Daniel 7 - Li Santil hu

Li visión chirix li ca̱hib chi joskꞌ aj xul

¹ Saꞌ li xbe̱n chihab nak laj Belsasar quicuan chokꞌ xreyeb laj Babilonia, laj Daniel yo̱ chi cua̱rc saꞌ lix chꞌa̱t nak quiril jun li visión li quicꞌutbesi̱c chiru saꞌ lix matcꞌ. Ut quixtzꞌi̱ba li cꞌaꞌru quiril.

² Laj Daniel quixye: —Saꞌ li kꞌojyi̱n aꞌan nak quicuil jun li visión, quicuil nak li ikꞌ yo̱ chak chi cha̱lc saꞌ xca̱ pacꞌalil li ruchichꞌochꞌ ut yo̱ chirecꞌasinquil ru li nimla palau.

³ Ut ca̱hib li ni̱nki xul queꞌel saꞌ li palau ut jalan jala̱nk li junju̱nk.

⁴ Li xbe̱n chanchan jun li cakcoj ut cuan xxicꞌ chanchan xxicꞌ li cꞌuch. Ut yo̱quin chirilbal nak qui-isi̱c lix xicꞌ. Ut li xul quixakaba̱c saꞌ li chꞌochꞌ. Chanchan jun li cui̱nk xakxo. Ut quiqꞌueheꞌ xnaꞌleb joꞌ xnaꞌleb cui̱nk.

⁵ Ut li xcab xul chanchan jun li oso, ac yo̱ xcuaclesinquil jun li rukꞌ. Ut cꞌaxcꞌo chak oxib li costilla saꞌ re. Ut quicuabi jun li xya̱b cux nak quixye, “Cuaꞌin ut tiu nabal li tib,” chan.

⁶ Ut chirix aꞌan quicuil jun chic li xul chanchan jun li hix, abanan chirix cuan ca̱hib li xicꞌ. Chanchan laj xicꞌanel xul. Ut cuan ca̱hib lix jolom. Ut quiqꞌueheꞌ lix cuanquilal re, nak quicuil.

⁷ Ut chirix aꞌan, quicuil saꞌ lin matcꞌ li xca̱ xul. Kꞌaxal yibru ut xiu xiu rilbal ut kꞌaxal cau rib. Ut riqꞌuin li ruch re hierro, quixtꞌupi li quixchap ut quixcꞌux ut li joꞌ qꞌuial incꞌaꞌ quixchoy xtiubal quixyekꞌi saꞌ rok. Li xul aꞌin jalan chiru li quicuil xbe̱n cua ut li jun aꞌin cuan laje̱b lix xucub.

⁸ Nak yo̱quin chirilbal lix xucub, aran quicuil jun chic li xucub chꞌina caꞌchꞌin. Yo̱ chak chi e̱lc saꞌ xya̱nkeb li laje̱b chic. Ut qui-isi̱c oxib li xucub li quicuil xbe̱n cua. Cuan xnakꞌ ru li chꞌina xucub nak quicuil. Chanchan xnakꞌ ru cui̱nk ut riqꞌuin lix tzꞌu̱mal re yo̱ chixnimobresinquil rib.

⁹ Nak yo̱quin chirilbal aꞌin, queꞌxakaba̱c li cꞌojariba̱l ut li Ti̱xil Cui̱nk li cuan chi junelic quicꞌojla. Li rakꞌ aꞌan sak sak chanchan li nieve. Ut li rismal chanchan li saki nokꞌ. Lix cꞌojariba̱l cuan saꞌ xbe̱n li ruedas ut yo̱ xxamlel.

¹⁰ Ut li xam chanchan jun li nimaꞌ yo̱ chi cꞌatc. Ut li qꞌuila okꞌob chi tenamit yo̱queb chi cꞌanjelac chiru ut cuan chic li qꞌuila okꞌob chi tenamit xakxo̱queb chiru. Ut laj rakol a̱tin quicꞌojla ut eb li hu queꞌteli.

¹¹ Toj yo̱quin ajcuiꞌ chi cꞌoxlac chirix li quixye li chꞌina xucub re xnimobresinquil rib, nak queꞌxcamsi li xca̱ xul. Quipedasi̱c lix tibel, quicuteꞌ saꞌ li xam ut quicꞌat.

¹² Ut qui-isi̱c lix cuanquileb li oxib chic chi xul li quicuil xbe̱n cua. Abanan queꞌcanaba̱c chi yoꞌyo usta yal ajlanbil cutan aj chic teꞌcua̱nk.

¹³ Ut saꞌ ajcuiꞌ li kꞌojyi̱n aꞌan quicuil saꞌ lin matcꞌ nak yo̱ chak chi cha̱lc saꞌ li chok li Cꞌajolbej. Ut quijiloc riqꞌuin li Ti̱xil Cui̱nk li cuan chi junelic.

¹⁴ Quiqꞌueheꞌ xcuanquilal ut xlokꞌal ut quiqꞌueheꞌ xcuanquil chi takla̱nc re nak chixjunileb li tenamit teꞌcꞌanjelak chiru aꞌ yal chanru li ra̱tinoba̱leb. Ut lix lokꞌal ut lix cuanquilal li jun aꞌan incꞌaꞌ ta̱osokꞌ. Cua̱nk ban chi junelic.

¹⁵ Laj Daniel quixye: —La̱in quisach inchꞌo̱l ut qui-oc incꞌaꞌux xban li cꞌaꞌru quicuil.

¹⁶ Ut la̱in quinjiloc riqꞌuin li jun li xakxo chiru li cꞌojariba̱l ut quinpatzꞌ re cꞌaꞌru xya̱lal chixjunil li quicuil. Ut aꞌan quichakꞌoc ut quixye cue cꞌaꞌru xya̱lal li yo̱quin chirilbal.

¹⁷ Quixye cue: —Li ca̱hib chi xul li xacuil, aꞌaneb retalil li ca̱hib chi rey li teꞌcua̱nk xcuanquil saꞌ xbe̱n li ruchichꞌochꞌ.

¹⁸ Abanan ta̱cuulak xkꞌehil nak eb li ralal xcꞌajol li nimajcual Dios teꞌqꞌuehekꞌ xcuanquil ut aꞌaneb chic teꞌcua̱nk xcuanquil chi junelic kꞌe cutan, chan.

¹⁹ Ut la̱in toj quicuaj xnaubal cꞌaꞌru xya̱lal li xca̱ xul, li kꞌaxal jalan chiruheb li oxib chic. Kꞌaxal xiu xiu rilbal. Cuan ruch re hierro ut li rixiꞌij bronce. Ut quixtꞌupi li quixchap ut quixcꞌux ut li joꞌ qꞌuial incꞌaꞌ quixchoy xtiubal quixyekꞌi saꞌ rok.

²⁰ Ut quinpatzꞌ ajcuiꞌ re cꞌaꞌru xya̱lal li laje̱b chi xucub li cuanqueb saꞌ xjolom. Ut quinpatzꞌ re chirix li xucub li caꞌchꞌin li qui-el chak mokon ut queꞌtꞌaneꞌ li oxib chiru. Li xucub aꞌan cuan xnakꞌ ru ut cuan xtzꞌu̱mal re ut yo̱ chixnimobresinquil rib riqꞌuin li naxye. Nacꞌutun chiru nak aꞌan nim xcuanquil chiruheb li jun chꞌol chic.

²¹ Ut li xucub aꞌin yo̱ chixpletinquil li ralal xcꞌajol li Dios nak quicuil ut yo̱ chi numta̱c saꞌ xbe̱neb.

²² Ut quicuil ajcuiꞌ nak quichal li Ti̱xil Cui̱nk li cuan chi junelic ut Aꞌan quirakoc a̱tin saꞌ xbe̱neb chixjunileb ut quixcoleb li ralal xcꞌajol. Quicuulac xkꞌehil nak queꞌqꞌueheꞌ xcuanquileb xban li Dios.

²³ Quixye cue: —Li xca̱ xul li xacuil, aꞌan retalil li xca̱ cuanquilal li ta̱cua̱nk saꞌ ruchichꞌochꞌ. Aꞌan jalan chiruheb chixjunileb li jun chꞌol chic. Ta̱numta̱k saꞌ xbe̱neb chixjunileb li cuanqueb saꞌ ruchichꞌochꞌ. Tixrahobtesiheb li tenamit ut tixyekꞌiheb saꞌ rok.

²⁴ Li laje̱b chi xucub aꞌan retalil li laje̱b chi cui̱nk teꞌcua̱nk chokꞌ rey. Ut chirixeb aꞌan, ta̱cua̱nk jun chic li rey jalan chiruheb aꞌan. Ut aꞌan li ta̱numta̱k saꞌ xbe̱neb oxib li rey ut tixsacheb.

²⁵ Aꞌan tixmajecua li nimajcual Dios ut tixrahobtesiheb ajcuiꞌ li ralal xcꞌajol li Dios. Tixcꞌoxla xjalbal eb li chakꞌrab ut tixcꞌoxla xjalbal li cꞌaynakeb xba̱nunquil li tenamit. Ut oxib chihab riqꞌuin media teꞌcua̱nk li ralal xcꞌajol li Dios rubel xcuanquil aꞌan.

²⁶ Abanan li Ti̱xil Cui̱nk li cuan chi junelic ta̱rakok a̱tin saꞌ xbe̱n ut ta̱risi lix cuanquil ut tixsach chi junaj cua.

²⁷ Ut chixjunil li cuanquilal ta̱qꞌuehekꞌ reheb li ralal xcꞌajol li Dios ut aꞌanakeb chic cua̱nkeb xcuanquil chi junelic saꞌ xbe̱neb chixjunileb li cuanqueb xcuanquil jun sut rubel choxa. Ut li cuanqueb xcuanquil saꞌ ruchichꞌochꞌ teꞌcꞌanjelak ut teꞌpa̱ba̱nk chiruheb, chan cue.

²⁸ Caꞌaj cuiꞌ aꞌan li quicuil saꞌ lin matcꞌ. La̱in cꞌajoꞌ nak quisach inchꞌo̱l ut qui-oc incꞌaꞌux. Sakquirin quincuulac xban inxiu abanan quincꞌu̱la saꞌ inchꞌo̱l li quicuil saꞌ lin matcꞌ ut ma̱ ani aj e quinserakꞌi li cꞌaꞌru quicuil, chan laj Daniel.