Deuteronomio 24 - Li Santil hu

¹ Cui junak cui̱nk tixcꞌam junak rixakil ut ta̱sumla̱k riqꞌuin, abanan nak ac xsumla riqꞌuin incꞌaꞌ nacuulac chiru xban nak tixqꞌue retal nak incꞌaꞌ us xnaꞌleb, naru tixyi̱b junak li hu re tixjach rib riqꞌuin. Tixqꞌue li hu re li ixk ut ta̱risi saꞌ li rochoch.

² Nak ac x-el saꞌ rochoch li cui̱nk, li ixk naru nasumla cuiꞌchic riqꞌuin jalan cui̱nk.

³ Abanan cui li cui̱nk li ta̱cꞌamok re xcaꞌ sut xicꞌ cuiꞌchic naril ut tixyi̱b cuiꞌchic lix hu re tixjach rib riqꞌuin ut ta̱risi saꞌ li rochoch, malaj ut ta̱ca̱mk li cui̱nk aꞌan li quicꞌamoc cuiꞌchic re li ixk,

⁴ li cui̱nk li quicꞌamoc re xbe̱n cua incꞌaꞌ chic naru naxcꞌam li ixk aꞌan chokꞌ rixakil xban nak li ixk aꞌan ac xmux rib. Aꞌan incꞌaꞌ nacuulac chiru li Dios. La̱ex incꞌaꞌ naru te̱sach xlokꞌal le̱ naꞌaj li tixqꞌue e̱re li Dios riqꞌuin xba̱nunquil li ma̱c aꞌan.

⁵ Incꞌaꞌ naru xtaklanquil chi pletic junak li cui̱nk li tojeꞌ xsumla, ut ma̱ jun cꞌanjel ta̱teneba̱k saꞌ xbe̱n. Ta̱cua̱nk ban jun chihab saꞌ rochoch re xqꞌuebal xsahil xchꞌo̱l li rixakil.

⁶ Incꞌaꞌ te̱cꞌul junak li caꞌ, chi moco li rukꞌ, chokꞌ prenda xban nak riqꞌuin lix caꞌ naxsicꞌ lix tumin li cristian re xnumsinquil li cutan junju̱nk.

⁷ Cui junak li cui̱nk ta̱relkꞌa li rech aj Israelil ut tixqꞌue joꞌ jun lix mo̱s malaj ut naxcꞌayi, tento nak ta̱camsi̱k li ani qui-elkꞌan re. Tento nak te̱risi saꞌ e̱ya̱nk chixjunil li ma̱usilal aꞌan.

⁸ Te̱ba̱nu reheb li saklep rixeb chi tzꞌakal re ru chixjunil li nequeꞌxye eb laj tij. Tento te̱ba̱nu joꞌ xinye reheb aꞌan.

⁹ Julticokꞌ e̱re li cꞌaꞌru quixba̱nu li Ka̱cuaꞌ le̱ Dios re lix María nak quex-el chak Egipto ut yo̱quex chi xic.

¹⁰ Nak te̱toꞌoni li cꞌaꞌak re ru re le̱ ras e̱ri̱tzꞌin, mex-oc saꞌ rochoch chixcꞌulbal li tꞌicr tixqꞌue e̱re chokꞌ prenda.

¹¹ Texcana̱k ban chirix cab ut li cui̱nk li xtoꞌonin e̱riqꞌuin tixcꞌam li prenda ut tixqꞌue e̱re.

¹² Cui nebaꞌ li xtoꞌonin e̱riqꞌuin, me̱xoc li tꞌicr li xqꞌue chokꞌ prenda chiru jun kꞌojyi̱n.

¹³ Te̱kꞌaxtesi ban lix prenda nak toj ma̱jiꞌ na-oc li sakꞌe re nak tixtzꞌap rib riqꞌuin lix tꞌicr nak oc re chi cua̱rc. Li cui̱nk tixbantioxi che̱ru ut ta̱cuulak chiru li Ka̱cuaꞌ le̱ Dios li cꞌaꞌru te̱ba̱nu.

¹⁴ Me̱rahobtesiheb le̱ mo̱s nebaꞌ li tenkꞌa̱c naraj, usta le̱ rech aj Israelil usta jalan xtenamit li cuan saꞌ e̱ya̱nk.

¹⁵ Te̱toj le̱ mo̱s rajlal cutan nak toj ma̱jiꞌ na-oc li sakꞌe. Me̱canab chokꞌ re cuulaj xban nak nebaꞌ ut naraj ru lix tojbal re xnumsinquil li cutan. Ma̱re anchal tixya̱ba xcꞌabaꞌ li Ka̱cuaꞌ xban nak incꞌaꞌ xe̱toj chi ticto ut saꞌ e̱be̱n ta̱cana̱k li ma̱c.

¹⁶ Eb li naꞌbej yucuaꞌbej incꞌaꞌ teꞌcamsi̱k xban lix ma̱queb li ralal xcꞌajol, chi moco li alal cꞌajolbej teꞌcamsi̱k xban lix ma̱queb lix naꞌ xyucuaꞌeb. Li junju̱nk tixtoj rix lix ma̱c.

¹⁷ Me̱ba̱nu ma̱usilal reheb li jalaneb xtenamit li cuanqueb saꞌ e̱ya̱nk, joꞌ eb ajcuiꞌ li ma̱cꞌaꞌ xnaꞌ xyucuaꞌ. Ut incꞌaꞌ te̱cꞌul chokꞌ prenda li rakꞌ li xma̱lcaꞌan.

¹⁸ Chijulticokꞌ e̱re nak la̱ex rahobtesinbil mo̱s nak quexcuan chak Egipto ut li Ka̱cuaꞌ le̱ Dios qui-isin chak e̱re saꞌ li naꞌajej aꞌan. Joꞌcan nak la̱in yo̱quin chixqꞌuebal e̱re li chakꞌrab aꞌin re nak te̱ba̱nu.

¹⁹ Ut nak yo̱kex chixsicꞌbal li ru le̱ racui̱mk, cui xsach saꞌ e̱chꞌo̱l jarubak jo̱b le̱ trigo, mexsukꞌi chixxocbal. Canabomak ban reheb li jalan xtenamiteb, ut reheb li ma̱cꞌaꞌ xnaꞌ xyucuaꞌ, joꞌ eb ajcuiꞌ li xma̱lcaꞌan re nak li Ka̱cuaꞌ le̱ Dios texrosobtesi riqꞌuin chixjunil li te̱ba̱nu.

²⁰ Nak te̱sicꞌ ru li cheꞌ olivo, me̱sicꞌ xcaꞌ sut. Canabomak ban reheb li jalan xtenamiteb, ut reheb li ma̱cꞌaꞌeb xnaꞌ xyucuaꞌ, joꞌ eb ajcuiꞌ li xma̱lcaꞌan.

²¹ Ut nak te̱sicꞌ ru li uvas, me̱sicꞌ ru xcaꞌ sut. Te̱canab ban reheb li jalan xtenamiteb, ut reheb li ma̱cꞌaꞌeb xnaꞌ xyucuaꞌ, ut reheb ajcuiꞌ li xma̱lcaꞌan.

²² Chijulticokꞌ e̱re nak quexcuan chak Egipto chokꞌ rahobtesinbil mo̱s. Joꞌcan nak yo̱quin chixqꞌuebal e̱re li chakꞌrab aꞌin re te̱ba̱nu.