Deuteronomio 33 - Li Santil hu

Li rosobtesinquileb li cablaju xte̱pal laj Israel

¹ Laj Moisés, li sicꞌbil ru xban li Dios, quixtzꞌa̱ma li rosobtesinquileb laj Israel chiru li Dios nak toj ma̱jiꞌ nacam.

² Quixye: —Li Ka̱cuaꞌ quichal chak saꞌ li tzu̱l Sinaí. Toj Seir quicꞌutun lix saken. Quicꞌutun xlokꞌal toj saꞌ li tzu̱l Parán. Quicꞌulun rochben lix qꞌuila okꞌob chi ángel. Ut saꞌ lix nim ukꞌ cuan li chakꞌrab chanchan xam.

³ Li Ka̱cuaꞌ naxraheb lix tenamit ut naxcoleb. Joꞌcan nak nequeꞌxcuikꞌib ribeb chiru ut nequeꞌxba̱nu li cꞌaꞌru naxye.

⁴ La̱in laj Moisés quinqꞌue e̱re lix chakꞌrab li Dios, li kꞌaxal lokꞌ chiku la̱o li ralal xcꞌajol laj Jacob.

⁵ Li Ka̱cuaꞌ, aꞌan li rey aran Jesurún nak queꞌxchꞌutub ribeb li nequeꞌcꞌamoc be rochbeneb lix te̱paleb laj Israel.—

⁶ Laj Moisés quixye chirixeb li ralal xcꞌajol laj Rubén: Incꞌaꞌ teꞌsachekꞌ ruheb li ralal xcꞌajol laj Rubén. Cheꞌnabalokꞌ ban ut teꞌta̱mk.

⁷ Ut quixye chirixeb li ralal xcꞌajol laj Judá: At Ka̱cuaꞌ, chacuabiheb taxak nak nequeꞌxya̱ba la̱ cꞌabaꞌ eb li ralal xcꞌajol laj Judá. Chacꞌameb riqꞌuineb li rech tenamitil. Chatenkꞌaheb riqꞌuin la̱ cuanquil nak nequeꞌpletic riqꞌuineb li xicꞌ nequeꞌiloc reheb ut chacoleb chiruheb li xicꞌ nequeꞌiloc reheb.

⁸ Quixye chirixeb li ralal xcꞌajol laj Leví: At Ka̱cuaꞌ, chaqꞌue la̱ Tumin ut la̱ Urim reheb li ralal xcꞌajol laj Leví, li nequeꞌcꞌanjelac cha̱cuu. Cayal rixeb aran Masah ut cayal rixeb aran Meriba.

⁹ Kꞌaxal cateꞌxra chiruheb lix naꞌ xyucuaꞌeb ut chiruheb ajcuiꞌ li rechꞌalaleb ut lix cocꞌaleb. Queꞌxba̱nu li cꞌaꞌru naxye saꞌ la̱ chakꞌrab ut incꞌaꞌ queꞌxkꞌet li contrato caba̱nu riqꞌuineb.

¹⁰ Eb aꞌan nequeꞌxcꞌut li chakꞌrab chiruheb laj Israel, li ralal xcꞌajol laj Jacob. Nequeꞌxcꞌat li incienso cha̱cuu ut nequeꞌxcꞌat ajcuiꞌ li mayej saꞌ la̱ artal.

¹¹ At Ka̱cuaꞌ, chacuosobtesi li cꞌaꞌru nequeꞌxba̱nu. Ta̱sahokꞌ taxak saꞌ a̱chꞌo̱l riqꞌuin lix yehom xba̱nuhomeb. Chasacheb ru li nequeꞌpletic riqꞌuineb. Ut chasacheb ru li xicꞌ nequeꞌiloc reheb toj retal teꞌosokꞌ.

¹² Laj Moisés quixye chirixeb li ralal xcꞌajol laj Benjamín: Cheꞌcua̱nk chi cꞌojcꞌo xchꞌo̱leb li ralal xcꞌajol laj Benjamín li raro̱queb xban li Ka̱cuaꞌ. Li Ka̱cuaꞌ, aꞌan junelic nacoloc reheb ut nacuan riqꞌuineb ut na-iloc reheb.

¹³ Ut quixye chirixeb li ralal xcꞌajol laj José: Aꞌ taxak li Ka̱cuaꞌ chi osobtesi̱nc re lix naꞌajeb ut tixtꞌakresi lix chꞌochꞌeb riqꞌuin li hab ut li xchuꞌque ut riqꞌuin li haꞌ li na-el saꞌ chꞌochꞌ.

¹⁴ Tixqꞌueheb li ru li racui̱mkeb li kꞌaxal cha̱bil li nakꞌanoꞌ chiru li sakꞌe ut li nequeꞌqꞌui rajlal po.

¹⁵ Ta̱cua̱nk chi nabal li ru li racui̱mkeb li kꞌaxal cha̱bil saꞌ eb li tzu̱l li cuan chalen najter kꞌe cutan ut chi junelic.

¹⁶ Nujenak taxak lix naꞌajeb riqꞌuin li cha̱bil echej. Osobtesinbilak taxak lix chꞌochꞌeb xban li Ka̱cuaꞌ, li quia̱tinac chak saꞌ li qꞌuix li yo̱ xxamlel. Cheꞌxcꞌul taxak chixjunil li usilal aꞌin eb li ralal xcꞌajol laj José xban nak laj José, aꞌan li nim xcuanquil saꞌ xbe̱neb li ras.

¹⁷ Lix metzꞌe̱u li ralal xcꞌajol laj José chanchan xmetzꞌe̱u li xbe̱n ral jun li toro. Chanchan xcacuilal lix xucub li bo̱yx li cuan saꞌ qꞌuicheꞌ. Riqꞌuin lix cacuilaleb teꞌnumta̱k saꞌ xbe̱neb li xni̱nkal ru tenamit ut teꞌra̱linaheb toj saꞌ xmaril li ruchichꞌochꞌ. Aꞌan li usilal li tintzꞌa̱ma reheb li qꞌuila ralal xcꞌajol laj Efraín ut reheb li qꞌuila ralal xcꞌajol laj Manasés.

¹⁸ Laj Moisés quixye chirixeb li ralal xcꞌajol laj Zabulón ut eb li ralal xcꞌajol laj Isacar: Cheꞌsahokꞌ taxak saꞌ xchꞌo̱leb li ralal xcꞌajol laj Zabulón nak teꞌe̱lk chi us nak nequeꞌxic chi cꞌayi̱nc yalak bar. Ut teꞌbiomokꞌ taxak li ralal xcꞌajol laj Isacar saꞌ lix naꞌajeb.

¹⁹ Teꞌxbokeb li tenamit saꞌ eb li tzu̱l ut aran teꞌmayejak saꞌ ti̱quilal. Teꞌxtau lix biomaleb saꞌ eb li palau ut saꞌ li samaib li cuan chire li palau.

²⁰ Laj Moisés quixye chirixeb li ralal xcꞌajol laj Gad: Lokꞌoninbilak taxak li Ka̱cuaꞌ li quixnimobresi lix naꞌajeb li ralal xcꞌajol laj Gad. Chanchaneb li cakcoj li yo̱ chiroybeninquil li ani tixchap re ta̱risi lix tel malaj ut lix jolom.

²¹ Queꞌxsicꞌ ru li naꞌajej li kꞌaxal cha̱bil chokꞌ reheb. Ut quiqꞌueheꞌ reheb li naꞌajej joꞌ quiqꞌueheꞌ reheb li nequeꞌcꞌamoc be. Ut queꞌxba̱nu li cꞌaꞌru quiraj li Ka̱cuaꞌ ut queꞌxba̱nu li ti̱quilal nak chꞌutchꞌu̱queb li nequeꞌcꞌamoc be saꞌ xya̱nkeb laj Israel.

²² Laj Moisés quixye chirixeb li ralal xcꞌajol laj Dan: Eb li ralal xcꞌajol laj Dan chanchaneb li cakcoj toj sa̱jeb, li nequeꞌel chak toj Basán.

²³ Laj Moisés quixye chirixeb li ralal xcꞌajol laj Neftalí: Eb li ralal xcꞌajol laj Neftalí numtajenak li rosobtesinquileb xban li Ka̱cuaꞌ. Nabal li usilal quixba̱nu reheb. Reheb li naꞌajej li cuan saꞌ li roqueba̱l li sakꞌe joꞌ ajcuiꞌ li cuan saꞌ li sur nacuulac toj cuan cuiꞌ li palau Galilea.

²⁴ Laj Moisés quixye chirixeb li ralal xcꞌajol laj Aser: Kꞌaxal nabal li rosobtesinquileb li ralal xcꞌajol laj Aser chiruheb li jun chꞌol chic. Oxlokꞌinbilakeb xbaneb li rech aj Israel. Ut nabalakeb li cheꞌ olivo li ta̱e̱lk saꞌ lix naꞌajeb.

²⁵ Li oqueba̱l re lix tenamit yi̱banbilakeb riqꞌuin bronce ut hierro. Ut junelic cua̱nkeb xmetzꞌe̱u joꞌ najtil yoꞌyo̱keb.

²⁶ La̱ex aj Jesurún te̱nau nak ma̱cꞌaꞌ chic junak dios juntakꞌe̱t riqꞌuin li Ka̱cuaꞌ le̱ Dios. Li Ka̱cuaꞌ nachal chak saꞌ choxa re textenkꞌa. Chanchan nak nachal saꞌ xbe̱n li chok riqꞌuin lix nimal xcuanquil ut riqꞌuin lix nimal xlokꞌal.

²⁷ Li Ka̱cuaꞌ li cuan chi junelic, aꞌan li nacoloc e̱re. Aꞌan natenkꞌan e̱re riqꞌuin lix cuanquil li incꞌaꞌ na-osoꞌ. Aꞌan li ta̱isi̱nk reheb li xicꞌ nequeꞌiloc e̱re saꞌ li naꞌajej li tixqꞌue e̱re. Aꞌan li quixye e̱re nak te̱sach ruheb.

²⁸ Joꞌcan nak la̱ex li ralal xcꞌajol laj Israel texcua̱nk chi tuktu le̱ chꞌo̱l. Ma̱cꞌaꞌ ta̱chꞌiꞌchꞌiꞌi̱nk e̱re la̱ex li ralal xcꞌajol laj Jacob. Kꞌaxal nabal li ru le̱ racui̱mk ut kꞌaxal nabal li vino saꞌ le̱ naꞌaj li ta̱tꞌakresi̱k riqꞌuin li hab li nachal saꞌ choxa.

²⁹ Us xak e̱re la̱ex aj Israel. ¿Ma cuan ta biꞌ junak chic tenamit juntakꞌe̱t e̱riqꞌuin la̱ex? La̱ex colbilex xban li Ka̱cuaꞌ. Li Ka̱cuaꞌ, aꞌan li ta̱tenkꞌa̱nk e̱re ut aꞌan li ta̱colok e̱re. Aꞌan ta̱qꞌuehok e̱re chi numta̱c saꞌ xbe̱neb li xicꞌ nequeꞌiloc e̱re. Eb li xicꞌ nequeꞌiloc e̱re teꞌxcuikꞌib ribeb che̱ru xban xxiuheb ut la̱ex texnumta̱k saꞌ xbe̱neb lix tenamit li queꞌxnimobresi cuiꞌ ribeb.