Deuteronomio 29 - Li Santil hu

Lix contrato li Dios riqꞌuineb laj Israel

¹ Aꞌan aꞌin li contrato li quixye li Dios re laj Moisés re tixba̱nu riqꞌuineb laj Israel nak cuanqueb saꞌ li naꞌajej Moab. Aꞌan aꞌin lix comon li contrato li quixba̱nu li Dios riqꞌuineb saꞌ li tzu̱l Horeb.

² Laj Moisés quixchꞌutubeb chixjunileb laj Israel ut quixye reheb: —La̱ex queril li cꞌaꞌru quixba̱nu li Ka̱cuaꞌ re laj faraón lix reyeb laj Egipto ut reheb chixjunileb li nequeꞌtenkꞌan reheb joꞌ eb ajcuiꞌ chixjunileb li tenamit.

³ La̱ex queril chixjunil li raylal, li milagro ut li sachba chꞌo̱lej li quixba̱nu li Ka̱cuaꞌ.

⁴ Ut toj chalen anakcuan li Dios incꞌaꞌ xexqꞌue chixtaubal ru li cꞌaꞌru xeril ut li cꞌaꞌru xerabi.

⁵ Chiru caꞌcꞌa̱l chihab nak la̱in xincꞌamoc be che̱ru saꞌ li chaki chꞌochꞌ, incꞌaꞌ x-osoꞌ le̱ rakꞌ chi moco le̱ xa̱b li cuan che̱rok.

⁶ Quima̱cꞌaꞌoꞌ le̱ caxlan cua ut le̱ vino. Ut quima̱cꞌaꞌoꞌ ajcuiꞌ le̱ rucꞌa li nachꞌamoꞌ. Abanan li Ka̱cuaꞌ quixqꞌue e̱re re nak te̱nau nak aꞌan li Ka̱cuaꞌ le̱ Dios.

⁷ Ut nak xocꞌulun saꞌ li naꞌajej aꞌin, laj Sehón lix reyeb laj Hesbón ut laj Og lix reyeb laj Basán queꞌchal chi pletic kiqꞌuin. Abanan la̱o xonumta saꞌ xbe̱neb.

⁸ La̱o xke̱chani lix naꞌajeb ut xkajeqꞌui reheb li ralal xcꞌajol laj Rubén, ut reheb li ralal xcꞌajol laj Gad, ut reheb ajcuiꞌ yi jach li ralal xcꞌajol laj Manasés.

⁹ Cheba̱nu chi tzꞌakal re ru chixjunil li naxye saꞌ li contrato aꞌin re nak us tex-e̱lk riqꞌuin li cꞌaꞌru te̱ba̱nu.

¹⁰ Anakcuan xakxo̱quex arin chiru li Ka̱cuaꞌ le̱ Dios. Cuanquex che̱junilex joꞌ eb ajcuiꞌ li nequeꞌcꞌamoc be che̱ru ut eb li nequeꞌtaklan saꞌ e̱be̱n. Cuanqueb chixjunileb li cui̱nk.

¹¹ Ut cuanqueb li ixk ut eb li cocꞌal joꞌ eb ajcuiꞌ li jalan xtenamiteb li cuanqueb saꞌ e̱ya̱nk, li nequeꞌyocꞌoc re le̱ siꞌ ut nequeꞌbelan re le̱ haꞌ.

¹² Cuanquex arin anakcuan re nak te̱ba̱nu li contrato riqꞌuin li Ka̱cuaꞌ le̱ Dios. Riqꞌuin juramento tixba̱nu li contrato li Ka̱cuaꞌ,

¹³ re nak texxakab chokꞌ ralal xcꞌajol. La̱exak lix tenamit ut aꞌanak le̱ Dios joꞌ quixyechiꞌi riqꞌuin juramento reheb le̱ xeꞌto̱nil yucuaꞌ, laj Abraham, laj Isaac, ut laj Jacob.

¹⁴ Ma̱cuaꞌ caꞌaj cuiꞌ e̱riqꞌuin la̱ex aj Israel li xakxo̱quex arin tixba̱nu li contrato riqꞌuin juramento li Ka̱cuaꞌ.

¹⁵ Xakxo aj ban cuiꞌ lix cuanquil chiru chixjunileb le̱ ralal e̱cꞌajol li teꞌcua̱nk mokon.

¹⁶ La̱ex jultic e̱re chanru le̱ yuꞌam nak quexcuan Egipto ut cꞌaꞌru xecꞌul nak yo̱quex chak chi numecꞌ saꞌ lix naꞌajeb li jalaneb xtenamit.

¹⁷ La̱ex xerileb lix jalanil dios li yi̱banbil riqꞌuin cheꞌ, pec, plata ut oro, li xicꞌ naril li Dios.

¹⁸ Cheqꞌue retal nak ma̱ jun saꞌ e̱ya̱nk tixtzꞌekta̱na li Ka̱cuaꞌ le̱ Dios re tixlokꞌoniheb lix jalanil dios li jalaneb xtenamit. Ma̱ jun taxak saꞌ e̱ya̱nk tixba̱nu aꞌan, chi moco li cui̱nk, chi moco li ixk, chi moco jun cabalak, chi moco jun xte̱paleb. Incꞌaꞌ te̱ba̱nu chi joꞌcan re nak ma̱cuaꞌakex joꞌ li cꞌahil kꞌe̱n li nacamsin.

¹⁹ Cui cuan junak saꞌ kaya̱nk ta̱rabi chixjunil li tenebanbil saꞌ kabe̱n ut incꞌaꞌ tixqꞌue xcuanquil ut tixcꞌoxla “us tine̱lk usta tinba̱nu li cꞌaꞌru nacuaj injunes” chaꞌak, xban li jun aꞌan ta̱sachekꞌ e̱ru che̱junilex, li cha̱bil xnaꞌleb joꞌ ajcuiꞌ li incꞌaꞌ us xnaꞌleb.

²⁰ Li Ka̱cuaꞌ incꞌaꞌ tixcuy xma̱c li ani tixba̱nu chi joꞌcan. Ta̱joskꞌokꞌ ban riqꞌuin ut tixtakla saꞌ xbe̱n chixjunil li raylal li tzꞌi̱banbil retalil saꞌ li hu aꞌin toj retal ta̱sachekꞌ ru ut incꞌaꞌ ta̱cua̱nk ralal xcꞌajol.

²¹ Li Ka̱cuaꞌ ta̱risi li cui̱nk aꞌan saꞌ e̱ya̱nk la̱ex aj Israel ut tixtakla li raylal saꞌ xbe̱n joꞌ naxye saꞌ lix contrato li Dios, li tzꞌi̱banbil saꞌ li hu aꞌin.

²² Eb le̱ ralal e̱cꞌajol li teꞌcua̱nk mokon ut eb li jalan xtenamiteb li teꞌcha̱lk chi najt teꞌril li raylal li te̱cꞌul nak li Ka̱cuaꞌ tixsach ru le̱ naꞌaj.

²³ Ma̱cꞌaꞌ chic ta̱e̱lk saꞌ eb le̱ cꞌaleba̱l. Junes azufre ut atzꞌam ta̱cua̱nk saꞌ le̱ chꞌochꞌ. Incꞌaꞌ ta̱e̱lk li acui̱mk chi moco li rax pim. Le̱ naꞌaj chanchanak chic li tenamit Sodoma ut Gomorra ut eb li tenamit Adma ut Zeboim, li queꞌsacheꞌ xban li Ka̱cuaꞌ nak yo̱ xjoskꞌil saꞌ xbe̱neb.

²⁴ Ut chixjunileb li cuanqueb saꞌ li xni̱nkal ru tenamit teꞌxye: ¿Cꞌaꞌut nak quixba̱nu li Ka̱cuaꞌ chi joꞌcan re lix naꞌajeb laj Israel? ¿Cꞌaꞌru xya̱lal nak quinumta lix joskꞌil saꞌ xbe̱neb?

²⁵ Ut ta̱yehekꞌ reheb, “Quixba̱nu chi joꞌcan li Ka̱cuaꞌ xban nak queꞌxkꞌet li contrato li queꞌxba̱nu riqꞌuin li Ka̱cuaꞌ lix Dioseb lix xeꞌto̱nil yucuaꞌeb nak li Dios qui-isin chak reheb saꞌ li naꞌajej Egipto.

²⁶ Queꞌxlokꞌoniheb li jalanil dios li ma̱ jun sut queꞌxlokꞌoni junxil. Queꞌxcuikꞌib ribeb chiruheb li jalanil dios usta ma̱cꞌaꞌ quiqꞌueheꞌ reheb xbaneb.

²⁷ Joꞌcan nak quichal xjoskꞌil li Ka̱cuaꞌ saꞌ xbe̱neb lix tenamit ut quixqꞌue saꞌ lix naꞌajeb chixjunil li raylal li tzꞌi̱banbil retalil saꞌ li hu aꞌin.

²⁸ Xban nak quinumta xjoskꞌil li Ka̱cuaꞌ saꞌ xbe̱neb, joꞌcan nak li Ka̱cuaꞌ quirisiheb saꞌ li naꞌajej aꞌin. Xban xjoskꞌil quixtaklaheb saꞌ jalan naꞌajej li cuanqueb cuiꞌ toj chalen anakcuan,” chuꞌuxk reheb.

²⁹ Cuan li naꞌleb li incꞌaꞌ quixcꞌutbesi chiku li Ka̱cuaꞌ xban nak aꞌan re li Ka̱cuaꞌ li kaDios. Abanan li cꞌaꞌru quixcꞌutbesi chiku, aꞌan ke la̱o ut reheb li kalal kacꞌajol li teꞌcua̱nk mokon re nak takaba̱nu li cꞌaꞌru naxye saꞌ li chakꞌrab aꞌin.