Deuteronomio 8 - Li Santil hu

Li naꞌleb li quixqꞌue laj Moisés reheb laj Israel

¹ Qꞌuehomak e̱chꞌo̱l chixba̱nunquil chixjunil li chakꞌrab li yo̱quin chixyebal e̱re anakcuan re nak ta̱cua̱nk le̱ yuꞌam ut texnabalokꞌ ut tex-oc chi cua̱nc saꞌ li naꞌajej li quixyechiꞌi li Dios reheb le̱ xeꞌto̱nil yucuaꞌ riqꞌuin juramento.

² Chijulticokꞌ e̱re chanru nak li Ka̱cuaꞌ le̱ Dios quicꞌamoc be che̱ru chiru caꞌcꞌa̱l chihab nak cuanquex chak saꞌ li chaki chꞌochꞌ. Quixtakla li raylal saꞌ e̱be̱n re xyalbal e̱rix, ut re te̱cubsi e̱rib, ut re ajcuiꞌ nak tixnau cꞌaꞌru cuan saꞌ le̱ chꞌo̱l, ma te̱ba̱nu lix chakꞌrab malaj ut incꞌaꞌ.

³ Usta quexcanab chixcuybal raylal ut chixcuybal e̱tzꞌocajic, abanan mokon quixqꞌue li maná re te̱cuaꞌ, li ma̱ jun sut e̱cuaꞌom chi moco le̱ xeꞌto̱nil yucuaꞌ queꞌcuaꞌoc re. Quixba̱nu chi joꞌcan re nak te̱qꞌue retal nak ma̱cuaꞌ caꞌaj cuiꞌ riqꞌuin li cua yoꞌyo cuiꞌ li cui̱nk. Riqꞌuin ban li a̱tin li naxye li Ka̱cuaꞌ.

⁴ Chiru li caꞌcꞌa̱l chihab incꞌaꞌ quikꞌeloꞌ le̱ rakꞌ chi moco quisi̱poꞌ le̱ rok nak cuanquex aran.

⁵ Chijulticokꞌ e̱re nak li Ka̱cuaꞌ le̱ Dios naxtijeb li ralal xcꞌajol joꞌ nak li yucuaꞌbej naxtij li ralal xcꞌajol.

⁶ Joꞌcan nak cheba̱nuhak li cꞌaꞌru nequexchakꞌrabi cuiꞌ li Ka̱cuaꞌ le̱ Dios. Cheba̱nu li cꞌaꞌru naraj li Dios ut chexucua ru.

⁷ Li Ka̱cuaꞌ le̱ Dios yo̱ che̱cꞌambal saꞌ jun li cha̱bil naꞌajej. Aran cuan nabal li rok haꞌ, li yuꞌam haꞌ, ut li nimaꞌ, joꞌ eb ajcuiꞌ li haꞌ li nequeꞌel chak saꞌ eb li tzu̱l.

⁸ Saꞌ li chꞌochꞌ aꞌan na-el chi us li acui̱mk. Na-el li trigo, li cebada, li uvas, li higos ut li granadas. Ut na-el ajcuiꞌ li olivo. Ut cuan chi nabal li aceite ut li xyaꞌal cab.

⁹ Saꞌ li naꞌajej aꞌan ma̱cꞌaꞌ ta̱paltok e̱re. Incꞌaꞌ ta̱paltokꞌ che̱ru le̱ tzacae̱mk. Saꞌ eb li pec li cuanqueb aran te̱risi li hierro. Ut saꞌ eb li tzu̱l te̱risi li cobre.

¹⁰ Sa texcuaꞌak toj retal ta̱cꞌojla̱k e̱chꞌo̱l. Ut texbantioxi̱nk chiru li Ka̱cuaꞌ le̱ Dios xban li cha̱bil naꞌajej li tixqꞌue e̱re.

¹¹ Cheqꞌuehak retal chi us re nak incꞌaꞌ te̱canab xpa̱banquil li Ka̱cuaꞌ le̱ Dios. Junelic te̱ba̱nu li chakꞌrab li quixqꞌue e̱re. Cheba̱nuhak le̱ taklanquil li quixqꞌue. Junelic taxak te̱ba̱nu chixjunil li yo̱quin chixyebal e̱re anakcuan.

¹² Ta̱cuulak xkꞌehil nak te̱yi̱b le̱ rochoch chi cha̱bil ut ta̱cua̱nk ajcuiꞌ le̱ tzacae̱mk chi nabal.

¹³ Nabalakeb chic le̱ cuacax ut le̱ carner. Ut ta̱ta̱mk ajcuiꞌ le̱ plata ut le̱ oro. Chixjunil li cꞌaꞌru cuan e̱re ta̱nabalokꞌ.

¹⁴ Nak acak xtam li cꞌaꞌru e̱re, incꞌaꞌ taxak te̱nimobresi e̱rib. Ut incꞌaꞌ taxak ta̱sachk saꞌ e̱chꞌo̱l nak li Ka̱cuaꞌ le̱ Dios, aꞌan li qui-isin chak e̱re Egipto, li quexcuan cuiꞌ chak chokꞌ rahobtesinbil mo̱s.

¹⁵ Aꞌan quicꞌamoc be che̱ru nak quexnumeꞌ chak saꞌ li nimla chaki chꞌochꞌ li xiu xiu cuiꞌ cua̱nc. Aran cuanqueb li cꞌantiꞌ li nequeꞌcamsin. Cuanqueb ajcuiꞌ eb laj xo̱cꞌ. Ut xecuy ajcuiꞌ li chaki el. Ut nak ma̱cꞌaꞌ li haꞌ, li Ka̱cuaꞌ quirisi li haꞌ saꞌ li cacuil sako̱nac re te̱rucꞌ.

¹⁶ Nak cuanquex saꞌ li chaki chꞌochꞌ quixqꞌue li maná re te̱cuaꞌ, li incꞌaꞌ naubil ru xbaneb le̱ xeꞌto̱nil yucuaꞌ. Quixtakla li raylal saꞌ e̱be̱n re te̱cubsi e̱rib ut re xyalbal e̱rix re nak us tex-e̱lk mokon nak cua̱nkex saꞌ li naꞌajej aꞌan.

¹⁷ Incꞌaꞌ taxak te̱cꞌoxla nak riqꞌuin le̱ cuanquil ut riqꞌuin le̱ metzꞌe̱u cuan chixjunil li cꞌaꞌru e̱re.

¹⁸ Chinak ban saꞌ e̱chꞌo̱l nak li Ka̱cuaꞌ, aꞌan li naqꞌuehoc le̱ cuanquil chi biomocꞌ. Naxba̱nu aꞌan re nak ta̱tzꞌaklok ru li contrato li quixba̱nu riqꞌuineb le̱ xeꞌto̱nil yucuaꞌ joꞌ yo̱ chixba̱nunquil e̱re anakcuan.

¹⁹ Abanan cui la̱ex ta̱sachk saꞌ e̱chꞌo̱l li Ka̱cuaꞌ le̱ Dios ut cui te̱cuikꞌib e̱rib chiruheb li jalanil dios re xlokꞌoninquileb, la̱in ninye e̱re nak relic chi ya̱l ta̱sachekꞌ e̱ru.

²⁰ Joꞌ nak quixsach ruheb li xni̱nkal ru tenamit li Dios li quexnumeꞌ cuiꞌ chak, joꞌcan ajcuiꞌ nak tixsach e̱ru la̱ex cui nequecanab xba̱nunquil li cꞌaꞌru naxye li Ka̱cuaꞌ le̱ Dios, chan laj Moisés.