Deuteronomio 22 - Li Santil hu

¹ Cui junak le̱ ras e̱ri̱tzꞌin ta̱sachk lix bo̱yx malaj ut lix carner ut la̱ex te̱ril ru, incꞌaꞌ te̱canab chi joꞌcan. Te̱chap ut te̱cꞌam riqꞌuin laj e̱chal re.

² Cui laj e̱chal re li xul ma̱cuaꞌ e̱rechcablal, malaj ut incꞌaꞌ nequenau ani, te̱cꞌam li xul saꞌ le̱ rochoch ut ta̱cua̱nk aran toj nak ta̱cuulak laj e̱chal re chixsicꞌbal. Nak ta̱cuulak te̱kꞌaxtesi re lix xul.

³ Joꞌcan ajcuiꞌ te̱ba̱nu riqꞌuin junak li bu̱r, malaj ut junak tꞌicr malaj ut li cꞌaꞌak chic re ru li te̱tau chi tzꞌektzꞌo. Me̱canab yal chi joꞌcan.

⁴ Cui te̱ril lix bu̱r malaj lix bo̱yx le̱ ras e̱ri̱tzꞌin tꞌantꞌo saꞌ be, me̱canab yal chi joꞌcan. Te̱tenkꞌa ban chi cuacli̱c cuiꞌchic.

⁵ Junak ixk incꞌaꞌ naru ta̱rocsi li rakꞌ li cui̱nk, chi moco li cui̱nk ta̱ru̱k ta̱rocsi li rakꞌ li ixk xban nak aꞌan incꞌaꞌ nacuulac chiru li Ka̱cuaꞌ le̱ Dios.

⁶ Cui te̱tau junak xul chi huphu saꞌ lix soc chire be malaj saꞌ rukꞌ junak li cheꞌ, ut cuan li cocꞌ ral, malaj ut lix mol chi rubel, incꞌaꞌ naru te̱chꞌeꞌ li naꞌbej.

⁷ Naru te̱cꞌam li ral, abanan te̱rachꞌab li naꞌbej re nak us tex-e̱lk riqꞌuin li cꞌaꞌru nequeba̱nu ut re ajcuiꞌ nak ta̱najtokꞌ rok le̱ yuꞌam.

⁸ Nak te̱yi̱b le̱ rochoch, tento nak te̱qꞌue xramleb nak te̱yi̱b re nak incꞌaꞌ ta̱cana̱k saꞌ e̱be̱n li chꞌaꞌajquilal cui junak ta̱tꞌanekꞌ aran ut nacam.

⁹ Me̱rau jalanil iyaj saꞌ xnaꞌaj le̱ uvas. Cui te̱rau jalanil iyaj, naru nequesach li ru le̱ uvas ut te̱sach ajcuiꞌ li iyaj li te̱rau.

¹⁰ Me̱qꞌue chi trabajic junak bo̱yx rochben junak bu̱r re te̱bec cuiꞌ xnaꞌaj le̱ racui̱mk.

¹¹ Me̱rocsi li tꞌicr cui lana rochben lino lix nokꞌil.

¹² Te̱qꞌue xmach le̱ rakꞌ saꞌ xca̱ xucu̱til.

¹³ Ma̱re junak cui̱nk tixcꞌam jun li xkaꞌal chokꞌ rixakil. Ut nak ac xcuan riqꞌuin incꞌaꞌ chic ta̱raj ru.

¹⁴ Nak ac xmux ru li xkaꞌal, li cui̱nk ta̱ticꞌtiꞌik ut tixye, “Ac cuanjenak riqꞌuin cui̱nk li ixk aꞌin nak xincꞌam,” chaꞌak.

¹⁵ Tojoꞌnak lix naꞌ xyucuaꞌ li xkaꞌal teꞌxcꞌam li tꞌicr retalil nak ya̱l nak toj ma̱jiꞌ cuanjenak riqꞌuin cui̱nk nak xcꞌameꞌ xban li cui̱nk. Ut teꞌxcꞌut li tꞌicr chiruheb li nequeꞌcꞌamoc be saꞌ xya̱nkeb li tenamit.

¹⁶ Li yucuaꞌbej tixye reheb, “La̱in xinsumub lin rabin riqꞌuin li cui̱nk aꞌin, abanan xicꞌ chic naril.

¹⁷ Anakcuan xmux ru lin rabin ut naxye nak ac cuanjenak riqꞌuin cui̱nk nak quixcꞌam. Abanan arin cuan li tꞌicr retalil nak ya̱l nak toj ma̱jiꞌ cuanjenak riqꞌuin cui̱nk.” Ut li naꞌbej ut li yucuaꞌbej teꞌxcꞌut li tꞌicr chiruheb li nequeꞌcꞌamoc be.

¹⁸ Ut eb laj cꞌamol be teꞌxchap li cui̱nk ut teꞌxqꞌue chixtojbal xma̱c.

¹⁹ Tento nak li cui̱nk tixtoj jun ciento chi tumin plata re li yucuaꞌbej xban nak quixyoꞌob ticꞌtiꞌ chirix li tukꞌ ixk aj Israel. Ut tento ajcuiꞌ nak ta̱cana̱k riqꞌuin li rixakil ut incꞌaꞌ ta̱ru̱k tixjach rib riqꞌuin joꞌ najtil chic yoꞌyo̱k li cui̱nk.

²⁰ Abanan cui ya̱l nak cuanjenak riqꞌuin cui̱nk nak xtauheꞌ xban li cui̱nk ut cui li naꞌbej ut li yucuaꞌbej incꞌaꞌ nequeꞌxcꞌam li retalil lix tukꞌ ixkilal,

²¹ li xkaꞌal ta̱cꞌamekꞌ chiru li puerta re li rochoch lix yucuaꞌ ut eb li cui̱nk saꞌ li tenamit aꞌan teꞌxcuti chi pec toj retal teꞌxcamsi xban nak xba̱nu li incꞌaꞌ us nak toj cuan saꞌ rochoch lix yucuaꞌ. Chi joꞌcaꞌin te̱risi li ma̱usilal aꞌan saꞌ e̱ya̱nk la̱ex.

²² Cui junak cui̱nk natauheꞌ chi cua̱rc riqꞌuin junak ixk ac sumsu, teꞌcamsi̱k chi xcabichaleb. Chi joꞌcaꞌin ta̱sachma̱nk li ma̱usilal saꞌ e̱ya̱nk la̱ex aj Israel.

²³ Cui junak xkaꞌal ac tzꞌa̱manbil ta̱tauhekꞌ xban junak chic cui̱nk saꞌ be ut li ixk tixsume ut li cui̱nk ta̱cua̱nk riqꞌuin,

²⁴ aꞌaneb tento nak teꞌcꞌamekꞌ chi xcabichaleb chiruheb laj rakol a̱tin saꞌ li oqueba̱l re li tenamit ut teꞌcutekꞌ chi pec toj retal teꞌcamsi̱k. Ta̱camsi̱k li ixk xban nak incꞌaꞌ quixjap re saꞌ li tenamit chixcolbal rib. Ut li cui̱nk ta̱camsi̱k xban nak quixmux ru li rixakil li ras ri̱tzꞌin. Chi joꞌcaꞌin te̱risi li ma̱usilal saꞌ e̱ya̱nk.

²⁵ Abanan cui junak cui̱nk tixtau saꞌ cꞌaleba̱l junak xkaꞌal ac tzꞌa̱manbil ut tixchap chi pue̱rs ut ta̱cua̱nk riqꞌuin, li cui̱nk aꞌan ta̱camsi̱k.

²⁶ Abanan ma̱cꞌaꞌ te̱ba̱nu re li xkaꞌal xban nak ma̱cꞌaꞌ xma̱c ut moco xcꞌulub ta nak ta̱camsi̱k. Li cui̱nk aꞌin xcꞌulub ca̱mc joꞌ quixcꞌul li cui̱nk li quixcamsi ras ri̱tzꞌin,

²⁷ xban nak li cui̱nk quixcꞌul li xkaꞌal saꞌ cꞌaleba̱l ut ma̱ ani quiru quicoloc re, usta quixjap re.

²⁸ Cui junak cui̱nk tixtau jun li tukꞌ ixk li incꞌaꞌ tzꞌa̱manbil ut tixchap ut ta̱cua̱nk riqꞌuin, ut nequeꞌtaꞌli chi ma̱cobc,

²⁹ li cui̱nk li quicuan riqꞌuin li xkaꞌal tento nak tixtoj laje̱b roxcꞌa̱l (50) chi tumin plata re lix yucuaꞌ li xkaꞌal. Ut tento ajcuiꞌ nak li cui̱nk ta̱sumla̱k riqꞌuin li xkaꞌal xban nak quixmux ru. Ut incꞌaꞌ ta̱ru̱k tixjach rib riqꞌuin joꞌ najtil yoꞌyo̱k li cui̱nk.

³⁰ Ma̱ jun li cui̱nk naru tixchꞌic rib riqꞌuin rixakil lix yucuaꞌ. Incꞌaꞌ naru tixcꞌut xxuta̱n lix yucuaꞌ.