Deuteronomio 23 - Li Santil hu

¹ Cui jun li cui̱nk pucꞌul xnakꞌ lix tzꞌejcual malaj ut tokbil lix tzꞌejcual, aꞌan incꞌaꞌ naru ta̱oc chokꞌ xcomoneb laj Israel, lix tenamit li Dios.

² Li incꞌaꞌ sumsu̱queb lix naꞌ xyucuaꞌeb, incꞌaꞌ naru teꞌoc chokꞌ xcomoneb laj Israel, chi moco li ralal xcꞌajol, usta toj saꞌ li laje̱b xte̱paleb li ralal xcꞌajol li teꞌcua̱nk mokon.

³ Incꞌaꞌ naru teꞌoc chokꞌ xcomoneb laj Israel lix tenamit li Dios eb laj amonita, chi moco laj moabita, chi moco li ralal xcꞌajol usta toj chirix li laje̱b xte̱paleb li ralal xcꞌajol.

⁴ Incꞌaꞌ naru teꞌoc chokꞌ xcomoneb laj Israel xban nak incꞌaꞌ queꞌcuulac che̱cꞌulbal, chi moco queꞌxqꞌue e̱cua e̱rucꞌa nak quex-el chak Egipto. Ut queꞌxtoj laj Balaam chixtzꞌa̱manquil ma̱usilal saꞌ e̱be̱n. Laj Balaam, aꞌan li ralal laj Beor. Petor xtenamit, li cuan saꞌ xcue̱nt Mesopotamia.

⁵ Abanan, li Ka̱cuaꞌ le̱ Dios incꞌaꞌ quirabi li cꞌaꞌru quixye laj Balaam. Quixsukꞌisi ban chokꞌ usilal li ma̱usilal li quixtzꞌa̱ma saꞌ e̱be̱n xban nak li Ka̱cuaꞌ le̱ Dios kꞌaxal nequexra.

⁶ Incꞌaꞌ te̱cꞌam e̱rib saꞌ usilal riqꞌuineb li tenamit aꞌan, chi moco te̱sicꞌ li us chokꞌ reheb joꞌ najtil yoꞌyo̱kex.

⁷ Incꞌaꞌ xicꞌ te̱ril eb laj Edom xban nak eb aꞌan le̱ rechꞌalal. Ut incꞌaꞌ xicꞌ te̱ril eb laj Egipto xban nak quexcuan saꞌ lix tenamiteb.

⁸ Li rox xte̱paleb li ralal xcꞌajol eb aꞌan naru teꞌoc chokꞌ xcomoneb laj Israel lix tenamit li Dios.

⁹ Nak acak xic e̱re chi pletic riqꞌuineb li xicꞌ nequeꞌiloc e̱re cheqꞌuehak retal re nak incꞌaꞌ te̱ba̱nu li cꞌaꞌak re ru incꞌaꞌ us.

¹⁰ Cui cuan junak cui̱nk saꞌ e̱ya̱nk ac xmux rib xban nak x-el xyaꞌal lix tzꞌejcual chiru kꞌojyi̱n, li jun aꞌan ta̱e̱lk saꞌ e̱ya̱nk ut ta̱xic chirix li naꞌajej li cuanqueb cuiꞌ le̱ muheba̱l. Incꞌaꞌ chic naru ta̱oc saꞌ li naꞌajej li cuanquex cuiꞌ chiru chixjunil li cutan.

¹¹ Nak ta̱ecuu̱k, ta̱ati̱nk ut naru na-oc cuiꞌchic saꞌ li naꞌajej li cua̱nkex cuiꞌ.

¹² Tento nak cua̱nk junak naꞌajej chirix li naꞌajej li cuan cuiꞌ le̱ muheba̱l re texxic cuiꞌ xtzꞌekbal e̱rib.

¹³ Ut te̱cꞌam ajcuiꞌ junak le̱ cheꞌ kꞌes ruꞌuj re te̱bec xnaꞌaj le̱ tzꞌekom ut te̱tzꞌap li xbe̱n riqꞌuin chꞌochꞌ.

¹⁴ Te̱ba̱nu chi joꞌcan xban nak li Ka̱cuaꞌ le̱ Dios cua̱nk saꞌ li naꞌajej li cua̱nkex cuiꞌ re texcol ut re ajcuiꞌ nak texqꞌue chi numta̱c saꞌ xbe̱neb li xicꞌ nequeꞌiloc e̱re. Joꞌcan nak li naꞌajej li cua̱nkex cuiꞌ santak re nak li Ka̱cuaꞌ le̱ Dios incꞌaꞌ ta̱ril li cꞌaꞌak re ru tzꞌaj saꞌ e̱ya̱nk. Ut re ajcuiꞌ nak incꞌaꞌ texcanab e̱junes yal xban li cꞌaꞌak re ru incꞌaꞌ us.

¹⁵ Cui junak li lokꞌbil mo̱s nacuulac e̱riqꞌuin chixcolbal rib, me̱kꞌaxtesi chic re lix patrón.

¹⁶ Te̱canab chi cua̱nc e̱riqꞌuin saꞌ li tenamit li naraj ut saꞌ li naꞌajej li nacuulac chiru. Ut incꞌaꞌ te̱rahobtesi.

¹⁷ Ma̱ jun aj Israel tixcꞌayi rib, usta ixk, usta cui̱nk, joꞌ nequeꞌxba̱nu li nequeꞌxlokꞌoni li jalanil dios.

¹⁸ Ut incꞌaꞌ naru teꞌxqꞌue chokꞌ xmayej saꞌ lix tabernáculo li Ka̱cuaꞌ le̱ Dios li tumin li nequeꞌxcꞌul li nequeꞌxcꞌayi ribeb. Incꞌaꞌ naru nequeꞌxtoj riqꞌuin li tumin aꞌan li cꞌaꞌru xeꞌxyechiꞌi re li Dios. Li Ka̱cuaꞌ xicꞌ naril li ma̱c aꞌan.

¹⁹ Nak te̱toꞌoni li cꞌaꞌak re ru reheb le̱ rech tenamitil, usta tumin, usta tzacae̱mk, usta cꞌaꞌak chic re ru, incꞌaꞌ naru te̱patzꞌ ral.

²⁰ Caꞌaj cuiꞌ li jalaneb xtenamit naru te̱patzꞌ ral li cꞌaꞌru te̱toꞌoni reheb. Abanan le̱ rech tenamitil incꞌaꞌ naru te̱patzꞌ ral li cꞌaꞌru te̱toꞌoni reheb. Cheba̱nuhak aꞌin re nak texrosobtesi li Ka̱cuaꞌ le̱ Dios ut re ajcuiꞌ nak us tex-e̱lk riqꞌuin chixjunil li te̱ba̱nu saꞌ li naꞌajej li ta̱qꞌuehekꞌ e̱re xban li Dios re texcua̱nk cuiꞌ.

²¹ Cui cuan li cꞌaꞌru te̱yechiꞌi re li Ka̱cuaꞌ le̱ Dios, mexbay chixqꞌuebal. Li Ka̱cuaꞌ tixcanab saꞌ e̱be̱n xtojbal ut cuan e̱ma̱c cui incꞌaꞌ nequetoj.

²² Abanan ma̱cꞌaꞌak le̱ ma̱c cui incꞌaꞌ nequeyechiꞌi cꞌaꞌak re ru re li Ka̱cuaꞌ.

²³ Li cꞌaꞌru nequeyechiꞌi re li Dios xba̱nunquil, tento nak te̱ba̱nu, xban nak yal e̱junes xeyechiꞌi chi incꞌaꞌ minbil e̱re xba̱nunquil.

²⁴ Cui nequexxic saꞌ xnaꞌajeb lix uvas le̱ rech cabal, naru te̱lou li ru toj ta̱cꞌojla̱k e̱chꞌo̱l, abanan incꞌaꞌ naru te̱xoc li ru saꞌ le̱ chacach re te̱cꞌam che̱rix.

²⁵ Ut nak tex-oc saꞌ xnaꞌaj lix trigo le̱ ras e̱ri̱tzꞌin, naru te̱risi li ru riqꞌuin le̱ rukꞌ, abanan incꞌaꞌ naru te̱set riqꞌuin chꞌi̱chꞌ.