Deuteronomio 28 - Li Santil hu

Osobtesinbilak li ani naxba̱nu li cꞌaꞌru naraj li Dios

¹ Cui la̱ex tex-abi̱nk chiru li Ka̱cuaꞌ ut te̱ba̱nu chi anchal e̱chꞌo̱l li cꞌaꞌru naxye ut cui te̱ba̱nu lix chakꞌrab li yo̱quin chixyebal e̱re anakcuan, kꞌaxal cuiꞌchic tixnimobresi le̱ cuanquil saꞌ xya̱nkeb chixjunileb li tenamit saꞌ ruchichꞌochꞌ.

² Cui te̱ba̱nu li cꞌaꞌru xye li Ka̱cuaꞌ, aꞌan ta̱osobtesi̱nk e̱re.

³ Li Ka̱cuaꞌ texrosobtesi saꞌ le̱ tenamit ut texrosobtesi ajcuiꞌ saꞌ le̱ cꞌaleba̱l.

⁴ Li Ka̱cuaꞌ texrosobtesi ut tixqꞌue nabal e̱ralal e̱cꞌajol. Tixqꞌue nabal li ru le̱ racui̱mk ut tixqꞌue ajcuiꞌ nabal li ral le̱ cuacax ut le̱ carner.

⁵ Osobtesinbilak li naꞌajej li nequexoc cuiꞌ li ru le̱ racui̱mk ut osobtesinbilak ajcuiꞌ li nequeyi̱b cuiꞌ lix kꞌemal le̱ tzacae̱mk.

⁶ Ut osobtesinbilak ajcuiꞌ chixjunil li cꞌanjel li te̱ba̱nu.

⁷ Li Ka̱cuaꞌ tixkꞌaxtesiheb saꞌ e̱rukꞌ li xicꞌ nequeꞌiloc e̱re. Tzololnakeb nak teꞌcha̱lk chi pletic e̱riqꞌuin, abanan sachso̱keb chic xnaꞌleb nak teꞌe̱lelik che̱ru ut teꞌxchaꞌchaꞌi ribeb.

⁸ Li Ka̱cuaꞌ ta̱rosobtesi le̱ cꞌanjel ut ta̱rosobtesi le̱ racui̱mk ut junelic cua̱nk chi nujenak li naꞌajej li nequexoc cuiꞌ li ru le̱ racui̱mk. Li Ka̱cuaꞌ le̱ Dios texrosobtesi saꞌ li naꞌajej li tixqꞌue e̱re.

⁹ Cui la̱ex te̱ba̱nu li cꞌaꞌru naxye li Ka̱cuaꞌ le̱ Dios ut incꞌaꞌ te̱kꞌet lix chakꞌrab, li Ka̱cuaꞌ texxakab chokꞌ jun xsantil tenamit joꞌ quixye e̱re.

¹⁰ Ut chixjunileb li tenamit li cuanqueb saꞌ ruchichꞌochꞌ teꞌxqꞌue retal nak li Ka̱cuaꞌ quisicꞌoc chak e̱ru chokꞌ ralal xcꞌajol ut teꞌxucuak e̱ban.

¹¹ Li Ka̱cuaꞌ tixqꞌue nabal le̱ ralal e̱cꞌajol ut nabal le̱ queto̱mk ut nabal le̱ racui̱mk saꞌ li naꞌajej li tixqꞌue e̱re joꞌ quixyechiꞌi riqꞌuin juramento reheb le̱ xeꞌto̱nil yucuaꞌ.

¹² Li Ka̱cuaꞌ toj saꞌ choxa tixtakla chak li hab saꞌ xkꞌehil ut ta̱rosobtesi le̱ cꞌanjel. Eb li xni̱nkal ru tenamit teꞌxpatzꞌ chi toꞌ cꞌaꞌruheb re e̱riqꞌuin, abanan la̱ex incꞌaꞌ te̱patzꞌ cꞌaꞌru e̱re chi toꞌ riqꞌuineb aꞌan.

¹³ Li Ka̱cuaꞌ tixqꞌue e̱cuanquil saꞌ xbe̱neb li jun chꞌol chic. Cui te̱ba̱nu le̱ chakꞌrabinquil xban li Ka̱cuaꞌ le̱ Dios li yo̱quin chixyebal e̱re anakcuan, la̱ex junelic texcꞌamok be ut incꞌaꞌ texcana̱k chi ixbej.

¹⁴ Me̱canab xba̱nunquil li chakꞌrab li yo̱quin chixqꞌuebal e̱re anakcuan. Ut me̱lokꞌoni li jalanil dios chi moco texcꞌanjelak chiruheb.

¹⁵ Abanan cui incꞌaꞌ te̱ba̱nu li cꞌaꞌru naraj li Dios, ut cui incꞌaꞌ nequeba̱nu li cꞌaꞌru naxye saꞌ lix chakꞌrab ut le̱ taklanquil xban joꞌ yo̱quin chixyebal e̱re anakcuan, ta̱cha̱lk li raylal aꞌin saꞌ e̱be̱n:

¹⁶ Tzꞌekta̱nanbilakex saꞌ le̱ tenamit ut saꞌ ajcuiꞌ le̱ cꞌaleba̱l.

¹⁷ Tzꞌekta̱nanbilakeb li nequexoc cuiꞌ li ru le̱ racui̱mk ut tzꞌekta̱nanbilak ajcuiꞌ li nequeyi̱b cuiꞌ lix kꞌemal le̱ tzacae̱mk.

¹⁸ Incꞌaꞌ chic ta̱cua̱nk le̱ ralal e̱cꞌajol ut incꞌaꞌ chic ta̱e̱lk le̱ racui̱mk chi moco teꞌcua̱nk chic raleb le̱ queto̱mk.

¹⁹ Ut incꞌaꞌ us tex-e̱lk riqꞌuin li cꞌanjel te̱ba̱nu xban nak moco osobtesinbilakex ta chic.

²⁰ Li Ka̱cuaꞌ tixtakla li raylal saꞌ e̱be̱n ut textzꞌekta̱na xban chixjunil li cꞌaꞌru te̱ba̱nu. Sachso e̱chꞌo̱l texcana̱k ut texsachekꞌ chi junpa̱t xban li ma̱usilal te̱ba̱nu nak te̱tzꞌekta̱na li Ka̱cuaꞌ.

²¹ Li Ka̱cuaꞌ tixqꞌue li caki yajel saꞌ e̱be̱n toj retal texsachekꞌ saꞌ li naꞌajej li tex-oc cuiꞌ.

²² Tixtakla nabal pa̱y ru li yajel saꞌ e̱be̱n joꞌ li caki yajel. Texsipokꞌ ut cꞌajoꞌak le̱ tik. Incꞌaꞌ chic tixqꞌue li hab saꞌ xbe̱n le̱ racui̱mk ut cꞌajoꞌ xtikcual. Ta̱moꞌo̱nk le̱ racui̱mk. Cꞌajoꞌ li raylal te̱cꞌul toj retal texca̱mk.

²³ Li choxa ta̱kꞌanokꞌ ru joꞌ li kꞌan chꞌi̱chꞌ bronce xban xtikcual ut li chꞌochꞌ ta̱cacuu̱k ru joꞌ li cacuil chꞌi̱chꞌ hierro.

²⁴ Li Ka̱cuaꞌ toj saꞌ choxa tixtakla chak li poks ut li samaib saꞌ e̱be̱n chokꞌ re̱kaj li hab toj retal tex-osokꞌ.

²⁵ Li Ka̱cuaꞌ texcanab saꞌ rukꞌeb li xicꞌ nequeꞌiloc e̱re. Tzololnakex nak texxic chi pletic, abanan sachso chic e̱naꞌleb nak tex-e̱lelik ut te̱chaꞌchaꞌi e̱rib. Ut chixjunileb li cuanqueb saꞌ ruchichꞌochꞌ teꞌsachk xchꞌo̱leb che̱rilbal xban nak ma̱cꞌaꞌ chic le̱ cuanquil.

²⁶ Eb laj xicꞌanel xul ut eb li joskꞌ aj xul teꞌxtiu le̱ tibel nak camenakex chic ut ma̱ ani ta̱chikꞌok reheb.

²⁷ Li Ka̱cuaꞌ tixtakla li xox che̱rix joꞌ xeꞌxcꞌul eb laj Egipto. Ta̱cua̱nk li raylal saꞌ chixjunil le̱ tibel ut tixpati rib le̱ raylal ut cꞌajoꞌ nak ta̱cuotzꞌocokꞌ ut ma̱cꞌaꞌak xbanol.

²⁸ Li Ka̱cuaꞌ texcanab chi lo̱cocꞌ ut texmutzꞌi̱rk ut sachso̱k le̱ naꞌleb texcana̱k.

²⁹ Yal te̱chꞌeꞌ aj chic le̱ be nak yo̱kex chi be̱c joꞌ nequeꞌxba̱nu li mutzꞌ nak nequeꞌxchꞌeꞌ lix be, usta chi cutan yo̱kex chi be̱c. Ut incꞌaꞌ te̱tau li be li texxic raj cuiꞌ. Incꞌaꞌ tex-e̱lk chi us riqꞌuin li cꞌaꞌru te̱ba̱nu. Junelic rahobtesinbilakex ut ta̱elkꞌa̱k li cꞌaꞌru e̱re. Ma̱ ani ta̱tenkꞌa̱nk e̱re.

³⁰ Usta tzꞌa̱manbilak junak xkaꞌal e̱ban, abanan jalan ta̱cꞌamok re. Texcablak, abanan incꞌaꞌ texcua̱nk saꞌ li cab li te̱yi̱b. Te̱rau le̱ racui̱mk uvas, abanan incꞌaꞌ te̱yal xsahil li ru li tixqꞌue.

³¹ Teꞌcamsi̱k le̱ bo̱yx che̱ru, abanan la̱ex incꞌaꞌ te̱yal xtibel. Yo̱kex chi iloc nak teꞌmakꞌekꞌ che̱ru le̱ bu̱r ut incꞌaꞌ chic ta̱kꞌaxtesi̱k e̱re. Eb le̱ carner teꞌqꞌuehekꞌ reheb li xicꞌ nequeꞌiloc e̱re ut ma̱ ani ta̱tenkꞌa̱nk e̱re re xcolbaleb.

³² Eb le̱ ralal e̱cꞌajol teꞌcꞌamekꞌ chokꞌ rahobtesinbil mo̱seb saꞌ jalan tenamit. Cuulaj cuulaj te̱siqꞌuiheb le̱ ralal e̱cꞌajol, abanan incꞌaꞌ chic te̱tauheb.

³³ Ut li jalaneb xtenamit tixmakꞌ che̱ru le̱ racui̱mk li xetacuasi e̱rib xcꞌanjelanquil. Xicꞌ chic tex-ilekꞌ ut junes raylal chic te̱cꞌul.

³⁴ Ta̱sachekꞌ le̱ naꞌleb xban li raylal li yo̱kex chixcꞌulbal.

³⁵ Li Ka̱cuaꞌ tixcanab chi xoxi̱rc le̱ tibel. Ta̱ticla̱k chak che̱rok ut ta̱cuulak toj le̱ jolom. Kꞌaxal ra te̱cꞌul ut ma̱cꞌaꞌak xbanbal le̱ yajel.

³⁶ Li Ka̱cuaꞌ texqꞌue chi cꞌamecꞌ la̱ex joꞌ ajcuiꞌ le̱ rey saꞌ jalan tenamit li incꞌaꞌ nequenau ru, chi moco le̱ xeꞌto̱nil yucuaꞌ queꞌxnau ru. Ut aran te̱lokꞌoni li jalanil dios li yi̱banbileb riqꞌuin cheꞌ ut riqꞌuin pec.

³⁷ Ut chixjunileb li tenamit teꞌsachk xchꞌo̱leb che̱rilbal. Xicꞌ tex-ilekꞌ ut texseꞌe̱k ut tex-etzꞌu̱k saꞌ li naꞌajej li textakla̱k cuiꞌ xban li Dios.

³⁸ Nabal li iyaj li te̱rau, abanan caꞌchꞌin ajcuiꞌ li ru li te̱xoc xban nak eb laj sa̱cꞌ teꞌxcuaꞌ le̱ racui̱mk.

³⁹ Te̱rau le̱ uvas ut te̱sabesi, abanan incꞌaꞌ te̱rucꞌ li xyaꞌal le̱ uvas, chi moco te̱sicꞌ li ru xban nak eb li motzoꞌ teꞌxcuaꞌ.

⁴⁰ Cua̱nk li cheꞌ olivo saꞌ chixjunil le̱ naꞌaj. Abanan ma̱cꞌaꞌak le̱ aceite re te̱yul che̱rix xban nak ta̱tꞌanekꞌ li ru.

⁴¹ Teꞌcua̱nk le̱ ralal e̱cꞌajol, abanan incꞌaꞌ teꞌcua̱nk e̱riqꞌuin xban nak teꞌchapekꞌ ut teꞌcꞌamekꞌ saꞌ jalan tenamit.

⁴² Eb le̱ cheꞌ ut eb le̱ racui̱mk teꞌsachekꞌ chi junaj cua xbaneb laj sa̱cꞌ.

⁴³ Ta̱nima̱nk xcuanquileb li jalaneb xtenamit li cuanqueb saꞌ e̱ya̱nk, ut la̱ex ta̱sachk le̱ cuanquil chi timil timil.

⁴⁴ Ta̱cua̱nk xtumineb li jalan xtenamit re teꞌxqꞌue chi toꞌ e̱re, abanan la̱ex ma̱cꞌaꞌak le̱ tumin re te̱qꞌue chi toꞌ. Ta̱nima̱k xcuanquileb toj retal teꞌtakla̱nk saꞌ e̱be̱n. Eb aꞌan teꞌxic chi ubej ut la̱ex texcana̱k chi ixbej.

⁴⁵ Chixjunil li raylal aꞌin ta̱cha̱lk saꞌ e̱be̱n toj retal nak ta̱sachekꞌ e̱ru xban nak incꞌaꞌ te̱ba̱nu li cꞌaꞌru quixye li Ka̱cuaꞌ le̱ Dios. Incꞌaꞌ te̱ba̱nu li chakꞌrab li quixqꞌue e̱re.

⁴⁶ Aꞌanak jun retalil chokꞌ e̱re ut reheb le̱ ralal e̱cꞌajol li teꞌcua̱nk mokon nak li Ka̱cuaꞌ quirakoc a̱tin saꞌ e̱be̱n.

⁴⁷ Li Ka̱cuaꞌ qui-osobtesin e̱re riqꞌuin chixjunil. Abanan la̱ex incꞌaꞌ quexcꞌanjelac chiru chi anchal e̱chꞌo̱l, chi moco chi sa saꞌ e̱chꞌo̱l, riqꞌuin chixjunil li quixqꞌue e̱re.

⁴⁸ Joꞌcan nak la̱ex texcꞌanjelak chiruheb li xicꞌ nequeꞌiloc e̱re li tixtakla chak li Ka̱cuaꞌ. Textzꞌoca̱k ut ta̱chakik e̱re ut ma̱cꞌaꞌak le̱ rakꞌ. Ut ma̱cꞌaꞌak chic cꞌaꞌru e̱re. Li Ka̱cuaꞌ texqꞌue chi cꞌanjelac chokꞌ rahobtesinbil mo̱s chiruheb li xicꞌ nequeꞌiloc e̱re toj retal nak tex-osokꞌ.

⁴⁹ Li Ka̱cuaꞌ tixcꞌameb chak chi najt eb li jalan xtenamit. La̱ex incꞌaꞌ te̱tau ru li ra̱tinoba̱leb. Chanchanakeb li xul tꞌiu nak teꞌcha̱lk chi junpa̱t chixsachbal e̱ru.

⁵⁰ Kꞌaxal joskꞌeb. Incꞌaꞌ teꞌril xtokꞌoba̱l e̱ru, chi moco li cocꞌal, chi moco li ac ti̱xeb.

⁵¹ Eb aꞌan teꞌxtzacaheb li ral le̱ queto̱mk joꞌ ajcuiꞌ li ru le̱ racui̱mk. Ma̱cꞌaꞌak chic le̱ trigo, chi moco le̱ vino, chi moco le̱ aceite. Ut ma̱cꞌaꞌak chic le̱ cuacax chi moco le̱ carner toj retal tex-osokꞌ xban cueꞌej.

⁵² Teꞌpletik riqꞌuin chixjunileb li tenamit li cuanqueb saꞌ li naꞌajej li tixqꞌue e̱re li Ka̱cuaꞌ le̱ Dios. Ut eb li tzꞌac li najt xteram li cꞌojcꞌo̱k cuiꞌ le̱ chꞌo̱l telajeꞌtꞌanekꞌ chixjunileb.

⁵³ Xban li raylal li te̱cꞌul saꞌ rukꞌeb li xicꞌ nequeꞌiloc e̱re nak yo̱keb chixsutinquil le̱ tenamit, textzꞌoca̱k toj retal te̱tiu xtibeleb le̱ ralal e̱cꞌajol li xqꞌue e̱re li Ka̱cuaꞌ le̱ Dios.

⁵⁴ Chi moco li cui̱nk li kꞌaxal tu̱lan ut kꞌun xchꞌo̱l li cuan saꞌ e̱ya̱nk ta̱ril xtokꞌoba̱l ruheb li ras ri̱tzꞌin, chi moco li rixakil li raro xban, chi moco lix cocꞌal.

⁵⁵ Incꞌaꞌ tixsi reheb caꞌchꞌinak xtibel lix cocꞌal li yo̱k chixtzacanquil. Caꞌaj cuiꞌ aꞌan ta̱tiꞌok re xban li raylal li yo̱k chixcꞌulbal saꞌ rukꞌeb li xicꞌ nequeꞌiloc e̱re nak yo̱keb chi numta̱c saꞌ xbe̱neb le̱ tenamit.

⁵⁶ Ut li ixakilbej li kꞌaxal kꞌun xchꞌo̱l ut ma̱ jun sut quixyal be̱c chi ma̱cꞌaꞌ xxa̱b, xicꞌ chic ta̱ril lix be̱lom joꞌ eb ajcuiꞌ lix cocꞌal, li raro̱queb raj xban, ut incꞌaꞌ chic tixqꞌue xtzacae̱mkeb.

⁵⁷ Xban tzꞌocajic tixmuk lix cꞌulaꞌal li tojeꞌ xyoꞌla re tixtzaca xjunes chi mukmu xban nak ma̱cꞌaꞌak re teꞌxtzaca nak eb li xicꞌ nequeꞌiloc reheb yo̱keb chi numta̱c saꞌ xbe̱neb le̱ tenamit.

⁵⁸ Cui incꞌaꞌ te̱ba̱nu chi anchal e̱chꞌo̱l chixjunil li chakꞌrab li tzꞌi̱banbil saꞌ li hu aꞌin, ut cui incꞌaꞌ te̱xucua ru li Ka̱cuaꞌ li nimajcual Dios li kꞌaxal lokꞌ,

⁵⁹ li Ka̱cuaꞌ le̱ Dios tixqꞌue xtzꞌakob li raylal saꞌ e̱be̱n. Tixqꞌue li caki yajel saꞌ e̱be̱n ut incꞌaꞌ chic ta̱e̱lk. Kꞌaxal yibru li yajel li tixqꞌue saꞌ e̱be̱n ut saꞌ xbe̱neb ajcuiꞌ le̱ ralal e̱cꞌajol.

⁶⁰ Tixqꞌue saꞌ e̱be̱n eb li yajel li quixqꞌue saꞌ xbe̱neb laj Egipto, li kꞌaxal xiu xiu, ut incꞌaꞌ chic tex-usa̱k.

⁶¹ Tixtakla ajcuiꞌ saꞌ e̱be̱n qꞌuila pa̱y ru li yajel li incꞌaꞌ tzꞌi̱banbil retalil saꞌ li hu aꞌin, li tzꞌi̱banbil cuiꞌ lix chakꞌrab li Dios. Tixtakla li raylal saꞌ e̱be̱n toj retal ta̱sachekꞌ e̱ru.

⁶² Incꞌaꞌ chic qꞌuihex texcana̱k, usta kꞌaxal nabalex nak quexcuan chak joꞌ xqꞌuial li chahim chiru li choxa, xban nak incꞌaꞌ xeba̱nu li naxye li Ka̱cuaꞌ le̱ Dios.

⁶³ Joꞌ nak quisahoꞌ xchꞌo̱l li Ka̱cuaꞌ nak quexqꞌue chi nabalocꞌ, joꞌcan ajcuiꞌ nak ta̱sahokꞌ xchꞌo̱l nak texqꞌue chi sachecꞌ. Tex-isi̱k saꞌ li naꞌajej li oc e̱re chire̱chaninquil.

⁶⁴ Li Ka̱cuaꞌ tixchaꞌchaꞌi e̱ru yalak bar saꞌ ruchichꞌochꞌ. Ut saꞌ eb li naꞌajej aꞌan te̱lokꞌoni li jalanil dios li yi̱banbil riqꞌuin cheꞌ ut pec, chi moco la̱ex chi moco le̱ xeꞌto̱nil yucuaꞌ queꞌxlokꞌoniheb junxil.

⁶⁵ Incꞌaꞌ texcua̱nk saꞌ tuktu̱quil usilal saꞌ eb li jalan tenamit. Ma̱cꞌaꞌak chic le̱ naꞌaj. Li Ka̱cuaꞌ ta̱ba̱nu̱nk re nak xiu xiu cua̱nkex ut incꞌaꞌ chic sahak saꞌ e̱chꞌo̱l. Ta̱chꞌina̱nk le̱ chꞌo̱l xban li raylal li tixqꞌue saꞌ e̱be̱n li Ka̱cuaꞌ.

⁶⁶ Yo̱k le̱ cꞌaꞌux chi kꞌek chi cutan ut yo̱kex chixcꞌoxlanquil nak ma̱re texcamsi̱k xban nak junelic xiu xiu cua̱nkex.

⁶⁷ Nak ta̱sake̱uk te̱ye, “Us raj ac ta x-oc li kꞌojyi̱n,” ut nak ta̱kꞌojyi̱nokꞌ, te̱ye, “Us raj ac ta xsake̱u,” chaꞌkex xban le̱ xiu ut xban li raylal li yo̱quex chixcꞌulbal.

⁶⁸ Li Ka̱cuaꞌ textakla cuiꞌchic Egipto saꞌ eb li ni̱nki jucub usta quixye e̱re nak ma̱ jaruj chic texsukꞌi̱k aran. Nak cua̱nkex aran texcꞌayi̱k raj chokꞌ rahobtesinbil mo̱s reheb li xicꞌ nequeꞌiloc e̱re, abanan ma̱ ani ta̱ajok lokꞌoc e̱re.