Deuteronomio 18 - Li Santil hu

Li cꞌaꞌru teꞌxcꞌul eb laj tij ut eb laj levita

¹ Eb laj tij ut li jun chꞌol chic li ralal xcꞌajol laj Leví incꞌaꞌ teꞌre̱chani lix chꞌochꞌeb joꞌ eb li jun chꞌol chic laj Israel. Eb aꞌan teꞌxcꞌul xcomon li mayej li nacꞌatman chiru li Ka̱cuaꞌ. Aꞌan li teꞌre̱chani.

² Ma̱cꞌaꞌ teꞌxcꞌul rochbeneb li ras ri̱tzꞌin xban nak lix ma̱taneb aꞌan, aꞌan li cꞌanjelac chiru li Ka̱cuaꞌ.

³ Nak eb laj levita teꞌxqꞌue jun li bo̱yx malaj ut jun li carner li toj sa̱j re lix cꞌatbil mayej, eb laj tij teꞌxcꞌul lix tel, lix ca̱lam re, ut lix puj.

⁴ Te̱qꞌue reheb laj tij li xbe̱n ru le̱ racui̱mk, li acꞌ vino, li aceite, ut li rix li carner li tojeꞌ xbe̱n cua te̱bes.

⁵ Teꞌxcꞌul aꞌin xban nak li Ka̱cuaꞌ le̱ Dios quixsicꞌ ruheb rochbeneb li ralal xcꞌajol saꞌ xya̱nkeb chixjunileb laj Israel re nak teꞌcꞌanjelak chiru chi junelic kꞌe cutan.

⁶ Ma̱re junak laj levita ta̱raj e̱lc saꞌ junak reheb le̱ tenamit aran Israel, ut ta̱recꞌa saꞌ xchꞌo̱l nak ta̱xic chi cꞌanjelac saꞌ jalan naꞌajej li tixsicꞌ ru li Ka̱cuaꞌ Dios re ta̱lokꞌoni̱k.

⁷ Naru teꞌcꞌanjelak chiru li Ka̱cuaꞌ lix Dioseb saꞌ li naꞌajej aꞌan, joꞌ nequeꞌxba̱nu li jun chꞌol chic laj levita li nequeꞌcꞌanjelac chiru li Dios.

⁸ Juntakꞌe̱t xqꞌuial li cꞌaꞌru teꞌxcꞌul riqꞌuin li nequeꞌxcꞌul li jun chꞌol chic laj levita, usta cuan cꞌaꞌru xeꞌre̱chani riqꞌuin lix yucuaꞌeb.

⁹ Nak tex-oc saꞌ li naꞌajej li tixqꞌue e̱re li Ka̱cuaꞌ, incꞌaꞌ te̱tzol e̱rib chixba̱nunquil li yibru naꞌleb li nequeꞌxba̱nu li cuanqueb saꞌ eb li tenamit li texxic cuiꞌ.

¹⁰ Ut ma̱ jun e̱re tixcꞌat lix cocꞌal chokꞌ xmayej, chi moco texkꞌehi̱nk, chi moco textu̱lak, chi moco texxic chi patzꞌoc riqꞌuineb laj tu̱l ut eb laj kꞌe.

¹¹ Chi moco texxic chi patzꞌoc riqꞌuineb laj kꞌe li nequeꞌa̱tinac riqꞌuineb li musikꞌej ut riqꞌuineb lix musikꞌ li camenak, chi moco te̱qꞌue cꞌaꞌak re ru che̱cux re nak ma̱cꞌaꞌ te̱cꞌul, chi moco te̱cuaꞌtesi le̱ yajel.

¹² Li Ka̱cuaꞌ xicꞌ narileb li nequeꞌxba̱nu li yibru naꞌleb aꞌin. Aꞌan xma̱queb li cristian li cuanqueb saꞌ li naꞌajej li tex-oc cuiꞌ. Joꞌcan nak li Ka̱cuaꞌ le̱ Dios ta̱risiheb saꞌ li naꞌajej aꞌan.

¹³ Tzꞌakalak re ru le̱ yuꞌam la̱ex chiru li Ka̱cuaꞌ le̱ Dios.

¹⁴ Eb li cristian li cuanqueb saꞌ li tenamit aꞌan, li te̱re̱chani, nequeꞌpatzꞌoc riqꞌuineb laj kꞌe ut riqꞌuineb laj tu̱l. Abanan li Ka̱cuaꞌ le̱ Dios xye nak la̱ex incꞌaꞌ te̱ba̱nu li incꞌaꞌ us joꞌ nequeꞌxba̱nu eb aꞌan.

¹⁵ Li Ka̱cuaꞌ le̱ Dios tixqꞌue junak profeta saꞌ e̱ya̱nk sicꞌbil ru xban joꞌ la̱in. E̱comon ajcuiꞌ la̱ex. Tento nak chiru aꞌan tex-abi̱nk.

¹⁶ Saꞌ li cutan nak chꞌutchꞌu̱quex che̱junilex saꞌ li tzu̱l Horeb queye chi joꞌcaꞌin, “Incꞌaꞌ chic nakaj rabinquil li xya̱b xcux li Ka̱cuaꞌ li kaDios, chi moco nakaj rilbal li nimla xam. Incꞌaꞌ chic takacuy. Toca̱mk xban,” chanquex.

¹⁷ Joꞌcan nak li Ka̱cuaꞌ quixye cue, “Us li cꞌaꞌru xeꞌxye.

¹⁸ La̱in tinqꞌue junak profeta saꞌ e̱ya̱nk joꞌ la̱at. E̱comon ajcuiꞌ la̱ex. La̱in tinqꞌue li cua̱tin re ut aꞌan tixye reheb li tenamit chixjunil li cꞌaꞌru tinye la̱in.

¹⁹ Ut la̱in tinqꞌue chixtojbal xma̱c li ani incꞌaꞌ ta̱rabi li cꞌaꞌru tixye li profeta saꞌ incꞌabaꞌ.

²⁰ Cui junak profeta tixqꞌue rib chi a̱tinac saꞌ incꞌabaꞌ chi incꞌaꞌ xinye la̱in, malaj ut cui ta̱a̱tinak saꞌ xcꞌabaꞌeb li jalanil dios, li jun aꞌan ta̱camsi̱k”, chan li Dios.

²¹ Ma̱re te̱ye saꞌ e̱chꞌo̱l, “¿Chanru nak takaqꞌue retal nak ma̱cuaꞌ ra̱tin li Ka̱cuaꞌ Dios li yo̱ chixyebal junak profeta?”

²² Cui junak profeta naxye nak naa̱tinac saꞌ xcꞌabaꞌ li Dios ut incꞌaꞌ nacꞌulman li cꞌaꞌru naxye, la̱ex te̱nau nak ma̱cuaꞌ ra̱tin li Ka̱cuaꞌ Dios li yo̱ chixyebal. Li profeta aꞌan yo̱ chixyebal li cꞌaꞌru naraj xjunes. Ut la̱ex mexxucuac xban.