Deuteronomio 30 - Li Santil hu

¹ Nak acak xecꞌul chixjunil le̱ rosobtesinquil ut le̱ xtzꞌekta̱nanquil li xinye e̱re anakcuan, te̱cꞌoxla chi us saꞌ li naꞌajej li textakla̱k cuiꞌ xban li Ka̱cuaꞌ le̱ Dios saꞌ xya̱nkeb li xni̱nkal ru tenamit.

² Nak la̱ex joꞌ eb ajcuiꞌ le̱ ralal e̱cꞌajol te̱jal e̱cꞌaꞌux ut texsukꞌi̱k riqꞌuin li Ka̱cuaꞌ le̱ Dios, chi anchal e̱chꞌo̱l ut chi anchal e̱metzꞌe̱u te̱ba̱nu li cꞌaꞌru naraj aꞌan joꞌ yo̱quin chixyebal e̱re anakcuan.

³ Nak texsukꞌi̱k riqꞌuin li Ka̱cuaꞌ le̱ Dios texrosobtesi cuiꞌchic ut ta̱ril xtokꞌoba̱l e̱ru. Ut texrisi saꞌ eb li jalan tenamit li quixjeqꞌui cuiꞌ e̱ru.

⁴ Usta kꞌaxal najt quextakla li Ka̱cuaꞌ, abanan toj aran tixchꞌutub chak e̱ru li Ka̱cuaꞌ le̱ Dios ut texcꞌam cuiꞌchic saꞌ le̱ naꞌaj.

⁵ Texcꞌam cuiꞌchic saꞌ li naꞌajej li quiqꞌueheꞌ reheb le̱ xeꞌto̱nil yucuaꞌ ut la̱ex te̱re̱chani li naꞌajej. Texrosobtesi ut kꞌaxal cuiꞌchic texta̱mk chiruheb le̱ xeꞌto̱nil yucuaꞌ ut kꞌaxal biomakex.

⁶ Chanchan nak te̱ba̱nu li circuncisión nak li Ka̱cuaꞌ ta̱risi saꞌ le̱ ra̱m li incꞌaꞌ us, joꞌ tixba̱nu reheb le̱ ralal e̱cꞌajol re nak te̱ra li Ka̱cuaꞌ le̱ Dios chi anchal e̱chꞌo̱l ut chi anchal le̱ ra̱m ut ta̱cua̱nk le̱ yuꞌam chi junelic.

⁷ Ut li Ka̱cuaꞌ le̱ Dios tixtakla chixjunil li raylal aꞌin saꞌ xbe̱neb li xicꞌ nequeꞌiloc e̱re, li nequeꞌrahobtesin e̱re.

⁸ Te̱ba̱nu cuiꞌchic li cꞌaꞌru naraj li Ka̱cuaꞌ le̱ Dios ut te̱ba̱nu chixjunil li chakꞌrab li yo̱quin chixqꞌuebal e̱re saꞌ li cutan aꞌin.

⁹ Ut li Ka̱cuaꞌ le̱ Dios texrosobtesi re nak us tex-e̱lk riqꞌuin chixjunil li cꞌaꞌru te̱ba̱nu. Teꞌnabalokꞌ le̱ ralal e̱cꞌajol ut teꞌta̱mk le̱ queto̱mk. Ut nabalak ajcuiꞌ li ru le̱ racui̱mk. Li Ka̱cuaꞌ ta̱sahokꞌ saꞌ xchꞌo̱l e̱riqꞌuin ut texrosobtesi joꞌ quixba̱nu reheb le̱ xeꞌto̱nil yucuaꞌ.

¹⁰ Abanan tento nak te̱ba̱nu li cꞌaꞌru naraj li Ka̱cuaꞌ le̱ Dios. Te̱ba̱nu chixjunil li chakꞌrab li tzꞌi̱banbil saꞌ li hu aꞌin. Tento nak te̱sicꞌ li Ka̱cuaꞌ le̱ Dios chi anchal le̱ chꞌo̱l ut chi anchal le̱ ra̱m.

¹¹ Moco chꞌaꞌaj ta xba̱nunquil le̱ chakꞌrabinquil li yo̱quin chixqꞌuebal e̱re anakcuan. Naru te̱ba̱nu li cꞌaꞌru naxye xban nak moco najt ta cuan e̱riqꞌuin.

¹² Moco saꞌ choxa ta cuan chak. Ut incꞌaꞌ naru te̱ye: ¿Ani ta̱takekꞌ saꞌ choxa chixcꞌambal chak li chakꞌrab ut tixye ke cꞌaꞌru naxye re nak naru takaba̱nu?

¹³ Chi moco jun pacꞌal li palau cuan chak, re nak te̱ye: ¿Ani takatakla jun pacꞌal li palau re ta̱xic chixcꞌambal chak li chakꞌrab ut tixye ke cꞌaꞌru naxye re nak naru takaba̱nu?

¹⁴ Me̱ye chi joꞌcan xban nak li chakꞌrab cuan e̱riqꞌuin. Cuan chi xtzꞌu̱mal e̱re ut cuan saꞌ le̱ chꞌo̱l re nak ta̱ru̱k te̱ba̱nu li cꞌaꞌru naxye.

¹⁵ Cheqꞌuehak retal anakcuan li cꞌaꞌru yo̱quin chixyebal e̱re. Xinye e̱re chanru naru ta̱cua̱nk le̱ yuꞌam ut le̱ cha̱bilal. Ut xinye ajcuiꞌ e̱re chanru nacuan li ca̱mc ut li ma̱usilal. Tento te̱sicꞌ ru bar cuan li te̱ba̱nu.

¹⁶ Anakcuan yo̱quin chixyebal e̱re nak te̱ra li Ka̱cuaꞌ le̱ Dios ut te̱ba̱nu li cꞌaꞌru naraj aꞌan. Cheba̱nu le̱ taklanquil xban ut te̱ba̱nu li cꞌaꞌru naxye saꞌ lix chakꞌrab. Cui te̱ba̱nu aꞌan, ta̱cua̱nk le̱ yuꞌam ut teꞌcua̱nk nabal le̱ ralal e̱cꞌajol. Ut li Ka̱cuaꞌ le̱ Dios ta̱osobtesi̱nk e̱re saꞌ li naꞌajej li oc e̱re chire̱chaninquil anakcuan.

¹⁷ Abanan cui te̱jal e̱cꞌaꞌux ut incꞌaꞌ te̱ba̱nu li cꞌaꞌru naxye li Ka̱cuaꞌ, ut cui nequetiquib xpa̱banquil li jalanil dios ut nequecuikꞌib e̱rib chiru chixlokꞌoninquil,

¹⁸ relic chi ya̱l ninye e̱re nak texca̱mk. Ut incꞌaꞌ chic najt texcua̱nk saꞌ li cha̱bil naꞌajej li cuan jun pacꞌal li nimaꞌ Jordán li oc e̱re chire̱chaninquil anakcuan.

¹⁹ Chiru li choxa ut chiru li ruchichꞌochꞌ ninye e̱re nak te̱sicꞌ ru li cꞌaꞌru te̱raj. ¿Ma te̱raj le̱ yuꞌam malaj ut te̱raj li ca̱mc? ¿Ma te̱raj te̱cꞌul le̱ rosobtesinquil malaj ut te̱raj le̱ tzꞌekta̱nanquil? Sicꞌomak ru li yuꞌam re nak yoꞌyo̱kex ut yoꞌyo̱keb ajcuiꞌ le̱ ralal e̱cꞌajol.

²⁰ Te̱ra taxak li Ka̱cuaꞌ le̱ Dios ut te̱ba̱nu taxak li cꞌaꞌru naxye aꞌan. Ti̱cak taxak le̱ chꞌo̱l chiru ut me̱jal taxak e̱cꞌaꞌux. Li Ka̱cuaꞌ ta̱qꞌuehok re le̱ yuꞌam re nak najt texcua̱nk saꞌ li naꞌajej li quixyechiꞌi riqꞌuin juramento reheb le̱ xeꞌto̱nil yucuaꞌ, laj Abraham, laj Isaac ut laj Jacob, chan laj Moisés.