Daniel 5 - Li Santil hu

Laj Belsasar quiril li ukꞌej li yo̱ chi tzꞌi̱bac chiru li tzꞌac nak yo̱queb chi ninkꞌei̱c

¹ Li rey Belsasar quixcꞌu̱b jun li ninkꞌe re cuaꞌac ut quixbokeb jun mil chi cui̱nk li nequeꞌcꞌanjelac chiru. Ut qui-oc chi ucꞌac vino li rey chiruheb li jun mil chi cui̱nk cuanqueb aran.

² Ut xban xcalajic, li rey Belsasar quixtakla risinquil li secꞌ oro ut plata, li quixcꞌam chak laj Nabucodonosor lix yucuaꞌ saꞌ li templo aran Jerusalén. Quixtakla xcꞌambal chak li secꞌ oro ut li secꞌ plata re teꞌucꞌak cuiꞌ li rey, joꞌqueb ajcuiꞌ li nequeꞌcꞌanjelac chiru, joꞌ eb ajcuiꞌ li rixakil ut eb lix concubina.

³ Joꞌcan nak quicꞌameꞌ chak li secꞌ oro li queꞌcuan saꞌ lix templo li Dios li quicuan Jerusalén. Ut queꞌoc chi ucꞌac li rey joꞌ eb ajcuiꞌ li nequeꞌcꞌanjelac chiru, joꞌqueb ajcuiꞌ li rixakil ut eb lix concubina.

⁴ Queꞌucꞌac vino ut queꞌxlokꞌoniheb li dios yi̱banbil riqꞌuin oro, plata, bronce, chꞌi̱chꞌ, cheꞌ ut pec.

⁵ Ut saꞌ ajcuiꞌ li ho̱nal aꞌan quicꞌutun aran li ruꞌuj rukꞌ jun li cui̱nk yo̱ chi tzꞌi̱bac chiru li tzꞌac nachꞌ cuan cuiꞌ li candil li cuan saꞌ li cab. Ut li rey yo̱ chirilbal li ukꞌej nak yo̱ chi tzꞌi̱bac chiru tzꞌac.

⁶ Ut quisakquirinoꞌ li riloba̱l li rey xban xxiu ut qui-oc xcꞌaꞌux ut nasicsot xban xxiu toj retal nequeꞌxtochꞌ rib li xbe̱n rak.

⁷ Li rey quixjap re chi cau ut quixye nak teꞌcꞌamekꞌ chak riqꞌuin chixjunileb laj qꞌuehol naꞌleb ut eb laj Caldea ut eb laj kꞌe. Ut li rey quixye reheb: —Li ani ta̱ru̱k xtaubal ru li a̱tin aꞌin ut tixye cue cꞌaꞌru lix ya̱lal, la̱in tinqꞌue li caki akꞌ chirix retalil lix cuanquil. Tinqꞌue lix kꞌol oro chi xcux ut aꞌanak li rox chi takla̱nc saꞌ xbe̱n li tenamit, chan.

⁸ Ut queꞌchal chixjunileb laj qꞌuehol naꞌleb saꞌ rochoch li rey. Abanan ma̱ jun quitaꞌoc ru li tzꞌi̱banbil chiru li tzꞌac ut incꞌaꞌ queꞌru xyebal re li rey cꞌaꞌru lix ya̱lal.

⁹ Ut kꞌaxal cuiꞌchic quisakquirinoꞌ li riloba̱l li rey Belsasar ut qui-oc chi cꞌoxlac xban xxiu. Ut queꞌoc ajcuiꞌ chi cꞌoxlac li nequeꞌcꞌanjelac chiru.

¹⁰ Ut li rixakil li rey quirabi nak yo̱ chixjapbal re li rey joꞌ eb ajcuiꞌ li nequeꞌcꞌanjelac chiru. Joꞌcan nak qui-oc aran cuan cuiꞌ li rey ut quixye re: —At rey, chicua̱nk taxak la̱ yuꞌam chi junelic. Matxucuac chi moco tatsakquirinokꞌ xban a̱xiu.

¹¹ Rubel la̱ cuanquil cuan jun li cui̱nk qꞌuebil xnaꞌleb xbaneb lix dios santo. Nak toj cua̱nk la̱ yucuaꞌ chokꞌ rey quixqꞌue retal nak aꞌan cuan xnaꞌleb ut naxtau ru li incꞌaꞌ natauman ru. Lix naꞌleb aꞌan chanchan lix naꞌlebeb li dios. Ut la̱ yucuaꞌ quixqꞌue xcuanquil saꞌ xbe̱neb chixjunileb laj qꞌuehol naꞌleb ut eb laj kꞌe ut eb laj Caldea joꞌqueb ajcuiꞌ li nequeꞌtzoloc chirix li chahim.

¹² Li cui̱nk aꞌan cuan xnaꞌleb ut naxnau xyebal cꞌaꞌru xya̱lal li matcꞌ ut naxnau xsicꞌbal xya̱lal li jaljo̱quil ru a̱tin ut naxtau ru li chꞌaꞌaj xtaubal ru. Aꞌan laj Daniel. Beltsasar quiqꞌueheꞌ chokꞌ xcꞌabaꞌ xban li rey Nabucodonosor. Takla xbokbal laj Daniel re nak aꞌan ta̱yehok a̱cue cꞌaꞌru naxye li tzꞌi̱banbil chiru li tzꞌac, chan.

¹³ Joꞌcan nak laj Daniel quicꞌameꞌ riqꞌuin li rey, ut li rey quixye re: —¿Ma la̱at laj Daniel li ralal xcꞌajoleb laj Judá li queꞌcꞌameꞌ chak arin xban inyucuaꞌ laj Nabucodonosor? chan.

¹⁴ —La̱in xcuabi resil nak qꞌuebil a̱naꞌleb xbaneb la̱ dios. Xcuabi resil nak cutan saken cha̱cuu li cꞌaꞌak re ru ut cuan a̱naꞌleb chixtaubal ru li cꞌaꞌru chꞌaꞌaj xtaubal ru.

¹⁵ Eb laj kꞌe ut eb laj qꞌuehol naꞌleb queꞌcꞌameꞌ chak cuiqꞌuin re nak teꞌril li tzꞌi̱banbil chiru li tzꞌac ut re teꞌxye raj cue cꞌaꞌru naxye. Abanan incꞌaꞌ queꞌru.

¹⁶ Cuabiom resil nak naru ta̱chꞌolob xya̱lal li cꞌaꞌru chꞌaꞌaj xtaubal ru. Anakcuan cui ta̱ru̱k ta̱cuil li tzꞌi̱banbil chiru li tzꞌac ut ta̱ye cue cꞌaꞌru naxye, tattikiba̱k riqꞌuin caki akꞌej ut ta̱qꞌuema̱nk junak kꞌol oro cha̱cux ut la̱atak li rox chi takla̱nc saꞌ xbe̱n li tenamit aꞌin, chan.

¹⁷ Laj Daniel quixye re li rey: —Li ma̱tan ta̱cuaj xsihinquil, cana̱k chokꞌ a̱cue. Ut lin kꞌajca̱munquil ta̱cuaj xqꞌuebal, chaqꞌue re jalan chic. At rey, la̱in tincuil li cꞌaꞌru tzꞌi̱banbil chiru li tzꞌac ut tinye a̱cue li cꞌaꞌru naraj naxye.

¹⁸ At rey, li nimajcual Dios quixqꞌue chi cua̱nc chokꞌ rey laj Nabucodonosor la̱ yucuaꞌ ut quixqꞌue xnimal xcuanquil ut xnimal xlokꞌal ut qui-oxlokꞌi̱c xbaneb li tenamit.

¹⁹ Ut xban lix nimal xcuanquil li quiqꞌueheꞌ re, chixjunileb li cuanqueb saꞌ ruchichꞌochꞌ aꞌ yal bar xtenamiteb ut aꞌ yal cꞌaꞌru ra̱tinoba̱leb, nequeꞌsicsot xbaneb xxiu chiru. Quixcamsi li ani quiraj xcamsinquil ut quixcol li ani quiraj xcolbal. Quixqꞌue xcuanquil li ani quiraj xqꞌuebal xcuanquil ut quixcubsi xcuanquil li ani quiraj xcubsinquil xcuanquil.

²⁰ Abanan qui-isi̱c saꞌ xcuanquil xban nak quixkꞌetkꞌeti rib ut quixcacuubresi lix chꞌo̱l. Xban lix kꞌetkꞌetil kꞌaxal cuiꞌchic quixnimobresi rib. Joꞌcan nak qui-isi̱c saꞌ xcuanquil ut qui-isi̱c ajcuiꞌ lix lokꞌal.

²¹ Qui-isi̱c saꞌ xya̱nkeb li tenamit ut lix naꞌleb chanchan chic xnaꞌleb li xul. Quicuan saꞌ pim saꞌ xya̱nkeb li bu̱r re li qꞌuicheꞌ, ut quixcuaꞌ li pim joꞌqueb li bo̱yx. Quitꞌakresi̱c xban li xchuꞌque toj quixqꞌue retal nak li nimajcual Dios aꞌan li kꞌaxal nim xcuanquil saꞌ xbe̱neb chixjunileb li cuanqueb xcuanquil xban nak aꞌan naxqꞌue xcuanquil li ani naraj.

²² Ut la̱at at Belsasar, la̱at li ralal. Ac nacanau chixjunil li quixcꞌul la̱ yucuaꞌ abanan la̱at incꞌaꞌ xacubsi a̱cuib.

²³ Xakꞌetkꞌeti ban a̱cuib chiru li Ka̱cuaꞌ cuan saꞌ choxa. Xatakla xcꞌambal li secꞌ li quicꞌanjelac saꞌ lix templo li Dios ut xerocsi saꞌ le̱ ninkꞌe. La̱at xat-ucꞌac vino chi saꞌ chiruheb li nequeꞌcꞌanjelac cha̱cuu, joꞌqueb ajcuiꞌ la̱ cuixakil ut eb la̱ concubina. Ut xalokꞌoni ajcuiꞌ li jalanil dios yi̱banbil riqꞌuin plata, oro, bronce, hierro, cheꞌ ut pec. Xaqꞌueheb xlokꞌal li yi̱banbil dios li ma̱cꞌaꞌeb xnaꞌleb, li incꞌaꞌ nequeꞌiloc chi moco nequeꞌabin. Ut incꞌaꞌ xaqꞌue xlokꞌal li tzꞌakal Dios. Aꞌan li naqꞌuehoc la̱ yuꞌam ut aꞌan li yal re saꞌ a̱be̱n.

²⁴ Li Dios quitaklan chak re li ukꞌej aꞌan li xacuil li quitzꞌi̱bac chiru li tzꞌac.

²⁵ Ut li tzꞌi̱banbil chiru li tzꞌac joꞌcaꞌin naxye: Mene, mene, tekel, uparsin.

²⁶ Li xya̱lal aꞌan, joꞌcaꞌin na-el: Mene: Li Dios xrajla joꞌ najtil tatcua̱nk chokꞌ rey ut anakcuan xrakeꞌ la̱ cuanquil.

²⁷ Tekel: Xatxbis riqꞌuin lix bisleb ut nacꞌutun nak incꞌaꞌ us la̱ naꞌleb.

²⁸ Peres malaj ut Uparsin: Li ni̱nki tenamit nacattaklan cuiꞌ ac xjacheꞌ saꞌ xyi ut ac xqꞌueman reheb laj Medo ut reheb laj Persia, chan laj Daniel.

²⁹ Tojoꞌnak li rey Belsasar quixtakla xtikibanquil laj Daniel riqꞌuin li caki akꞌ ut quixqꞌue ajcuiꞌ xkꞌol oro. Ut quixtakla resil nak laj Daniel, aꞌan chic li roxil chi takla̱nc.

³⁰ Ut saꞌ ajcuiꞌ li kꞌojyi̱n aꞌan, quicamsi̱c laj Belsasar lix reyeb laj Caldea.

³¹ Ut laj Darío aj Medo, aꞌan chic qui-oc saꞌ xcuanquil. Cuib xca̱cꞌa̱l (62) chihab cuan re nak qui-oc chokꞌ rey.