cuiꞌ inchꞌo̱l.—

² Chaba̱nuhak anakcuan nak toj nacꞌutun li sakꞌe chi cutan, li po ut li chahim chiru kꞌojyi̱n, ut nak toj ma̱jiꞌ namoy ru li cutan xban li chok.

³ Ta̱cuulak xkꞌehil nak chixjunileb sicsotkeb xbaneb xti̱xil, ut eb li cui̱nk li cauheb rib, cꞌutzcꞌu̱keb aj chic rixeb. Ut ma̱cꞌaꞌak chic ruch reheb xban nak ac ti̱xeb chic. Ut eb li nequeꞌiloc saꞌ ventana incꞌaꞌ chic teꞌru̱k teꞌilok xban nak ac xmoy li xnakꞌ ruheb.

⁴ Nak ac ti̱xakat chic, incꞌaꞌ chic tat-abi̱nk ut incꞌaꞌ chic tatru̱k chi cuaꞌac xban nak ma̱cꞌaꞌak chic ruch a̱cue. Ut incꞌaꞌ chic sa tatcua̱rk. Toj ekꞌela tatcuacli̱k nak ta̱ya̱bak laj tzoꞌ xul. Ut incꞌaꞌ chic tatru̱k chi bicha̱nc.

⁵ Tatxucuak chi cubec saꞌ junak naꞌajej najt xteram. Yo̱k a̱xiu nak tatbe̱k ut sakak chic la̱ cuismal, chanchanak xsakal li ratzꞌum li almendro. Incꞌaꞌ chic ta̱cuy xban nak ti̱xakat chic chi us. Incꞌaꞌ chic tatcuaꞌak ut ma̱cꞌaꞌ chic ta̱ra ru. Chi se̱b tatca̱mk ut tatxic chi hila̱nc saꞌ la̱ naꞌaj chi junaj cua. Ut nak eb laj mukunel yo̱keb chi xic cha̱mukbal, yo̱keb chi ya̱bac xban nak ac xatcam.

⁶ Nak toj yoꞌyo̱cat saꞌ ruchichꞌochꞌ, chijulticokꞌ a̱cue li Dios li quiyoꞌobtesin a̱cue xban nak ta̱cuulak xkꞌehil nak tatca̱mk joꞌ nak natꞌupeꞌ junak cadena plata. Nak tatca̱mk chanchan nak najoreꞌ li ucꞌal oro. Ut chanchan nak najoreꞌ li cuc chire li yuꞌam haꞌ ut chanchan nak natokeꞌ li sursu̱quil cheꞌ li naquelon chak re li haꞌ chi saꞌ li becbil jul.

⁷ Nak tatca̱mk, tatsukꞌi̱k cuiꞌchic chꞌochꞌ xban nak chꞌochꞌ oquenakat. Ut la̱ musikꞌ ta̱xic cuiꞌchic riqꞌuin li Dios xban nak aꞌan quiqꞌuehoc la̱ musikꞌ.

⁸ La̱in, li ninnau a̱tinac chi cha̱bil, ninye nak lix naꞌleb li ruchichꞌochꞌ ma̱cꞌaꞌ na-oc cuiꞌ. Chixjunil ma̱cꞌaꞌ na-oc cuiꞌ.

Li cui̱nk li naxnau a̱tinac chi cha̱bil quixrak li ra̱tin riqꞌuineb li a̱tin aꞌin

⁹ La̱in ninnau a̱tinac chi cha̱bil ut cuan innaꞌleb. Quintzol cuib chi us ut quintzꞌil rix li naꞌleb. Ut quinqꞌueheb ajcuiꞌ xnaꞌleb li tenamit ut quinye saꞌ xxiqueb re nak teꞌxtau xya̱lal. Ut nabal li proverbios quintzꞌi̱ba.

¹⁰ Quinqꞌue inchꞌo̱l chixsicꞌbal ruheb li a̱tin re nak tintzꞌi̱ba li naꞌleb aꞌin chi tzꞌakal re ru riqꞌuin cha̱bil a̱tin.

¹¹ Li naꞌleb li nequeꞌxye li cuanqueb xnaꞌleb nacꞌanjelac chiku joꞌ nak nacꞌanjelac li kꞌes ruꞌuj cheꞌ re xberesinquil li bo̱yx. Li cha̱bil naꞌleb qꞌuebil ke xban li tzꞌakal Pastor li na-iloc ke. Nacana saꞌ kachꞌo̱l. Chanchan li claux li natꞌojeꞌ saꞌ li cheꞌ.

¹² Qꞌuehomak retal. Nabal li naꞌleb cuan saꞌ ruchichꞌochꞌ. Moco narakeꞌ ta xtzꞌi̱banquil. Abanan ma̱cꞌaꞌ rajbal xtzolbal chixjunil li cꞌaꞌak re ru aꞌan. Li tzoloc chi nabal, aꞌan nalubtesin.

¹³ Riqꞌuin li a̱tin aꞌin tinrak li a̱tinac saꞌ li hu aꞌin: nak chexucua̱k ru li Dios ut cheba̱nuhak li cꞌaꞌru naxye saꞌ lix chakꞌrab xban nak aꞌin li kꞌaxal tento xba̱nunquil.

¹⁴ Li Dios ta̱rakok a̱tin saꞌ kabe̱n riqꞌuin chixjunil li cꞌaꞌru nakaba̱nu, usta chi mukmu nakaba̱nu. Ta̱rakok a̱tin saꞌ kabe̱n riqꞌuin chixjunil li nakaba̱nu, usta us, usta incꞌaꞌ us.