Daniel 12 - Li Santil hu

Li cꞌaꞌru talajcꞌulma̱nk saꞌ rosoꞌjiqueb li cutan

¹ Ut quixye ajcuiꞌ li ángel re laj Daniel: —Saꞌ eb li cutan aꞌan ta̱cha̱lk li ángel Miguel li na-iloc reheb la̱ tenamit Israel. Nabal li raylal ta̱cꞌulma̱nk saꞌ eb li cutan aꞌan. Ma̱ jun cua quicꞌulman chi joꞌcan chalen chak saꞌ xticlajic li ruchichꞌochꞌ toj chalen anakcuan. Abanan lix tenamit li Dios teꞌcolekꞌ, li joꞌ qꞌuialeb tzꞌi̱banbil xcꞌabaꞌeb saꞌ li hu.

² Ut nabaleb li ac camenakeb teꞌcuacli̱k cuiꞌchic. Cuan li teꞌxcꞌul li yuꞌam chi junelic ut cuan li xuta̱nal teꞌxcꞌul nak teꞌxic saꞌ li tojba ma̱c chi junelic.

³ Ut eb li cuanqueb xnaꞌleb, li queꞌcꞌutuc re li ti̱quilal chiruheb li tenamit, teꞌqꞌuehekꞌ xlokꞌal chi junelic. Chanchanakeb li sakꞌe ut li chahim li nalemtzꞌun chiru li choxa.

⁴ Abanan la̱at, Daniel, cꞌu̱la saꞌ a̱chꞌo̱l li cꞌaꞌru xacuil saꞌ li visión. Ta̱bot ru li hu li yo̱cat xtzꞌi̱banquil ut ta̱qꞌue li sello chiru re nak ma̱ ani ta̱ilok re toj ta̱cuulak xkꞌehil li rosoꞌjiqueb li cutan. Ut nabaleb li tenamit teꞌcha̱lk teꞌxic yalak bar re nak teꞌxtau xtzꞌakob lix naꞌlebeb, chan cue li ángel.

⁵ Ut la̱in laj Daniel queꞌcuil cuib chic li chanchaneb cui̱nk xakxo̱queb saꞌ xcaꞌ pacꞌalil li nimaꞌ.

⁶ Ut jun reheb li cuib li xakxo̱queb chire li nimaꞌ quia̱tinac riqꞌuin li jun lino li rakꞌ xakxo saꞌ xbe̱n li haꞌ ut quixpatzꞌ re jokꞌe ta̱rakekꞌ xcꞌulbal chixjunil li sachba chꞌo̱lej aꞌin.

⁷ Ut li jun li lino rakꞌ, li cuan saꞌ xbe̱n li haꞌ, quixtaksi li rukꞌ xcabichal ut quicuabi nak quixpatzꞌ xcꞌabaꞌ li Dios li cuan chi junelic kꞌe cutan ut quixye nak li sachba chꞌo̱lej aꞌin ta̱cꞌulma̱nk chiru oxib chihab riqꞌuin media. Nak acak xsacheꞌ xcuanquileb lix tenamit li Dios, ta̱rakekꞌ xcꞌulbal chixjunil aꞌin, chan.

⁸ Quicuabi chixjunil li cꞌaꞌru quixye abanan incꞌaꞌ quintau ru. Joꞌcan nak quinye re: Ka̱cuaꞌ, ¿jokꞌe ta̱rakekꞌ xcꞌulbal chixjunil aꞌin?

⁹ Quichakꞌoc ut quixye cue: —Ayu, at Daniel, xban nak ac xinye a̱cue nak anakcuan incꞌaꞌ ta̱tauma̱nk ru chixjunil li cꞌaꞌak re ru aꞌin. Toj saꞌ rosoꞌjiqueb li cutan ta̱tauma̱nk ru.

¹⁰ Nabaleb teꞌsantobresi̱k xban lix ni̱nkal raylal teꞌxcꞌul. Abanan li incꞌaꞌ useb xnaꞌlebeb yo̱keb chixba̱nunquil li ma̱usilal ut ma̱ jun saꞌ xya̱nkeb teꞌxtau ru li cꞌaꞌru yo̱k chi cꞌulma̱nc. Caꞌaj cuiꞌ eb li cuanqueb xnaꞌleb teꞌxtau ru chixjunil.

¹¹ Nak acak xnumeꞌ oxib chihab riqꞌuin cuakib po (1,290 cutan) xcanabanquil li mayejac saꞌ li Templo, tojoꞌnak teꞌrocsi li kꞌaxal xiu xiu rilbal saꞌ lix Templo li Ka̱cuaꞌ.

¹² Us xak reheb li ti̱queb xchꞌo̱l li teꞌxcuy xnumsinquil li oxib chihab riqꞌuin cuukub po ut oꞌlaju cutan (1,335 cutan) chi incꞌaꞌ teꞌchꞌina̱nk xchꞌo̱leb.

¹³ Ut la̱at, at Daniel, ti̱cak taxak la̱ yuꞌam toj saꞌ rosoꞌjic. Tatca̱mk abanan tatcuacli̱k cuiꞌchic ut ta̱cꞌul la̱ kꞌajca̱munquil saꞌ rosoꞌjiqueb li cutan, chan cue li xakxo saꞌ xbe̱n li haꞌ.