Deuteronomio 7 - Li Santil hu

Eb laj Israel incꞌaꞌ teꞌxlokꞌoniheb li jalanil dios

¹ Li Ka̱cuaꞌ le̱ Dios ta̱ocsi̱nk e̱re saꞌ li naꞌajej li te̱re̱chani la̱ex. Ta̱risiheb che̱ru li cuukub chi xni̱nkal ru tenamit. Aꞌaneb laj heteo, eb laj gergeseo, eb laj amorreo, eb laj cananeo, eb laj ferezeo, eb laj heveo, joꞌ eb ajcuiꞌ laj jebuseo. Eb li tenamit aꞌin cauheb rib ut kꞌaxal ni̱nkeb xcuanquil che̱ru la̱ex.

² Li Ka̱cuaꞌ le̱ Dios tixkꞌaxtesiheb saꞌ e̱rukꞌ re nak texpletik riqꞌuineb ut texnumta̱k saꞌ xbe̱neb. Incꞌaꞌ te̱ba̱nu li contrato riqꞌuineb, chi moco te̱ril xtokꞌoba̱l ruheb. Te̱sach ban ruheb chi junaj cua.

³ Incꞌaꞌ texsumla̱k riqꞌuineb ut incꞌaꞌ te̱sumubeb le̱ rabin riqꞌuineb li ralal eb aꞌan, chi moco te̱sumubeb le̱ ralal riqꞌuin lix rabin eb aꞌan.

⁴ Cui texsumla̱k riqꞌuineb, teꞌrisi ribeb le̱ ralal e̱cꞌajol riqꞌuin li Ka̱cuaꞌ ut teꞌoc chixlokꞌoninquil li jalanil dios. Riqꞌuin aꞌan ta̱cha̱lk xjoskꞌil li Ka̱cuaꞌ saꞌ e̱be̱n ut saꞌ junpa̱t ta̱sachekꞌ e̱ru chi junaj cua.

⁵ Li cꞌaꞌru tento te̱ba̱nu, aꞌan aꞌin: te̱sach chi junaj cua lix artaleb. Te̱sach chixjunil li joꞌ qꞌuial cuan saꞌ li naꞌajej li nequeꞌxlokꞌoni cuiꞌ li jalanil dios. Te̱sach lix jalam u̱cheb lix Asera xcꞌabaꞌ ut te̱cꞌat chixjunileb lix yi̱banbil dios.

⁶ Te̱ba̱nu chi joꞌcan xban nak la̱ex jun xsantil tenamit li Ka̱cuaꞌ le̱ Dios. Li Ka̱cuaꞌ le̱ Dios quisicꞌoc e̱ru saꞌ xya̱nkeb chixjunileb li cuanqueb saꞌ ruchichꞌochꞌ re nak la̱exak lix tenamit. Ut kꞌaxal lokꞌex chiru li Dios.

⁷ Moco xban ta nak kꞌaxal nabalex joꞌ eb li tenamit jun chꞌol chic nak quixsicꞌ e̱ru li Dios ut quexra, xban nak la̱ex moco qꞌuihex ta.

⁸ Quixsicꞌ ban e̱ru xban nak nequexra ut xban nak quiraj xba̱nunquil li quixyechiꞌi reheb le̱ xeꞌto̱nil yucuaꞌ nak texrisi Egipto. Joꞌcan nak quexrisi riqꞌuin xcuanquil saꞌ li naꞌajej li quexcuan cuiꞌ chokꞌ rahobtesinbil mo̱s rubel xcuanquil laj faraón.

⁹ Joꞌcan nak chenauhak nak li Ka̱cuaꞌ le̱ Dios, aꞌan li tzꞌakal Dios. Aꞌan cha̱bil ut ti̱c xchꞌo̱l chixba̱nunquil li cꞌaꞌru naxyechiꞌi ut naruxta̱na ruheb li nequeꞌrahoc re li Dios ut nequeꞌxba̱nu li cꞌaꞌru naxye toj saꞌ xnabalil xtasalil li ralal xcꞌajol.

¹⁰ Abanan li Ka̱cuaꞌ moco tixcanab ta chi incꞌaꞌ tixqꞌue chixtojbal xma̱c li ani xicꞌ na-iloc re. Tixqꞌue ban chixtojbal xma̱c. Ut tixsach ruheb li nequeꞌtzꞌekta̱nan re.

¹¹ Joꞌcan nak cheqꞌuehak retal ut te̱ba̱nu chixjunil li naxye li chakꞌrab ut te̱ba̱nu le̱ taklanquil li quixqꞌue li Dios. Te̱ba̱nu chixjunil li tinye e̱re anakcuan.

¹² Cui la̱ex te̱qꞌue retal li chakꞌrab aꞌin ut cui te̱qꞌue e̱chꞌo̱l chixba̱nunquil, li Ka̱cuaꞌ le̱ Dios tixba̱nu joꞌ quixye saꞌ li contrato ut ta̱ruxta̱na e̱ru joꞌ quixyechiꞌi reheb le̱ xeꞌto̱nil yucuaꞌ.

¹³ Li Ka̱cuaꞌ texra ut texrosobtesi ut tixqꞌue chi qꞌuia̱nc le̱ ralal e̱cꞌajol ut ta̱rosobtesiheb. Ut tixqꞌue ajcuiꞌ chi nabalocꞌ li ru le̱ racui̱mk. Tixqꞌue nabal le̱ trigo, le̱ vino ut le̱ aceite. Tixqꞌue nabal li ral le̱ cuacax ut le̱ carner saꞌ li naꞌajej li quixyechiꞌi riqꞌuin juramento reheb le̱ xeꞌto̱nil yucuaꞌ.

¹⁴ Kꞌaxal cuiꞌchic nabal le̱ rosobtesinquil tixqꞌue li Ka̱cuaꞌ chiruheb chixjunileb li tenamit. Ma̱ jun e̱re incꞌaꞌ ta teꞌcua̱nk ralal xcꞌajol, joꞌ cui̱nk joꞌ ixk. Ut teꞌcua̱nk ajcuiꞌ li raleb le̱ queto̱mk.

¹⁵ Li Ka̱cuaꞌ ta̱colok e̱re chiruheb li yajel. Incꞌaꞌ te̱yajeni li yibru yajel li queꞌxcꞌul eb laj Egipto nak cuanquex chak aran. Tixtakla ban li yajel saꞌ xbe̱neb li xicꞌ nequeꞌiloc e̱re.

¹⁶ Tento nak te̱sach ruheb chixjunileb li tenamit li tixkꞌaxtesi saꞌ e̱rukꞌ li Ka̱cuaꞌ le̱ Dios. Incꞌaꞌ te̱ruxta̱na ruheb chi moco te̱ril xtokꞌoba̱l ruheb. Ut me̱lokꞌoniheb lix yi̱banbil dios re nak incꞌaꞌ ta̱sachekꞌ e̱ru.

¹⁷ Ma̱re te̱ye chi ribil e̱rib, “Eb li tenamit aꞌin kꞌaxal cauheb rib chiku la̱o. ¿Chanru nak ta̱ru̱k takisiheb saꞌ li naꞌajej aꞌin?”

¹⁸ Abanan, mexxucuac chiruheb. Chinak ban saꞌ e̱chꞌo̱l cꞌaꞌru quixba̱nu li Ka̱cuaꞌ le̱ Dios re laj faraón ut reheb chixjunileb laj Egipto.

¹⁹ Riqꞌuin xnakꞌ e̱ru la̱ex xeril li sachba chꞌo̱lej ut li milagro li quixba̱nu li Ka̱cuaꞌ riqꞌuin xnimal xcuanquil nak quexrisi saꞌ li raylal li cuanquex cuiꞌ. Ut joꞌcan ajcuiꞌ tixba̱nu li Ka̱cuaꞌ le̱ Dios riqꞌuineb li tenamit aꞌin li yo̱queb chixqꞌuebal e̱xiu.

²⁰ Ut tixseꞌbesiheb xbaneb li chꞌub li tixtakla re xtiubaleb toj retal nak teꞌosokꞌ chixjunileb, usta yo̱keb chixmukbal ribeb che̱ru.

²¹ Mexxucuac chiruheb xban nak li Ka̱cuaꞌ le̱ Dios li cuan e̱riqꞌuin, aꞌan li kꞌaxal nim xcuanquil che̱tenkꞌanquil.

²² Chi caꞌchꞌinkil li Ka̱cuaꞌ le̱ Dios ta̱risiheb li tenamit aꞌan che̱ru nak yo̱kex chi xic. Incꞌaꞌ naru te̱sacheb ru chi junaj cua re nak incꞌaꞌ teꞌta̱mk li joskꞌ aj xul saꞌ le̱ naꞌaj re nak incꞌaꞌ texchꞌiꞌchꞌiꞌi̱k xbaneb.

²³ Ta̱cuulak xkꞌehil nak li Ka̱cuaꞌ le̱ Dios tixkꞌaxtesiheb saꞌ e̱rukꞌ. Tixsach lix cuanquileb ut tixsacheb ru chi junaj cua.

²⁴ Li Ka̱cuaꞌ tixkꞌaxtesiheb lix reyeb saꞌ e̱rukꞌ. Te̱camsiheb ut ma̱ ani chic ta̱jultica̱nk reheb. Ma̱ ani tixcuy e̱sumenquil la̱ex. Te̱sach ban ruheb chixjunileb.

²⁵ Te̱cꞌat chixjunileb lix yi̱banbil dios. Me̱rahi ru li plata ut li oro li cuan chiru lix dioseb ut me̱xoc chokꞌ e̱re ma̱re anchal te̱tzꞌek e̱rib xbaneb, xban nak li Ka̱cuaꞌ xicꞌ narileb lix yi̱banbil dios.

²⁶ Me̱rocsi saꞌ le̱ rochoch li cꞌaꞌ re ru tzꞌekta̱nanbil xban li Dios. Me̱qꞌue e̱rib chi sachecꞌ xbaneb re nak incꞌaꞌ texsachekꞌ ajcuiꞌ la̱ex. Xicꞌ ban te̱ril chixjunileb. Tento nak teꞌsachekꞌ ru chi junaj cua xban nak ac kꞌaxtesinbil re sachecꞌ.