Deuteronomio 2 - Li Santil hu

Li cꞌaꞌru queꞌxcꞌuleb laj Israel nak queꞌnumeꞌ saꞌ li chaki chꞌochꞌ

¹ Chirix aꞌan cosukꞌi ut co̱o saꞌ li chaki chꞌochꞌ saꞌ li Caki Palau joꞌ quixye cue li Ka̱cuaꞌ. Najt kabeni kib saꞌ li naꞌajej Seir, li tzu̱l ru.

² Chirix aꞌan li Ka̱cuaꞌ quixye cue,

³ “Anakcuan texxic saꞌ li norte xban nak ac junxil nequex-oc chixbeninquil e̱rib saꞌ li naꞌajej aꞌin.

⁴ Ta̱ye reheb laj Israel chi joꞌcaꞌin: Oc e̱re chi numecꞌ saꞌ lix naꞌajeb li ralal xcꞌajol laj Esaú, le̱ rechꞌalal li cuanqueb saꞌ li naꞌajej Seir. Eb aꞌan teꞌxucuak che̱rilbal, abanan la̱ex te̱ba̱nu cue̱nt.

⁵ Mex-oc chi pletic riqꞌuineb xban nak la̱in incꞌaꞌ tinqꞌue e̱re li naꞌajej li quinqꞌue reheb aꞌan. Chi moco caꞌchꞌin ajcuiꞌ li bar te̱xakab cuiꞌ le̱ rok tinqꞌue e̱re xban nak la̱in ac xinqꞌue re laj Esaú li naꞌajej Seir li tzu̱l ru.

⁶ La̱ex te̱toj le̱ cua e̱rucꞌa li ta̱qꞌuehekꞌ e̱re aran,” chan e̱re.

⁷ Li Ka̱cuaꞌ le̱ Dios quexrosobtesi riqꞌuin chixjunil li cꞌaꞌru queba̱nu. Aꞌan qui-iloc e̱re chiru li caꞌcꞌa̱l chihab nak yo̱quex chi numecꞌ saꞌ li chaki chꞌochꞌ. Ut quicuan e̱riqꞌuin ut ma̱cꞌaꞌ quipaltoꞌ che̱ru.

⁸ Joꞌcan nak co-el Seir, li naꞌajej li tzu̱l ru li cuanqueb cuiꞌ li ralal xcꞌajol laj Esaú li kechꞌalal. Kacanab li be re Arabá li naxic Elat ut Ezión-geber. Ut conumeꞌ cuiꞌchic saꞌ li be saꞌ li chaki chꞌochꞌ re Moab.

⁹ Ut li Ka̱cuaꞌ quixye cue, “Me̱chꞌiꞌchꞌiꞌiheb laj Moab li ralal xcꞌajol laj Lot. Me̱chikꞌ xjoskꞌileb re teꞌpletik xban nak la̱in incꞌaꞌ tinqꞌue lix naꞌajeb chokꞌ e̱re la̱ex. La̱in ac quinqꞌue li naꞌajej Ar reheb”.

¹⁰ (Junxil queꞌcuan eb laj Emita saꞌ li naꞌajej aꞌan. Kꞌaxal nabaleb ut cauheb rib. Najt rokeb joꞌ eb li ralal xcꞌajol laj Anac.

¹¹ Naꞌno̱queb ru nak ni̱nki cui̱nkeb joꞌ xni̱nkaleb li ralal xcꞌajol laj Anac. Eb laj Moab nequeꞌxye “Emitas” reheb.

¹² Najter eb laj horeo queꞌcuan saꞌ li naꞌajej Seir, abanan eb li ralal xcꞌajol laj Esaú queꞌrisiheb ut queꞌxsach ruheb ut queꞌcana chi cua̱nc saꞌ lix naꞌajeb. Queꞌxba̱nu joꞌ queꞌxba̱nu laj Israel nak queꞌoc saꞌ li naꞌajej li quixqꞌue li Dios reheb.)

¹³ Ut li Ka̱cuaꞌ quixye, “Ut anakcuan ayukex jun pacꞌal li nimaꞌ Zered” chan. Ut joꞌcan kaba̱nu.

¹⁴ Cuakxaklaju xcaꞌcꞌa̱l (38) chihab kelic Cades-barnea toj chalen nak conumeꞌ jun pacꞌal li nimaꞌ Zered. Ac camenakeb chic chixjunileb li cui̱nk li nequeꞌxic chi pletic joꞌ quixye li Dios riqꞌuin juramento.

¹⁵ Li Ka̱cuaꞌ quixsach ruheb chixjunileb riqꞌuin lix cuanquil ut ma̱ jun chic queꞌcana.

¹⁶ Nak ac camenakeb chic chixjunileb li cui̱nk li nequeꞌxic chi pletic,

¹⁷ li Ka̱cuaꞌ quixye cue,

¹⁸ “Anakcuan texnumekꞌ saꞌ li naꞌajej Ar, li cuanqueb cuiꞌ eb laj Moab.

¹⁹ Nak texcuulak cuanqueb cuiꞌ eb li ralal xcꞌajol laj Amón, me̱chꞌiꞌchꞌiꞌiheb ut me̱chikꞌ xjoskꞌileb re teꞌpletik xban nak la̱in incꞌaꞌ tinqꞌue e̱re lix naꞌajeb. La̱in quinqꞌue li naꞌajej aꞌan chokꞌ reheb li ralal xcꞌajol laj Lot,” chan.

²⁰ (Junxil li naꞌajej aꞌin reheb li ni̱nki cui̱nk ut eb li ralal xcꞌajol laj Amón queꞌxye zomzomeo reheb.

²¹ Kꞌaxal nabaleb ut cauheb rib ut najt rokeb joꞌ eb li ralal xcꞌajol laj Anac. Li Ka̱cuaꞌ quixcanabeb laj Amón chixsachbal ruheb laj zomzomeo. Ut eb li ralal xcꞌajol laj Amón queꞌcana chi cua̱nc saꞌ lix naꞌajeb.

²² Joꞌcan ajcuiꞌ quixba̱nu li Ka̱cuaꞌ reheb li ralal xcꞌajol laj Esaú li cuanqueb saꞌ li naꞌajej Seir. Queꞌxsach ruheb laj horeo ut chalen toj anakcuan cuanqueb saꞌ lix naꞌajeb.

²³ Ut eb laj Caftor queꞌxsach ruheb laj aveo li queꞌcuan saꞌ li naꞌajej nacuulac toj Gaza. Ut eb laj caftoreo queꞌcana chi cua̱nc saꞌ lix naꞌajeb.)

²⁴ Li Ka̱cuaꞌ quixye, “Ayukex anakcuan ut numenkex jun pacꞌal li nimaꞌ Arnón. La̱in tinkꞌaxtesi saꞌ e̱rukꞌ laj Sehón laj amorreo, lix reyeb laj Hesbón. Ut tinqꞌue e̱re li naꞌajej li cuan cuiꞌ laj Sehón. Texxic chi pletic riqꞌuineb re nak te̱re̱chani li naꞌajej.

²⁵ Saꞌ li cutan aꞌin la̱in tinqꞌue xxiuheb chixjunileb li tenamit li cuanqueb rubel choxa. Teꞌrabi resil li cꞌaꞌru yo̱kex ut sicsotkeb xban xxiuheb che̱ru,” chan li Dios.

²⁶ Nak cuanco saꞌ li chaki chꞌochꞌ re Cademot la̱in quintaklaheb lin takl riqꞌuin laj Sehón lix reyeb laj Hesbón chi a̱tinac riqꞌuin saꞌ usilal.

²⁷ Quinye re: Choa̱canab chi numecꞌ saꞌ la̱ naꞌaj. Yal numecꞌ takaba̱nu saꞌ li nim be. Ti̱c toxic. Ma̱cꞌaꞌ takachꞌeꞌ e̱re. Ti̱c ban tonumekꞌ.

²⁸ Takatoj li kacua kucꞌa. La̱o tonumekꞌ chi kok saꞌ le̱ naꞌaj.

²⁹ Choa̱canab chi numecꞌ saꞌ le̱ naꞌaj toj retal tonumekꞌ jun pacꞌal li nimaꞌ Jordán saꞌ li naꞌajej li xqꞌue ke li Ka̱cuaꞌ li kaDios joꞌ nak xoeꞌxcanab chi numecꞌ saꞌ lix naꞌajeb li ralal xcꞌajol laj Esaú li cuanqueb Seir ut eb li ralal xcꞌajol laj Moab li cuanqueb Ar, chanquin re li rey.

³⁰ Abanan laj Sehón lix reyeb laj Hesbón incꞌaꞌ coxcanab chi numecꞌ xban nak li Ka̱cuaꞌ le̱ Dios quixcacuubresi xchꞌo̱l re nak tixkꞌaxtesi saꞌ kukꞌ li naꞌajej toj chalen anakcuan.

³¹ Ut li Ka̱cuaꞌ quixye cue: “Qꞌue retal. La̱in yo̱quin chixkꞌaxtesinquil saꞌ e̱rukꞌ laj Sehón ut lix naꞌaj. Anakcuan ayukex chire̱chaninquil lix naꞌajeb,” chan.

³² Ut laj Sehón rochbeneb chixjunileb lix soldado queꞌchal chikacꞌulbal ut queꞌpletic kiqꞌuin saꞌ li tenamit Jahaza.

³³ Ut li Ka̱cuaꞌ li kaDios quixkꞌaxtesiheb saꞌ kukꞌ. Ut kasach ruheb laj Sehón rochbeneb li ralal ut chixjunileb lix soldado.

³⁴ Ut conumta saꞌ xbe̱neb chixjunileb lix tenamit ut kasach ruheb chixjunileb joꞌ cui̱nk, joꞌ ixk, joꞌ cocꞌal. Ma̱ jun chic queꞌcana.

³⁵ Caꞌaj cuiꞌ lix queto̱mk kaxoc chokꞌ ke ut li cꞌaꞌru terto xtzꞌak li cuan saꞌ eb lix tenamit.

³⁶ Ma̱ jun li tenamit incꞌaꞌ ta conumta saꞌ xbe̱n naticla Aroer ut nacuulac toj Galaad. Ma̱ jun li tenamit kꞌaxal cau rib chiku la̱o. Li Ka̱cuaꞌ Dios quixkꞌaxtesiheb chixjunileb saꞌ kukꞌ.

³⁷ Abanan incꞌaꞌ kachap chokꞌ ke lix naꞌajeb li ralal xcꞌajol laj Amón, chi moco li chꞌochꞌ li cuan chire li nimaꞌ Jaboc, chi moco li tenamit li cuanqueb saꞌ li naꞌajej li tzu̱l ru. Incꞌaꞌ copletic riqꞌuineb li tenamit li quixye ke li Ka̱cuaꞌ li kaDios nak incꞌaꞌ takachꞌeꞌ.