Daniel 11 - Li Santil hu

Teꞌxpleti ribeb li rey li cuan saꞌ li norte ut li rey li cuan saꞌ li sur

¹ Saꞌ xbe̱n li chihab nak laj Darío cuan chokꞌ xreyeb laj Medo, la̱in quintakla̱c chixtenkꞌanquil aꞌan. La̱in quinqꞌuehoc re lix cacuilal ut lix cuanquil.

² Ut anakcuan la̱in ajcuiꞌ tinyehok a̱cue lix ya̱lal li ta̱cꞌulma̱nk. Teꞌcua̱nk oxib lix reyeb laj Persia ut lix ca̱ reyeb, aꞌan kꞌaxal nabal xbiomal ta̱cua̱nk chiruheb li oxib li teꞌcua̱nk. Tixcacuubresi rib riqꞌuin lix biomal ut ta̱oc chi pletic riqꞌuin li tenamit Grecia.

³ Ut aran Grecia ta̱cua̱nk jun li rey kꞌaxal cau rib. Aꞌan ta̱takla̱nk riqꞌuin xnimal lix cuanquil ut tixba̱nu li cꞌaꞌru naraj.

⁴ Abanan nak ac xakxo̱k chic chi tzꞌakal lix cuanquilal, ta̱sachekꞌ lix cuanquil ut lix tenamit ca̱hib jachal ta̱e̱lk. Ut incꞌaꞌ teꞌoc chokꞌ rey li ralal xcꞌajol chi moco teꞌcua̱nk xcuanquil joꞌ xcuanquil aꞌan xban nak ta̱sachekꞌ lix cuanquil ut jalaneb chic teꞌe̱chani̱nk re.

⁵ Ut li rey li cuan saꞌ li sur (Egipto), aꞌan kꞌaxal nima̱k xcuanquil. Abanan jun reheb li nequeꞌcꞌanjelac chiru ta̱nima̱nk xcuanquil ut aꞌan chic li kꞌaxal nima̱k xcuanquil chiru aꞌan.

⁶ Nak acak xnumeꞌ cuib oxib chihab teꞌxba̱nu jun li contrato. Lix rabin li rey li cuan saꞌ li sur ta̱sumla̱k riqꞌuin li rey li cuan saꞌ li norte (Siria) yal re nak teꞌxcꞌam rib saꞌ usilal li cuib chi tenamit. Abanan incꞌaꞌ najt teꞌcua̱nk saꞌ usilal. Li rey li cuan saꞌ li norte tixkꞌet li contrato ut incꞌaꞌ ta̱rabi ra̱tin li rixakil xban nak li ixakilbej ma̱cꞌaꞌak xcuanquil chiru. Joꞌcan nak ta̱camsi̱k li ixakilbej rochben lix yum ut rochbeneb ajcuiꞌ li quixcꞌameb chirix nak co̱ aran saꞌ li norte, ut ta̱camsi̱k ajcuiꞌ lix be̱lom.

⁷ Abanan jun reheb li rechꞌalal li ixakilbej ta̱cua̱nk xcuanquil. Aꞌan tixcꞌameb chak lix soldado re teꞌpletik riqꞌuin li rey li cuan saꞌ li norte. Teꞌoc saꞌ li tenamit ut teꞌnumta̱k saꞌ xbe̱neb.

⁸ Ut teꞌxcꞌam saꞌ li sur chixjunil li cuan saꞌ li norte. Teꞌcꞌamekꞌ lix dioseb li yi̱banbil riqꞌuin chꞌi̱chꞌ ut teꞌcꞌamekꞌ ajcuiꞌ li cꞌaꞌak chic re ru yi̱banbil riqꞌuin oro ut plata. Ut li cuanqueb saꞌ li norte teꞌcua̱nk rubel xcuanquil laj Egipto chiru nabal chihab.

⁹ Nak acak xnumeꞌ cuib oxib chihab, li cuanqueb saꞌ li norte teꞌxic saꞌ li sur ut teꞌxyal numta̱c saꞌ xbe̱neb, abanan incꞌaꞌ teꞌru̱k. Teꞌsukꞌi̱k cuiꞌchic saꞌ lix tenamiteb.

¹⁰ Abanan eb li ralal xcꞌajol lix reyeb li cuanqueb saꞌ li norte, kꞌaxal cuiꞌchic teꞌjoskꞌokꞌ ut teꞌxtiquib xcauresinquil ribeb re pletic. Teꞌxchꞌutub nabaleb lix soldado ut teꞌxic cuiꞌchic chi pletic. Chanchanakeb jun li nimaꞌ nak teꞌoc ut ta̱cua̱nk cuiꞌchic jun nimla ple̱t nak teꞌxyal numta̱c saꞌ xbe̱neb li cuanqueb saꞌ li sur.

¹¹ Cꞌajoꞌ nak ta̱joskꞌokꞌ li rey li cuan saꞌ li sur. Aꞌan ta̱e̱lk chak saꞌ lix naꞌaj ut ta̱pletik riqꞌuineb li cuanqueb saꞌ li norte. Ut chixjunileb li qꞌuila okꞌob chi soldado re li norte teꞌtꞌanekꞌ saꞌ rukꞌeb li cuanqueb saꞌ li sur.

¹² Ut kꞌaxal cuiꞌchic tixnimobresi rib li rey li cuan saꞌ li sur nak ta̱numta̱k saꞌ xbe̱neb li cuanqueb saꞌ li norte xban nak ta̱re̱chaniheb. Ut tixqꞌueheb nabal chi camsi̱c. Abanan incꞌaꞌ chic najt ta̱cua̱nk saꞌ lix cuanquil.

¹³ Mokon chic li rey li cuan saꞌ li norte tixchꞌutubeb ut tixcauresiheb lix soldado ut kꞌaxal cuiꞌchic nabal chiru li queꞌpletic junxil. Nak ta̱cuulak xkꞌehil ta̱xic cuiꞌchic saꞌ li sur riqꞌuin lix qꞌuila soldado ut cua̱nk lix cha̱bil cꞌanjeleba̱l re pletic.

¹⁴ Ut nabaleb li tenamit teꞌxjunaji ribeb riqꞌuineb li cuanqueb saꞌ li norte re nak teꞌnumta̱k saꞌ xbe̱neb li cuanqueb saꞌ li sur. Ut cua̱nkeb ajcuiꞌ li cui̱nk li incꞌaꞌ useb xnaꞌleb saꞌ xya̱nkeb laj Israel. Eb aꞌan teꞌxjunaji ribeb riqꞌuineb li cuanqueb saꞌ li norte joꞌ quicꞌutbesi̱c cha̱cuu saꞌ li visión. Abanan eb aꞌan incꞌaꞌ ajcuiꞌ teꞌxcuy saꞌ rukꞌeb li cuanqueb saꞌ li sur.

¹⁵ Tojoꞌnak li rey li cuan saꞌ li norte tixchap jun li tenamit cau rib chi pletic ut tixsut saꞌ tzꞌac re xrambaleb. Ut incꞌaꞌ chic teꞌxcuy pletic li soldado re li sur, usta kꞌaxal cauhak ribeb.

¹⁶ Ut li rey li cuan saꞌ li norte tixba̱nu li cꞌaꞌru naraj riqꞌuineb. Ut ta̱cana̱k saꞌ li cha̱bil naꞌajej yechiꞌinbil reheb laj Israel ut chixjunil ta̱cana̱k saꞌ rukꞌ aꞌan ut ma̱ ani ta̱ru̱k ta̱colok reheb.

¹⁷ Ut li rey li cuan saꞌ li norte tixtiquib xcꞌu̱banquil chanru nak tixchapeb li cuanqueb saꞌ li sur. Joꞌcan nak tixba̱nu jun li contrato riqꞌuineb re ta̱numta̱k saꞌ xbe̱neb. Ut tixsumub jun lix rabin riqꞌuin li rey li cuan saꞌ li sur, abanan incꞌaꞌ us ta̱e̱lk chiru li tixcꞌoxla xba̱nunquil xban nak lix rabin incꞌaꞌ ta̱oque̱nk chirix lix yucuaꞌ.

¹⁸ Mokon chic li rey li cuan saꞌ li norte tixyal xkꞌe chi numta̱c saꞌ xbe̱neb li tenamit cuanqueb chire li nimla palau ut ta̱re̱chani nabal. Abanan jun cui̱nk nim xcuanquil tixcuy pletic riqꞌuin ut tixcut xxuta̱n li rey li cuan saꞌ li norte nak ta̱numta̱k saꞌ xbe̱neb.

¹⁹ Ut li rey li cuan saꞌ li norte ta̱e̱lelik chiru ut yo̱k raj chi sukꞌi̱c saꞌ lix tenamit. Abanan ta̱cua̱nk xchꞌaꞌajquilal saꞌ be ut incꞌaꞌ ta̱cuulak.

²⁰ Ut li jun li ta̱oc chokꞌ re̱kaj tixtaklaheb laj titzꞌol toj saꞌ lix tenamiteb laj Israel re nak ta̱biomokꞌ. Ut incꞌaꞌ najt ta̱cua̱nk saꞌ xcuanquil xban nak ta̱camsi̱k abanan moco saꞌ ple̱t ta ta̱camsi̱k.

²¹ Li jun chic li ta̱oc chokꞌ rey, aꞌan jun cui̱nk kꞌaxal yibru xnaꞌleb ut ma̱cuaꞌ xcomoneb li nequeꞌoc chokꞌ rey. Aꞌan ta̱oc chokꞌ rey xban nak tixbalakꞌiheb li tenamit ut tixmuk chiruheb li cꞌaꞌru cuan saꞌ xcꞌaꞌux.

²² Li ani teꞌxyal numta̱c saꞌ xbe̱n, teꞌsachekꞌ. Chanchan ta̱cha̱lk butꞌ saꞌ xbe̱neb nak tixsacheb. Li cui̱nk aꞌan tixsach ru li jun li quiba̱nun re li contrato riqꞌuin.

²³ Nak acak xeꞌxba̱nu li contrato riqꞌuin, tixbalakꞌiheb. Kꞌaxal cuiꞌchic ta̱nima̱nk xcuanquil usta moco nim ta lix tenamit.

²⁴ Chi ma̱cꞌaꞌ saꞌ xchꞌo̱leb li tenamit li cuanqueb saꞌ xya̱lal, li cui̱nk aꞌan ta̱oc saꞌ eb li cha̱bil naꞌajej. Ut tixba̱nu li ma̱ jun sut queꞌxba̱nu lix xeꞌto̱nil yucuaꞌ saꞌ eb li tenamit aꞌan. Tixchap lix biomal ut tixjeqꞌui saꞌ xya̱nkeb li nequeꞌta̱ken re. Us ta̱e̱lk nak tixchap li ni̱nki tenamit abanan incꞌaꞌ najt ta̱cua̱nk saꞌ cuanquil.

²⁵ Ta̱recꞌa nak cauhak chic rib ut nimak chic xcuanquil li rey li cuan saꞌ li norte. Ta̱xic chi pletic riqꞌuineb li cuanqueb saꞌ li sur. Usta kꞌaxal nabaleb li soldado li cuanqueb saꞌ li sur, abanan incꞌaꞌ ajcuiꞌ teꞌxcuy pletic xban nak cuanqueb saꞌ li sur li teꞌxbalakꞌi lix reyeb ut teꞌxcꞌayi lix tenamiteb reheb li cuanqueb saꞌ li norte.

²⁶ Aꞌaneb ajcuiꞌ li nequeꞌcuaꞌac saꞌ me̱x rochben li rey li teꞌcꞌu̱ba̱nk re chanru nak teꞌxsach ru lix cuanquil. Nabaleb lix soldado teꞌcamsi̱k ut nabaleb teꞌe̱lelik.

²⁷ Li cuib chi rey teꞌcꞌojla̱k chi cuaꞌac saꞌ jun li me̱x, abanan junes raylal teꞌxcꞌoxla xba̱nunquil chi ribileb rib. Junes ticꞌtiꞌ teꞌxye chi ribileb rib. Ut ma̱ jun reheb ta̱ru̱k tixba̱nu li cꞌaꞌru tixcꞌoxla xba̱nunquil xban nak toj ma̱jiꞌ nacuulac xkꞌehil.

²⁸ Ut li rey li cuan saꞌ li norte ta̱sukꞌi̱k cuiꞌchic saꞌ lix tenamit ut tixcꞌam nabal li biomal riqꞌuin li tixmakꞌ chiruheb li cuanqueb saꞌ li sur. Ut xicꞌ ta̱ril li contrato li quixba̱nu li Dios riqꞌuineb laj Israel. Ut tixba̱nu li joꞌ qꞌuial ta̱raj aꞌan nak yo̱k chi sukꞌi̱c saꞌ xtenamit.

²⁹ Nak ta̱cuulak xkꞌehil li ac yebil, ta̱xic cuiꞌchic saꞌ li sur chi pletic. Abanan saꞌ li ple̱t aꞌan incꞌaꞌ us ta̱e̱lk.

³⁰ Moco joꞌ ta nak queꞌpletic xbe̱n cua xban nak nabaleb li soldado teꞌcha̱lk Quitim saꞌ li ni̱nki jucub re pletic ut teꞌxram xbeheb chiruheb. Ut ma̱cꞌajoꞌ nak teꞌxucuak ut teꞌsukꞌi̱k cuiꞌchic saꞌ lix tenamiteb. Ut li rey kꞌaxal cuiꞌchic xicꞌ ta̱rileb laj Israel lix tenamit li Dios. Cuanqueb laj Israel teꞌxtzꞌekta̱na li santil contrato ut teꞌkꞌaxo̱nk saꞌ xya̱nkeb li cuanqueb saꞌ li norte. Ut aꞌanakeb chic teꞌqꞌuehok xnaꞌleb li rey re xba̱nunquil li incꞌaꞌ us.

³¹ Ut eb li soldado teꞌxmux ru lix Templo li Dios joꞌ ajcuiꞌ li tzꞌac li sutsu cuiꞌ. Ut ta̱qꞌuehekꞌ aran saꞌ li templo li kꞌaxal xiu xiu rilbal. Ut incꞌaꞌ chic teꞌru̱k teꞌmayejak saꞌ li templo rajlal cutan lix tenamit li Dios.

³² Ut li rey li cuan saꞌ li norte tixbalakꞌiheb laj Israel li ac queꞌxtzꞌekta̱na li santil contrato ut eb aꞌan teꞌoque̱nk chirix. Abanan li tzꞌakal xtenamit li Dios teꞌxcacuubresi ribeb chixcolbal ribeb chiru li rey.

³³ Eb li cuanqueb xnaꞌleb saꞌ xya̱nkeb laj Israel teꞌxchꞌolob lix ya̱lal chiruheb nabal. Abanan cuan teꞌcamsi̱k riqꞌuin chꞌi̱chꞌ, cuan teꞌcꞌatekꞌ, cuan teꞌelkꞌa̱k cꞌaꞌru reheb, ut cuan teꞌchapekꞌ ut teꞌcꞌamekꞌ saꞌ jalan naꞌajej. Abanan incꞌaꞌ najt teꞌrahobtesi̱k.

³⁴ Nak yo̱keb chixcꞌulbal li raylal, cuan junju̱nk teꞌtenkꞌa̱nk reheb ut cua̱nkeb ajcuiꞌ nabal li teꞌxjunaji rib riqꞌuineb re xtenkꞌanquileb chi pletic yal xban nak cuan cꞌaꞌru teꞌraj teꞌre̱chani.

³⁵ Ut cuanqueb ajcuiꞌ saꞌ xya̱nkeb li nequeꞌqꞌuehoc naꞌleb saꞌ li tenamit teꞌcamsi̱k. Ta̱cꞌulma̱nk chi joꞌcan yal re xtenkꞌanquileb li jun chꞌol chic ut re ajcuiꞌ nak ta̱cꞌutu̱nk li ani tzꞌakal ti̱c xchꞌo̱l saꞌ xya̱nkeb re nak tzꞌakalakeb re ru nak ta̱cuulak xkꞌehil nak ta̱rakekꞌ li raylal li yo̱queb chixcꞌulbal joꞌ yebil chak xban li Dios.

³⁶ Li rey li cuan saꞌ li norte tixba̱nu li cꞌaꞌru ta̱raj. Tixnimobresi rib ut tixye nak aꞌan kꞌaxal nim xcuanquil chiru yalak cꞌaꞌru chi diosil. Ut tixye ajcuiꞌ nak aꞌan kꞌaxal nim xcuanquil chiru li tzꞌakal Dios. Ut chixjunil us ta̱e̱lk chiru toj ta̱cuulak xkꞌehil nak li Dios tixqꞌue chixtojbal rix lix ma̱c xban nak ac chꞌolchꞌo nak joꞌcan ta̱cꞌulma̱nk.

³⁷ Li rey li cuan saꞌ li norte tixtzꞌekta̱naheb lix dioseb lix xeꞌto̱nil yucuaꞌ ut tixtzꞌekta̱na ajcuiꞌ li dios li nequeꞌxlokꞌoni li ixk. Ma̱ jun li dios tixqꞌue xcuanquil xban nak tixcꞌoxla nak caꞌaj cuiꞌ aꞌan li kꞌaxal nim xcuanquil saꞌ xbe̱neb chixjunileb.

³⁸ Aꞌan tixlokꞌoni jun li jalanil dios li ma̱ jun cua queꞌxlokꞌoni lix xeꞌto̱nil yucuaꞌ xban nak aꞌan tixcꞌoxla nak li dios aꞌan ta̱qꞌuehok xmetzꞌe̱uheb saꞌ li ple̱t. Tixmayeja chiru li dios aꞌan li oro, li plata, li terto̱quil pec ut li cꞌaꞌak chic re ru terto xtzꞌak.

³⁹ Ut eb li nequeꞌxlokꞌoni li jalanil dios aꞌan, aꞌaneb li teꞌxakaba̱k xban li rey re nak teꞌxcol rix lix naꞌaj ut tixqꞌue xlokꞌaleb li nequeꞌxcanab rib rubel xcuanquil. Tixqꞌueheb xcuanquil ut tixjeqꞌui li chꞌochꞌ reheb chokꞌ xkꞌajca̱munquileb.

⁴⁰ Nak acak cuulac re rosoꞌjic lix cuanquil li rey li cuan saꞌ li norte, li rey li cuan saꞌ li sur ta̱xic chi pletic riqꞌuin. Chanchan xmetzꞌe̱u li ca̱k-sut-ikꞌ nak eb li soldado li teꞌcha̱lk saꞌ li norte teꞌoc chi pletic. Riqꞌuin xnimal xcuanquileb teꞌpletik riqꞌuin lix cacua̱y ut lix carruaje ut lix jucub. Chanchan li butꞌ nak naxhel rib saꞌ li chꞌochꞌ nak teꞌnumta̱k saꞌ xbe̱neb nabal chi tenamit.

⁴¹ Nak yo̱keb chi xic saꞌ li sur, li soldado li teꞌcha̱lk saꞌ li norte teꞌoc saꞌ nabal chi tenamit chi pletic. Ut teꞌoc aran Israel saꞌ li naꞌajej yechiꞌinbil reheb lix tenamit li Dios. Ut teꞌxcamsi nabaleb laj Israel. Abanan eb li tenamit Edom ut Moab ut lix qꞌuialeb li ralal xcꞌajol laj Amón teꞌxcol ribeb chiruheb.

⁴² Nabaleb chic li tenamit teꞌoc cuiꞌ chi pletic ut incꞌaꞌ teꞌxcuy xcolbaleb rib chiruheb li soldado li teꞌcha̱lk saꞌ li norte. Ut chi moco eb laj Egipto ta̱ru̱k teꞌxcol rib chiruheb.

⁴³ Ut eb li soldado li teꞌcha̱lk saꞌ li norte teꞌxmakꞌ chixjunil lix biomaleb laj Egipto, joꞌ lix oro ut lix plata ut li cꞌaꞌak chic re ru terto xtzꞌak. Ut teꞌnumta̱k ajcuiꞌ saꞌ xbe̱neb li tenamit Libia ut Etiopía.

⁴⁴ Ut chirix aꞌan ta̱cuulak esil riqꞌuin li rey li cuan saꞌ li norte. Li esil aꞌan ta̱cha̱lk chak saꞌ li este ut saꞌ li norte. Nak ta̱rabi cꞌajoꞌ nak ta̱oc xcꞌaꞌux xban. Ut cꞌajoꞌ nak ta̱cha̱lk xjoskꞌil ut ta̱xic chixcamsinquil nabal li tenamit ut chixsachbaleb ru.

⁴⁵ Tixyi̱b lix muheba̱l saꞌ xya̱nkeb li cuib chi palau nachꞌ riqꞌuin li tzu̱l bar cuan cuiꞌ lix Templo li Ka̱cuaꞌ. Ut ta̱cuulak xkꞌehil nak ta̱osokꞌ li rey. Ut aran ta̱ca̱mk ut ma̱ ani chic ta̱tenkꞌa̱nk re.