Deuteronomio 26 - Li Santil hu

Li mayej re li xbe̱n ru li acui̱mk

¹ Nak ac tex-oc chi cua̱nc saꞌ li naꞌajej li tixqꞌue e̱re li Ka̱cuaꞌ le̱ Dios, re nak texcua̱nk aran,

² te̱sicꞌ li xbe̱n ru le̱ racui̱mk li x-el saꞌ li chꞌochꞌ li xqꞌue e̱re li Ka̱cuaꞌ le̱ Dios. Te̱qꞌue li ru le̱ racui̱mk saꞌ jun li chacach ut te̱cꞌam saꞌ li naꞌajej li tixsicꞌ ru li Ka̱cuaꞌ re te̱lokꞌoni cuiꞌ.

³ Ut texxic riqꞌuineb laj tij li cua̱nkeb saꞌ li cutan aꞌan ut te̱ye reheb, “La̱in ninye anakcuan chiru li Ka̱cuaꞌ lin Dios nak xo-oc saꞌ li naꞌajej li quixye reheb li kaxeꞌto̱nil yucuaꞌ riqꞌuin juramento nak tixqꞌue ke.”

⁴ Ut laj tij tixcꞌul li chacach li cuan saꞌ e̱rukꞌ, ut tixqꞌue chiru lix artal li Ka̱cuaꞌ le̱ Dios.

⁵ Ut la̱ex te̱ye chiru li Ka̱cuaꞌ le̱ Dios, “Eb li kaxeꞌto̱nil yucuaꞌ, aꞌaneb jun chꞌina chꞌu̱tal chi arameo li queꞌco̱eb chi cua̱nc Egipto. Aran queꞌtam ut queꞌnabaloꞌ. Cuanqueb xcuanquil joꞌ jun xnimal ru tenamit, ut cuanqueb xmetzꞌe̱u.

⁶ Eb laj Egipto queꞌnumta saꞌ kabe̱n ut coeꞌxrahobtesi ut coeꞌxqꞌue saꞌ cacuil trabaj.

⁷ La̱o kaya̱ba lix cꞌabaꞌ li Ka̱cuaꞌ, lix Dioseb li kaxeꞌto̱nil yucuaꞌ. Li Ka̱cuaꞌ quirabi li katij ut quiril xtokꞌoba̱l ku. Quixqꞌue retal nak cuanco saꞌ cacuil cꞌanjel ut rahobtesinbilo.

⁸ Joꞌcan nak li Ka̱cuaꞌ corisi chak Egipto riqꞌuin xnimal xcuanquil. Quixba̱nu li milagro ut sachba chꞌo̱lej nak corisi chak Egipto.

⁹ Ut aꞌan quicꞌamoc chak ke saꞌ li naꞌajej aꞌin, ut quixqꞌue ke li cha̱bil naꞌajej aꞌin li na-el cuiꞌ chi us li acui̱mk.

¹⁰ Joꞌcan nak la̱o xkacꞌam chak li xbe̱n ru li kacui̱mk li x-el saꞌ li chꞌochꞌ aꞌin li xaqꞌue ke, at Ka̱cuaꞌ”, chaꞌkex. Chirix aꞌan te̱qꞌue li chacach chiru li Ka̱cuaꞌ le̱ Dios ut te̱cuikꞌib e̱rib chiru.

¹¹ Ut la̱ex, ut eb laj levita, joꞌ eb ajcuiꞌ li jalan xtenamit li cuanqueb saꞌ e̱ya̱nk teꞌsahokꞌ saꞌ e̱chꞌo̱l xban li sahil echej li quixqꞌue e̱re li Ka̱cuaꞌ le̱ Dios ut reheb ajcuiꞌ le̱ jun cablal.

¹² Rajlal oxib chihab te̱qꞌue li junju̱nk saꞌ xlaje̱tkil li ru le̱ racui̱mk reheb laj levita ut li ma̱cꞌaꞌ xnaꞌ xyucuaꞌ ut reheb li jalaneb xtenamit li cuanqueb saꞌ e̱ya̱nk joꞌ eb ajcuiꞌ li xma̱lcaꞌan. Te̱qꞌue reheb re nak naru teꞌtzaca̱nk saꞌ le̱ tenamit ut ta̱cꞌojla̱k xchꞌo̱leb.

¹³ Ut te̱ye re li Ka̱cuaꞌ le̱ Dios, “La̱in xcuisi saꞌ li cuochoch li lokꞌlaj mayej. Xinqꞌue reheb laj levita, eb li jalaneb xtenamit, ut eb li ma̱cꞌaꞌ xnaꞌ xyucuaꞌ joꞌ eb ajcuiꞌ li xma̱lcaꞌan. Xinba̱nu joꞌ xaye cue. Incꞌaꞌ xinkꞌet la̱ chakꞌrab chi moco xsach saꞌ inchꞌo̱l li xaye cue.

¹⁴ Incꞌaꞌ xintzaca nak ra saꞌ inchꞌo̱l xban xcamic junak, chi moco xcuisi saꞌ cuochoch nak muxbil cuu, chi moco xinqꞌue reheb li camenak. La̱in xinba̱nu li chakꞌrab ut xinba̱nu ajcuiꞌ chixjunil li xaye cue.

¹⁵ China̱cuil, at Ka̱cuaꞌ, toj saꞌ la̱ santil naꞌaj saꞌ choxa. Chacuosobtesiheb laj Israel la̱ tenamit. Ut chacuosobtesi li naꞌajej li xaqꞌue ke joꞌ xaye reheb li kaxeꞌto̱nil yucuaꞌ nak xaba̱nu li juramento. Xaqꞌue ke li cha̱bil naꞌajej li na-el cuiꞌ chi us li acui̱mk,” chaꞌkex.

¹⁶ Anakcuan li Ka̱cuaꞌ le̱ Dios yo̱ chixyebal e̱re nak te̱ba̱nu chi tzꞌakal li chakꞌrab ut le̱ taklanquil xban. Cheba̱nuhak biꞌ chi anchal le̱ chꞌo̱l ut chi anchal le̱ ra̱m.

¹⁷ La̱ex xechꞌolob saꞌ li cutan aꞌin nak li Ka̱cuaꞌ, aꞌan le̱ Dios. Xeyechiꞌi nak te̱pa̱b aꞌan ut te̱ba̱nu li cꞌaꞌru naxye. Xeyechiꞌi nak junelic te̱ba̱nu li chakꞌrab li xqꞌue e̱re ut te̱ba̱nu le̱ taklanquil xban.

¹⁸ Ut saꞌ ajcuiꞌ li cutan aꞌin li Ka̱cuaꞌ quixye nak la̱ex lix lokꞌlaj tenamit. Ut rehex chic chi tzꞌakal joꞌ quixyechiꞌi e̱re. Ut aꞌan naraj nak te̱ba̱nu chixjunil li chakꞌrab li quixqꞌue e̱re.

¹⁹ Aꞌan ta̱tenkꞌa̱nk e̱re re nak la̱exak jun nimla tenamit. Kꞌaxal nimak e̱cuanquil ut e̱lokꞌal chiruheb chixjunileb li tenamit li quixyoꞌobtesi. Ut yalak bar ta̱abi̱k e̱resilal. La̱exak jun xsantil tenamit joꞌ quixye li Ka̱cuaꞌ le̱ Dios.