Deuteronomio 25 - Li Santil hu

¹ Cui cuan li yo̱queb chi pletic, eb aꞌan teꞌxic riqꞌuin laj rakol a̱tin. Ut laj rakol a̱tin tixtzꞌil rix li ani cuan xma̱c ut li ani ma̱cꞌaꞌ xma̱c.

² Ut li cuan xma̱c ta̱teneba̱k li saqꞌuecꞌ saꞌ xbe̱n. Ut laj rakol a̱tin tixye re nak tixhupub rib saꞌ chꞌochꞌ ut ta̱qꞌuehekꞌ lix tzꞌu̱m chiru laj rakol a̱tin, aꞌ yal chanru lix ma̱c.

³ Abanan incꞌaꞌ tixcꞌul numenak caꞌcꞌa̱l chi tzꞌu̱m. Cui tixcꞌul numenak caꞌcꞌa̱l chi tzꞌu̱m ta̱cꞌutekꞌ xxuta̱n chiruheb li tenamit.

⁴ Me̱bacꞌ xtzꞌu̱mal re le̱ bo̱yx nak yo̱ chi cꞌanjelac re risinquil rix li trigo.

⁵ Cui cuibak cui̱nk cuanqueb saꞌ jun chi cab, ut li jun ta̱ca̱mk ut tixcanab li rixakil chi ma̱cꞌaꞌ ralal xcꞌajol, li ixk aꞌan tento ta̱cꞌamekꞌ xban li ri̱tzꞌin li camenak re nak ta̱cua̱nk ralal xcꞌajol saꞌ xcꞌabaꞌ li camenak. Incꞌaꞌ ta̱sumla̱k li ixk riqꞌuin junak ma̱cuaꞌ xcomon li camenak.

⁶ Ut li xbe̱n ralal ta̱cua̱nk tento nak tixcꞌam xcꞌabaꞌ li camenak re nak lix cꞌabaꞌ incꞌaꞌ ta̱sachekꞌ saꞌ xya̱nkeb laj Israel.

⁷ Ut cui li i̱tzꞌinbej incꞌaꞌ naraj xcꞌambal li rixakil li ras camenak, li ixk aꞌan ta̱xic saꞌ li oqueba̱l re li tenamit chi a̱tinac riqꞌuineb li nequeꞌcꞌamoc be. Ut tixye reheb, “Li ri̱tzꞌin lin be̱lom camenak incꞌaꞌ naraj incꞌambal chokꞌ rixakil re nak ta̱cua̱nk cocꞌal saꞌ xcꞌabaꞌ li camenak joꞌ tento xba̱nunquil.”

⁸ Ut eb li nequeꞌcꞌamoc be teꞌxtakla xbokbal li ri̱tzꞌin li camenak re teꞌa̱tinak riqꞌuin. Ut cui aꞌan tixye nak incꞌaꞌ naraj sumla̱c riqꞌuin li ixk,

⁹ li rixakil li camenak ta̱xic riqꞌuin li cui̱nk chiruheb li nequeꞌcꞌamoc be. Ta̱risi jun lix xa̱b li cui̱nk ut tixchu̱ba saꞌ xnakꞌ ru ut tixye re, “Joꞌcaꞌin ta̱uxma̱nk re li cui̱nk li incꞌaꞌ naraj xqꞌuebal ralal xcꞌajol li ras camenak.”

¹⁰ Ut aran Israel eb li ralal xcꞌajol li cui̱nk aꞌan teꞌqꞌuehekꞌ chokꞌ xcꞌabaꞌ “ralal xcꞌajol li cui̱nk li qui-isi̱c xxa̱b.”

¹¹ Cui yo̱keb chi pletic cuib li cui̱nk ut li rixakil li jun ta̱xic chixcolbal lix be̱lom, cui li ixk aꞌan tixchap lix yoꞌleba̱l li cui̱nk li yo̱ chi sacꞌoc re lix be̱lom,

¹² li ixk aꞌan ta̱isi̱k li rukꞌ. Incꞌaꞌ ta̱cuyekꞌ xma̱c.

¹³ Me̱balakꞌi le̱ ras e̱ri̱tzꞌin riqꞌuin li bisleb li nequexbisoc cuiꞌ.

¹⁴ Incꞌaꞌ ta̱cua̱nk cuib le̱ bisleb, jun ta tzꞌakal ut jun ta incꞌaꞌ.

¹⁵ Tento nak texbisok chi tzꞌakal, usta li ra̱lal usta lix nimal yo̱kex chixbisbal. Texbisok chi tzꞌakal re nak ta̱najtokꞌ rok le̱ yuꞌam saꞌ li naꞌajej li tixqꞌue e̱re li Ka̱cuaꞌ le̱ Dios.

¹⁶ Li Ka̱cuaꞌ xicꞌ narileb li nequeꞌxbalakꞌi ras ri̱tzꞌin ut incꞌaꞌ nequeꞌbisoc chi tzꞌakal.

¹⁷ Chijulticokꞌ e̱re li cꞌaꞌru queꞌxba̱nu e̱re eb li ralal xcꞌajol laj Amalec nak quex-el chak Egipto nak yo̱quex chi numecꞌ saꞌ lix naꞌajeb.

¹⁸ Nak lublu̱quex ut tacuajenakex, eb li ralal xcꞌajol laj Amalec queꞌpletic e̱riqꞌuin ut queꞌxcamsiheb li ma̱cꞌaꞌ chic xmetzꞌe̱uheb. Incꞌaꞌ queꞌxxucua ru li Dios.

¹⁹ Nak li Ka̱cuaꞌ le̱ Dios texqꞌue chi hila̱nc ut incꞌaꞌ chic texpletik riqꞌuineb li xicꞌ nequeꞌiloc e̱re li cuanqueb chi xjun sutam li naꞌajej li tixqꞌue e̱re li Ka̱cuaꞌ, tento nak te̱camsi chixjunileb li ralal xcꞌajol laj Amalec re nak ta̱sachk xcꞌabaꞌeb chi junaj cua saꞌ ruchichꞌochꞌ. Misach saꞌ e̱chꞌo̱l xba̱nunquil aꞌan.