Deuteronomio 14 - Li Santil hu

Li tzacae̱mk li naru xtzacanquil ut li incꞌaꞌ naru xtzacanquil

¹ La̱ex ralal xcꞌajol li Ka̱cuaꞌ le̱ Dios. Joꞌcan nak incꞌaꞌ te̱set le̱ tibel xban xrahil e̱chꞌo̱l chirix junak camenak, chi moco te̱jo le̱ rismal li cuan saꞌ xbe̱n le̱ pe̱quem.

² La̱ex jun santil tenamit chiru li Ka̱cuaꞌ le̱ Dios. Saꞌ xya̱nkeb chixjunileb li xni̱nkal ru tenamit li cuanqueb saꞌ ruchichꞌochꞌ li Dios quixsicꞌ e̱ru ut la̱ex li tenamit li kꞌaxal lokꞌ saꞌ xya̱nkeb li jun chꞌol chic.

³ Incꞌaꞌ te̱tzaca li cꞌaꞌru tzꞌekta̱nanbil xban li Ka̱cuaꞌ.

⁴ Aꞌaneb aꞌin li xul li naru te̱tzaca xtibel: li bo̱yx, li carner, li chiba̱t,

⁵ ut li qꞌuila pa̱y ru li quej ut li yuc, joꞌ ajcuiꞌ li carner li nacuan saꞌ qꞌuicheꞌ.

⁶ Naru te̱tzaca xtibel li xul li jun ajcuiꞌ lix xa̱la rok ut cuib rixiꞌij, li nequeꞌxhab xcuaheb xcaꞌ sut.

⁷ Incꞌaꞌ naru te̱tzaca li xul li incꞌaꞌ nequeꞌxhab xcuaheb xcaꞌ sut ut ma̱cꞌaꞌ cuib rixiꞌij. Incꞌaꞌ naru nequetzaca li camello, chi moco li imul, chi moco li tejón xban nak usta nequeꞌxhab xcuaheb xcaꞌ sut, abanan moco cuib ta li rixiꞌij. Incꞌaꞌ naru te̱tzaca xtibel li xul aꞌan xban nak muxbil ru.

⁸ Joꞌcan ajcuiꞌ li a̱k. Incꞌaꞌ naru nequetzaca xban nak usta cuib li rixiꞌij, abanan incꞌaꞌ nequeꞌxhab xcuaheb xcaꞌ sut. Incꞌaꞌ naru te̱tzaca xtibel chi moco naru te̱chꞌeꞌ cui camenak.

⁹ Ut xcomoneb li xul li cuanqueb saꞌ li palau ut saꞌ eb li nimaꞌ, naru nequetzaca li car li cuanqueb xxicꞌ ut li cuan xta rixeb.

¹⁰ Cui ma̱cꞌaꞌ xxicꞌ ut ma̱cꞌaꞌ xta rix incꞌaꞌ naru nequetzaca xban nak muxbil ru.

¹¹ Cuanqueb li xul li nequeꞌrupupic naru xtzacanquil.

¹² Ut eb li incꞌaꞌ naru nequetzaca, aꞌaneb aꞌin: laj tꞌiu, li soꞌsol li kꞌek rix, ut li soꞌsol li cak rix,

¹³ li cꞌuch li kꞌek rix joꞌ ajcuiꞌ li cak rix ut li cꞌaꞌ chic ru chi cꞌuchil,

¹⁴ ut li qꞌuila pa̱y ru li tzꞌok,

¹⁵ li nimla xul avestruz, ut li cuarom ut li jotz,

¹⁶ li qꞌuila pa̱y ru li cocꞌ cuarom ut li qꞌuila pa̱y ru li jotz,

¹⁷ li pelícano, ut li qꞌuila pa̱y ru li ni̱nki cuarom,

¹⁸ li cigueña, li sakiquil, li abubilla, joꞌ ajcuiꞌ li sotzꞌ.

¹⁹ Incꞌaꞌ naru te̱tzaca li cocꞌ xul li nequeꞌrupupic ut nequeꞌxmululi ribeb, insecto xcꞌabaꞌeb.

²⁰ Abanan cuanqueb xul li nequeꞌrupupic naru te̱tzaca.

²¹ Incꞌaꞌ naru te̱tzaca xtibel li xul li nacam yal xjunes. Naru te̱qꞌue reheb li jalaneb xtenamit li cuanqueb saꞌ e̱ya̱nk ut eb aꞌan naru teꞌxtzaca. Malaj ut naru te̱cꞌayi reheb li jalan xtenamit li yo̱queb chi numecꞌ saꞌ le̱ naꞌaj. Incꞌaꞌ naru te̱tzaca xtibel li xul aꞌan xban nak la̱ex jun santil tenamit chiru li Ka̱cuaꞌ le̱ Dios. Ut me̱chik xtibel li chꞌina chiba̱t saꞌ xyaꞌal xtuꞌ lix naꞌ.

Li mayej li junju̱nk saꞌ xlaje̱tkil

²² Rajlal chihab tento nak te̱qꞌue re li Ka̱cuaꞌ li junju̱nk saꞌ xlaje̱tkil li ru le̱ racui̱mk.

²³ Ut texxic saꞌ li naꞌajej li sicꞌbil ru xban li Ka̱cuaꞌ bar te̱lokꞌoni cuiꞌ. Ut aran chiru li Ka̱cuaꞌ te̱tzaca li junju̱nk saꞌ xlaje̱tkil li ru le̱ racui̱mk, li acꞌ vino ut li aceite joꞌ ajcuiꞌ li xbe̱n ral le̱ cuacax ut li xbe̱n ral le̱ carner. Te̱ba̱nu chi joꞌcan re nak te̱tzol e̱rib chixxucuanquil ru li Ka̱cuaꞌ le̱ Dios chi junelic.

²⁴ Abanan, cui kꞌaxal najt cuan li naꞌajej li quixsicꞌ ru li Dios re te̱lokꞌoni cuiꞌ, ut cui incꞌaꞌ naru xcꞌambal le̱ mayej toj aran xban xnajtil,

²⁵ naru te̱jal ru le̱ mayej riqꞌuin tumin. Ut li tumin aꞌan te̱cꞌam saꞌ li naꞌajej li quixsicꞌ ru li Dios re te̱lokꞌoni cuiꞌ.

²⁶ Ut chiru li tumin aꞌan te̱lokꞌ li cꞌaꞌru te̱raj chokꞌ re le̱ mayej. Naru te̱lokꞌ li cuacax, li carner, li vino, malaj ut jalan ucꞌa ac xchꞌamoꞌ. Ut la̱ex rochbeneb le̱ jun cablal textzaca̱nk aran chiru li Ka̱cuaꞌ ut ta̱sahokꞌ saꞌ e̱chꞌo̱l.

²⁷ Ut julticokꞌ e̱re xqꞌuebal reheb laj levita li cuanqueb saꞌ le̱ tenamit xban nak eb aꞌan incꞌaꞌ xeꞌxcꞌul lix chꞌochꞌ joꞌ nak xecꞌul la̱ex.

²⁸ Rajlal ox ox chihab, nak rakecꞌ re li chihab, te̱cꞌam li junju̱nk saꞌ xlaje̱tkil chixjunil li ru le̱ racui̱mk re xcꞌu̱lanquil saꞌ le̱ tenamit.

²⁹ Li tzacae̱mk aꞌin reheb laj levita xban nak incꞌaꞌ xeꞌxcꞌul lix chꞌochꞌeb. Ut reheb ajcuiꞌ li jalaneb xtenamit, li ma̱cꞌaꞌ xnaꞌ xyucuaꞌ ut reheb ajcuiꞌ li xma̱lcaꞌan li cuanqueb saꞌ le̱ tenamit. Eb aꞌan ta̱ru̱k teꞌtzaca̱nk toj ta̱cꞌojla̱k xchꞌo̱leb. Ut li Ka̱cuaꞌ le̱ Dios texrosobtesi re nak us tex-e̱lk riqꞌuin chixjunil li cꞌaꞌru te̱ba̱nu.