Deuteronomio 20 - Li Santil hu

¹ Nak texxic chi pletic riqꞌuineb li xicꞌ nequeꞌiloc e̱re ut te̱ril nak kꞌaxal nabaleb lix soldado ut lix cacua̱y ut lix carruaje chiru le̱ re la̱ex, mexxucuac xbaneb. Li Ka̱cuaꞌ le̱ Dios li qui-isin chak e̱re aran Egipto, aꞌan cua̱nk e̱riqꞌuin ut ta̱tenkꞌa̱nk e̱re.

² Nak oc e̱re chi pletic, laj tij ta̱cha̱lk chi a̱tinac riqꞌuineb le̱ soldado.

³ Ut tixye reheb, “Abihomak la̱ex aj Israel. Anakcuan texxic chi pletic riqꞌuineb li xicꞌ nequeꞌiloc e̱re. Incꞌaꞌ ta̱chꞌina̱k e̱chꞌo̱l chi moco texxucuak. Incꞌaꞌ texcꞌoxlak chi moco ta̱sachk e̱chꞌo̱l xbaneb li xicꞌ nequeꞌiloc e̱re.

⁴ Li Ka̱cuaꞌ le̱ Dios, aꞌan li ta̱cua̱nk e̱riqꞌuin. Aꞌan ta̱tenkꞌa̱nk e̱re chi pletic riqꞌuineb li xicꞌ nequeꞌiloc e̱re re texnumta̱k saꞌ xbe̱neb.”

⁵ Ut eb laj cꞌamol be saꞌ xya̱nkeb li soldados teꞌxye, “Cui cuan junak saꞌ e̱ya̱nk xyi̱b junak rochoch ut toj ma̱jiꞌ naxsul, mas us nak ta̱sukꞌi̱k saꞌ li rochoch re nak tixsul xban nak ma̱re ta̱ca̱mk chak saꞌ li ple̱t ut ma̱re jalan chic ta̱suluk re li rochoch.

⁶ ¿Ma cuan junak saꞌ e̱ya̱nk xrau lix uvas ut toj ma̱jiꞌ naxyal xsahil? Cui cuan, li jun aꞌan ta̱sukꞌi̱k saꞌ rochoch re nak tixyal xsahil xban nak ma̱re ta̱camsi̱k saꞌ li ple̱t ut ma̱re jalan chic ta̱yalok xsahil.

⁷ ¿Ma cuan junak xtzꞌa̱ma rixakil ut toj ma̱jiꞌ nasumla? Cui cuan, li jun aꞌan ta̱sukꞌi̱k saꞌ rochoch xban nak ma̱re ta̱camsi̱k saꞌ li ple̱t ut jalan chic cui̱nk ta̱cꞌamok re.”

⁸ Ut eb li nequeꞌtaklan teꞌxye ajcuiꞌ, “¿Ma cuan junak xchꞌinan xchꞌo̱l ut ta̱xucuak? Cui cuan, chisukꞌi̱k saꞌ rochoch re nak eb li ras ri̱tzꞌin incꞌaꞌ teꞌchꞌina̱nk xchꞌo̱leb xban.”

⁹ Ut nak teꞌrakekꞌ chi a̱tinac, eb li nequeꞌtaklan saꞌ xbe̱neb li soldado teꞌoc chi cꞌamoc be chiruheb.

¹⁰ Ut nak tex-oc chi pletic riqꞌuin junak li tenamit li te̱re̱chani, xbe̱n cua te̱ye reheb nak naru teꞌxcꞌam ribeb saꞌ usilal e̱riqꞌuin.

¹¹ Cui teꞌxcꞌul xchꞌo̱l ut saꞌ usilal teꞌxte li oqueba̱l re li tenamit che̱ru, chixjunileb li cuanqueb saꞌ li tenamit teꞌcꞌanjelak che̱ru chokꞌ e̱mo̱s.

¹² Abanan cui eb aꞌan incꞌaꞌ teꞌxcꞌam ribeb saꞌ usilal e̱riqꞌuin ut teꞌraj pletic, la̱ex te̱sut rix lix tenamiteb.

¹³ Ut nak li Ka̱cuaꞌ le̱ Dios tixkꞌaxtesi li tenamit aꞌan saꞌ e̱rukꞌ, tento nak te̱camsiheb chi chꞌi̱chꞌ chixjunileb li cui̱nk li cuanqueb saꞌ li tenamit.

¹⁴ Abanan naru te̱cꞌam chokꞌ e̱re eb li ixk, eb li cocꞌal, li queto̱mk ut chixjunil li cꞌaꞌak re ru cuan saꞌ li tenamit li tixkꞌaxtesi chokꞌ e̱re li Ka̱cuaꞌ le̱ Dios.

¹⁵ Joꞌcaꞌin te̱ba̱nu riqꞌuineb chixjunileb li tenamit li najt cuanqueb li ma̱cuaꞌ saꞌ xcue̱nteb li tenamit li nachꞌ cuanqueb e̱riqꞌuin.

¹⁶ Abanan saꞌ eb li tenamit li tixqꞌue e̱re li Dios re texcua̱nk cuiꞌ, ma̱ jun cristian ta̱ru̱k te̱canab chi yoꞌyo.

¹⁷ Te̱sach ruheb chi junaj cua eb laj heteo, eb laj amorreo, eb laj cananeo, eb laj ferezeo, ut eb laj heveo, joꞌ eb ajcuiꞌ laj jebuseo, joꞌ quixye e̱re li Ka̱cuaꞌ le̱ Dios.

¹⁸ Cui incꞌaꞌ te̱sach ruheb, eb aꞌan teꞌxcꞌut che̱ru li incꞌaꞌ us joꞌ nequeꞌxba̱nu eb aꞌan nak nequeꞌxlokꞌoni li jalanil dios. Ut la̱ex texma̱cobk chiru li Ka̱cuaꞌ le̱ Dios.

¹⁹ Nak yo̱kex chi pletic re te̱re̱chani junak li tenamit, cui texba̱yk chi pletic riqꞌuineb, me̱tꞌaneb li cheꞌ li nequeꞌu̱chin xban nak ta̱ru̱k te̱tzaca li ru li nequeꞌxqꞌue. Li cheꞌ ma̱cuaꞌeb cui̱nk re nak te̱sach ruheb.

²⁰ Abanan naru te̱tꞌaneb li cheꞌ li incꞌaꞌ nequeꞌu̱chin. Naru teꞌcꞌanjelak re xyi̱banquil li takleba̱l re tex-oc saꞌ li tenamit toj retal te̱re̱chani.