Eclesiastés 1 - Li Santil hu

Chixjunil li cꞌaꞌru cuan saꞌ ruchichꞌochꞌ ma̱cꞌaꞌ na-oc cuiꞌ

¹ Aꞌan aꞌin ra̱tin jun li cui̱nk naxnau a̱tinac chi us. Li cui̱nk aꞌan, aꞌan li ralal laj David, li quicuan chokꞌ rey aran Jerusalén.

² Aꞌin li quixye chirix li cꞌaꞌru cuan saꞌ ruchichꞌochꞌ: Chixjunil li cꞌaꞌak re ru cuan saꞌ ruchichꞌochꞌ, ma̱cꞌaꞌ na-oc cuiꞌ. Chixjunil li cꞌaꞌru nakacꞌoxla xba̱nunquil, ma̱cꞌaꞌ rajbal.

³ ¿Cꞌaꞌru tixra li cui̱nk nak tixcamsi rib chi trabajic rajlal cutan?

⁴ Cuan li toj yo̱queb chi yoꞌla̱c ut cuan yo̱queb chi ca̱mc. Abanan li ruchichꞌochꞌ incꞌaꞌ najala.

⁵ Rajlal ekꞌela na-el li sakꞌe ut rajlal ecuu na-oc cuiꞌchic re nak naru ta̱e̱lk cuiꞌchic cuulaj. Junelic joꞌcan naxba̱nu.

⁶ Joꞌcan ajcuiꞌ li ikꞌ. Nanumeꞌ saꞌ li sur ut nanumeꞌ ajcuiꞌ saꞌ li norte. Li bar ac xnumeꞌ cuiꞌ, nanumeꞌ cuiꞌchic. Ut joꞌcan rajlal naxba̱nu.

⁷ Ut eb li nimaꞌ nequeꞌbe̱c rok ut nequeꞌxic saꞌ li palau. Abanan li palau incꞌaꞌ nanujac xbaneb. Li bar nequeꞌnumeꞌ cuiꞌ rajlal, aran cuiꞌchic nequeꞌnumeꞌ li haꞌ.

⁸ Nocolub riqꞌuin chixjunil li cꞌaꞌak re ru aꞌin, ut ma̱ ani nequeꞌru xyebal chanru nak nequeꞌtitzꞌ xban. Usta nabal nequeꞌrabi ut usta nabal nequeꞌril, abanan incꞌaꞌ nequeꞌcꞌojla xchꞌo̱leb.

⁹ ¿Ma cuan ta biꞌ cꞌaꞌak re ru toj acꞌ saꞌ ruchichꞌochꞌ anakcuan? Ma̱cꞌaꞌ. Chixjunil li cꞌaꞌru cuan anakcuan, ac cuan ajcuiꞌ chak junxil. Ma̱cꞌaꞌ cꞌaꞌru toj xyi̱baman anakcuan xban nak ac yi̱banbil chak junxil.

¹⁰ ¿Ma cuan ta biꞌ junak naru tixye, “Aꞌin toj acꞌ?” Incꞌaꞌ naru naxye chi joꞌcan xban nak chixjunil li cꞌaꞌru cuan anakcuan, ac cuan ajcuiꞌ chak junxil chiku la̱o.

¹¹ Chixjunil li cꞌaꞌak re ru ac xnumeꞌ, ac xsach saꞌ xchꞌo̱leb. Joꞌcan ajcuiꞌ chixjunil li cꞌaꞌru talajcha̱lk mokon, ta̱sachk ajcuiꞌ saꞌ xchꞌo̱leb.

Ma̱cꞌaꞌ na-oc cuiꞌ xsicꞌbal nabal li naꞌleb

¹² La̱in li ninnau a̱tinac chi cha̱bil. La̱in quincuan chokꞌ xreyeb laj Israel aran Jerusalén.

¹³ Xban nak cuan innaꞌleb la̱in, quinqꞌue inchꞌo̱l chixtzolbal ut chixsiqꞌuinquil xya̱lal chixjunil li cꞌaꞌru nacꞌulman saꞌ ruchichꞌochꞌ. Kꞌaxal cau li i̱k quixqꞌue li Dios saꞌ xbe̱neb li cui̱nk re teꞌxba̱nu.

¹⁴ Riqꞌuin aꞌin quinqꞌue retal nak chixjunil li na-uxman saꞌ ruchichꞌochꞌ, ma̱cꞌaꞌ na-oc cuiꞌ. Junes rahil chꞌo̱lej naxqꞌue.

¹⁵ Chanchan junak li cꞌaꞌru yocos rix incꞌaꞌ naru xti̱cobresinquil rix. Malaj ut joꞌ junak li cꞌaꞌak re ru incꞌaꞌ tzꞌakal re ru incꞌaꞌ naru xqꞌuebal saꞌ ajl.

¹⁶ La̱in quinye saꞌ inchꞌo̱l nak kꞌaxal nim incuanquil ut kꞌaxal cuan innaꞌleb chiruheb li queꞌcuan chokꞌ rey aran Jerusalén xbe̱n cua chicuu la̱in. Ut quinqꞌue inchꞌo̱l chixtaubal nabal chic innaꞌleb.

¹⁷ Quinkꞌaxtesi cuib chixtaubal nabal chic li naꞌleb li cha̱bil. Ut quinqꞌue ajcuiꞌ inchꞌo̱l chixtaubal li naꞌleb li incꞌaꞌ us li ma̱cꞌaꞌ na-oc cuiꞌ. Abanan quinqꞌue retal nak chixjunil aꞌan ma̱cꞌaꞌ na-oc cuiꞌ. Junes rahil chꞌo̱lej naxqꞌue.

¹⁸ Li ani naxsicꞌ nabal lix naꞌleb nacuan nabal lix chꞌaꞌajquilal, xban nak li ani cuan nabal xnaꞌleb, nabal ajcuiꞌ li raylal naxcꞌul.