Deuteronomio 13 - Li Santil hu

¹ Ma̱re junak profeta malaj junak li naxye xya̱lal li matcꞌ ta̱cuulak e̱riqꞌuin ut tixye resil junak milagro malaj ut junak sachba chꞌo̱lej.

² Cui nacꞌulman li cꞌaꞌru tixye ut tixye ajcuiꞌ e̱re “Takalokꞌoni li jalanil dios ut tocꞌanjelak chiruheb”,

³ me̱pa̱b li cꞌaꞌru tixye e̱re li profeta aꞌan, chi moco li naxye xya̱lal li matcꞌ. Li Ka̱cuaꞌ le̱ Dios yo̱k chixyalbal e̱rix re rilbal ma nequera li Ka̱cuaꞌ chi anchal e̱chꞌo̱l ut chi anchal e̱metzꞌe̱u.

⁴ Aꞌ li Ka̱cuaꞌ le̱ Dios, aꞌan li te̱pa̱b ut aꞌan li te̱lokꞌoni. Cheba̱nuhak li chakꞌrab li quixqꞌue e̱re ut te̱ba̱nu le̱ taklanquil xban. Chexcꞌanjelak chiru ut chepa̱b chi anchal e̱chꞌo̱l.

⁵ Te̱qꞌue chi camsi̱c li profeta aj balakꞌ malaj ut li naxchꞌolob xya̱lal li matcꞌ cui teꞌxye e̱re nak te̱kꞌetkꞌeti e̱rib chiru li Ka̱cuaꞌ le̱ Dios li qui-isin chak e̱re Egipto li quexcuan cuiꞌ chokꞌ rahobtesinbil mo̱s. Incꞌaꞌ cha̱bil aꞌan xban nak quixye e̱re nak te̱tzꞌekta̱na li Ka̱cuaꞌ ut te̱canab xba̱nunquil li chakꞌrab li quixqꞌue e̱re. Tento nak te̱risi li ma̱usilal saꞌ e̱ya̱nk.

⁶ Cui ani tixye e̱re saꞌ mukmu nak te̱lokꞌoni li jalanil dios, me̱ba̱nu chi joꞌcan. Me̱ba̱nu aꞌan usta le̱ ras, usta le̱ ralal malaj ut le̱ rabin, usta le̱ rixakil li nequera, usta li tzꞌakal e̱rami̱g li ta̱yehok e̱re nak te̱lokꞌoniheb li jalanil dios li incꞌaꞌ xelokꞌoni ruheb, chi moco xeꞌxlokꞌoni le̱ naꞌ e̱yucuaꞌ.

⁷ Ma̱re tixye e̱re nak te̱lokꞌoni lix dioseb li tenamit li cuanqueb yalak bar saꞌ li naꞌajej aꞌin, joꞌ li cuanqueb chi nachꞌ ut li cuanqueb chi najt.

⁸ Me̱ba̱nu li cꞌaꞌru naxye chi moco te̱rabi. Me̱ril xtokꞌoba̱l ru, chi moco te̱ruxta̱na ru, chi moco te̱col rixeb.

⁹ Abanan te̱camsi li xyehoc e̱re nak te̱lokꞌoniheb li jalanil dios. Ut la̱ex xbe̱n texcutuk re chi pec. Ut chirix aꞌan, eb li tenamit teꞌcutuk re chi pec.

¹⁰ Ta̱cutekꞌ chi pec toj retal ta̱ca̱mk xban nak quixye e̱re nak te̱tzꞌekta̱na li Ka̱cuaꞌ le̱ Dios li qui-isin chak e̱re Egipto li quexcuan cuiꞌ chak chokꞌ rahobtesinbil mo̱s.

¹¹ Ut chixjunileb laj Israel teꞌxucuak nak teꞌrabi resil li cꞌaꞌru ta̱cꞌulma̱nk. Ut ma̱ ani chic saꞌ e̱ya̱nk tixba̱nu li ma̱usilal aꞌan.

¹² Nak cua̱nkex chic saꞌ li naꞌajej li tixqꞌue e̱re li Ka̱cuaꞌ, ma̱re ta̱abi̱k resil

¹³ nak cuanqueb cui̱nk incꞌaꞌ useb xnaꞌleb yo̱keb chixcꞌambal xbe li tenamit chixlokꞌoninquil li jalan Dios li incꞌaꞌ xelokꞌoni la̱ex.

¹⁴ Cui te̱rabi resil te̱tzꞌil rix chi us. Cui te̱qꞌue retal nak ya̱l nak cuan li yo̱queb chixba̱nunquil li ma̱usilal aꞌan,

¹⁵ tento nak teꞌcamsi̱k chi chꞌi̱chꞌ chixjunileb li cuanqueb saꞌ li tenamit aꞌan. Teꞌsachekꞌ ru chi junaj cua, joꞌ cristian, joꞌ eb ajcuiꞌ lix queto̱mk.

¹⁶ Te̱chꞌutub saꞌ xyi li tenamit chixjunil li cꞌaꞌak re ru cuan saꞌ li tenamit aꞌan ut te̱cꞌat chixjunil li tenamit joꞌ ajcuiꞌ li cꞌaꞌru cuan chi saꞌ chokꞌ cꞌatbil mayej chiru li Ka̱cuaꞌ le̱ Dios. Ut poꞌbilak chic li tenamit aꞌan chi junaj cua. Incꞌaꞌ chic ta̱yi̱ba̱k.

¹⁷ Ut me̱xoc chokꞌ e̱re li cꞌaꞌru ac kꞌaxtesinbil re sachecꞌ re nak ta̱numekꞌ xjoskꞌil li Ka̱cuaꞌ. Ut li Ka̱cuaꞌ ta̱ril xtokꞌoba̱l e̱ru ut aꞌan ta̱uxta̱na̱nk e̱ru. Texqꞌue chi nabalocꞌ joꞌ quixye reheb le̱ xeꞌto̱nil yucuaꞌ riqꞌuin juramento.

¹⁸ Tixba̱nu chi joꞌcan cui te̱ba̱nu li quixye e̱re li Ka̱cuaꞌ le̱ Dios. Cheba̱nu chixjunil li chakꞌrab li yo̱quin chixyebal e̱re anakcuan. Ut cua̱nkex saꞌ ti̱quilal chiru li Ka̱cuaꞌ.