Deuteronomio 10 - Li Santil hu

Li chakꞌrab quiqꞌueheꞌ xcaꞌ sut re laj Moisés

¹ Tojoꞌnak li Ka̱cuaꞌ quixye cue, “Ta̱yi̱b cuib chic li perpo̱quil pec joꞌ li cuib li queꞌjoreꞌ ut ta̱cꞌam cuiqꞌuin saꞌ li tzu̱l. Ut ta̱yi̱b ajcuiꞌ jun li ca̱x riqꞌuin cheꞌ.

² La̱in tintzꞌi̱ba chiru li pec li a̱tin li quintzꞌi̱ba chiru li pec li xajor. Ut la̱at ta̱xoqueb saꞌ li ca̱x li ta̱yi̱b”, chan.

³ Joꞌcan nak la̱in quinyi̱b li ca̱x riqꞌuin li cheꞌ acacia ut quinyi̱b ajcuiꞌ cuib li perpo̱quil pec joꞌ li queꞌjoreꞌ. Ut quincꞌam saꞌ cuukꞌ li cuib chi pec nak quintakeꞌ saꞌ li tzu̱l.

⁴ Ut li Ka̱cuaꞌ quixtzꞌi̱ba cuiꞌchic li laje̱b chi chakꞌrab joꞌ nak quixtzꞌi̱ba xbe̱n cua. Aꞌan li chakꞌrab li quixqꞌue e̱re saꞌ li tzu̱l nak quia̱tinac chak saꞌ li xam saꞌ li cutan nak quechꞌutub e̱rib. Ut chirix aꞌan li Ka̱cuaꞌ quixqꞌue cue.

⁵ Ut la̱in quincube cuiꞌchic riqꞌuineb ut quinqꞌue li pec saꞌ li ca̱x li quinyi̱b joꞌ quixye cue li Ka̱cuaꞌ. Ut aran xocxo anakcuan.

⁶ Chirix aꞌan eb li ralal xcꞌajol laj Israel queꞌel Beerot-bene-jaacán ut queꞌco̱eb saꞌ li naꞌajej Mosera. Ut laj Aarón quicam ut quimukeꞌ Mosera. Ut laj Eleazar qui-oc chokꞌ aj tij chokꞌ ru̱chil laj Aarón lix yucuaꞌ.

⁷ Nak queꞌel Mosera, queꞌco̱eb Gudgoda. Queꞌel aran ut queꞌco̱eb saꞌ li naꞌajej Jotbata, li cuan cuiꞌ nabal li rok haꞌ.

⁸ Saꞌ eb li cutan aꞌan li Ka̱cuaꞌ quixxakabeb li ralal xcꞌajol laj Leví chi cꞌanjelac chiru li Ka̱cuaꞌ ut chixpakonquil li Lokꞌlaj Ca̱x li cuan cuiꞌ lix contrato li Ka̱cuaꞌ, ut chixtzꞌa̱manquil li rosobtesinquileb li tenamit. Ut joꞌcan queꞌxba̱nu toj chalen anakcuan.

⁹ Xban aꞌan nak eb laj levita incꞌaꞌ teꞌxcꞌul lix chꞌochꞌ joꞌ teꞌxcꞌul eb li rech aj Israel. Lix ma̱taneb aꞌan, aꞌan li cꞌanjelac chiru li Dios, joꞌ quixye li Ka̱cuaꞌ.

¹⁰ La̱in quincana saꞌ li tzu̱l chiru caꞌcꞌa̱l cutan ut caꞌcꞌa̱l kꞌojyi̱n joꞌ quinba̱nu xbe̱n cua. Ut li Ka̱cuaꞌ quirabi li cꞌaꞌru quintzꞌa̱ma chiru. Ut incꞌaꞌ quixsach e̱ru.

¹¹ Ut li Ka̱cuaꞌ quixye cue, “Ayu anakcuan ut tatcꞌamok be chiruheb li tenamit nak teꞌxic re nak teꞌoc saꞌ li cha̱bil naꞌajej ut teꞌre̱chani joꞌ xinye reheb lix xeꞌto̱nil yucuaꞌ riqꞌuin juramento.”

¹² ¿Cꞌaꞌru naraj li Ka̱cuaꞌ le̱ Dios e̱riqꞌuin nak nequecꞌoxla la̱ex aj Israel? Li cꞌaꞌru naraj li Dios, aꞌan nak la̱ex te̱xucua ru li Ka̱cuaꞌ le̱ Dios, ut texcua̱nk joꞌ naraj aꞌan. Te̱ra ut texcꞌanjelak chiru chi anchal le̱ chꞌo̱l ut chi anchal le̱ ra̱m.

¹³ Te̱ba̱nu li cꞌaꞌru naxye saꞌ lix chakꞌrab li yo̱quin chixyebal e̱re anakcuan. Cui te̱ba̱nu li cꞌaꞌru naxye li Ka̱cuaꞌ, us texcua̱nk.

¹⁴ Li Ka̱cuaꞌ le̱ Dios, aꞌan laj e̱chal re chixjunil li choxa, joꞌ ajcuiꞌ li ruchichꞌochꞌ ut li joꞌ qꞌuial cuan chi saꞌ.

¹⁵ Li Ka̱cuaꞌ Dios quixsicꞌ ruheb le̱ xeꞌto̱nil yucuaꞌ ut quixraheb. Ut quixsicꞌ ajcuiꞌ e̱ru la̱ex xban nak la̱ex li ralal xcꞌajoleb aꞌan. La̱ex li quixsicꞌ e̱ru saꞌ xya̱nkeb chixjunileb li tenamit, joꞌ yo̱quex chirilbal anakcuan.

¹⁶ Joꞌcan ut chalen anakcuan isihomak saꞌ le̱ ra̱m chixjunil li incꞌaꞌ us. Chanchan nak te̱ba̱nu li circuncisión. Cheba̱nu ban li cꞌaꞌru naraj li Ka̱cuaꞌ ut me̱cacuubresi chic le̱ chꞌo̱l.

¹⁷ Xban nak li Ka̱cuaꞌ le̱ Dios, aꞌan li nimajcual Dios. Ma̱cꞌaꞌ chic junak Dios chiru aꞌan. Kꞌaxal nim xcuanquil saꞌ xbe̱neb chixjunileb li cuanqueb xcuanquil ut xucuajel ru. Aꞌan incꞌaꞌ naxsicꞌ ru li ani tixra ut ma̱ ani naru ta̱tumina̱nk ru.

¹⁸ Aꞌan na-iloc reheb li ma̱cꞌaꞌeb xnaꞌ xyucuaꞌ joꞌ ajcuiꞌ eb li xma̱lcaꞌan. Naxraheb li jalaneb xtenamit ut naxqꞌue xcua rucꞌaheb ut naxqꞌue ajcuiꞌ rakꞌeb.

¹⁹ Joꞌcan nak la̱ex cherahakeb li jalaneb xtenamit xban nak la̱ex jalan ajcuiꞌ e̱tenamit nak quexcuan chak Egipto.

²⁰ Chexucua ru li Ka̱cuaꞌ le̱ Dios ut caꞌaj cuiꞌ chiru aꞌan texcꞌanjelak. Chexcua̱nk saꞌ ti̱quilal chiru. Ut caꞌaj cuiꞌ saꞌ xcꞌabaꞌ aꞌan te̱ba̱nu li juramento.

²¹ Li Ka̱cuaꞌ aꞌan li te̱lokꞌoni xban nak aꞌan le̱ Dios. La̱ex queril li sachba chꞌo̱lej li quixba̱nu riqꞌuin lix nimal xcuanquilal.

²² Laje̱b xca̱cꞌa̱leb (70) ajcuiꞌ le̱ xeꞌto̱nil yucuaꞌ nak queꞌco̱eb Egipto najter. Abanan li Ka̱cuaꞌ le̱ Dios xexqꞌue chi qꞌuia̱nc joꞌ xqꞌuial li chahim li cuanqueb chiru choxa.