Deuteronomio 11 - Li Santil hu

¹ Cherahak biꞌ li Ka̱cuaꞌ le̱ Dios ut te̱ba̱nu li cꞌaꞌru naxye saꞌ li chakꞌrab ut le̱ taklanquil xban. Junelic te̱ba̱nu li cꞌaꞌru naxye ut li cꞌaꞌru tenebanbil saꞌ e̱be̱n xba̱nunquil.

² Anakcuan cheqꞌuehak retal nak eb le̱ cocꞌal incꞌaꞌ queꞌril nak li Ka̱cuaꞌ quexkꞌus. La̱ex ban quex-iloc re lix lokꞌal, lix cuanquilal ut li sachba chꞌo̱lej,

³ ut li milagros li quixba̱nu. La̱ex queril cꞌaꞌru quixba̱nu re lix reyeb laj Egipto ut reheb chixjunileb lix tenamit.

⁴ La̱ex queril chanru nak li Ka̱cuaꞌ quixsach ruheb chixjunileb li soldado aj Egipto ut quixsach ajcuiꞌ eb lix cacua̱y ut lix carruaje. Queꞌosoꞌ saꞌ li Caki Palau nak yo̱queb che̱ra̱linanquil.

⁵ Ut la̱ex nequenau chanru nak li Ka̱cuaꞌ quextenkꞌa chak saꞌ li chaki chꞌochꞌ nak toj ma̱jiꞌ nequexcꞌulun saꞌ li naꞌajej aꞌin.

⁶ La̱ex nequenau cꞌaꞌru quixba̱nu li Ka̱cuaꞌ re laj Datán ut laj Abiram, eb li ralal laj Eliab li ralal laj Rubén. Chixjunileb laj Israel yo̱queb chirilbal nak quixjach rib li chꞌochꞌ ut laj Datán ut laj Abiram queꞌtꞌaneꞌ toj chi saꞌ rochbeneb lix jun cablal, lix muheba̱leb, ut chixjunil lix queto̱mk.

⁷ La̱ex queril riqꞌuin xnakꞌ e̱ru chixjunil li quilajxba̱nu li Ka̱cuaꞌ riqꞌuin lix nimal xcuanquilal.

⁸ Joꞌcan nak cheba̱nu chi tzꞌakal re ru chixjunil li naxye saꞌ lix chakꞌrab li Dios li yo̱quin chixkꞌaxtesinquil e̱re anakcuan re nak cauhak e̱chꞌo̱l chire̱chaninquil li naꞌajej aꞌan li yechiꞌinbil e̱re.

⁹ Cui te̱ba̱nu li naxye li chakꞌrab, ta̱najtokꞌ rok le̱ yuꞌam saꞌ li naꞌajej li quiyechiꞌi̱c reheb le̱ xeꞌto̱nil yucuaꞌ joꞌ ajcuiꞌ e̱re la̱ex li ralal xcꞌajolex. Saꞌ li naꞌajej aꞌan natauman li cha̱bil echej joꞌ li leche ut li xyaꞌal cab.

¹⁰ Li naꞌajej li xic e̱re chire̱chaninquil, aꞌan moco joꞌ ta li naꞌajej Egipto li quex-el cuiꞌ chak. Nak quexcuan chak saꞌ li naꞌajej aꞌan, la̱ex nequex-au. Abanan toj nequetacuasi e̱rib xtꞌakresinquil.

¹¹ Abanan li naꞌajej li xic cuiꞌ e̱re, aꞌan jun cha̱bil naꞌajej. Cuan tzu̱l ut cuan ru takꞌa ut tꞌakresinbil xban li hab li naxqꞌue chak li Dios.

¹² Li naꞌajej aꞌan lokꞌ chiru li Ka̱cuaꞌ le̱ Dios. Aꞌan na-iloc re junelic chalen saꞌ xticlajic li chihab junju̱nk toj saꞌ rosoꞌjic.

¹³ Joꞌcan nak cheba̱nu li cꞌaꞌru naxye saꞌ li chakꞌrab li xinqꞌue e̱re anakcuan. Te̱ra li Ka̱cuaꞌ le̱ Dios ut texcꞌanjelak chiru chi anchal le̱ chꞌo̱l ut chi anchal le̱ ra̱m.

¹⁴ Cui te̱ba̱nu chi joꞌcan, li Dios tixqꞌue li hab saꞌ xbe̱n le̱ chꞌochꞌ saꞌ xkꞌehil. Tixqꞌue saꞌ sakꞌehil ut tixqꞌue saꞌ habalkꞌe re nak ta̱e̱lk chi cha̱bil li ru le̱ racui̱mk. Ta̱cua̱nk nabal le̱ trigo, le̱ vino ut le̱ aceite.

¹⁵ Ut tixqꞌue ajcuiꞌ chi qꞌui̱c li rax pim saꞌ le̱ cꞌaleba̱l re nak ta̱cua̱nk xtzacae̱mkeb le̱ cuacax. Ut re ajcuiꞌ nak ta̱cua̱nk chi nabal le̱ tzacae̱mk la̱ex toj retal ta̱cꞌojla̱k e̱chꞌo̱l.

¹⁶ Joꞌcan nak cheba̱nuhak cue̱nt re nak incꞌaꞌ te̱qꞌue e̱rib chi balakꞌic. Ut incꞌaꞌ te̱canab xlokꞌoninquil li Ka̱cuaꞌ xban xlokꞌoninquil li jalanil dios chi moco te̱cuikꞌib e̱rib chiruheb.

¹⁷ Cui te̱lokꞌoni li jalanil Dios, li Ka̱cuaꞌ ta̱joskꞌokꞌ saꞌ e̱be̱n ut incꞌaꞌ chic tixqꞌue chak li hab saꞌ xbe̱n li chꞌochꞌ. Ut incꞌaꞌ chic ta̱e̱lk chi cha̱bil li ru le̱ racui̱mk. Ut la̱ex texca̱mk chi junpa̱t saꞌ li cha̱bil chꞌochꞌ li tixqꞌue e̱re li Ka̱cuaꞌ.

¹⁸ Joꞌcan ut nak ninye e̱re nak checꞌu̱la li ra̱tin li Dios saꞌ le̱ chꞌo̱l ut saꞌ le̱ ra̱m. Te̱bacꞌ chiru le̱ rukꞌ ut saꞌ le̱ pe̱quem re nak incꞌaꞌ ta̱sachk saꞌ e̱chꞌo̱l xba̱nunquil li naxye.

¹⁹ Ut te̱cꞌut ajcuiꞌ li ra̱tin li Dios chiruheb le̱ ralal e̱cꞌajol. Junelic te̱serakꞌi reheb nak cua̱nkex saꞌ le̱ rochoch ut nak yo̱kex chi be̱c, nak oc e̱re chi cua̱rc, ut joꞌcan ajcuiꞌ nak texcuacli̱k.

²⁰ Ut te̱tzꞌi̱ba ajcuiꞌ chiru li rokechal le̱ rochoch, joꞌ ajcuiꞌ chire le̱ be chiru li oqueba̱l.

²¹ Cui te̱ba̱nu li yo̱quin chixyebal e̱re, ta̱najtokꞌ rok le̱ yuꞌam ut ta̱najtokꞌ rok lix yuꞌameb le̱ cocꞌal saꞌ li naꞌajej li quixqꞌue li Ka̱cuaꞌ reheb le̱ xeꞌto̱nil yucuaꞌ. Texcua̱nk aran joꞌ najtil ta̱cua̱nk li choxa saꞌ xbe̱n li ruchichꞌochꞌ.

²² Cheba̱nu chi anchal e̱chꞌo̱l chixjunil li chakꞌrab li xinye e̱re. Ut cherahak li Ka̱cuaꞌ le̱ Dios ut cheba̱nu chixjunil le̱ taklanquil xban. Te̱ba̱nu chi anchal e̱chꞌo̱l li cꞌaꞌru naxye e̱re.

²³ Cui te̱ba̱nu chi joꞌcan, li Ka̱cuaꞌ ta̱risiheb li tenamit che̱ru nak yo̱kex chi oc saꞌ li naꞌajej aꞌan. La̱ex texnumta̱k saꞌ xbe̱neb li tenamit ni̱nkeb xcuanquil ut kꞌaxal cauheb rib che̱ru.

²⁴ Chixjunil li naꞌajej li texnumekꞌ cuiꞌ, e̱rehak la̱ex. Naticla chak saꞌ li chaki chꞌochꞌ nacuulac Líbano. Naticla cuan cuiꞌ li nimaꞌ Éufrates ut nacuulac toj cuan cuiꞌ li palau Mediterráneo. Chixjunil li naꞌajej li texbe̱k cuiꞌ, e̱rehak.

²⁵ Ma̱ ani tixcuy e̱sumenquil. Li Ka̱cuaꞌ le̱ Dios tixba̱nu joꞌ quixye e̱re. Tixqꞌueheb xxiuheb chixjunileb ut teꞌxucuak e̱ban yalak bar texxic.

²⁶ Anakcuan oc cue chixyebal e̱re chanru nak naru tex-osobtesi̱k ut chanru nak naru textzꞌekta̱na̱k.

²⁷ Tex-osobtesi̱k cui te̱ba̱nu li naxye saꞌ li chakꞌrab li quixqꞌue e̱re li Ka̱cuaꞌ le̱ Dios, li chakꞌrab li yo̱quin chixchꞌolobanquil che̱ru anakcuan.

²⁸ Ut textzꞌekta̱na̱k cui incꞌaꞌ te̱ba̱nu li chakꞌrab li quixqꞌue e̱re li Ka̱cuaꞌ le̱ Dios. Textzꞌekta̱na̱k cui te̱tzꞌekta̱na le̱ taklanquil li xinye e̱re ut cui te̱lokꞌoni li jalanil dios li incꞌaꞌ xenau ru junxil.

²⁹ Nak li Ka̱cuaꞌ texcꞌam saꞌ li naꞌajej li te̱re̱chani, te̱ye resilal le̱ rosobtesinquil saꞌ li tzu̱l Gerizim. Ut saꞌ li tzu̱l Ebal te̱ye resilal le̱ tzꞌekta̱nanquil.

³⁰ Eb li tzu̱l aꞌin cuanqueb jun pacꞌal li nimaꞌ Jordán saꞌ xjayal li na-oc cuiꞌ li sakꞌe saꞌ li ru takꞌa Arabá li cuanqueb cuiꞌ eb laj cananeo. Nachꞌ cuanqueb riqꞌuineb li ni̱nki ji re More chiru li tenamit Gilgal.

³¹ Chi se̱b texxic jun pacꞌal li nimaꞌ Jordán chire̱chaninquil li naꞌajej li quixyechiꞌi e̱re li Ka̱cuaꞌ le̱ Dios. Te̱re̱chani ut texcua̱nk aran.

³² Nak ac xere̱chani li naꞌajej ut nak cua̱nkex chic aran, te̱ba̱nu chixjunil li chakꞌrab ut le̱ taklanquil li yo̱quin chixchꞌolobanquil che̱ru anakcuan.