Deuteronomio 27 - Li Santil hu

Li artal li cuan saꞌ li tzu̱l Ebal

¹ Laj Moisés rochbeneb li nequeꞌcꞌamoc be saꞌ xya̱nkeb laj Israel, quixye reheb li tenamit: —Cheba̱nu chixjunil li chakꞌrab li oc cue chixyebal e̱re anakcuan.

² Nak la̱ex texnumekꞌ jun pacꞌal li nimaꞌ Jordán re tex-oc saꞌ li naꞌajej li tixqꞌue e̱re li Ka̱cuaꞌ le̱ Dios, saꞌ li cutan aꞌan te̱xakab li ni̱nki pec ut te̱boneb riqꞌuin chun.

³ Ut te̱tzꞌi̱ba chiru chixjunil li chakꞌrab ut li tijleb aꞌin nak ac xex-oc saꞌ li cha̱bil naꞌajej li na-el cuiꞌ chi us li acui̱mk, li tixqꞌue e̱re li Ka̱cuaꞌ lix Dioseb le̱ xeꞌto̱nil yucuaꞌ, joꞌ quixye e̱re.

⁴ Nak ac xexnumeꞌ jun pacꞌal li nimaꞌ Jordán, te̱xakabeb li pec joꞌ yo̱quin chixyebal e̱re anakcuan ut te̱boneb riqꞌuin chun.

⁵ Te̱yi̱b jun li artal aran re xlokꞌoninquil li Ka̱cuaꞌ le̱ Dios. Incꞌaꞌ te̱rocsi li chꞌi̱chꞌ re xyi̱banquil li artal.

⁶ Te̱yi̱b li artal re xlokꞌoninquil li Ka̱cuaꞌ le̱ Dios riqꞌuineb li pec li incꞌaꞌ setbil riqꞌuin chꞌi̱chꞌ. Ut saꞌ li artal aꞌan te̱qꞌue li mayej li te̱cꞌat re xlokꞌoninquil li Ka̱cuaꞌ le̱ Dios.

⁷ Ut aran ajcuiꞌ te̱qꞌue le̱ mayej re xcꞌambal e̱rib saꞌ usilal riqꞌuin li Dios ut te̱tzaca ut ta̱sahokꞌ saꞌ e̱chꞌo̱l chiru li Ka̱cuaꞌ le̱ Dios.

⁸ Te̱tzꞌi̱ba chi cha̱bil chiru li pec aꞌin li chakꞌrab li xinqꞌue e̱re, chan.

⁹ Ut laj Moisés, rochbeneb laj tij quixye reheb laj Israel: —La̱ex aj Israel, abihomak li cꞌaꞌru tinye e̱re ut cheqꞌuehak retal. Anakcuan la̱ex chic lix tenamit li Ka̱cuaꞌ le̱ Dios.

¹⁰ Joꞌcan nak tento nak te̱ba̱nu li cꞌaꞌru tixye e̱re ut te̱ba̱nu li cꞌaꞌru naxye saꞌ li chakꞌrab li yo̱quin chixqꞌuebal e̱re anakcuan.

¹¹ Saꞌ li cutan aꞌan laj Moisés quixye reheb laj Israel:

¹² —Nak ac xexnumeꞌ jun pacꞌal li nimaꞌ Jordán, aꞌineb li xte̱paleb laj Israel li teꞌxakli̱k saꞌ li tzu̱l Gerizim chixyebal resil li rosobtesinquileb li tenamit: eb li ralal xcꞌajol laj Simeón, eb li ralal xcꞌajol laj Leví, eb li ralal xcꞌajol laj Judá, eb li ralal xcꞌajol laj Isacar, eb li ralal xcꞌajol laj José ut eb li ralal xcꞌajol laj Benjamín.

¹³ Ut aꞌineb li xte̱paleb laj Israel li teꞌxakli̱k saꞌ li tzu̱l Ebal chixyebal resil li xtzꞌekta̱nanquileb li tenamit: eb li ralal xcꞌajol laj Rubén, eb li ralal xcꞌajol laj Gad, eb li ralal xcꞌajol laj Aser, eb li ralal xcꞌajol laj Zabulón, eb li ralal xcꞌajol laj Dan ut eb li ralal xcꞌajol laj Neftalí.

¹⁴ Ut eb laj levita teꞌa̱tinak chi cau xya̱b xcuxeb ut teꞌxye li a̱tin aꞌin reheb chixjunileb laj Israel:

¹⁵ Tzꞌekta̱nanbil li ani tixyi̱b lix jalanil dios ut xjalam u̱ch riqꞌuin chꞌi̱chꞌ ut riqꞌuin cheꞌ usta tixqꞌue saꞌ junak naꞌajej mukmu re tixlokꞌoni xban nak li Ka̱cuaꞌ xicꞌ naril aꞌan. Ut chixjunileb li tenamit teꞌchakꞌok ut teꞌxye: Joꞌcan taxak.

¹⁶ Tzꞌekta̱nanbil li ani tixtzꞌekta̱na xnaꞌ xyucuaꞌ. Ut chixjunileb li tenamit teꞌxye: Joꞌcan taxak.

¹⁷ Tzꞌekta̱nanbil li ani tixjal xnuba̱l lix chꞌochꞌ li rech cabal. Ut chixjunileb li tenamit teꞌxye: Joꞌcan taxak.

¹⁸ Tzꞌekta̱nanbil li ani tixjal xbe junak li mutzꞌ. Ut chixjunileb li tenamit teꞌxye: Joꞌcan taxak.

¹⁹ Tzꞌekta̱nanbil li ani naxba̱nu ma̱usilal reheb li jalan xtenamiteb, malaj ut li ma̱cꞌaꞌ xnaꞌ xyucuaꞌ, malaj ut li xma̱lcaꞌan. Ut chixjunileb li tenamit teꞌxye: Joꞌcan taxak.

²⁰ Tzꞌekta̱nanbil li tixchꞌic rib riqꞌuin li rixakil lix yucuaꞌ ut tixcꞌut xxuta̱n lix yucuaꞌ. Ut chixjunileb li tenamit teꞌxye: Joꞌcan taxak.

²¹ Tzꞌekta̱nanbil li ani tixchꞌic rib riqꞌuin junak xul. Ut chixjunileb li tenamit teꞌxye: Joꞌcan taxak.

²² Tzꞌekta̱nanbil li ani tixchꞌic rib riqꞌuin li ranab, usta jalan xnaꞌ, ut usta jalan xyucuaꞌ. Ut chixjunileb li tenamit teꞌxye: Joꞌcan taxak.

²³ Tzꞌekta̱nanbil li ani tixchꞌic rib riqꞌuin lix naꞌ li rixakil. Ut chixjunileb li tenamit teꞌxye: Joꞌcan taxak.

²⁴ Tzꞌekta̱nanbil li ani tixcamsi ras ri̱tzꞌin usta chi mukmu naxba̱nu. Ut chixjunileb li tenamit teꞌxye: Joꞌcan taxak.

²⁵ Tzꞌekta̱nanbil li ani ta̱tumina̱k ru re nak tixcamsi li ras ri̱tzꞌin li ma̱cꞌaꞌ xma̱c. Ut chixjunileb li tenamit teꞌxye: Joꞌcan taxak.

²⁶ Tzꞌekta̱nanbil li ani incꞌaꞌ tixqꞌue xcuanquil chixjunil li chakꞌrab aꞌin, chi moco tixba̱nu li tijleb li xqꞌue li Ka̱cuaꞌ. Ut chixjunileb li tenamit teꞌxye: Joꞌcan taxak.