Deuteronomio 12 - Li Santil hu

Li jun chi naꞌajej li teꞌlokꞌoni̱nk cuiꞌ eb laj Israel

¹ Aꞌaneb aꞌin li chakꞌrab ut le̱ taklanquil li tento te̱ba̱nu nak cua̱nkex saꞌ li naꞌajej li tixqꞌue e̱re li Ka̱cuaꞌ lix Dioseb le̱ xeꞌto̱nil yucuaꞌ. Cheba̱nu li cꞌaꞌru naxye saꞌ li chakꞌrab aꞌin joꞌ najtil texcua̱nk saꞌ li naꞌajej li tixqꞌue e̱re li Ka̱cuaꞌ.

² Te̱sach chi junaj cua chixjunileb li naꞌajej li nequeꞌxlokꞌoni cuiꞌ li jalanil dios eb li tenamit li te̱re̱chani. Te̱jucꞌ chi junaj cua lix artal li cuanqueb saꞌ eb li tzu̱l, ut saꞌ xbe̱n bol, joꞌ eb ajcuiꞌ li cuanqueb rubel li cheꞌ li ni̱nkeb xmu.

³ Te̱jucꞌ chi junaj cua lix artaleb. Te̱jori li pec li nequeꞌlokꞌonin cuiꞌ ut te̱cꞌat ajcuiꞌ li cheꞌ li nequeꞌxlokꞌoni cuiꞌ lix Asera lix dioseb. Sachomak ruheb chi junaj cua chixjunil li yi̱banbil dios re nak ma̱ ani chic ta̱jultica̱nk re lix cꞌabaꞌeb.

⁴ Abanan nak la̱ex te̱lokꞌoni li Ka̱cuaꞌ le̱ Dios, me̱ba̱nu joꞌ nequeꞌxba̱nu eb aꞌan nak nequeꞌxlokꞌoni li jalanil dios.

⁵ Li Ka̱cuaꞌ ban ta̱sicꞌok ru li naꞌajej bar te̱lokꞌoni cuiꞌ lix cꞌabaꞌ. Ut la̱ex texxic saꞌ li naꞌajej aꞌan chixlokꞌoninquil li Ka̱cuaꞌ.

⁶ Ut aran te̱cꞌam le̱ mayej xul ut te̱camsi ut te̱cꞌat re xqꞌuebal xlokꞌal li Ka̱cuaꞌ. Ut te̱cꞌam ajcuiꞌ le̱ mayej li junju̱nk saꞌ xlaje̱tkil joꞌ ajcuiꞌ li mayej li na-ala saꞌ e̱chꞌo̱l xqꞌuebal. Te̱cꞌam ajcuiꞌ le̱ mayej li ac xeyechiꞌi re li Ka̱cuaꞌ. Ut aran ajcuiꞌ te̱mayeja li xbe̱n ral le̱ cuacax ut li xbe̱n ral le̱ carner.

⁷ Saꞌ li naꞌajej aꞌan texcuaꞌak chiru li Ka̱cuaꞌ le̱ Dios ut ta̱sahokꞌ saꞌ e̱chꞌo̱l la̱ex e̱rochben le̱ ralal e̱cꞌajol xban nak li Ka̱cuaꞌ le̱ Dios xexrosobtesi.

⁸ Saꞌ li naꞌajej aꞌan incꞌaꞌ chic te̱ba̱nu joꞌ nakaba̱nu la̱o saꞌ li naꞌajej aꞌin. Anakcuan nakaba̱nu joꞌ nakaj la̱o chikaju̱nkal.

⁹ Toj ma̱jiꞌ nequexcuulac saꞌ li naꞌajej li tixqꞌue e̱re li Ka̱cuaꞌ li texcua̱nk cuiꞌ saꞌ tuktu̱quil usilal.

¹⁰ Nak acak xexcuulac jun pacꞌal li nimaꞌ Jordán, li Ka̱cuaꞌ texcanab chi cua̱nc aran. Texcua̱nk saꞌ tuktu̱quil usilal xban nak incꞌaꞌ chic tixqꞌueheb li xicꞌ nequeꞌiloc e̱re chi pletic e̱riqꞌuin, usta cuanqueb chi xjun sutam le̱ naꞌaj.

¹¹ Li Ka̱cuaꞌ le̱ Dios tixsicꞌ ru jun li naꞌajej li ta̱lokꞌoni̱k cuiꞌ. Ut la̱ex te̱cꞌam aran le̱ mayej li te̱qꞌue re li Ka̱cuaꞌ. Te̱cꞌam aran le̱ cꞌatbil mayej ut li mayej li junju̱nk saꞌ xlaje̱tkil, ut li mayej li na-ala saꞌ e̱chꞌo̱l xqꞌuebal, joꞌ ajcuiꞌ li mayej li te̱qꞌue nak nequeyechiꞌi xba̱nunquil li cꞌaꞌak re ru re li Ka̱cuaꞌ Dios.

¹² Ut nak cua̱nkex saꞌ li naꞌajej aꞌan ta̱sahokꞌ saꞌ e̱chꞌo̱l la̱ex chiru li Ka̱cuaꞌ le̱ Dios. Ta̱sahokꞌ saꞌ e̱chꞌo̱l la̱ex e̱rochben le̱ ralal e̱cꞌajol, ut eb le̱ mo̱s cui̱nk ut eb le̱ mo̱s ixk ut e̱rochben ajcuiꞌ eb laj levita li cuanqueb saꞌ e̱ya̱nk. Eb aꞌan incꞌaꞌ queꞌxcꞌul lix naꞌajeb.

¹³ Cheba̱nu cue̱nt nak incꞌaꞌ te̱cꞌat le̱ mayej yalak bar.

¹⁴ Caꞌaj cuiꞌ saꞌ li naꞌajej li tixsicꞌ ru li Ka̱cuaꞌ saꞌ lix naꞌajeb li jun xte̱paleb laj Israel naru te̱qꞌue le̱ cꞌatbil mayej. Ut aran ajcuiꞌ te̱ba̱nu li yo̱quin chixyebal e̱re.

¹⁵ Abanan naru te̱camsiheb li xul li te̱tzaca yalak bar cuanquex, joꞌ nak nequetzaca xtibel li quej. Naru te̱tzaca li joꞌ qꞌuial te̱raj, aꞌ yal joꞌ qꞌuial tixqꞌue e̱re li Ka̱cuaꞌ. Naru nequextzacan usta muxbil e̱ru, usta incꞌaꞌ muxbil e̱ru.

¹⁶ Caꞌaj cuiꞌ lix quiqꞌuel li xul incꞌaꞌ naru te̱tzaca. Tento nak te̱hoy saꞌ chꞌochꞌ joꞌ nak nequehoy li haꞌ.

¹⁷ Abanan li mayej li nequeqꞌue chiru li Ka̱cuaꞌ incꞌaꞌ naru te̱tzaca saꞌ le̱ tenamit, joꞌ li junju̱nk saꞌ xlaje̱tkil li ru le̱ racui̱mk, ut le̱ vino, ut le̱ aceite, joꞌ ajcuiꞌ li xbe̱n ral le̱ cuacax, ut li xbe̱n ral le̱ carner. Ut incꞌaꞌ naru te̱tzaca saꞌ le̱ tenamit li mayej li nequeqꞌue nak nequeyechiꞌi re li Dios xba̱nunquil li cꞌaꞌak re ru, ut li mayej li na-ala saꞌ e̱chꞌo̱l xqꞌuebal, joꞌ ajcuiꞌ li mayej li nequetaksi chiru li Ka̱cuaꞌ saꞌ le̱ rukꞌ.

¹⁸ Te̱tzaca ban li mayej aꞌan chiru li Ka̱cuaꞌ saꞌ li naꞌajej li tixsicꞌ ru li Ka̱cuaꞌ le̱ Dios. Joꞌcan te̱ba̱nu la̱ex, ut eb le̱ ralal e̱cꞌajol, eb le̱ mo̱s ixk ut eb le̱ mo̱s cui̱nk, joꞌ eb ajcuiꞌ laj levita li cua̱nkeb saꞌ le̱ tenamit. Ut ta̱sahokꞌ saꞌ e̱chꞌo̱l chiru li Ka̱cuaꞌ riqꞌuin chixjunil li cꞌanjel te̱ba̱nu.

¹⁹ Cheba̱nuhak cue̱nt re nak incꞌaꞌ te̱canabeb laj levita chi ma̱cꞌaꞌ cuan reheb joꞌ najtil texcua̱nk saꞌ ruchichꞌochꞌ.

²⁰ Ut nak li Ka̱cuaꞌ le̱ Dios naxnimobresi le̱ naꞌaj joꞌ quixye e̱re, naru te̱tzaca li tib yalak jokꞌe te̱raj.

²¹ Cui najt cuan li naꞌajej li tixsicꞌ ru li Dios re ta̱lokꞌoni̱k cuiꞌ, naru te̱camsi li xul li te̱sicꞌ ru saꞌ xya̱nkeb le̱ queto̱mk li quixqꞌue e̱re li Ka̱cuaꞌ. Ut naru te̱tzaca saꞌ le̱ tenamit lix tibel li joꞌ qꞌuial te̱raj.

²² Joꞌ nak nequetzaca xtibel li quej, joꞌcan ajcuiꞌ nak te̱tzaca. Eb li cristian li muxbil ruheb naru teꞌxtzaca, joꞌ eb ajcuiꞌ li incꞌaꞌ muxbil ruheb.

²³ Abanan, incꞌaꞌ naru te̱tzaca lix quiqꞌueleb li xul xban nak li quicꞌ, aꞌan li naqꞌuehoc xyuꞌam li xul. Ut incꞌaꞌ naru te̱tzaca li naqꞌuehoc yuꞌam rochben li tib.

²⁴ Incꞌaꞌ naru te̱tzaca li quicꞌ. Te̱hoy ban saꞌ chꞌochꞌ joꞌ nak nequehoy li haꞌ.

²⁵ Me̱tzaca li quicꞌ re nak us tex-e̱lk riqꞌuin li cꞌaꞌru te̱ba̱nu. Ut re ajcuiꞌ nak us teꞌe̱lk le̱ ralal e̱cꞌajol li teꞌcua̱nk mokon xban nak yo̱kex chixba̱nunquil li ti̱quilal chiru li Ka̱cuaꞌ.

²⁶ Abanan te̱cꞌam le̱ mayej li ac kꞌaxtesinbil re Dios saꞌ li naꞌajej li sicꞌbil ru xban li Ka̱cuaꞌ ut te̱cꞌam ajcuiꞌ aran li ac yechiꞌinbil.

²⁷ Aran saꞌ li naꞌajej li sicꞌbil ru te̱qꞌue li mayej li ta̱cꞌatma̱nk chi jun saꞌ xbe̱n lix artal li Ka̱cuaꞌ. Ut te̱qꞌue ajcuiꞌ li mayej li te̱tzaca xtibel ut te̱mayeja xquiqꞌuel saꞌ xbe̱n lix artal li Ka̱cuaꞌ.

²⁸ Cheba̱nu chi anchal e̱chꞌo̱l chixjunil li yo̱quin chixyebal e̱re re nak us tex-e̱lk joꞌ eb ajcuiꞌ le̱ ralal e̱cꞌajol li teꞌcua̱nk mokon. Us tex-e̱lk xban nak yo̱kex chixba̱nunquil li us ut li ti̱c chiru li Ka̱cuaꞌ le̱ Dios.

Li Ka̱cuaꞌ tixsach ruheb li nequeꞌlokꞌonin reheb li jalanil dios

²⁹ Li Ka̱cuaꞌ le̱ Dios tixsach ruheb chixjunileb li xni̱nkal ru tenamit li cuanqueb saꞌ li naꞌajej li texxic cuiꞌ chi cua̱nc la̱ex.

³⁰ Nak ac cua̱nkex chic saꞌ li naꞌajej ut nak ac xeꞌsacheꞌ ruheb, me̱qꞌue e̱rib chi balakꞌi̱c xbaneb. Me̱patzꞌi lix jalanil dios ut me̱ye nak te̱lokꞌoniheb li jalanil dios joꞌ nak nequeꞌxlokꞌoni eb aꞌan.

³¹ Nak texlokꞌoni̱nk chiru li Ka̱cuaꞌ le̱ Dios, me̱ba̱nu li incꞌaꞌ us joꞌ nequeꞌxba̱nu li jalan xtenamiteb nak nequeꞌxlokꞌoni lix yi̱banbil dioseb. Nequeꞌxba̱nu li ma̱usilal toj retal nak nequeꞌxcꞌat li ralal xcꞌajol chokꞌ xmayejeb chiru lix jalanil dios.

³² Te̱ba̱nu chixjunil li cꞌaꞌru xinye e̱re. Me̱qꞌue xtzꞌakob li cua̱tin, chi moco te̱cꞌos li cꞌaꞌru xinye e̱re.