Deuteronomio 31 - Li Santil hu

Laj Josué quixakaba̱c chokꞌ ru̱chil laj Moisés

¹ Saꞌ jun li cutan laj Moisés quia̱tinac cuiꞌchic riqꞌuineb laj Israel ut quixye reheb:

² —Anakcuan ac ti̱xin chic chi us. Cuakcꞌa̱l (120) chihab cuan cue. Incꞌaꞌ chic nincuy cꞌamoc be che̱ru. Li Ka̱cuaꞌ Dios quixye cue nak la̱in incꞌaꞌ tinnumekꞌ jun pacꞌal li nimaꞌ Jordán.

³ Li Ka̱cuaꞌ le̱ Dios, aꞌan ta̱cꞌamok be che̱ru nak texnumekꞌ jun pacꞌal li nimaꞌ. Aꞌan ta̱sachok reheb li tenamit nak yo̱kex chi xic re nak texnumta̱k saꞌ xbe̱neb ut te̱re̱chani li naꞌajej. Laj Josué, aꞌan li ta̱cꞌamok re le̱ be joꞌ quixye li Ka̱cuaꞌ.

⁴ Li Ka̱cuaꞌ tixba̱nu reheb li tenamit aꞌin joꞌ quixba̱nu reheb laj Sehón ut laj Og, lix reyeb laj amorreo. Quixsach ruheb aꞌan, joꞌ ajcuiꞌ lix tenamiteb.

⁵ Li Ka̱cuaꞌ tixkꞌaxtesiheb saꞌ e̱rukꞌ ut texnumta̱k saꞌ xbe̱neb. Tento nak te̱ba̱nu reheb chixjunil li xinye e̱re.

⁶ Cacuubresihomak e̱chꞌo̱l ut chicua̱nk e̱metzꞌe̱u. Mexxucuak chi moco texcꞌoxlak xbaneb, xban nak li Ka̱cuaꞌ incꞌaꞌ texcanab e̱junes. Cua̱nk ban e̱riqꞌuin chi junelic, chan laj Moisés.

⁷ Ut chirix aꞌan laj Moisés quixbok laj Josué ut chiruheb chixjunileb laj Israel quixye re: —Cacuubresi a̱chꞌo̱l, at Josué, ut cauhak taxak a̱cuib, xban nak la̱at tatcꞌamok be chiruheb li tenamit nak teꞌoc saꞌ li naꞌajej li quixyechiꞌi li Ka̱cuaꞌ reheb le̱ xeꞌto̱nil yucuaꞌ. La̱at ta̱cꞌam xbeheb chire̱chaninquil li naꞌajej.

⁸ Li Ka̱cuaꞌ ta̱cua̱nk a̱cuiqꞌuin. Aꞌan ta̱cꞌamok be cha̱cuu. Incꞌaꞌ tatxcanab a̱junes chi moco tatxtzꞌekta̱na. Joꞌcan nak matxucuac chi moco ta̱chꞌina̱nk a̱chꞌo̱l, chan laj Moisés.

⁹ Ut laj Moisés quixtzꞌi̱ba li chakꞌrab aꞌin ut quixqꞌue reheb laj tij, eb li ralal laj Leví. Aꞌan eb li nequeꞌcꞌamoc re li Lokꞌlaj Ca̱x li cuan cuiꞌ li contrato li quixba̱nu li Ka̱cuaꞌ. Ut quixqꞌue ajcuiꞌ reheb li cui̱nk li nequeꞌcꞌamoc be saꞌ xya̱nkeb laj Israel.

¹⁰ Ut laj Moisés quixye reheb: —Rajlal saꞌ li xcuuk chihab nak nacuyeꞌ xma̱queb riqꞌuin lix cꞌaseb, ta̱cuil li chakꞌrab chiruheb li tenamit nak yo̱keb chi ninkꞌei̱c saꞌ li cocꞌ muheba̱l yi̱banbil riqꞌuin rukꞌ cheꞌ.

¹¹ Nak teꞌxchꞌutub ribeb chixjunileb laj Israel chixlokꞌoninquil li Ka̱cuaꞌ saꞌ li naꞌajej li tixye e̱re, aran te̱ril xsaꞌ li chakꞌrab aꞌin saꞌ xxiqueb chixjunileb.

¹² Ta̱chꞌutub ruheb chixjunileb laj Israel, joꞌ cui̱nk, joꞌ ixk, joꞌ cocꞌal. Ut joꞌcan ajcuiꞌ li jalaneb xtenamit li cuanqueb saꞌ e̱ya̱nk. Ta̱chꞌutubeb chixjunileb re nak teꞌrabi ut teꞌxtzol rib chixba̱nunquil li naxye saꞌ li chakꞌrab aꞌin. Cheꞌxxucua ru li Ka̱cuaꞌ le̱ Dios ut teꞌxqꞌue xchꞌo̱l chixba̱nunquil li naxye li chakꞌrab.

¹³ Tento nak teꞌrabi eb li ralal xcꞌajoleb, li toj ma̱jiꞌ nequeꞌrabi li chakꞌrab aꞌin. Teꞌxtzol ribeb chixxucuanquil ru li Ka̱cuaꞌ le̱ Dios joꞌ najtil teꞌcua̱nk saꞌ li naꞌajej li xic e̱re chire̱chaninquil nak te̱kꞌax li nimaꞌ Jordán, chan laj Moisés.

¹⁴ Li Ka̱cuaꞌ quixye re laj Moisés: —Cuulac re xkꞌehil nak tatca̱mk. Ta̱bok chak laj Josué ut saꞌ cuibal texxic saꞌ li tabernáculo re nak tinxakab laj Josué saꞌ xcꞌanjel, chan. Ut laj Moisés ut laj Josué queꞌco̱eb saꞌ li tabernáculo ut queꞌxakli chiru li Ka̱cuaꞌ.

¹⁵ Ut li Ka̱cuaꞌ quixcꞌutbesi rib saꞌ jun li chok ut quixakli saꞌ xbe̱n li oqueba̱l re li tabernáculo.

¹⁶ Ut li Ka̱cuaꞌ quixye re laj Moisés: —La̱at tatxic chi hila̱nc a̱cuochbeneb la̱ xeꞌto̱nil yucuaꞌ. Chi se̱b li tenamit aꞌin teꞌxtiquib xlokꞌoninquileb li jalanil dios saꞌ li naꞌajej li teꞌxic cuiꞌ. Chanchanakeb chic li ixk li nequeꞌxcꞌayi ribeb. Tineꞌxtzꞌekta̱na ut teꞌxkꞌet li contrato li quinba̱nu riqꞌuineb.

¹⁷ Saꞌ li cutan aꞌan la̱in tinjoskꞌokꞌ saꞌ xbe̱neb ut tintzꞌekta̱naheb. Tincanabeb xjuneseb ut teꞌsachekꞌ ruheb. Nabal li raylal ut li chꞌaꞌajquilal ta̱cha̱lk saꞌ xbe̱neb. Ut eb aꞌan teꞌxye: —Yo̱co chixcꞌulbal li raylal aꞌin xban nak li Ka̱cuaꞌ li kaDios xoxcanab kajunes, chaꞌkeb.

¹⁸ Ut la̱in incꞌaꞌ tincuabi lix tijeb saꞌ li cutan aꞌan. Tinmuk ban cuib chiruheb xban li ma̱usilal teꞌxba̱nu nak teꞌxlokꞌoniheb li jalanil Dios.

¹⁹ Chatzꞌi̱ba biꞌ li bich aꞌin ut ta̱cꞌut chiruheb laj Israel re nak aꞌaneb teꞌxbicha. Li bich aꞌin tixchꞌolob xya̱lal chiruheb nak incꞌaꞌ us queꞌxba̱nu.

²⁰ La̱in tincꞌameb saꞌ li naꞌajej li kꞌaxal cha̱bil li na-el cuiꞌ chi us li acui̱mk joꞌ quinyechiꞌi reheb lix xeꞌto̱nil yucuaꞌeb. Ta̱cua̱nk chixjunil li tzacae̱mk li teꞌraj ut teꞌcua̱nk aran chi saheb saꞌ xchꞌo̱l. Abanan eb aꞌan teꞌxjal xnaꞌlebeb ut teꞌxlokꞌoniheb li jalanil dios. Tineꞌxtzꞌekta̱na ut teꞌrisi xcuanquil lin contrato.

²¹ Nabal li raylal ut li chꞌaꞌajquilal ta̱cha̱lk saꞌ xbe̱neb. Abanan ta̱bicha̱k li bich aꞌin chokꞌ retalil li ma̱usilal queꞌxba̱nu. La̱in ninnau cꞌaꞌru cuan saꞌ xchꞌo̱leb usta toj ma̱jiꞌ xincꞌameb saꞌ li naꞌajej li quinyechiꞌi reheb, chan li Dios.

²² Ut saꞌ li cutan aꞌan laj Moisés quixtzꞌi̱ba li bich ut quixcꞌut chiruheb laj Israel.

²³ Ut li Ka̱cuaꞌ quia̱tinac riqꞌuin laj Josué li ralal laj Nun ut quixye re: —Cacuubresi a̱chꞌo̱l ut chicua̱nk a̱metzꞌe̱u xban nak la̱at tatcꞌamok reheb laj Israel saꞌ li naꞌajej li xinyechiꞌi reheb riqꞌuin juramento. Ut la̱in tincua̱nk a̱cuiqꞌuin, chan.

²⁴ Ut laj Moisés quixchoy xtzꞌi̱banquil li chakꞌrab saꞌ xticlajic toj saꞌ rosoꞌjic.

²⁵ Chirix aꞌan quixye reheb laj levita li nequeꞌpakon re li Lokꞌlaj Ca̱x li cuan cuiꞌ lix contrato li Ka̱cuaꞌ:

²⁶ —Cꞌamomak li hu aꞌin li tzꞌi̱banbil cuiꞌ li chakꞌrab ut te̱qꞌue chixcꞌatk li Lokꞌlaj Ca̱x li cuan cuiꞌ lix contrato li Ka̱cuaꞌ le̱ Dios. Aran ta̱cua̱nk chokꞌ retalil che̱ru.

²⁷ La̱in ninnau nak aj kꞌetoleb a̱tin li tenamit aꞌin ut kꞌaxal cauheb xchꞌo̱l. Xeꞌxkꞌetkꞌeti ribeb chiru li Ka̱cuaꞌ nak cuanquin riqꞌuineb. Ut kꞌaxal cuiꞌchic teꞌxba̱nu nak ac xincam nak ma̱ anihakin chic riqꞌuineb.

²⁸ Ta̱chꞌutubeb chicuu chixjunileb li nequeꞌcꞌamoc be joꞌ eb ajcuiꞌ li nequeꞌtaklan re nak la̱in tina̱tinak riqꞌuineb. Ut cutan saken chiru li choxa ut li ruchichꞌochꞌ nak nequenau cꞌaꞌru te̱cꞌul cui te̱kꞌet li chakꞌrab li xinye anakcuan.

²⁹ La̱in ninnau nak chirix lin camic eb li tenamit teꞌxba̱nu li ma̱usilal ut teꞌxtzꞌekta̱na li cꞌaꞌru xinye reheb. Raylal ta̱cha̱lk saꞌ xbe̱neb chiruheb li cutan cha̱lel xban nak teꞌxba̱nu li ma̱usilal chiru li Ka̱cuaꞌ. Teꞌxqꞌue xjoskꞌil li Ka̱cuaꞌ riqꞌuin li cꞌaꞌru teꞌxyi̱b riqꞌuin li rukꞌeb.—

³⁰ Ut laj Moisés quixye li ra̱tinal li bich aꞌin reheb chixjunileb laj Israel li chꞌutchꞌu̱queb aran. Quixye reheb chalen saꞌ xticlajic toj saꞌ rosoꞌjic li bich.