Deuteronomio 34 - Li Santil hu

Lix camic laj Moisés

¹ Laj Moisés qui-el saꞌ li ru takꞌa aran Moab ut quitakeꞌ chiru li tzu̱l Nebo ut co̱ saꞌ xbe̱n li tzu̱l Pisga li cuan saꞌ xcaꞌyaba̱l li tenamit Jericó. Ut li Ka̱cuaꞌ quixcꞌut chiru chixjunil li nimla naꞌajej li cuan Galaad toj saꞌ li naꞌajej li teꞌre̱chani li ralal xcꞌajol laj Dan.

² Quixcꞌut ajcuiꞌ chiru li naꞌajej li teꞌre̱chani li ralal xcꞌajol laj Neftalí, laj Efraín, ut laj Manasés joꞌ ajcuiꞌ li naꞌajej li teꞌre̱chani li ralal xcꞌajol laj Judá. Li chꞌochꞌ li quixcꞌut chiru quicuulac cuan cuiꞌ li palau Mediterráneo.

³ Quixcꞌut ajcuiꞌ chiru li naꞌajej Neguev ut eb li ru takꞌa Jordán ut Jericó, li tenamit li cuanqueb cuiꞌ li cheꞌ palmera toj saꞌ li naꞌajej Zoar.

⁴ Ut li Ka̱cuaꞌ quixye re laj Moisés: —Aꞌan aꞌin li naꞌajej li quinyechiꞌi reheb laj Abraham, laj Isaac ut laj Jacob. Quinye riqꞌuin juramento nak tinqꞌue reheb li ralal xcꞌajoleb. La̱in nacuaj nak ta̱cuil, usta incꞌaꞌ naru tat-oc saꞌ li naꞌajej aꞌan, chan li Ka̱cuaꞌ.

⁵ Ut laj Moisés, laj cꞌanjel chiru li Dios, quicam saꞌ li naꞌajej Moab joꞌ yebil xban li Ka̱cuaꞌ.

⁶ Ut aran ajcuiꞌ quimukeꞌ xban li Dios saꞌ li ru takꞌa li cuan Moab saꞌ xcaꞌyaba̱l li tenamit Bet-peor. Ut ma̱ ani nanaꞌoc re li naꞌajej li quimukeꞌ cuiꞌ toj chalen anakcuan.

⁷ Cuakcꞌa̱l (120) chihab cuan re laj Moisés nak quicam. Toj saken na-iloc ut toj cau rib chi us.

⁸ Laje̱b xcaꞌcꞌa̱l cutan queꞌrahoꞌ saꞌ xchꞌo̱leb laj Israel ut queꞌxya̱ba lix camic laj Moisés saꞌ li naꞌajej Moab. Joꞌcaꞌin nak queꞌxnumsiheb li cutan re rahil chꞌo̱lejil ut ya̱bac xban lix camic.

⁹ Ut laj Josué li ralal laj Nun quiqꞌueheꞌ xnaꞌleb xban nak laj Moisés quixqꞌue li rukꞌ saꞌ xbe̱n retalil nak aꞌan chic ta̱cꞌamok be chiruheb laj Israel. Joꞌcan nak eb laj Israel queꞌabin chiru ut queꞌxba̱nu joꞌ quiyeheꞌ re laj Moisés xban li Ka̱cuaꞌ Dios.

¹⁰ Chalen saꞌ li cutan aꞌan, ma̱ jun chic profeta quicuan saꞌ xya̱nkeb laj Israel joꞌ laj Moisés queꞌril ta ru li Dios chi tzꞌakal joꞌ quixba̱nu aꞌan.

¹¹ Ma̱ ani chic quiru xba̱nunquil li sachba chꞌo̱lej ut li milagros li quixba̱nu laj Moisés aran Egipto chiru laj faraón, ut chiruheb laj cꞌanjel chiru, joꞌqueb ajcuiꞌ chixjunileb li tenamit. Quixba̱nu joꞌ quitakla̱c cuiꞌ xban li Dios.

¹² Ma̱ ani chic quiru xba̱nunquil li sachba chꞌo̱lej ut li milagros joꞌ li quixba̱nu laj Moisés chiruheb chixjunileb laj Israel, chi moco quicuan xcuanquileb joꞌ li xcuanquil laj Moisés.