Daniel 10 - Li Santil hu

Li visión li quicꞌutbesi̱c chire li nimaꞌ Tigris

¹ Yo̱ rox chihab roquic laj Ciro chokꞌ xreyeb laj Persia nak quicꞌutbesi̱c jun chic li visión chiru laj Daniel li nayeman Beltsasar re. Li cꞌaꞌru quicꞌutbesi̱c chiru, aꞌan tzꞌakal ya̱l ut kꞌaxal ra rabinquil. Abanan laj Daniel quiqꞌueheꞌ xnaꞌleb xban li Dios chixtaubal ru lix ya̱lal li quicꞌutbesi̱c chiru saꞌ li visión.

² Laj Daniel quixye: —Nak quicꞌutbesi̱c chicuu li visión aꞌin, oxib xama̱n quirahoꞌ inchꞌo̱l xban.

³ Chiru li oxib xama̱n aꞌan incꞌaꞌ xintzaca li sahil echej chi moco xinyal li vino, chi moco li tib, ut incꞌaꞌ quicuocsi li sununquil ban re xyi̱banquil cuib toj quinumeꞌ li oxib xama̱n aꞌan.

⁴ Ut saꞌ li ca̱hib xcaꞌcꞌa̱l (24) xbe li xbe̱n po cuanquin chire li nimla nimaꞌ Hidekel xcꞌabaꞌ.

⁵ Nak quin-iloc takecꞌ quicuil jun li cui̱nk. Li rakꞌ yi̱banbil riqꞌuin li cha̱bil tꞌicr lino ut lix cꞌa̱mal xsaꞌ yi̱banbil riqꞌuin tzꞌakal oro li nachal chak aran Ufaz.

⁶ Lix tibel nalemtzꞌun joꞌ jun li terto̱quil pec ut li ru chanchan li rakꞌ ca̱k ut li xnakꞌ ru chanchan li xam. Li rok rukꞌ nalemtzꞌun joꞌ li kꞌan chꞌi̱chꞌ bronce ut nak quia̱tinac, kꞌaxal cau lix ya̱b xcux chanchan qꞌuila tenamit nak quicuabi.

⁷ Ma̱ ani chic qui-iloc re li visión aꞌin. Caꞌaj cuiꞌ la̱in laj Daniel. Eb li cui̱nk li cuanqueb cuochben incꞌaꞌ queꞌril. Cꞌajoꞌ nak qui-oc xxiuheb ut queꞌe̱lelic ut queꞌxmuk ribeb.

⁸ Quincana injunes ut quicuil li sachba chꞌo̱lej aꞌin li quicꞌutbesi̱c chicuu. Qui-osoꞌ lin metzꞌe̱u nak quicuecꞌa. Quinsakquirinoꞌ ut ma̱cꞌaꞌ chic inmetzꞌe̱u quincana.

⁹ Quicuabi lix ya̱b xcux nak qui-oc chi a̱tinac ut quisach innaꞌleb ut quintꞌaneꞌ chi huphu saꞌ chꞌochꞌ. Chanchan cua̱rc yo̱quin.

¹⁰ Ut jun li ukꞌej quichꞌeꞌoc cue ut quincuacli raj abanan cꞌachcꞌo quincana ut ninsicsot xban inxiu.

¹¹ Ut quixye cue: —At Daniel, la̱at raro̱cat xban li Dios. Qꞌue retal li oc cue chixyebal a̱cue ut xaklin xban nak taklanbilin chi a̱tinac a̱cuiqꞌuin, chan cue. Ut la̱in ninsicsot xban inxiu nak quinxakli.

¹² Ut li cui̱nk quixye cue: —At Daniel, matxucuac xban nak chalen nak xaqꞌue a̱chꞌo̱l chixtaubal ru li yo̱ chi cꞌulma̱nc ut xacubsi a̱cuib chiru la̱ Dios, aꞌan quirabi la̱ tij. Joꞌcan nak xinchal a̱cuiqꞌuin chixchꞌolobanquil lix ya̱lal cha̱cuu.

¹³ Abanan chiru jun xcaꞌcꞌa̱l cutan li nataklan saꞌ xbe̱neb laj Persia quixyal numta̱c saꞌ inbe̱n. Ut li ángel Miguel, jun saꞌ xya̱nkeb li kꞌaxal ni̱nkeb xcuanquil, quichal chintenkꞌanquil xban nak injunes cuanquin aran riqꞌuineb lix reyeb laj Persia.

¹⁴ La̱in xinchal chixyebal a̱cue li cꞌaꞌru teꞌxcꞌul la̱ tenamit saꞌ eb li cutan li teꞌcha̱lk. Li visión aꞌin, aꞌan ta̱cꞌulma̱nk saꞌ eb li cutan li teꞌcha̱lk, chan cue.

¹⁵ Nak quixye cue eb li a̱tin aꞌin, ti̱c quinxulub cuib ut mem quincana.

¹⁶ Ut xaka̱mil chicuu jun chanchan li cui̱nk. Aꞌan quixqꞌue li rukꞌ chi xtzꞌu̱mal cue ut quina̱tinac cuiꞌchic. Ut la̱in quinye re: —At Ka̱cuaꞌ, kꞌaxal ra saꞌ inchꞌo̱l xban li quicꞌutbesi̱c chicuu ut ma̱cꞌaꞌ chic inmetzꞌe̱u.

¹⁷ At Ka̱cuaꞌ, ¿chan ta ru nak ta̱ru̱k tina̱tinak a̱cuiqꞌuin? La̱in ma̱cꞌaꞌ chic inmetzꞌe̱u ut incꞌaꞌ chic naru ninmusikꞌac.

¹⁸ Ut li jun li chanchan cui̱nk quixqꞌue cuiꞌchic li rukꞌ saꞌ inbe̱n ut quicuecꞌa nak cuan chic inmetzꞌe̱u.

¹⁹ Ut aꞌan quixye cue: —Li Dios nacatxra. Tuktu̱quil usilal chicua̱nk a̱cuiqꞌuin. Chacacuubresi la̱ chꞌo̱l ut matxucuac, chan cue. Nak quixye cue aꞌan, quicuecꞌa nak cuan chic inmetzꞌe̱u. Usin chic. Ut la̱in quinye re: —At Ka̱cuaꞌ, anakcuan a̱tinan cuiqꞌuin. Us chic nacuecꞌa xban nak la̱at xaqꞌue cuiꞌchic inmetzꞌe̱u, chanquin re.

²⁰ Ut aꞌan quixye cue: —¿Ma nacanau cꞌaꞌru aj e nak xinchal a̱cuiqꞌuin? La̱in xinchal chixcꞌutbesinquil cha̱cuu li cꞌaꞌru ta̱cꞌulma̱nk. Anakcuan tento nak tinxic cuiꞌchic aran Persia chi pletic riqꞌuin li jun li nataklan saꞌ xbe̱neb. Nak acak xinrakeꞌ chi pletic riqꞌuin aꞌan, ta̱cha̱lk li jun li nataklan saꞌ xbe̱neb laj Grecia.

²¹ Ma̱ ani natenkꞌan cue, caꞌaj cuiꞌ li ángel Miguel li na-iloc reheb laj Israel. La̱in tincꞌutbesi cha̱cuu li cꞌaꞌru tzꞌi̱banbil saꞌ li hu re li ya̱l.