Deuteronomio 32 - Li Santil huLix bich laj Moisés 1 Cherabihak la̱ex li cuanquex saꞌ choxa, li cꞌaꞌru tinye. Cherabihak la̱ex li cuanquex saꞌ ruchichꞌochꞌ, li cꞌaꞌru tinye riqꞌuin xtzꞌu̱mal cue. 2 Li tijleb li tinye chanchanak li hab. Li cua̱tin li tinye chanchanak li xchuꞌque. Chanchanak li hab cocꞌ ru li naxtꞌakresi li rax pim. Chanchanak li hab li naxtꞌakresi li acui̱mk. 3 La̱in tinnima xcꞌabaꞌ li Ka̱cuaꞌ. Ut lix tenamit teꞌxye nak nim xcuanquil. 4 Li Ka̱cuaꞌ, aꞌan li nacoloc ke joꞌ jun li sako̱nac li nequeꞌxcol cuiꞌ ribeb li tenamit. Li Ka̱cuaꞌ, aꞌan kꞌaxal cha̱bil ut ti̱c xchꞌo̱l. Naxba̱nu li ti̱quilal. Li Ka̱cuaꞌ kꞌaxal cha̱bil. Incꞌaꞌ naxba̱nu li incꞌaꞌ us. Junelic ban naxba̱nu li us ut li ti̱quilal. 5 La̱ex lix tenamit li Ka̱cuaꞌ queba̱nu li ma̱usilal. Quecꞌut e̱xuta̱n. Moco e̱cꞌulub ta nak la̱ex li ralal xcꞌajol. Nequexma̱cob ut incꞌaꞌ us le̱ naꞌleb. 6 ¿Ma joꞌcaꞌin nak te̱qꞌue re̱kaj li usilal li naxba̱nu li Ka̱cuaꞌ? Incꞌaꞌ us le̱ naꞌleb. Incꞌaꞌ nequetau xya̱lal. ¿Ma ma̱cuaꞌ ta biꞌ aꞌan li Ka̱cuaꞌ le̱ Dios li quiqꞌuehoc e̱yuꞌam? Aꞌan quiyoꞌobtesin e̱re ut quexxakab saꞌ le̱ naꞌaj. 7 Chijulticokꞌ e̱re cꞌaꞌru quicꞌulman junxil. Ut cꞌoxlankex chirixeb li chihab li ac xelajeꞌnumeꞌ. Ut patzꞌomak reheb le̱ yucuaꞌ. Aꞌan teꞌxye e̱re lix ya̱lal. Ut eb li ti̱xil cui̱nk teꞌxserakꞌi e̱re cꞌaꞌru quicꞌulman. 8 Li Ka̱cuaꞌ li kꞌaxal nim xcuanquil quixqꞌue xnaꞌajeb li xni̱nkal ru tenamit. Quixye reheb bar cuan xnuba̱l lix chꞌochꞌeb. Ut quixqꞌue lix chꞌochꞌeb laj Israel aꞌ yal jarubeb saꞌ li junju̱nk xte̱paleb. 9 La̱ex li ralal xcꞌajol laj Jacob, la̱ex lix tenamit li Ka̱cuaꞌ. 10 Quextau nak yo̱quex chixbeninquil e̱rib saꞌ li chaki chꞌochꞌ, li naꞌajej li ma̱cꞌaꞌ cuan chi saꞌ. Quexcol ut quexril ut quextenkꞌa xban nak lokꞌex chiru joꞌ li xnakꞌ ru. 11 Li Ka̱cuaꞌ quitenkꞌan e̱re ut quicꞌamoc be che̱ru joꞌ nak li tꞌiu naxcoleb li cocꞌ ral saꞌ lix soc ut naxcꞌameb saꞌ xbe̱n lix xicꞌ nak toj ma̱jiꞌ nequeꞌxnau rupupic. 12 Li Ka̱cuaꞌ, aꞌan li quicꞌamoc be che̱ru. Ma̱cuaꞌ junak jalanil dios li quitenkꞌan e̱re. 13 Li Ka̱cuaꞌ quixqꞌue e̱cuanquil saꞌ xbe̱neb li tenamit ut saꞌ xbe̱neb li tzu̱l. Ut quixqꞌue li ru li acui̱mk re te̱tzaca. Saꞌ xya̱nkeb li pec quetau li xyaꞌal cab ut saꞌ xya̱nkeb li sako̱nac quicuan le̱ cheꞌ olivo. 14 Quixqꞌue le̱ cuacax re ta̱cua̱nk le̱ leche ut le̱ queso. Quixqꞌue le̱ cha̱bil carner ut chiba̱t li cuanqueb Basán re nak ta̱cua̱nk le̱ tib. Ut quixqꞌue ajcuiꞌ li cha̱bil trigo. Ut querucꞌ li xyaꞌal li uvas li chanchan quicꞌ xban xcakal. 15 Eb laj Jesurún queꞌni̱nkan ut queꞌxkꞌetkꞌeti ribeb. Nalemtzꞌun nequeꞌiloc xban xni̱nkaleb. Ut queꞌxtzꞌekta̱na li Ka̱cuaꞌ li quiyi̱ban reheb. Queꞌxtzꞌekta̱na laj Colol reheb. 16 Queꞌxchikꞌ xjoskꞌil li Ka̱cuaꞌ nak queꞌxlokꞌoni li jalanil dios. Quinumta xjoskꞌil xban li ma̱usilal queꞌxba̱nu. 17 Queꞌmayejac chiruheb li ma̱us aj musikꞌej ut queꞌxlokꞌoniheb li moco dioseb ta. Queꞌxlokꞌoni li jalanil dios li incꞌaꞌ queꞌxlokꞌoni lix xeꞌto̱nil yucuaꞌ chi moco queꞌrabi resil. 18 Queꞌxtzꞌekta̱na li Ka̱cuaꞌ li quicoloc reheb. Queꞌxtzꞌekta̱na li Ka̱cuaꞌ li quiyoꞌobtesin reheb. 19 Li Ka̱cuaꞌ quiril li queꞌxba̱nu. Joꞌcan nak quixtzꞌekta̱naheb. Queꞌxqꞌue xjoskꞌil xban lix ma̱usilaleb. 20 Li Ka̱cuaꞌ quixye: —La̱in incꞌaꞌ chic tincuileb chi moco tincuabiheb. Toj tincuil cꞌaꞌru teꞌxcꞌul xban nak incꞌaꞌ useb xnaꞌleb. Queꞌxkꞌetkꞌeti ribeb chicuu ut ma̱cꞌaꞌeb xpa̱ba̱l. 21 Queꞌxchikꞌ injoskꞌil riqꞌuin xlokꞌoninquil jalanil dios. Queꞌxqꞌue injoskꞌil riqꞌuin xlokꞌoninquil li ma̱cuaꞌ Dios. Joꞌcan ajcuiꞌ tinba̱nu reheb. La̱in tinchikꞌ xjoskꞌileb riqꞌuin jalan tenamit. Tinqꞌueheb xjoskꞌileb xban jun tenamit incꞌaꞌ nequeꞌraj xtaubal xya̱lal. 22 Cꞌajoꞌ nak queꞌxqꞌue injoskꞌil. Lin joskꞌil chanchan li xam yo̱ chixcꞌatbal chixjunil toj saꞌ xchamal li ruchichꞌochꞌ. Chanchan nak tixcꞌat li ruchichꞌochꞌ ut li acui̱mk li cuan chiru. Tixcꞌat lix to̱n li tzu̱l. 23 Kꞌaxal nabaleb li raylal li tintakla saꞌ xbe̱neb. Chanchan nak tincuteb riqꞌuin tzimaj. 24 Telajeꞌca̱mk xban cueꞌej ut xban li caki yajel ut li tik. Tintaklaheb li joskꞌ aj xul chixtiubaleb. Ut teꞌtiꞌekꞌ xbaneb li cꞌantiꞌ li nequeꞌcamsin. 25 Telajeꞌcamsi̱k riqꞌuin chꞌi̱chꞌ li cuanqueb saꞌ be. Ut cꞌajoꞌ nak teꞌxucuak saꞌ li rochocheb. Telajeꞌca̱mk li sa̱jeb, joꞌ chꞌajom, joꞌ xkaꞌal. Telajeꞌca̱mk li cꞌulaꞌal ut li ac ti̱xeb. 26 Ut xinye nak tinjeqꞌuiheb yalak bar. Ut incꞌaꞌ chic teꞌpatzꞌekꞌ xcꞌabaꞌeb. 27 Xinsach raj ruheb chi junaj cua, abanan incꞌaꞌ xcuaj nak eb li xicꞌ nequeꞌiloc reheb teꞌxnimobresi ribeb chixyebal, “La̱o xosachoc reheb. Ma̱cuaꞌ li Ka̱cuaꞌ,” chaꞌakeb. 28 Eb laj Israel ma̱cꞌaꞌeb xnaꞌleb ut incꞌaꞌ nequeꞌxtau xya̱lal. 29 Us raj cui cuan xnaꞌlebeb. Us raj nak teꞌxqꞌue retal li raylal li teꞌxcꞌul. Ut us raj ajcuiꞌ cui teꞌxqꞌue retal chanru nak teꞌosokꞌ. 30 ¿Chanru nak jun chi cui̱nk ta̱ra̱lina jun mil chi cristian? Ut, ¿chanru nak cuib chi cui̱nk teꞌra̱lina laje̱b mil? Teꞌxcꞌul chi joꞌcan xban nak li Ka̱cuaꞌ lix Dioseb ac quixcanabeb xjuneseb ut quixtzꞌekta̱naheb. 31 Eb li xicꞌ nequeꞌiloc reheb nequeꞌxqꞌue retal nak lix jalanil dios moco juntakꞌe̱t ta riqꞌuin lix Dioseb laj Israel. 32 Eb li xicꞌ nequeꞌiloc reheb chanchaneb laj Sodoma ut chanchaneb laj Gomorra. Li cꞌaꞌru nequeꞌxba̱nu chanchaneb ru li uvas li cꞌa li nacamsin. 33 Lix tijleb chanchan li vino li yi̱banbil riqꞌuin xmay li cꞌantiꞌ. 34 Li Ka̱cuaꞌ naxnau cꞌaꞌru queꞌxba̱nu li xicꞌ nequeꞌiloc reheb laj Israel. Cuan saꞌ xchꞌo̱l li cꞌaꞌru queꞌxba̱nu. 35 Cuulac re xkꞌehil nak li Ka̱cuaꞌ tixqꞌue re̱kaj reheb li incꞌaꞌ us queꞌxba̱nu ut telajeꞌtꞌanekꞌ. Cuulac re xkꞌehil nak teꞌsachekꞌ ruheb ut teꞌosokꞌ. 36 Li Ka̱cuaꞌ ta̱rakok a̱tin saꞌ xbe̱neb lix tenamit. Abanan, xban nak naxraheb ta̱ril xtokꞌoba̱l ruheb nak tixqꞌue retal nak ma̱cꞌaꞌ chic xmetzꞌe̱uheb. Ta̱ruxta̱na ruheb nak ta̱ril nak ma̱cꞌaꞌeb xmetzꞌe̱uheb li nequeꞌcꞌanjelac chiru. 37 Ut li Ka̱cuaꞌ tixye reheb: —¿Bar cuanqueb le̱ dios li cꞌojcꞌo cuiꞌ le̱ chꞌo̱l? 38 Quemayeja le̱ cha̱bil mayej chiruheb ut quemayeja le̱ vino chiruheb. Cha̱lk anakcuan. Xtenkꞌakex ut xcolakex. 39 ¿Ma incꞌaꞌ nequenau nak la̱in li Ka̱cuaꞌ Dios? Ma̱cꞌaꞌ chic junak dios chicuu la̱in. Caꞌaj cuiꞌ la̱in. La̱in nincamsin ut la̱in ninqꞌuehoc yuꞌam. La̱in ninqꞌuehoc raylal ut la̱in ninbanoc. Ut ma̱ ani ta̱ru̱k tixcol rib saꞌ cuukꞌ. 40 La̱in nintaksi li cuukꞌ saꞌ choxa ut ninye: La̱in li yoꞌyo̱quil Dios chi junelic kꞌe cutan. 41 La̱in tinqꞌue xkꞌesnal lin chꞌi̱chꞌ ut la̱in tinrakok a̱tin. La̱in tinqꞌue re̱kaj reheb li xicꞌ nequeꞌiloc cue ut tinqꞌueheb chixtojbal xma̱queb. 42 Ta̱tꞌanekꞌ li quicꞌ chiru lin tzimaj nak tincamsiheb li xicꞌ nequeꞌiloc cue. Ma̱ ani ta̱colekꞌ chicuu nak tinpletik riqꞌuineb. Telajeꞌcamsi̱k chixjunileb joꞌ eb li tochꞌol ut eb li cuanqueb chi pre̱xil, joꞌ eb ajcuiꞌ li cuanqueb xcuanquil saꞌ xya̱nkeb li xicꞌ nequeꞌiloc cue, chan li Dios. 43 La̱ex li xni̱nkal ru tenamit, te̱qꞌue xlokꞌal lix tenamit li Ka̱cuaꞌ xban nak li Ka̱cuaꞌ tixsach ruheb li xicꞌ nequeꞌiloc reheb. Li Ka̱cuaꞌ tixqꞌue re̱kaj reheb li queꞌcamsin reheb lix tenamit, abanan tixcuy xma̱queb lix tenamit ut ta̱risi li ma̱usilal saꞌ lix naꞌajeb. 44 Laj Moisés quicuulac rochben laj Josué li ralal laj Nun ut quixye reheb li tenamit li ra̱tinal li bich aꞌin. 45 Laj Moisés quirakeꞌ xyebal li ra̱tinal li bich reheb chixjunileb laj Israel. 46 Tojoꞌnak quixye reheb: —Qꞌuehomak retal chixjunil li xinye e̱re chiru li cutan aꞌin ut cheba̱nuhak. Ut te̱ye reheb le̱ ralal e̱cꞌajol nak teꞌxba̱nu chixjunil li naxye saꞌ li chakꞌrab aꞌin. 47 Li chakꞌrab li quixqꞌue li Dios ma̱cuaꞌ yal a̱tin. Cuan ban rajbal xban nak aꞌan ta̱qꞌuehok e̱yuꞌam. Cui te̱ba̱nu li cꞌaꞌru naxye saꞌ li chakꞌrab, najt texcua̱nk saꞌ li naꞌajej li xic e̱re chire̱chaninquil jun pacꞌal li nimaꞌ Jordán, chan laj Moisés. 48 Saꞌ ajcuiꞌ li cutan aꞌan li Ka̱cuaꞌ quixye re laj Moisés: 49 —Tatxic saꞌ xbe̱n li tzu̱l Nebo li cuan saꞌ xya̱nkeb li tzu̱l re Abarim saꞌ lix naꞌajeb laj Moab, li cuan chiru li tenamit Jericó. Ut aran saꞌ xbe̱n li tzu̱l Nebo ta̱cuil li naꞌajej Canaán li tinqꞌue reheb laj Israel re teꞌre̱chani. 50 Ut saꞌ li tzu̱l aꞌan tatca̱mk ut ta̱tauheb la̱ cuechꞌalal li ac camenakeb joꞌ nak laj Aarón la̱ cuas quicam saꞌ li tzu̱l Hor ut coxtauheb li rechꞌalal li ac camenakeb. 51 Ta̱cꞌulma̱nk chi joꞌcan xban nak chixcabichalex xekꞌet li cua̱tin chiruheb laj Israel nak cuanquex chiru li haꞌ li cuan Meriba li cuan Cades saꞌ li chaki chꞌochꞌ Zin. La̱ex incꞌaꞌ xeqꞌue inlokꞌal chiruheb laj Israel. 52 Joꞌcan nak yal ta̱cuil li naꞌajej chi najt. Incꞌaꞌ naru tat-oc saꞌ li naꞌajej li tinqꞌue reheb li ralal xcꞌajol laj Israel. |
© 2019, Wycliffe Bible Translators. All rights reserved.
Wycliffe Bible Translators, Inc.