Deuteronomio 17 - Li Santil hu

¹ Me̱mayeja chiru li Ka̱cuaꞌ le̱ Dios li bo̱yx malaj ut li carner li cuanqueb xpaltil. Xicꞌ naril li Ka̱cuaꞌ li mayej li cuan xpaltil.

² Ma̱re cua̱nk junak cui̱nk malaj ixk saꞌ eb li tenamit li tixqꞌue e̱re li Ka̱cuaꞌ li tixkꞌet li contrato ut ta̱ma̱cobk chiru li Ka̱cuaꞌ

³ riqꞌuin xlokꞌoninquil li jalanil dios, malaj li sakꞌe, li po ut li chahim chi ac xye e̱re li Ka̱cuaꞌ nak incꞌaꞌ te̱ba̱nu.

⁴ Cui la̱ex te̱rabi resil li cꞌaꞌru yo̱queb chixba̱nunquil, tento nak te̱tzꞌil rix chi us re rilbal ma ya̱l nak yo̱queb chixba̱nunquil li ma̱usilal aꞌan saꞌ li tenamit Israel.

⁵ Cui ya̱l, te̱cꞌam li cui̱nk malaj ut li ixk aꞌan chirix li tenamit ut te̱cuti chi pec toj retal ta̱ca̱mk.

⁶ Abanan tento nak cua̱nk cuib malaj oxib ta̱yehok re nak cuan xma̱c. Incꞌaꞌ naru ta̱camsi̱k cui jun ajcuiꞌ li ta̱yehok nak cuan xma̱c.

⁷ Li ani teꞌyehok re nak cuan xma̱c, aꞌaneb li xbe̱n li teꞌcutuk re chi pec. Chirix aꞌan, eb li jun chꞌol chic teꞌxcut chi pec. Chi joꞌcaꞌin te̱risi saꞌ e̱ya̱nk li naꞌleb li incꞌaꞌ us.

⁸ Cui cuan li nimla chꞌaꞌajquil li incꞌaꞌ naru te̱rak a̱tin saꞌ xbe̱n, usta camsi̱nc, usta pletic malaj ut cuechꞌi̱nc, te̱cꞌameb li cristian saꞌ li naꞌajej li quixsicꞌ ru li Ka̱cuaꞌ le̱ Dios.

⁹ Texxic riqꞌuineb laj tij xcomoneb li ralal xcꞌajol laj Leví ut texxic riqꞌuin laj rakol a̱tin. Eb aꞌan teꞌxtzꞌil rix le̱ chꞌaꞌajquilal ut teꞌxye e̱re cꞌaꞌru te̱ba̱nu.

¹⁰ Abanan tento nak te̱ba̱nu li cꞌaꞌru nequeꞌxye eb aꞌan saꞌ li naꞌajej li tixsicꞌ ru li Dios. Cheqꞌue retal nak te̱ba̱nu chixjunil li cꞌaꞌru teꞌxye e̱re.

¹¹ Checꞌu̱luban saꞌ e̱chꞌo̱l li chakꞌrab li teꞌxcꞌut che̱ru ut le̱ tijbal xbaneb. Te̱ba̱nu chi tzꞌakal re ru li cꞌaꞌru teꞌxye e̱re.

¹² Cui cuan junak naxkꞌetkꞌeti rib chiruheb laj tij ut laj rakol a̱tin ut incꞌaꞌ tixba̱nu li teꞌxye eb aꞌan li yo̱queb chi cꞌanjelac chiru li Ka̱cuaꞌ le̱ Dios, tento nak ta̱teneba̱k ca̱mc saꞌ xbe̱n aꞌan. Tento nak te̱risi li ma̱usilal saꞌ e̱ya̱nk la̱ex aj Israel.

¹³ Chixjunileb li tenamit teꞌrabi resil li ta̱cꞌulma̱nk ut teꞌxucuak. Ut ma ani chic tixkꞌetkꞌeti rib chiruheb laj tij ut laj rakol a̱tin.

¹⁴ Nak tex-oc saꞌ li naꞌajej li tixqꞌue e̱re li Ka̱cuaꞌ, nak ac xere̱chani ut cua̱nkex chic aran, ma̱re te̱ye, “Takaj junak karey re ta̱takla̱nk saꞌ kabe̱n joꞌ eb li tenamit li cuanqueb chi xjun sutam li kanaꞌaj”, chaꞌkex.

¹⁵ Naru te̱xakab le̱ rey, abanan li rey li te̱xakab, tento nak li Ka̱cuaꞌ le̱ Dios ta̱sicꞌok ru saꞌ e̱ya̱nk. Incꞌaꞌ naru te̱xakab junak chi takla̱nc saꞌ e̱be̱n cui ma̱cuaꞌ e̱rech tenamitil.

¹⁶ Li rey li te̱xakab incꞌaꞌ naru nak cua̱nk nabalak xcacua̱y. Chi moco ta̱ru̱k tixtaklaheb li tenamit chixsicꞌbal xtzꞌakob lix cacua̱y saꞌ li tenamit Egipto xban nak li Ka̱cuaꞌ quixye nak incꞌaꞌ chic naru texsukꞌi̱k saꞌ li naꞌajej aꞌan.

¹⁷ Chi moco naru ta̱cua̱nk nabalak rixakil xban nak naru naxjal lix naꞌleb xbaneb. Chi moco naru nacuan nabalak x-oro ut nabalak xplata.

¹⁸ Nak ta̱oc saꞌ xcuanquil li rey tixtakla xtzꞌi̱banquil saꞌ junak hu retalil li chakꞌrab li cuan riqꞌuineb laj levita aj tij re nak junelic cua̱nk riqꞌuin.

¹⁹ Li chakꞌrab aꞌan cua̱nk riqꞌuin ut rajlal cutan ta̱ril xsaꞌ joꞌ najtil yoꞌyo re nak tixtzol rib chixxucuanquil ru li Ka̱cuaꞌ lix Dios ut re ajcuiꞌ nak tixba̱nu lix taklanquil joꞌ ajcuiꞌ li cꞌaꞌru tzꞌi̱banbil saꞌ li chakꞌrab.

²⁰ Incꞌaꞌ tixnimobresi rib chiruheb li rech tenamitil. Ut incꞌaꞌ tixcanab xba̱nunquil li cꞌaꞌru naxye li chakꞌrab. Tixqꞌue ban xchꞌo̱l chixba̱nunquil chi tzꞌakal re ru saꞌ e̱ya̱nk la̱ex aj Israel re nak najt ta̱cua̱nk saꞌ lix cuanquil joꞌ eb ajcuiꞌ li ralal xcꞌajol.