Eclesiastés 10 - Li Santil hu

¹ Li camenak raxya̱t naxpoꞌ li sununquil ban ut nachuhoꞌ. Joꞌcan ajcuiꞌ li to̱ntil naꞌleb naru tixpoꞌ ru li naꞌleb li kꞌaxal lokꞌ.

² Li ani cuan xnaꞌleb junelic nacuulac chiru xba̱nunquil li us. Abanan li ani ma̱cꞌaꞌ xnaꞌleb caꞌaj cuiꞌ li incꞌaꞌ us nacuulac chiru xba̱nunquil.

³ Li ani ma̱cꞌaꞌ xnaꞌleb riqꞌuin li cꞌaꞌru naxba̱nu nacꞌutun nak ma̱cꞌaꞌ xnaꞌleb usta yo̱k chixyebal nak eb li jun chꞌol chic ma̱cꞌaꞌeb xnaꞌleb.

⁴ Cui li cuan xcuanquil ta̱joskꞌokꞌ cha̱cuu, incꞌaꞌ ta̱sume ru, xban nak naru nequeyi̱b ru li chꞌaꞌajquilal saꞌ xya̱lal.

⁵ Cuan jun li chꞌaꞌajquilal ninqꞌue retal saꞌ ruchichꞌochꞌ li nequeꞌxba̱nu li cuanqueb saꞌ xcuanquil.

⁶ Li ma̱cꞌaꞌeb xnaꞌleb nequeꞌqꞌueheꞌ xcꞌanjel cha̱bil ut li cuanqueb xnaꞌleb incꞌaꞌ cha̱bil li cꞌanjel nequeꞌqꞌueheꞌ reheb.

⁷ Ut quinqꞌue ajcuiꞌ retal nak aꞌ chic li lokꞌbil mo̱s nequeꞌbe̱c chirix cacua̱y ut eb li cuanqueb xcuanquil nequeꞌbe̱c chi rok. Chanchaneb chic li lokꞌbil mo̱s.

⁸ Li ani naxbec junak jul re ta̱tꞌanekꞌ jalan, aꞌan ajcuiꞌ li ta̱tꞌanekꞌ chi saꞌ. Li ani tixjor li tzꞌac li sutsu cuiꞌ li tenamit ta̱tiꞌekꞌ xban cꞌantiꞌ.

⁹ Li ani najoroc pec naru naxtochꞌ rib riqꞌuin li pec. Ut li ani najoroc siꞌ naru naxyocꞌ rib.

¹⁰ Cui li ma̱l na-el li xkꞌesnal re, ut cui incꞌaꞌ ta̱qꞌue xkꞌesnal, tento nak tatyocꞌok chi cau. Joꞌcan nak kꞌaxal us nak cua̱nk a̱naꞌleb chixcꞌoxlanquil chanru ta̱ba̱nu re nak ta̱ba̱nu chi us li cꞌaꞌak re ru.

¹¹ ¿Cꞌaꞌ ta cuiꞌ ru aj e nak junak tixnau xtu̱lanobresinquil li cꞌantiꞌ cui ta̱tiꞌekꞌ xban, nak toj ma̱jiꞌ naxtu̱lanobresi?

Kꞌaxal lokꞌ nak cua̱nk xnaꞌleb li junju̱nk chiru nak ma̱cꞌaꞌak xnaꞌleb

¹² Li a̱tin li naxye li cuan xnaꞌleb nasukꞌi usilal chokꞌ re. Abanan li cꞌaꞌru naxye li ma̱cꞌaꞌ xnaꞌleb, aꞌan ajcuiꞌ nasachoc re.

¹³ Li cui̱nk li ma̱cꞌaꞌ xnaꞌleb naxtiquib a̱tinac riqꞌuin to̱ntil naꞌleb. Ut nak narakeꞌ chi a̱tinac, kꞌaxal cuiꞌchic yibru li naxye.

¹⁴ Li ma̱cꞌaꞌ xnaꞌleb cꞌajoꞌ nacuulac chiru a̱tinac. Abanan ¿ma ta̱ru̱k ta biꞌ tixye cꞌaꞌru ta̱cꞌulma̱nk? Incꞌaꞌ, xban nak ma̱ ani nanaꞌoc re cꞌaꞌru ta̱cꞌulma̱nk mokon nak ma̱ anihak chic aꞌan.

¹⁵ Li ani ma̱cꞌaꞌ xnaꞌleb naxcamsi rib chi cꞌanjelac chi ma̱cꞌaꞌ aj e ut incꞌaꞌ naxnau bar ta̱xic mokon.

¹⁶ Tokꞌob ru li tenamit li cuan xrey toj sa̱j, xban nak toj ma̱cꞌaꞌ xnaꞌleb. Ut li nequeꞌtenkꞌan re li rey junes ninkꞌei̱c nequeꞌxcꞌoxla.

¹⁷ Abanan us xak re li tenamit li cuan jun xrey cuan xnaꞌleb ut cha̱bil. Ut eb li nequeꞌtenkꞌan re nequeꞌcuaꞌac saꞌ x-o̱ril re xqꞌuebal re̱kaj lix metzꞌe̱uheb. Ut ma̱cuaꞌ cala̱c nequeꞌxcꞌoxla.

¹⁸ Li ani incꞌaꞌ nacuulac chiru cꞌanjelac, natꞌaneꞌ li rochoch saꞌ xbe̱n. Ut xban nak incꞌaꞌ naraj cꞌanjelac, na-oquesin li rochoch.

¹⁹ Li ninkꞌe naqꞌuehoc sahil chꞌo̱lej. Ut li vino naxqꞌue ajcuiꞌ xsahil xchꞌo̱leb li cuanqueb saꞌ ruchichꞌochꞌ. Abanan li tumin, aꞌan li naxba̱nu chixjunil aꞌin.

²⁰ Ma̱cuechꞌ rix li rey chi moco riqꞌuin la̱ cꞌaꞌux. Ut incꞌaꞌ tat-a̱tinak chirix li biom usta a̱junes cua̱nkat saꞌ la̱ cuochoch, xban nak cuanqueb cocꞌ xul nequeꞌrupupic. Ma̱re teꞌxye chak re li cꞌaꞌru ta̱ye.