Deuteronomio 19 - Li Santil hu

Eb li tenamit li teꞌxcol cuiꞌ ribeb li nequeꞌcamsin chi yal incꞌaꞌ nequeꞌraj xchꞌo̱l

¹ Nak li Ka̱cuaꞌ le̱ Dios ac xsach ruheb chixjunileb li tenamit li cuanqueb saꞌ li naꞌajej li tixqꞌue e̱re li Ka̱cuaꞌ, nak acak xere̱chani ut cua̱nkex chic saꞌ lix tenamiteb ut saꞌ li rochocheb,

² la̱ex te̱sicꞌ ru chokꞌ e̱re oxib li tenamit li cuanqueb saꞌ li naꞌajej li tixqꞌue e̱re li Ka̱cuaꞌ.

³ Te̱yi̱b li be li ta̱xic saꞌ eb li tenamit aꞌin. Ut te̱jach saꞌ oxib jachal li naꞌajej li tixqꞌue e̱re li Ka̱cuaꞌ. Ut cui junak tixcamsi li ras ri̱tzꞌin chi incꞌaꞌ yal xraj xchꞌo̱l nak tixcamsi, li jun aꞌan ta̱ru̱k ta̱xic saꞌ junak reheb li oxib chi tenamit aꞌin re tixcol rib.

⁴ Li ani tixcamsi li ras ri̱tzꞌin chi incꞌaꞌ yal xraj xchꞌo̱l nak tixcamsi, ut cui incꞌaꞌ xicꞌ naril, naru ta̱xic saꞌ li tenamit re tixcol rib.

⁵ Ma̱re junak cui̱nk ta̱xic chixyocꞌbal xsiꞌ, saꞌ qꞌuicheꞌ ut nak ta̱oc chi yocꞌoc, ta̱tobekꞌ lix ma̱l ut tixyocꞌ li rochben ut ta̱ca̱mk. Li cui̱nk aꞌan li xcamsin re chi incꞌaꞌ yal xraj xchꞌo̱l naru ta̱xic saꞌ jun reheb li oxib chi tenamit aꞌin re tixcol chak rib.

⁶ Cui kꞌaxal najt cuan li tenamit, ma̱re incꞌaꞌ ta̱ru̱k ta̱cuulak saꞌ li tenamit re tixcol rib. Li rechꞌalal li camenak naru toxtau saꞌ be ut xban xjoskꞌil tixcamsi chokꞌ re̱kaj li camenak, usta li cui̱nk aꞌan incꞌaꞌ tenebanbil ca̱mc saꞌ xbe̱n xban nak incꞌaꞌ yal xraj xchꞌo̱l nak xcamsi li rochben.

⁷ Joꞌcan nak la̱in ninye e̱re nak te̱sicꞌ ruheb li oxib chi tenamit aꞌin.

⁸ Ut li Ka̱cuaꞌ le̱ Dios tixnimobresi le̱ naꞌaj joꞌ quixyechiꞌi riqꞌuin juramento reheb le̱ xeꞌto̱nil yucuaꞌ, ut tixqꞌue e̱re li naꞌajej joꞌ quixye.

⁹ Cherahak li Ka̱cuaꞌ le̱ Dios ut te̱ba̱nu li cꞌaꞌru naxye saꞌ lix chakꞌrab. Junelic chexcua̱nk joꞌ naraj aꞌan ut li Ka̱cuaꞌ tixnimobresi le̱ naꞌaj. Tojoꞌnak la̱ex te̱sicꞌ ru oxib chic li tenamit bar ta̱ru̱k teꞌxcol cuiꞌ ribeb li cristian li nequeꞌxcamsi ras ri̱tzꞌin chi incꞌaꞌ yal xraj xchꞌo̱l.

¹⁰ Chesicꞌ ruheb li tenamit aꞌin re nak incꞌaꞌ teꞌcamsi̱k saꞌ le̱ naꞌaj li ani ma̱cꞌaꞌ xma̱c. Cheba̱nu aꞌan re nak incꞌaꞌ texma̱cobk riqꞌuin xcamsinquil li ani ma̱cꞌaꞌ xma̱c saꞌ li naꞌajej li tixqꞌue e̱re li Ka̱cuaꞌ le̱ Dios.

¹¹ Abanan ma̱re junak cui̱nk xicꞌ ta̱ril li ras ri̱tzꞌin ut tixcꞌu̱b ru chanru nak tixcamsi. Ut nak tixcamsi li ras ri̱tzꞌin ta̱e̱lelik ut ta̱xic saꞌ junak reheb li tenamit aꞌin re xcolbal rib.

¹² Eb li nequeꞌcꞌamoc be saꞌ li tenamit li qui-el cuiꞌ li cui̱nk teꞌxtakla xcꞌambal ut teꞌxkꞌaxtesi saꞌ rukꞌ li rechꞌalal li camenak re tixcamsi.

¹³ Incꞌaꞌ te̱ril xtokꞌoba̱l ru li ani nama̱cob riqꞌuin xcamsinquil ras ri̱tzꞌin. Tento nak te̱risi li ma̱c saꞌ le̱ naꞌaj re nak us tex-e̱lk.

¹⁴ Ut incꞌaꞌ naru te̱jal li nuba̱l re lix chꞌochꞌ le̱ ras e̱ri̱tzꞌin li quixakaba̱c junxil saꞌ li naꞌajej li tixqꞌue e̱re li Ka̱cuaꞌ le̱ Dios re texcua̱nk cuiꞌ.

¹⁵ Incꞌaꞌ tzꞌakal cui jun ajcuiꞌ ta̱yehok re nak cuan xma̱c junak cristian. Tento nak ta̱cua̱nk cuib malaj ut oxib li teꞌyehok re cuan xma̱c.

¹⁶ Cui junak cristian ta̱xic chixyebal ticꞌtiꞌ chirix li ras ri̱tzꞌin,

¹⁷ tento nak li cuib chi cristian li yo̱queb chi pletic teꞌxic chiru li Ka̱cuaꞌ ut chiruheb laj tij ut chiruheb ajcuiꞌ laj rakol a̱tin li cuanqueb saꞌ xcuanquil.

¹⁸ Ut laj rakol a̱tin teꞌxtzꞌil rix chi us li chꞌaꞌajquilal. Cui nacꞌutun nak li jun quixye ticꞌtiꞌ chirix ras ri̱tzꞌin,

¹⁹ tojoꞌnak te̱ba̱nu re aꞌan joꞌ quiraj raj xba̱nunquil re li ras ri̱tzꞌin. Tento nak te̱risi li ma̱usilal saꞌ e̱ya̱nk.

²⁰ Ut chixjunileb li tenamit teꞌrabi resil li quicꞌulman ut teꞌxucuak. Ut incꞌaꞌ chic ta̱ba̱numa̱nk li ma̱usilal aꞌan saꞌ e̱ya̱nk.

²¹ Incꞌaꞌ te̱ril xtokꞌoba̱l ruheb li nequeꞌxba̱nu li ma̱usilal. Cui junak tixcamsi ras ri̱tzꞌin, ta̱camsi̱k ajcuiꞌ aꞌan. Cui junak ta̱risi xnakꞌ ru li ras ri̱tzꞌin, ta̱isi̱k ajcuiꞌ xnakꞌ ru aꞌan; cui junak ta̱risi ruch re li ras ri̱tzꞌin, ta̱isi̱k ajcuiꞌ ruch re aꞌan; cui junak ta̱risi li rukꞌ li ras ri̱tzꞌin, ta̱isi̱k ajcuiꞌ li rukꞌ aꞌan; cui junak ta̱risi li rok li ras ri̱tzꞌin, ta̱isi̱k ajcuiꞌ li rok aꞌan.