Deuteronomio 5 - Li Santil hu

Eb li laje̱b chi chakꞌrab

¹ Laj Moisés quixchꞌutubeb chixjunileb laj Israel ut quixye reheb: —La̱ex aj Israel, abihomak li chakꞌrab ut le̱ taklanquil li oc cue chixyebal e̱re anakcuan. Chetzolak chi us li chakꞌrab ut qꞌuehomak e̱chꞌo̱l chixba̱nunquil.

² Li Ka̱cuaꞌ li kaDios quixba̱nu jun li contrato kiqꞌuin saꞌ li tzu̱l Horeb.

³ Moco caꞌaj cuiꞌ ta riqꞌuineb li kaxeꞌto̱nil yucuaꞌ quixba̱nu li contrato. Quixba̱nu ban ajcuiꞌ kiqꞌuin la̱o li cuanco arin anakcuan.

⁴ Li Ka̱cuaꞌ quia̱tinac e̱riqꞌuin chi tzꞌakal saꞌ li xam aran saꞌ li tzu̱l.

⁵ La̱in quinqꞌue cuib saꞌ e̱yi la̱ex ut li Ka̱cuaꞌ re nak tinye e̱re cꞌaꞌru naxye li Ka̱cuaꞌ. La̱ex quexxucuac xban li xam. Joꞌcan nak incꞌaꞌ quextakeꞌ saꞌ li tzu̱l.

⁶ Ut li Ka̱cuaꞌ quixye, “La̱in li Ka̱cuaꞌ le̱ Dios. La̱in quin-isin chak e̱re saꞌ li tenamit Egipto, saꞌ li naꞌajej li xexrahobtesi̱c cuiꞌ chak.

⁷ Incꞌaꞌ naru nacuan jalanil dios e̱riqꞌuin chicuu la̱in.

⁸ Me̱yi̱b e̱pechꞌbil dios chi moco xjalam u̱ch ta li cuan saꞌ choxa, chi moco li cuan saꞌ ruchichꞌochꞌ, chi moco li cuan saꞌ haꞌ.

⁹ Me̱cuikꞌib e̱rib chiruheb li yi̱banbil dios, chi moco chelokꞌoniheb. La̱in li Ka̱cuaꞌ le̱ Dios. Cau cuib. La̱in incꞌaꞌ nacuulac chicuu nak jalan te̱qꞌue xlokꞌal. Ut ninrahobtesiheb li alal cꞌajolbej riqꞌuin lix ma̱queb lix naꞌ xyucuaꞌeb toj saꞌ rox saꞌ xca̱ xtasalil li ralal xcꞌajoleb li xicꞌ nequeꞌiloc cue.

¹⁰ Ut nacuuxta̱naheb ru chixjunileb li nequeꞌrahoc cue li nequeꞌxpa̱b lin chakꞌrab.

¹¹ Me̱patzꞌ xcꞌabaꞌ li Ka̱cuaꞌ le̱ Dios saꞌ yoꞌobanbil a̱tin. Li Ka̱cuaꞌ Dios moco tixcanab ta chi incꞌaꞌ tixtoj xma̱c li ani tixpatzꞌ lix cꞌabaꞌ chi ma̱cꞌaꞌ rajbal.

¹² Julticak e̱re li hiloba̱l cutan re nak oxlokꞌinbilak che̱ru, joꞌ quixye e̱re li Ka̱cuaꞌ le̱ Dios.

¹³ Cuakib cutan texcꞌanjelak ut te̱ba̱nu chixjunil le̱ trabaj.

¹⁴ Saꞌ xcuuk li cutan aꞌan jun hiloba̱l cutan chiru li Ka̱cuaꞌ le̱ Dios. Ma̱ jun li cꞌanjel te̱ba̱nu. Ma̱ ani ta̱trabajik chi moco la̱ex, chi moco le̱ ralal e̱cꞌajol, chi moco le̱ mo̱s cui̱nk, chi moco le̱ mo̱s ixk, chi moco le̱ bo̱yx, chi moco le̱ bu̱r. Ma̱ jun reheb le̱ xul te̱qꞌue chi cꞌanjelac, chi moco junak li jalan xtenamit li cuan saꞌ le̱ rochoch re nak teꞌhila̱nk le̱ mo̱s cui̱nk le̱ mo̱s ixk joꞌ nak texhila̱nk la̱ex.

¹⁵ Chijulticokꞌ e̱re la̱ex nak quexcuan chak chokꞌ rahobtesinbil mo̱s aran Egipto. Abanan li Ka̱cuaꞌ le̱ Dios quexrisi chak saꞌ li naꞌajej aꞌan riqꞌuin lix nimal xcuanquilal. Joꞌcan nak li Ka̱cuaꞌ yo̱ chixyebal e̱re nak te̱qꞌue xlokꞌal li hiloba̱l cutan.

¹⁶ Che-oxlokꞌi le̱ naꞌ le̱ yucuaꞌ joꞌ xextakla cuiꞌ li Dios re nak ta̱najtokꞌ ru le̱ yuꞌam ut re ajcuiꞌ nak us tex-e̱lk saꞌ li chꞌochꞌ li yo̱ chixqꞌuebal e̱re li Ka̱cuaꞌ le̱ Dios.

¹⁷ Me̱camsi e̱ras e̱ri̱tzꞌin.

¹⁸ Mexmuxuc caxa̱r.

¹⁹ Mex-elkꞌac.

²⁰ Mexyoꞌoban a̱tin chirix le̱ ras e̱ri̱tzꞌin.

²¹ Me̱ra ru rixakil le̱ ras e̱ri̱tzꞌin, chi moco li rochoch, chi moco lix chꞌochꞌ, chi moco lix mo̱s cui̱nk, chi moco lix mo̱s ixk. Me̱ra ru lix bo̱yx chi moco lix bu̱r. Ma̱cꞌaꞌ cꞌaꞌak chic re ru, re le̱ ras e̱ri̱tzꞌin te̱ra ru”, chan li Ka̱cuaꞌ.

²² Aꞌaneb aꞌin li chakꞌrab li quixqꞌue e̱re li Ka̱cuaꞌ nak chꞌutchꞌu̱quex che̱junilex saꞌ xto̱n li tzu̱l. Li Ka̱cuaꞌ quia̱tinac chi cau xya̱b xcux saꞌ li xam, ut saꞌ li chok li kꞌojyi̱n ru. Ut ma̱cꞌaꞌ chic quixye. Chirix aꞌan quixtzꞌi̱ba li chakꞌrab aꞌan chiru li cuib chi perpo̱quil pec, ut quixqꞌue cue li pec aꞌan.

²³ Nak querabi lix ya̱b xcux li Ka̱cuaꞌ nak quia̱tinac chak saꞌ li kꞌojyi̱n ru ut yo̱ chi cꞌatc li tzu̱l, eb li nequeꞌcꞌamoc be ut eb li nequeꞌtaklan saꞌ xbe̱neb li junju̱nk xte̱paleb laj Israel queꞌcuulac cuiqꞌuin.

²⁴ Ut queꞌxye cue, “Li Ka̱cuaꞌ li kaDios quixcꞌut chiku lix lokꞌal ut lix cuanquilal. Xkabi lix ya̱b xcux nak quia̱tinac chak saꞌ li xam. Nakanau nak li Dios naru naa̱tinac riqꞌuineb li cui̱nk ut incꞌaꞌ teꞌca̱mk li cui̱nk.

²⁵ Abanan, ¿cꞌaꞌut nak takaqꞌue kib chi ca̱mc? To-osokꞌ xban li xam li kꞌaxal xiu xiu. Incꞌaꞌ chic takacuy cui li Dios ta̱a̱tinak cuiꞌchic kiqꞌuin.

²⁶ ¿Ma cuan ta biꞌ chic junak qui-abin re lix ya̱b xcux li yoꞌyo̱quil Dios nak quia̱tinac saꞌ xam joꞌ nak quikabi la̱o ut incꞌaꞌ xcam?

²⁷ At Ka̱cuaꞌ Moisés, tatjilok cuiꞌchic la̱at ut ta̱cuabi chixjunil li cꞌaꞌru tixye li Ka̱cuaꞌ li kaDios. Chirix aꞌan ta̱ye ke cꞌaꞌru tixye ut la̱o takabi ut takaba̱nu li cꞌaꞌru tixye ke”, chanqueb.

²⁸ Li Ka̱cuaꞌ quirabi li cꞌaꞌru xeye cue ut quixye cue, “La̱in xcuabi chixjunil li queꞌxye a̱cue eb li tenamit aꞌin. Us li cꞌaꞌru xeꞌxye.

²⁹ Us raj nak eb li cualal incꞌajol incꞌaꞌ teꞌxjal xcꞌaꞌuxeb. Junelic raj teꞌxxucua cuu. Junelic raj teꞌxba̱nu li cꞌaꞌru naxye saꞌ lin chakꞌrab re nak junelic us teꞌe̱lk joꞌ eb ajcuiꞌ li ralal xcꞌajoleb.

³⁰ Tatxic ut ta̱ye reheb nak teꞌsukꞌi̱k saꞌ lix muheba̱leb.

³¹ Abanan, la̱at tatcha̱lk cuiꞌchic ut tatcana̱k arin cuiqꞌuin re nak ta̱ru̱k tinqꞌue a̱cue chixjunileb li chakꞌrab, ut le̱ taklanquil ut le̱ tijbal. Ut la̱at ta̱cꞌut chiruheb re nak teꞌxba̱nu chi joꞌcan saꞌ li naꞌajej li tinqꞌue reheb”, chan li Ka̱cuaꞌ.

³² Joꞌcan nak cheqꞌuehak retal ut te̱ba̱nu li cꞌaꞌru naxye e̱re li Ka̱cuaꞌ le̱ Dios. Me̱canab xba̱nunquil. Te̱ba̱nu ban chixjunil li naxye li Ka̱cuaꞌ.

³³ Cheba̱nu chixjunil li naxye e̱re li Ka̱cuaꞌ le̱ Dios re nak cua̱nk le̱ yuꞌam ut us tex-e̱lk riqꞌuin li cꞌaꞌru te̱ba̱nu ut re ajcuiꞌ nak najt texcua̱nk saꞌ li naꞌajej li quixqꞌue e̱re li Ka̱cuaꞌ re te̱re̱chani.