Daniel 6 - Li Santil hu

Quicuteꞌ laj Daniel saꞌ xnaꞌajeb li cakcoj

¹ Qui-ala saꞌ xchꞌo̱l li rey Darío xxakabanquil jun ciento riqꞌuin junmay chi cui̱nk re tixqꞌue xcuanquileb chi takla̱nc saꞌ chixjunil li naꞌajej.

² Ut quixxakabeb oxibeb chic li cui̱nk re nak eb aꞌan teꞌtakla̱nk saꞌ xbe̱neb li jun ciento riqꞌuin junmay chi cui̱nk li ac quixxakabeb. Laj Daniel aꞌan jun saꞌ xya̱nkeb li oxib li queꞌxakaba̱c re nak teꞌril ma tzꞌakal re ru lix cꞌanjeleb li jun ciento riqꞌuin junmay ut re ajcuiꞌ nak teꞌril chi us li cꞌaꞌru cuan re li rey.

³ Laj Daniel kꞌaxal cuiꞌchic us quixba̱nu chiruheb li cuib chic chi gobernador joꞌqueb ajcuiꞌ chixjunileb li nequeꞌtaklan xban nak kꞌaxal cuiꞌchic cha̱bil xnaꞌleb chiruheb chixjunileb. Joꞌcan nak li rey quixcꞌoxla xqꞌuebal laj Daniel chi takla̱nc saꞌ xbe̱neb chixjunileb li tenamit.

⁴ Ut eb li gobernador ut eb li nequeꞌtaklan saꞌ li tenamit, queꞌoc chixcakalinquil laj Daniel. Queꞌoc chixsicꞌbal chanru nak ta̱paltok re nak ta̱ru̱k teꞌjitok chirix chiru li rey. Abanan incꞌaꞌ queꞌxtau chanru nak teꞌjitok chirix xban nak laj Daniel ti̱c xchꞌo̱l ut ma̱cꞌaꞌ xma̱c, chi moco quixbalakꞌiheb li tenamit.

⁵ Tojoꞌnak eb li cui̱nk aꞌan queꞌxye: —Ma̱cꞌaꞌ ta̱ru̱k tojitok cuiꞌ chirix laj Daniel cui incꞌaꞌ takaba̱nu saꞌ xcꞌabaꞌ lix pa̱banquil xchakꞌrab lix Dios, chanqueb.

⁶ Ut eb li gobernador joꞌqueb ajcuiꞌ li nequeꞌtaklan saꞌ xbe̱neb li tenamit queꞌxchꞌutub ribeb chiru li rey ut queꞌxye re: —At rey Darío, chicua̱nk taxak la̱ yuꞌam chi junelic.

⁷ Chikajunilo la̱o li gobernador ut eb li capitán, eb li comisionado ut eb li ni̱nk xcuanquileb, xkacꞌu̱b ru chi kibil kib nak la̱at ta̱qꞌue jun li chakꞌrab ut ta̱xakab xcuanquil. Ta̱chakꞌrabiheb li tenamit nak chiru li laje̱b xcaꞌcꞌa̱l cutan li ta̱cha̱lk ma̱ ani naru ta̱tzꞌa̱ma̱nk chiru lix Dios chi moco chiru junak cui̱nk. Caꞌaj cuiꞌ cha̱cuu la̱at ta̱ru̱k teꞌtzꞌa̱ma̱nk. Ut cui cuan junak naxkꞌet la̱ chakꞌrab, li jun aꞌan ta̱cutekꞌ saꞌ xya̱nkeb li cakcoj.

⁸ Ta̱qꞌue li chakꞌrab aꞌin ut ta̱tzꞌi̱ba la̱ cꞌabaꞌ chiru re nak ta̱xakaba̱k xcuanquil ut ma̱ ani ta̱ru̱k ta̱jalok ru. Aꞌanak lix chakꞌrabeb laj Medo ut eb laj Persia ut ma̱ ani ta̱ru̱k ta̱sachok re xcuanquil, chanqueb re li rey.

⁹ Joꞌcan nak li rey Darío quixqꞌue li chakꞌrab ut quixtzꞌi̱ba lix cꞌabaꞌ chiru.

¹⁰ Nak quixnau nak li rey quixqꞌue li chakꞌrab aꞌan, laj Daniel co̱ saꞌ rochoch. Ut quixcanab chi teto lix ventanil lix cuariba̱l li cuan saꞌ xjayal li tenamit Jerusalén. Joꞌ cꞌaynak xba̱nunquil laj Daniel, quixcuikꞌib rib aran ut oxib sut chiru li cutan quitijoc ut quibantioxin chiru li Ka̱cuaꞌ lix Dios joꞌ naxba̱nu rajlal.

¹¹ Ut eb li xicꞌ nequeꞌiloc re laj Daniel queꞌxchꞌutub ribeb chiru lix ventana ut queꞌril nak laj Daniel yo̱ chi tijoc ut yo̱ chi tzꞌa̱ma̱nc chiru lix Dios.

¹² Ut queꞌco̱eb saꞌ junpa̱t riqꞌuin li rey ut queꞌa̱tinac riqꞌuin chirix li chakꞌrab li quixqꞌue ut queꞌxye re: —¿Ma incꞌaꞌ ta biꞌ xaqꞌue li chakꞌrab nak chiru laje̱b xcaꞌcꞌa̱l (30) cutan ma̱ ani ta̱tzꞌa̱ma̱nk chiru lix Dios, malaj ut chiru junak cui̱nk cui ma̱cuaꞌ a̱cuiqꞌuin la̱at, at rey? ¿Ma incꞌaꞌ ta biꞌ caye nak li ani ta̱tzꞌa̱ma̱nk chiru lix Dios, li jun aꞌan ta̱cutekꞌ saꞌ xnaꞌajeb li cakcoj? chanqueb. Quichakꞌoc li rey ut quixye: —Ya̱l nak joꞌcan. Aꞌan lix chakꞌrabeb laj Medo ut eb laj Persia ut ma̱ ani naru ta̱jalok re aꞌan, chan.

¹³ Ut queꞌxye re li rey: —Laj Daniel li ralal xcꞌajoleb laj judío li queꞌchapeꞌ ut queꞌcꞌameꞌ chak arin, aꞌan incꞌaꞌ naxqꞌue a̱cuanquil, at rey, chi moco naxpa̱b li chakꞌrab li xaqꞌue. Oxib sut chiru li cutan natzꞌa̱man chiru lix Dios, chanqueb.

¹⁴ Cꞌajoꞌ nak quirahoꞌ xchꞌo̱l li rey nak quirabi cꞌaꞌru queꞌxye eb aꞌan. Ut aꞌan quixcꞌoxla saꞌ xchꞌo̱l nak tixcol laj Daniel. Ut quixyal xkꞌe xsicꞌbal chanru nak tixcol toj chalen nak qui-ecuu.

¹⁵ Eb li cui̱nk queꞌsukꞌi cuiꞌchic riqꞌuin li rey ut queꞌxchꞌutub rib riqꞌuin ut queꞌxye re: —At rey, la̱at nacanau nak lix chakꞌrab eb laj Medo ut eb laj Persia naxye nak ma̱ ani naru najaloc ru li chakꞌrab xakabanbil xcuanquil xban junak rey, chanqueb.

¹⁶ Joꞌcan nak li rey quixtakla xcꞌambal chak laj Daniel ut quixye re: —Aꞌ taxak li Ka̱cuaꞌ la̱ Dios li nacacꞌanjela ru junelic, aꞌan taxak chicolok a̱cue saꞌ rukꞌeb li cakcoj, chan re. Ut queꞌxcut laj Daniel saꞌ xya̱nkeb li cakcoj.

¹⁷ Ut queꞌxcꞌam jun li nimla pec ut riqꞌuin aꞌan queꞌxtzꞌap li oqueba̱l re lix naꞌajeb li cakcoj. Ut li rey quixqꞌue li sello chiru li pec riqꞌuin lix matkꞌab ut riqꞌuin ajcuiꞌ lix matkꞌab eb laj cꞌanjel chiru. Aꞌan li retalil nak ma̱ ani ta̱tehok re.

¹⁸ Tojoꞌnak li rey co̱ saꞌ li palacio ut quixyocob rib saꞌ xchꞌa̱t chi incꞌaꞌ quicuaꞌac, chi moco quichꞌeꞌeꞌ li cuajb re xqꞌuebal xsahil xchꞌo̱l. Ut incꞌaꞌ quicuar li rey xban xcꞌaꞌux.

¹⁹ Sake̱uc re nak quicuacli li rey ut co̱ saꞌ junpa̱t saꞌ lix naꞌajeb li cakcoj.

²⁰ Nak yo̱ chi nachꞌoc aran, chi ra saꞌ xchꞌo̱l, li rey quixbok laj Daniel ut quixye re: —At Daniel, la̱at aj cꞌanjel chiru li yoꞌyo̱quil Dios. ¿Ma xatxcol la̱ Dios li junelic nacacꞌanjela ru? ¿Ma xatxcol chiruheb li cakcoj? chan re.

²¹ Laj Daniel quichakꞌoc ut quixye re: —At rey, chicua̱nk taxak la̱ yuꞌam chi junelic.

²² Lin Dios quixtakla chak lix ángel ut aꞌan quitzꞌapoc re lix tzꞌu̱mal reheb li cakcoj re nak incꞌaꞌ tineꞌxcamsi xban nak chiru li Dios ma̱cꞌaꞌ inma̱c chi moco cha̱cuu la̱at xinba̱nu li incꞌaꞌ us, chan re li rey.

²³ Cꞌajoꞌ nak quisahoꞌ xchꞌo̱l li rey xban nak quicoleꞌ laj Daniel ut quixtakla risinquil saꞌ xnaꞌajeb li cakcoj. Ut ma̱cꞌaꞌ quixcꞌul laj Daniel xban nak cꞌojcꞌo xchꞌo̱l riqꞌuin lix Dios.

²⁴ Ut li rey quixtakla lix takl re nak teꞌcꞌamekꞌ riqꞌuin chixjunileb li cui̱nk li queꞌjitoc re laj Daniel. Ut queꞌcuteꞌ saꞌ xya̱nkeb li cakcoj rech xiquic li rixakileb joꞌqueb ajcuiꞌ lix cocꞌaleb. Ut toj ma̱jiꞌ ajcuiꞌ nequeꞌnak saꞌ lix naꞌajeb li cakcoj nak queꞌchapeꞌ xbaneb ut queꞌtoki̱c lix bakeleb.

²⁵ Tojoꞌnak li rey Darío quitzꞌi̱bac riqꞌuineb chixjunileb li tenamit cuanqueb saꞌ chixjunil li ruchichꞌochꞌ ut riqꞌuineb li jalan jala̱nk ra̱tinoba̱leb ut quixye reheb: —Chinumta̱k taxak li tuktu̱quil usilal e̱riqꞌuin.

²⁶ La̱in yo̱quin chixqꞌuebal e̱re li chakꞌrab aꞌin yalak bar saꞌ eb li naꞌajej li nintaklan cuiꞌ. Chixjunileb teꞌxxucua ru ut teꞌxlokꞌoni li Ka̱cuaꞌ Dios li naxlokꞌoni laj Daniel, xban nak aꞌan li yoꞌyo̱quil Dios li cuan chi junelic kꞌe cutan. Aꞌan li nataklan chi junelic ut lix cuanquilal incꞌaꞌ ta̱osokꞌ. Ta̱cua̱nk ban chi junelic.

²⁷ Li Ka̱cuaꞌ Dios, aꞌan li na-achꞌaban ut aꞌan li nacoloc. Aꞌan li naba̱nun re li milagro ut li sachba chꞌo̱lej joꞌ saꞌ choxa joꞌ ajcuiꞌ saꞌ ruchichꞌochꞌ. Aꞌan li quicoloc re laj Daniel. Incꞌaꞌ quixcanab chi camsi̱c xbaneb li cakcoj, chan.

²⁸ Ut kꞌaxal cuiꞌchic quiqꞌueheꞌ xcuanquil laj Daniel nak laj Darío cuan chokꞌ rey ut quiqꞌueheꞌ ajcuiꞌ xcuanquil nak laj Ciro aj Persia qui-oc chokꞌ rey.