Deuteronomio 21 - Li Santil hu

¹ Ma̱re te̱tau junak li camenak saꞌ cꞌaleba̱l saꞌ li naꞌajej li tixqꞌue e̱re li Ka̱cuaꞌ le̱ Dios ut incꞌaꞌ te̱nau ani xcamsin re.

² Eb li nequeꞌcꞌamoc be saꞌ e̱ya̱nk rochbeneb laj rakol a̱tin teꞌxic ut teꞌxbis joꞌ najtil cuan li camenak riqꞌuineb li tenamit.

³ Ut eb li nequeꞌcꞌamoc be saꞌ li tenamit li cuan chi nachꞌ riqꞌuin li camenak teꞌxchap jun li cuacax li toj ma̱jiꞌ xcꞌanjelac, li ma̱ jun sut qꞌuebil yugo chirix xcux.

⁴ Teꞌxcꞌam li cuacax saꞌ junak li ru takꞌa li ma̱ jun sut quibequeꞌ li chꞌochꞌ chi moco qui-ux a̱uc aran. Saꞌ li naꞌajej aꞌan teꞌxtok xcux li cuacax.

⁵ Teꞌcha̱lk eb laj tij, li ralal xcꞌajol laj Leví, xban nak aꞌaneb li sicꞌbil ruheb xban li Dios chi cꞌanjelac chiru ut chixtzꞌa̱manquil nak li Dios ta̱rosobtesiheb li tenamit. Aꞌaneb li teꞌrakok re li ple̱t ut li cuechꞌi̱nc.

⁶ Ut chixjunileb li nequeꞌcꞌamoc be saꞌ li tenamit, li cuanqueb nachꞌ riqꞌuin li naꞌajej li queꞌxtau cuiꞌ li camenak, teꞌxchꞌaj li rukꞌ saꞌ xbe̱n li cuacax li quitokeꞌ xcux saꞌ li ru takꞌa.

⁷ Ut teꞌxye, “Ma̱cuaꞌ la̱o xocamsin re li cui̱nk aꞌan, chi moco xkil li ani xba̱nun re.

⁸ At Ka̱cuaꞌ, chacuy xma̱queb la̱ tenamit Israel li cacuisiheb chak Egipto. Ma̱qꞌue taxak saꞌ kabe̱n lix camic li cui̱nk aꞌin li ma̱cꞌaꞌ xma̱c. Ut riqꞌuin li teꞌxba̱nu tojbil chic rix lix camic li cui̱nk.”

⁹ Ut xban nak la̱ex xeba̱nu li us chiru li Ka̱cuaꞌ incꞌaꞌ ta̱teneba̱k saꞌ e̱be̱n lix camic li cui̱nk li ma̱cꞌaꞌ xma̱c.

¹⁰ Nak texxic chi pletic riqꞌuineb li xicꞌ nequeꞌiloc e̱re ut nak li Ka̱cuaꞌ le̱ Dios tixkꞌaxtesi saꞌ e̱rukꞌ li tenamit, cuanqueb li te̱cꞌam chi pre̱xil.

¹¹ Cui junak cui̱nk saꞌ e̱ya̱nk ta̱ril jun li ixk chꞌinaꞌus saꞌ xya̱nkeb li queꞌcꞌameꞌ chi pre̱xil ut tixra ru, naru tixcꞌam chokꞌ rixakil.

¹² Tixcꞌam li ixk saꞌ rochoch ut tixye re nak tixjo li rismal xjolom ut tixset li rixiꞌij.

¹³ Li ixk tixjal li rakꞌ li quirocsi saꞌ li jalan tenamit ut ta̱cua̱nk saꞌ li rochoch li cui̱nk. Ut chiru jun po ta̱rahokꞌ xchꞌo̱l xban xcamic lix naꞌ xyucuaꞌ. Chirix li jun po li cui̱nk naru ta̱cua̱nk riqꞌuin. Aꞌanak chic li rixakil, ut aꞌanak chic lix be̱lom.

¹⁴ Cui li cui̱nk incꞌaꞌ cꞌojcꞌo xchꞌo̱l riqꞌuin li ixk, naru tixcanab chi xic. Abanan incꞌaꞌ naru tixcꞌayi li ixk, chi moco naru tixba̱nu re joꞌ naxba̱nu reheb lix lokꞌbil mo̱s, xban nak li cui̱nk, aꞌan li xmux ru li ixk.

¹⁵ Ma̱re cuan junak cui̱nk ta̱cua̱nk cuib li rixakil. Naxra li jun, abanan xicꞌ naril li jun chic. Ut ma̱re cua̱nk ralal riqꞌuineb li cuib chi ixk. Abanan ma̱re riqꞌuin li ixk li incꞌaꞌ naxra ta̱cua̱nk li xbe̱n ralal.

¹⁶ Li cui̱nk incꞌaꞌ naru tixsicꞌ ru li ralal li tixra. Nak tixjeqꞌui li cꞌaꞌru cuan re, tento nak tixqꞌue li ma̱tan re li xbe̱n alalbej li xcꞌulub xcꞌulbal, usta aꞌan li ralal li cuan riqꞌuin li ixk li incꞌaꞌ naxra.

¹⁷ Tento nak tixqꞌue cuib sut xqꞌuial li cꞌaꞌak re ru re li xbe̱n alalbej usta aꞌan ma̱cuaꞌ li ralal li cuan riqꞌuin li rixakil li naxra. Tento nak tixqꞌue re li joꞌ qꞌuial xcꞌulub xcꞌulbal xban nak aꞌan li xbe̱n alalbej.

¹⁸ Ma̱re cua̱nk junak cui̱nk cua̱nk junak ralal li incꞌaꞌ na-abin. Naxkꞌetkꞌeti ban rib. Usta nakꞌuseꞌ, incꞌaꞌ naxcꞌul lix kꞌusbal xbaneb lix naꞌ xyucuaꞌ.

¹⁹ Tento nak li naꞌbej yucuaꞌbej teꞌxcꞌam li al aꞌan saꞌ li oqueba̱l re lix tenamiteb ut teꞌxxakab chiruheb li nequeꞌcꞌamoc be saꞌ li tenamit aꞌan.

²⁰ Teꞌxye reheb li nequeꞌcꞌamoc be, “Li al aꞌin naxkꞌetkꞌeti rib chiku. Incꞌaꞌ na-abin chiku ut incꞌaꞌ naxpa̱b lix kꞌusbal. Junes cuaꞌac naraj ut aj calajenak.”

²¹ Ut chixjunileb li cui̱nk li cuanqueb saꞌ li tenamit aꞌan teꞌxcuti chi pec toj retal ta̱ca̱mk. Chi joꞌcaꞌin te̱risi li ma̱usilal saꞌ e̱ya̱nk. Ut chixjunileb laj Israel teꞌrabi resil ut teꞌxucuak xban.

²² Cui junak cui̱nk naxba̱nu li ma̱c ut nateneba̱c ca̱mc saꞌ xbe̱n ut natꞌuyuba̱c chiru cheꞌ,

²³ incꞌaꞌ naru te̱canab li camenak chi tꞌuytꞌu chiru li kꞌojyi̱n. Tento nak ta̱mukekꞌ saꞌ ajcuiꞌ li cutan aꞌan xban nak tzꞌekta̱nanbil xban li Dios li ani natꞌuyuba̱c chiru cheꞌ. Incꞌaꞌ naru te̱mux ru li naꞌajej li tixqꞌue e̱re li Ka̱cuaꞌ le̱ Dios.