Eclesiastés 11 - Li Santil hu

¹ Ma̱ra li cꞌaꞌru a̱cue. Chatsihi̱nk ban. Ut saꞌ jun cutan ta̱cꞌul re̱kaj.

² Ta̱jecꞌ li cꞌaꞌru cuan a̱cue reheb li ma̱cꞌaꞌ cuan reheb, xban nak incꞌaꞌ nacanau jokꞌe ta̱cha̱lk raylal saꞌ a̱be̱n la̱at nak cuancat saꞌ ruchichꞌochꞌ.

³ La̱o incꞌaꞌ nakanau cꞌaꞌru ta̱cꞌulma̱nk. Cui nachal li chok rochben li hab saꞌ ruchichꞌochꞌ, naru nachal. Cui li cheꞌ ta̱tꞌanekꞌ saꞌ li norte, naru natꞌaneꞌ aran. Ut cui natꞌaneꞌ saꞌ li sur, tꞌanekꞌ aran. Li naꞌajej li ta̱tꞌanekꞌ cuiꞌ, aran ta̱cana̱k.

⁴ Li ani yo̱k xcꞌaꞌux chirix li ikꞌ incꞌaꞌ ta̱a̱uk. Ut li ani yo̱k xcꞌaꞌux chirix li chok incꞌaꞌ ta̱kꞌolok.

⁵ La̱at incꞌaꞌ nacanau bar naxic li ikꞌ. Ut incꞌaꞌ ajcuiꞌ nacanau chanru nak naqꞌui li cꞌulaꞌal li toj ma̱jiꞌ nayoꞌla. Joꞌcan ajcuiꞌ nak incꞌaꞌ nacanau cꞌaꞌru naxba̱nu li Dios li quiyi̱ban re chixjunil li cꞌaꞌak re ru.

⁶ Nak tat-a̱uk, ta̱cuau la̱ cuiyaj ekꞌela ut ta̱cuau cuiꞌchic ecuu xban nak incꞌaꞌ nacanau bar cuan li ta̱e̱lk chi us, ma li ta̱cuau xbe̱n cua, malaj ut li ta̱cuau mokon, malaj ut juntakꞌe̱t ta̱e̱lk.

⁷ Relic chi ya̱l nak kꞌaxal us nak yoꞌyo̱ko saꞌ ruchichꞌochꞌ ut yo̱ko chirilbal li cutan.

⁸ Abanan, usta nabal chihab tocua̱nk saꞌ ruchichꞌochꞌ ut yo̱ko xyalbal xsahil li cꞌaꞌru ke, tento nak takaqꞌue retal nak ta̱cuulak xkꞌehil nak toca̱mk chi junaj cua ut incꞌaꞌ chic tocua̱nk saꞌ ruchichꞌochꞌ. Chixjunil li ta̱cha̱lk chiku mokon, ma̱cꞌaꞌ na-oc cuiꞌ.

Li naꞌleb aꞌin us chokꞌ reheb li toj sa̱jeb

⁹ La̱ex, li toj sa̱jex, cheyalak xsahil le̱ sa̱jilal. Cheba̱nuhak li cꞌaꞌru te̱ra ru ut li cꞌaꞌru nacuulac che̱ru. Abanan, tento nak te̱qꞌue retal nak saꞌ jun cutan ta̱rakok a̱tin li Dios saꞌ e̱be̱n.

¹⁰ Checanabak xcꞌoxlanquil li cꞌaꞌak re ru nachꞌiꞌchꞌiꞌin e̱re joꞌ ajcuiꞌ li chꞌaꞌajquilal. Chenauhak nak incꞌaꞌ najt texcua̱nk saꞌ le̱ sa̱jilal. Joꞌcan nak ma̱cꞌaꞌ na-oc cuiꞌ li cꞌaꞌru te̱ba̱nu.