Deuteronomio 1 - Li Santil hu

Laj Moisés naxjultica reheb laj Israel li yechiꞌinbil reheb xban li Dios

¹ Aꞌan aꞌin li a̱tin li quixye laj Moisés reheb chixjunileb laj Israel nak cuanqueb saꞌ li chaki chꞌochꞌ nachꞌ riqꞌuin li nimaꞌ Jordán saꞌ li este. Cuanqueb saꞌ li naꞌajej Arabá saꞌ xcaꞌyaba̱l li Caki Palau saꞌ xya̱nkeb li naꞌajej Parán, Tofel, Labán, Hazerot ut Dizahab.

² Junlaju cutan chi be xnajtil li naꞌajej Horeb riqꞌuin li naꞌajej Cades-barnea nak nequeꞌxic saꞌ li be li nanumeꞌ saꞌ li tzu̱l Seir.

³ Saꞌ li xbe̱n cutan nak yo̱ li junlaju po re li caꞌcꞌa̱l chihab li reliqueb Egipto nak laj Moisés quia̱tinac riqꞌuineb laj Israel ut quixye reheb chixjunil li quiyeheꞌ re xban li Ka̱cuaꞌ.

⁴ Aꞌin quicꞌulman nak ac xeꞌnumta saꞌ xbe̱n laj Sehón lix reyeb laj amorreo, li quicuan Hesbón ut saꞌ xbe̱n ajcuiꞌ laj Og lix reyeb laj Basán li quicuan Astarot saꞌ li naꞌajej Edrei.

⁵ Laj Moisés quia̱tinac riqꞌuineb laj Israel nak cuanqueb chire li nimaꞌ Jordán saꞌ li este saꞌ lix naꞌajeb laj Moab ut quixye reheb cꞌaꞌru naxye saꞌ li chakꞌrab.

⁶ Quixye: —Nak cuanco Horeb, li Ka̱cuaꞌ li kaDios quia̱tinac kiqꞌuin ut quixye ke chi joꞌcaꞌin. Ac junxil nequex-oc chi cua̱nc saꞌ li tzu̱l aꞌin.

⁷ Xocomak li cꞌaꞌru e̱re ut texxic saꞌ li naꞌajej li tzu̱l ru li cuanqueb cuiꞌ eb laj amorreo. Texxic saꞌ eb li naꞌajej li cuanqueb chi xjun sutam. Texxic saꞌ li ru takꞌa re Arabá, ut saꞌ eb li tzu̱l. Ut texxic Neguev, ut chire li palau, ut saꞌ eb lix naꞌajeb laj cananeo ut li naꞌajej Líbano. Texxic toj cuan cuiꞌ li nimla nimaꞌ Éufrates.

⁸ Qꞌuehomak retal. La̱in xinqꞌue e̱re li naꞌajej aꞌin. Texxic ut te̱re̱chani li naꞌajej joꞌ quinye riqꞌuin juramento reheb le̱ xeꞌto̱nil yucuaꞌ, laj Abraham, laj Isaac ut laj Jacob ut reheb ajcuiꞌ li ralal xcꞌajoleb li teꞌcua̱nk mokon, chan li Dios.

⁹ Laj Moisés quixye reheb: —Nak toj cuanquex chak saꞌ li tzu̱l Sinaí la̱in quinye e̱re nak incꞌaꞌ chic nincuy cꞌamoc be che̱ru injunes.

¹⁰ Li Ka̱cuaꞌ li kaDios xoxqꞌue chi ta̱mc. Anakcuan chanchano chic xqꞌuial li chahim chiru li choxa.

¹¹ Aꞌ taxak li Ka̱cuaꞌ, lix Dioseb li kaxeꞌto̱nil yucuaꞌ, ta̱qꞌuehok e̱re chi ta̱mc chi nabal chiru anakcuan ut texrosobtesi chi nabal joꞌ quixyechiꞌi xba̱nunquil ke.

¹² Abanan, ¿chan ta cuiꞌ ru nak tincuy rakoc a̱tin saꞌ e̱be̱n injunes? La̱in incꞌaꞌ tincuy rabinquil le̱ chꞌaꞌajquilal nak nequecuechꞌi e̱rib chi ribil e̱rib.

¹³ Sicꞌomakeb ru saꞌ li junju̱nk xte̱paleb li tenamit li cui̱nk li cuanqueb xnaꞌleb ut nequeꞌxnau qꞌuehoc naꞌleb. Teꞌxnau takla̱nc li te̱sicꞌ ruheb ut la̱in tinxakabeb chi rakoc a̱tin saꞌ e̱be̱n.

¹⁴ Ut la̱ex queye cue: “Us li nacacꞌoxla xba̱nunquil,” chanquex.

¹⁵ Joꞌcan nak la̱in quinxakabeb chi rakoc a̱tin saꞌ e̱be̱n li cui̱nk li nequeꞌcꞌamoc be saꞌ e̱ya̱nk, li cuanqueb xnaꞌleb ut nequeꞌxnau takla̱nc. Cuan li queꞌrakoc a̱tin saꞌ xbe̱n jun mil li cristian, cuan li queꞌrakoc a̱tin saꞌ xbe̱n jun ciento, cuan li queꞌrakoc a̱tin saꞌ xbe̱n laje̱b roꞌcꞌa̱l, ut cuan ajcuiꞌ li queꞌrakoc a̱tin saꞌ xbe̱n laje̱b chi cristian.

¹⁶ Ut la̱in quinye reheb li teꞌrakok a̱tin saꞌ e̱be̱n, “Te̱qꞌue retal chi us li cꞌaꞌru nequeꞌxye li yo̱queb chi cuechꞌi̱nc. Ut texrakok a̱tin saꞌ xya̱lal saꞌ xbe̱neb, usta a̱cuech aj Israelil malaj ut li jalan xtenamit li cuanqueb saꞌ e̱ya̱nk.

¹⁷ Incꞌaꞌ te̱sicꞌ ru li ani te̱col rix. Texrakok ban a̱tin saꞌ ti̱quilal saꞌ xbe̱neb li ma̱cꞌaꞌeb xcuanquil joꞌ eb ajcuiꞌ li cuanqueb xcuanquil. Ma̱ ani te̱xucua ru xban nak li tzꞌakal aj rakol a̱tin, aꞌan li Dios. Cui kꞌaxal nim li chꞌaꞌajquilal ut incꞌaꞌ texru̱k chixyi̱banquil, te̱cꞌameb chak cuiqꞌuin ut la̱in tinrakok a̱tin saꞌ xbe̱neb,” chanquin reheb.

¹⁸ Ut saꞌ li cutan aꞌan la̱in quinye e̱re chixjunil li cꞌaꞌru te̱ba̱nu.

¹⁹ La̱o kaba̱nu joꞌ quixye ke li Ka̱cuaꞌ li kaDios. Co-el saꞌ li naꞌajej Horeb ut conumeꞌ saꞌ li nimla chaki chꞌochꞌ li xiu xiu cuiꞌ numecꞌ. Queqꞌue ajcuiꞌ retal la̱ex. Conumeꞌ saꞌ lix naꞌajeb laj amorreo, li tzu̱l ru ut cocuulac toj Cades-barnea.

²⁰ Ut la̱in quinye e̱re, ac xocꞌulun saꞌ lix naꞌajeb laj amorreo, li tzu̱l ru. Aꞌan li naꞌajej li tixkꞌaxtesi ke li Ka̱cuaꞌ li kaDios.

²¹ Qꞌuehomak retal. Li Ka̱cuaꞌ le̱ Dios tixkꞌaxtesi e̱re li naꞌajej. Texxic ut te̱re̱chani li naꞌajej joꞌ quixye li Ka̱cuaꞌ, lix Dioseb li kaxeꞌto̱nil yucuaꞌ. Mexxucuac, chi moco ta̱chꞌina̱nk le̱ chꞌo̱l, chanquin e̱re.

²² Abanan la̱ex quexcuulac cuiqꞌuin ut queye cue: “Takataklaheb li cui̱nk chixqꞌuebal retal li naꞌajej. Nak teꞌcꞌulu̱nk, teꞌxye ke bar cuan li be takacꞌam ut bar cuan li tenamit li to-oc cuiꞌ.”

²³ Quixcꞌul inchꞌo̱l li cꞌaꞌru queye. Ut quinsicꞌ ruheb cablaju li cui̱nk. Junju̱nk quinsicꞌ ru saꞌ xya̱nkeb lix te̱paleb laj Israel.

²⁴ Queꞌco̱eb saꞌ li naꞌajej li tzu̱l ru ut queꞌcuulac toj saꞌ li ru takꞌa Escol ut queꞌoc chixqꞌuebal retal chanru li naꞌajej.

²⁵ Nak queꞌsukꞌi queꞌxcꞌam chak kiqꞌuin li quiꞌil kꞌe̱n re takil. Ut queꞌxye ke, “Kꞌaxal cha̱bil li naꞌajej li tixqꞌue ke li Ka̱cuaꞌ li kaDios,” chanqueb.

²⁶ Abanan la̱ex incꞌaꞌ queraj xic chire̱chaninquil li naꞌajej. Quekꞌet ban li chakꞌrab li quixqꞌue e̱re li Ka̱cuaꞌ le̱ Dios.

²⁷ Ut la̱ex quex-oc chi cuechꞌi̱nc saꞌ le̱ muheba̱l ut queye, “Xicꞌ nocoril li Ka̱cuaꞌ. Joꞌcan nak corisi chak Egipto re nak toxkꞌaxtesi saꞌ rukꞌeb laj amorreo re nak teꞌxsach ku.

²⁸ ¿Bar ta̱ru̱k toxic anakcuan? Xchꞌinan li kachꞌo̱l xban nak eb li kacomon xeꞌxye ke nak eb li cristian aran ni̱nkeb rok chiku la̱o ut cauheb rib. Ut ni̱nkeb li tenamit ut ni̱nkeb ajcuiꞌ xteram li tzꞌac li sutsu̱queb cuiꞌ. Ut xeꞌrileb ajcuiꞌ chak ruheb li ralal xcꞌajol li nimla cui̱nk aj Anac xcꞌabaꞌ.”

²⁹ Ut la̱in quinye e̱re, Michꞌinan e̱chꞌo̱l chi moco texxucuak xbaneb aꞌan.

³⁰ Li Ka̱cuaꞌ le̱ Dios, aꞌan ta̱cꞌamok be che̱ru. Aꞌan ta̱tenkꞌa̱nk e̱re chi pletic, joꞌ nak quextenkꞌa nak cuanquex Egipto. La̱ex queqꞌue retal cꞌaꞌru quixba̱nu.

³¹ Ut queril chanru nak li Ka̱cuaꞌ quextenkꞌa nak cuanquex saꞌ li chaki chꞌochꞌ. Chanchan nak quexkꞌalu joꞌ jun li yucuaꞌbej naxkꞌalu li ralal. Ut quicꞌamoc be che̱ru toj chalen nak quexcꞌulun saꞌ li naꞌajej aꞌin.

³² Usta li Dios quextenkꞌa chak, abanan la̱ex incꞌaꞌ ajcuiꞌ quepa̱b li Ka̱cuaꞌ le̱ Dios.

³³ Ut li Ka̱cuaꞌ yo̱ chi cꞌamoc be che̱ru riqꞌuin li xam chi kꞌojyi̱n ut li chok chi cutan. Quixcꞌut che̱ru bar te̱yi̱b cuiꞌ le̱ muheba̱l ut quixcꞌut che̱ru bar cuan li be te̱cꞌam nak texxic.

³⁴ Cꞌajoꞌ nak quijoskꞌoꞌ li Ka̱cuaꞌ nak quirabi li cꞌaꞌru queye. Joꞌcan nak quixye chi joꞌcaꞌin riqꞌuin juramento:

³⁵ “Ma̱ jun e̱re la̱ex li incꞌaꞌ us le̱ naꞌleb te̱ril li cha̱bil naꞌajej li quinyechiꞌi riqꞌuin juramento reheb le̱ xeꞌto̱nil yucuaꞌ.

³⁶ Caꞌaj cuiꞌ laj Caleb li ralal laj Jefone ta̱ril. La̱in tinqꞌue re aꞌan li naꞌajej li quinumeꞌ cuiꞌ ut tinqꞌue ajcuiꞌ reheb li ralal xcꞌajol xban nak laj Caleb quixpa̱b chi anchal xchꞌo̱l li cꞌaꞌru quinye.”

³⁷ E̱ma̱c la̱ex nak quichal xjoskꞌil li Ka̱cuaꞌ saꞌ inbe̱n la̱in ut quixye cue “Chi moco la̱at tat-oc saꞌ li naꞌajej aꞌan.

³⁸ Abanan laj Josué li natenkꞌan a̱cue, li ralal laj Nun, ta̱oc saꞌ li naꞌajej aꞌan. Ta̱qꞌue xcacuil xchꞌo̱l xban nak aꞌan ta̱cꞌamok be chiruheb laj Israel nak teꞌre̱chani li naꞌajej aꞌan.

³⁹ Teꞌoc le̱ ralal e̱cꞌajol li toj ma̱jiꞌ nequeꞌxqꞌue retal cꞌaꞌru li us ut cꞌaꞌru li incꞌaꞌ us. Aꞌaneb li queye nak teꞌchapekꞌ ut teꞌcꞌamekꞌ chi pre̱xil, abanan la̱in tinqꞌue li naꞌajej reheb aꞌan. Aꞌaneb li teꞌe̱chani̱nk re.

⁴⁰ Ut la̱ex, sukꞌinkex. Ayukex saꞌ li chaki chꞌochꞌ. Te̱cꞌam li be li naxic saꞌ li Caki Palau,” chan li Dios.

⁴¹ Tojoꞌnak la̱ex queye, “La̱o xoma̱cob chiru li Ka̱cuaꞌ. La̱o toxic chi pletic. Takaba̱nu li cꞌaꞌru tixye ke li Ka̱cuaꞌ li kaDios,” chanquex. Ut quecauresi e̱rib chi xic chi pletic saꞌ li naꞌajej li tzu̱l ru.

⁴² Ut li Ka̱cuaꞌ quixye cue, “Ta̱ye reheb nak incꞌaꞌ teꞌxic chi pletic xban nak la̱in incꞌaꞌ tincua̱nk riqꞌuineb. Eb li xicꞌ nequeꞌiloc e̱re teꞌnumta̱k saꞌ xbe̱neb,” chan li Dios.

⁴³ La̱in quinye e̱re cꞌaꞌru quixye cue li Ka̱cuaꞌ. Abanan la̱ex incꞌaꞌ queraj rabinquil li cꞌaꞌru quinye. Quekꞌetkꞌeti ban e̱rib chiru li Ka̱cuaꞌ. Quekꞌet li ra̱tin ut co̱ex chi pletic saꞌ li naꞌajej li tzu̱l ru.

⁴⁴ Eb laj amorreo li cuanqueb saꞌ li naꞌajej li tzu̱l ru queꞌel che̱cꞌulbal. Chanchaneb jun tu̱b li chꞌub nak queꞌchal saꞌ e̱be̱n. Ut quexra̱lina toj Horma. Queꞌnumta saꞌ e̱be̱n saꞌ li naꞌajej Seir.

⁴⁵ La̱ex texya̱bak nak quexsukꞌi chak ut quetzꞌa̱ma chiru li Dios nak aꞌan textenkꞌa. Abanan li Ka̱cuaꞌ incꞌaꞌ quirabi nak queya̱ba lix cꞌabaꞌ.

⁴⁶ Joꞌcan nak najt quexcana Cades.