Deuteronomio 3 - Li Santil hu

¹ Chirix aꞌan co̱o saꞌ li be li naxic Basán. Ut laj Og, lix reyeb laj Basán, rochbeneb lix soldado queꞌchal chi pletic kiqꞌuin aran Edrei.

² Ut li Ka̱cuaꞌ quixye cue: “Matxucuac xban laj Og xban nak la̱in tinkꞌaxtesi saꞌ e̱rukꞌ rochbeneb chixjunileb lix soldado ut lix naꞌajeb. Ta̱ba̱nu re joꞌ xaba̱nu re laj Sehón, lix reyeb laj amorreo li quicuan Hesbón,” chan.

³ Joꞌcan nak li Ka̱cuaꞌ li kaDios quixkꞌaxtesi saꞌ kukꞌ laj Og lix reyeb laj Basán rochbeneb chixjunileb lix soldado. Kasach ruheb chixjunileb. Ma̱ jun chic queꞌcana.

⁴ Ut quike̱chani chixjunileb li tenamit. Ma̱ jun incꞌaꞌ ta quike̱chani. Oxcꞌa̱l li tenamit kachap. Aꞌan chixjunil li naꞌajej Argob li quitaklan cuiꞌ li rey Og aran Basán.

⁵ Chixjunileb li tenamit aꞌin cauresinbileb chi us. Najt xteram eb li tzꞌac li sutsu̱queb cuiꞌ ut tzꞌaptzꞌo̱queb li oqueba̱l riqꞌuin chꞌi̱chꞌ. Ut cuanqueb ajcuiꞌ nabal li tenamit li kachap li moco sutsu̱queb ta riqꞌuin tzꞌac.

⁶ Kasach chixjunileb li tenamit joꞌ kaba̱nu re laj Sehón lix reyeb laj Hesbón. Ut kasach ruheb li cristian, joꞌ cui̱nk, joꞌ ixk, ut joꞌ cocꞌal.

⁷ Ut kaxoc li queto̱mk chokꞌ ke ut li cꞌaꞌru cuan saꞌ eb lix tenamit.

⁸ Saꞌ eb li cutan aꞌan la̱o quike̱chani lix naꞌajeb li cuib chi xreyeb laj amorreo. Quike̱chani chixjunil li naꞌajej li cuan saꞌ lix pacꞌal li nimaꞌ Jordán li cuanco cuiꞌ. Naticla cuan cuiꞌ li nimaꞌ Arnón ut nacuulac toj saꞌ li tzu̱l Hermón.

⁹ (Eb laj Sidón nequeꞌxye Sirión re li naꞌajej Hermón ut eb laj amorreo nequeꞌxye Senir re.)

¹⁰ Quike̱chani chixjunileb li tenamit li cuanqueb saꞌ li ru takꞌa, li naꞌajej Galaad, li naꞌajej Basán ut eb li naꞌajej toj Salca ut Edrei. Aꞌaneb lix naꞌaj li rey Og aran Basán.

¹¹ (Chirix lix camic li rey Og, ma̱ jun chic xcana xcomoneb li ni̱nki cui̱nk. Lix chꞌa̱t laj Og yi̱banbil riqꞌuin chꞌi̱chꞌ. Numenak ca̱hib metro rok ut numenak cuib metro ru. Toj naru rilbal saꞌ li tenamit Rabá, lix tenamiteb li ralal xcꞌajol laj Amón.)

¹² Nak quike̱chani li naꞌajej, la̱in quinqꞌue reheb li ralal xcꞌajol laj Rubén ut eb li ralal xcꞌajol laj Gad li naꞌajej li cuan saꞌ li norte. Naticla Aroer chire li nimaꞌ Arnón ut quinqꞌue yijach li naꞌajej li tzu̱l ru li cuan Galaad rochbeneb li tenamit li cuanqueb aran.

¹³ Ut reheb yijach li ralal xcꞌajol laj Manasés quinqꞌue li yijach jun chic li tzu̱l ru li cuan Galaad, joꞌ ajcuiꞌ li naꞌajej Basán, li quicuan cuiꞌ chi takla̱nc li rey Og. Ut quinqꞌue ajcuiꞌ reheb chixjunil li naꞌajej Argob, li nequeꞌxye “xnaꞌajeb li ni̱nki cui̱nk” re.

¹⁴ Laj Jair, xcomoneb li ralal xcꞌajol laj Manasés quire̱chani chixjunil li naꞌajej Argob nacuulac toj saꞌ li nuba̱l re li naꞌajej Gesur ut Maaca. Ut quixqꞌue chokꞌ xcꞌabaꞌ Basán-havot-jair joꞌ lix cꞌabaꞌ aꞌan. Aꞌan lix cꞌabaꞌ toj chalen anakcuan.

¹⁵ Li naꞌajej Galaad quinqꞌue re laj Maquir.

¹⁶ Ut reheb li ralal xcꞌajol laj Rubén ut eb li ralal xcꞌajol laj Gad quinqꞌue li naꞌajej li naticla Galaad ut nacuulac toj saꞌ li nimaꞌ Arnón ut nacuulac cuan cuiꞌ li nimaꞌ Jaboc li nuba̱l re lix naꞌajeb li ralal xcꞌajol laj Amón.

¹⁷ Saꞌ li oeste lix naꞌajeb quicuulac cuan cuiꞌ li nimaꞌ Jordán. Naticla cuan cuiꞌ li palau Cineret ut quicuulac cuan cuiꞌ li palau Mar Muerto xcꞌabaꞌ li cuan saꞌ li sur. Nacuulac cuan cuiꞌ li tzu̱l Pisga li cuan saꞌ li este.

¹⁸ Saꞌ li cutan aꞌan la̱in quinye e̱re, Li Ka̱cuaꞌ li kaDios xqꞌue e̱re li naꞌajej aꞌin re texcua̱nk cuiꞌ. Cauresihomakeb li cauheb xchꞌo̱l chi pletic ut taklahomakeb jun pacꞌal li nimaꞌ Jordán re xtenkꞌanquileb li jun chꞌol chic laj Israel chixcolbal rix lix naꞌajeb.

¹⁹ Ut caꞌaj eb cuiꞌ li ixakilbej ut eb li cocꞌal teꞌcana̱k saꞌ eb li tenamit li xinqꞌue e̱re. Ut eb le̱ queto̱mk teꞌcana̱k xban nak ninnau nak nabaleb le̱ queto̱mk.

²⁰ Incꞌaꞌ naru texsukꞌi̱k saꞌ le̱ naꞌaj la̱ex toj teꞌre̱chani lix naꞌajeb li jun chꞌol chic joꞌ nak li Ka̱cuaꞌ xqꞌue e̱re la̱ex. Nak ac cua̱nkeb saꞌ lix naꞌajeb chi cꞌojcꞌo xchꞌo̱leb naru texsukꞌi̱k saꞌ li naꞌajej li xqꞌueheꞌ e̱re la̱ex.

²¹ Saꞌ li cutan aꞌan la̱in quinchakꞌrabi laj Josué ut quinye re: La̱ex xeril riqꞌuin xnakꞌ e̱ru chixjunil li quixba̱nu li Ka̱cuaꞌ riqꞌuineb li cuib chi rey nak coxtenkꞌa chi numta̱c saꞌ xbe̱neb. Joꞌcan ajcuiꞌ tixba̱nu riqꞌuineb chixjunileb li rey li cuanqueb bar texnumekꞌ cuiꞌ.

²² Mexxucuac xban nak moco e̱junes ta texpletik riqꞌuineb. Li Ka̱cuaꞌ le̱ Dios ban ta̱tenkꞌa̱nk e̱re chi pletic riqꞌuineb.

²³ La̱in quintijoc chiru li Ka̱cuaꞌ saꞌ li cutan aꞌan ut quinye re:

²⁴ At nimajcual Dios, la̱in aj cꞌanjel cha̱cuu. Xatiquib xcꞌutbal la̱ cuanquilal chicuu. Ninnau nak kꞌaxal nim la̱ cuanquil xban nak ma̱cꞌaꞌ chic junak dios tixba̱nu joꞌ nacaba̱nu la̱at. Ma̱ jun cuan, chi moco saꞌ choxa, chi moco saꞌ ruchichꞌochꞌ.

²⁵ Nintzꞌa̱ma cha̱cuu nak china̱canab chi xic jun pacꞌal li nimaꞌ Jordán chirilbal li cha̱bil naꞌajej. Tincuil taxak li cha̱bil naꞌajej li tzu̱l ru ut li naꞌajej Líbano, chanquin re.

²⁶ Abanan e̱ma̱c la̱ex nak quijoskꞌoꞌ li Ka̱cuaꞌ cuiqꞌuin ut incꞌaꞌ quirabi li cꞌaꞌru quintzꞌa̱ma chiru. Quixye cue, “Tzꞌakal li xaye. Mat-a̱tinac chic chirix aꞌan.

²⁷ Ayu saꞌ xbe̱n li tzu̱l Pisga ut tat-ilok saꞌ li ca̱hib pacꞌal. Tat-ilok saꞌ li oeste, saꞌ li norte, saꞌ li sur ut saꞌ li este. Ta̱cuil chi us li naꞌajej aꞌan xban nak la̱at incꞌaꞌ naru tatnumekꞌ jun pacꞌal li nimaꞌ Jordán.

²⁸ Ta̱xakab laj Josué chi cꞌanjelac. Ta̱qꞌue xcacuilal xchꞌo̱l ut ta̱qꞌue xnaꞌleb xban nak aꞌan li ta̱cꞌamok be chiruheb li tenamit nak teꞌxic jun pacꞌal li nimaꞌ chire̱chaninquil li naꞌajej li yo̱cat chirilbal anakcuan”, chan cue.

²⁹ Joꞌcan nak cocana saꞌ li ru takꞌa chiru li tenamit Bet-peor.