Deuteronomio 16 - Li Santil hu

Li ninkꞌe Pascua

¹ Saꞌ li po Abib te̱ba̱nu li ninkꞌe Pascua re xlokꞌoninquil li Ka̱cuaꞌ le̱ Dios xban nak chiru li po Abib quexrisi chak li Ka̱cuaꞌ saꞌ li naꞌajej Egipto chiru kꞌojyi̱n.

² Nak te̱ba̱nu li ninkꞌe Pascua re xlokꞌoninquil li Ka̱cuaꞌ le̱ Dios, texxic saꞌ li naꞌajej li tixsicꞌ ru li Ka̱cuaꞌ re te̱lokꞌoni cuiꞌ. Ut aran te̱camsi jun li xul li te̱sicꞌ ru saꞌ xya̱nkeb le̱ queto̱mk chokꞌ re le̱ mayej chiru li Ka̱cuaꞌ.

³ Incꞌaꞌ te̱tzaca tib riqꞌuin li caxlan cua cuan xchꞌamal. Chiru cuukub cutan te̱cuaꞌ li caxlan cua ma̱cꞌaꞌ xchꞌamal, li caxlan cua re rahil chꞌo̱lej. Te̱ba̱nu chi joꞌcan re nak junelic ta̱julticokꞌ e̱re chanru nak quex-el chak Egipto saꞌ junpa̱t, li bar quexrahobtesi̱c cuiꞌ.

⁴ Chiru cuukub cutan incꞌaꞌ ta̱cua̱nk li cꞌaꞌru nachꞌamobresin saꞌ le̱ naꞌaj. Tento nak te̱choy xtzacanquil saꞌ li kꞌojyi̱n aꞌan lix tibel li xul li te̱mayeja saꞌ li ecuu re li xbe̱n cutan. Incꞌaꞌ te̱canab li relaꞌ re cuulaj.

⁵ Incꞌaꞌ naru te̱mayeja li xul re li ninkꞌe Pascua yalak bar saꞌ eb le̱ tenamit li tixqꞌue e̱re li Ka̱cuaꞌ le̱ Dios.

⁶ Te̱mayeja ban saꞌ li naꞌajej li tixsicꞌ ru li Dios re te̱lokꞌoni cuiꞌ. Aran texmayejak re li ninkꞌe Pascua saꞌ li ecuu nak oc re li sakꞌe, saꞌ li ho̱nal nak quex-el chak aran Egipto.

⁷ Te̱pom li tib ut te̱tzaca saꞌ li naꞌajej li tixsicꞌ ru li Ka̱cuaꞌ le̱ Dios. Ut cuulajak chic texsukꞌi̱k saꞌ le̱ muheba̱l.

⁸ Chiru cuakib cutan te̱cuaꞌ li caxlan cua li ma̱cꞌaꞌ xchꞌamal. Saꞌ xcuuk li cutan te̱chꞌutub e̱rib chixlokꞌoninquil li Ka̱cuaꞌ le̱ Dios, ut ma̱ jun li cꞌanjel te̱ba̱nu.

⁹ Cuukub xama̱n xtiquibanquil xxocbal li ru le̱ trigo nak texninkꞌei̱k.

¹⁰ Li ninkꞌe li te̱ba̱nu, aꞌan re xlokꞌoninquil li Ka̱cuaꞌ le̱ Dios. Ut li mayej li te̱qꞌue, aꞌan li joꞌ qꞌuial na-ala saꞌ e̱chꞌo̱l xqꞌuebal, aꞌ yal chanru le̱ rosobtesinquil xban li Ka̱cuaꞌ le̱ Dios.

¹¹ Ut ta̱sahokꞌ saꞌ e̱chꞌo̱l chiru li Ka̱cuaꞌ le̱ Dios saꞌ li naꞌajej li quixsicꞌ ru re te̱lokꞌoni cuiꞌ. Ta̱sahokꞌ saꞌ e̱chꞌo̱l la̱ex e̱rochben le̱ ralal e̱cꞌajol joꞌ eb ajcuiꞌ le̱ mo̱s ixk ut le̱ mo̱s cui̱nk. Ut ta̱sahokꞌ ajcuiꞌ saꞌ xchꞌo̱leb laj levita ut eb li jalaneb xtenamit li cuanqueb saꞌ e̱ya̱nk ut eb li ma̱cꞌaꞌ xnaꞌ xyucuaꞌ joꞌ eb ajcuiꞌ li xma̱lcaꞌan li cuanqueb saꞌ e̱ya̱nk.

¹² Julticak e̱re nak junxil la̱ex chak rahobtesinbil mo̱s aran Egipto. Joꞌcan nak qꞌuehomak le̱ chꞌo̱l chixba̱nunquil chixjunil li chakꞌrab aꞌin.

¹³ Nak ac xesicꞌ ru le̱ racui̱mk trigo ut nak ac xesicꞌ ru le̱ uvas, te̱yi̱b le̱ cocꞌ muheba̱l riqꞌuin rukꞌ cheꞌ ut te̱ba̱nu le̱ ninkꞌe.

¹⁴ Ta̱sahokꞌ saꞌ e̱chꞌo̱l la̱ex e̱rochben le̱ ralal e̱cꞌajol, eb le̱ mo̱s ixk ut eb le̱ mo̱s cui̱nk. Ut ta̱sahokꞌ ajcuiꞌ saꞌ xchꞌo̱leb laj levita, eb li jalaneb xtenamit li cuanqueb saꞌ le̱ naꞌaj, ut eb li ma̱cꞌaꞌ xnaꞌ xyucuaꞌ joꞌ eb ajcuiꞌ li xma̱lcaꞌan li cuanqueb saꞌ le̱ tenamit.

¹⁵ Cuukub cutan texninkꞌei̱k re xlokꞌoninquil li Ka̱cuaꞌ le̱ Dios saꞌ li naꞌajej li tixsicꞌ ru. Li Ka̱cuaꞌ le̱ Dios ta̱osobtesi̱nk e̱re ut tixqꞌue e̱re nabal li ru le̱ racui̱mk. Ta̱rosobtesi chixjunil li cꞌaꞌru te̱ba̱nu. Relic chi ya̱l ta̱sahokꞌ saꞌ e̱chꞌo̱l.

¹⁶ Oxib sut chiru li chihab chixjunileb li cui̱nk teꞌxic chiru li Ka̱cuaꞌ le̱ Dios saꞌ li naꞌajej li tixsicꞌ ru. Aꞌaneb aꞌin li oxib sut: li ninkꞌe nak nequecuaꞌ li caxlan cua li ma̱cꞌaꞌ xchꞌamal, li ninkꞌe nak nequemayeja li xbe̱n ru le̱ racui̱mk, ut li ninkꞌe nak nequeyi̱b le̱ cocꞌ muheba̱l riqꞌuin rukꞌ cheꞌ. Ma̱ ani tixcꞌut rib chiru li Ka̱cuaꞌ chi ma̱cꞌaꞌ li tixcꞌam chokꞌ xmayej.

¹⁷ Li junju̱nk tixqꞌue lix mayej aꞌ yal chanru li rosobtesinquil quiqꞌueheꞌ xban li Ka̱cuaꞌ.

¹⁸ Te̱xakab laj rakol a̱tin ut eb li teꞌtakla̱nk saꞌ xbe̱neb li junju̱nk xte̱paleb saꞌ eb le̱ tenamit li tixqꞌue e̱re li Ka̱cuaꞌ le̱ Dios. Ut eb aꞌan teꞌrakok a̱tin saꞌ xbe̱neb le̱ tenamit saꞌ ti̱quilal.

¹⁹ Laj rakol a̱tin li te̱xakab incꞌaꞌ teꞌrisi xcuanquil li ti̱quilal ut incꞌaꞌ teꞌxsicꞌ ru li ani teꞌxba̱nu usilal re. Incꞌaꞌ cheꞌtumina̱k ruheb xban nak li ani naxcꞌul xtumin incꞌaꞌ chic naxtau xya̱lal ut incꞌaꞌ narakoc a̱tin saꞌ ti̱quilal.

²⁰ Chesicꞌak li rakba a̱tin saꞌ ti̱quilal re nak ta̱najtokꞌ rok le̱ yuꞌam ut te̱re̱chani li naꞌajej li tixqꞌue e̱re li Ka̱cuaꞌ le̱ Dios.

²¹ Me̱rau li cheꞌ re xlokꞌoninquil li jalanil dios lix Asera, chi moco te̱qꞌue chixcꞌatk lix artal li Ka̱cuaꞌ le̱ Dios.

²² Ut micuan e̱jalam u̱ch re te̱lokꞌoni, xban nak li Ka̱cuaꞌ le̱ Dios xicꞌ naril eb aꞌan.