Daniel 1 - Li Santil hu

Laj Daniel cuan saꞌ rochoch li rey

¹ Yo̱ rox chihab roquic laj Joacim chokꞌ xreyeb laj Judá nak quicuulac Jerusalén laj Nabucodonosor lix reyeb laj Babilonia chi pletic riqꞌuineb.

² Ut li Dios quixcanab laj Joacim lix reyeb laj Judá saꞌ rukꞌeb laj Babilonia. Ut cuan li secꞌ li quicꞌanjelac saꞌ rochoch li Dios li quicꞌameꞌ saꞌ li naꞌajej Sinar. Ut laj Nabucodonosor quixcꞌam saꞌ rochoch lix dios ut quixqꞌue saꞌ li naꞌajej bar naxocman cuiꞌ li cꞌaꞌak re ru terto xtzꞌak re lix dioseb.

³ Laj Aspenaz aꞌan li nataklan saꞌ xbe̱neb li cui̱nk li eunuco, li nequeꞌtrabajic saꞌ li palacio. Li rey quixye re laj Aspenaz nak tixsicꞌ ruheb cuib oxib xcomoneb li ralal xcꞌajol li queꞌcuan chokꞌ xreyeb laj Israel ut tixcꞌameb saꞌ li palacio.

⁴ Eb li chꞌajom aꞌan tento nak cꞌajoꞌak xchakꞌaleb ru ut cua̱nkeb xnaꞌleb, tzolbilakeb ut se̱bak xchꞌo̱leb, ut tzꞌakalak re ruheb re nak ta̱ru̱k teꞌcꞌanjelak saꞌ li palacio. Ut laj Aspenaz tixcꞌut chiruheb li a̱tinac ut li tzꞌi̱bac saꞌ li ra̱tinoba̱leb laj Babilonia.

⁵ Li rey quixye nak rajlal cutan teꞌqꞌuehekꞌ xtzacae̱mk joꞌ naxtzaca aꞌan. Teꞌqꞌuehekꞌ xvino joꞌ narucꞌ aꞌan. Teꞌchꞌolani̱k oxib chihab ut chirix aꞌan teꞌcꞌamekꞌ chiru li rey.

⁶ Saꞌ xya̱nkeb li sicꞌbileb ru cuanqueb laj Daniel, laj Ananías, laj Misael ut laj Azarías. Aꞌaneb ralal xcꞌajol laj Judá.

⁷ Ut li nataklan saꞌ xbe̱neb li eunucos quixqꞌue xcꞌabaꞌeb. Laj Daniel quiqꞌueheꞌ chokꞌ aj Beltsasar. Laj Ananías quiqꞌueheꞌ chokꞌ aj Sadrac. Laj Misael quiqꞌueheꞌ chokꞌ aj Mesac ut laj Azarías quiqꞌueheꞌ chokꞌ aj Abed-nego.

⁸ Ut laj Daniel quixye saꞌ xchꞌo̱l nak incꞌaꞌ tixmux ru lix pa̱ba̱l riqꞌuin xcuaꞌbal li tzacae̱mk li quiqꞌueheꞌ re xban li rey chi moco riqꞌuin rucꞌbal li vino xban nak eb laj Judá incꞌaꞌ queꞌxba̱nu li tzacae̱mk aꞌan. Quixtzꞌa̱ma ban chiru laj Aspenaz nak incꞌaꞌ ta̱minekꞌ ru xba̱nunquil.

⁹ Ut li Dios quixtenkꞌa laj Daniel. Lix naꞌleb laj Daniel quicuulac chiru laj Aspenaz li nataklan saꞌ xbe̱neb li eunuco.

¹⁰ Ut laj Aspenaz li nataklan reheb quixye re laj Daniel: —La̱in ninxucuac xban nak li rey quixye cue cꞌaꞌru te̱tzaca. Cui sakquirin le̱ riloba̱l ut cui bakex chiruheb li jun chꞌol chic, li rey naru naxtakla incamsinquil la̱in, chan.

¹¹ Tojoꞌnak laj Daniel quia̱tinac riqꞌuin laj Melsar, li quiqꞌueheꞌ xban laj Aspenaz chi iloc reheb laj Daniel, laj Ananías, laj Misael ut laj Azarías.

¹² Quixye re: —Ba̱nu usilal, kayalak laje̱bak cutan li yo̱quin chixtzꞌa̱manquil cha̱cuu. Junes quiꞌil kꞌe̱n ta̱qꞌue chikatzaca ut junes haꞌ ta̱qꞌue chikucꞌ.

¹³ Riqꞌuin aꞌin ta̱cuil bar cuan li kꞌaxal cau, ma la̱o malaj li nequeꞌtzacan re li tzacae̱mk joꞌ naxtzaca li rey. Ut chirix aꞌan naru nacaba̱nu li cꞌaꞌru nacacuaj kiqꞌuin. Cui ta̱cuil nak incꞌaꞌ cauho, ta̱qꞌue chikatzaca li cꞌaꞌru ta̱cuaj, chan.

¹⁴ Ut laj Melsar quixcꞌul xchꞌo̱l li quixye laj Daniel. Ut laje̱b cutan queꞌxba̱nu chi joꞌcan.

¹⁵ Ut nak ac xnumeꞌ li laje̱b cutan, laj Daniel ut eb li rochben kꞌaxal cau nequeꞌiloc ut cau ribeb chiruheb li jun chꞌol chic li nequeꞌtzacan joꞌ quixye li rey.

¹⁶ Ut chirix chic aꞌan laj Melsar incꞌaꞌ quixqꞌue reheb li tzacae̱mk ut li vino li quixye li rey. Quixqꞌue ban junes quiꞌil kꞌe̱n chixtzacaheb ut junes haꞌ quixqꞌue chiruqꞌueb.

¹⁷ Ut li Dios quixqꞌue xnaꞌlebeb li ca̱hib chi sa̱j cui̱nk aꞌin ut kꞌaxal se̱beb xchꞌo̱l chixtaubal ru chixjunil li cꞌaꞌru quicuteꞌ chiruheb. Ut kꞌaxal cuiꞌchic li naꞌleb li quiqꞌueheꞌ re laj Daniel xban li Dios re xtaubal ru li naxye li matcꞌ ut li visión.

¹⁸ Nak ac xnumeꞌ li oxib chihab li quixye li rey, laj Aspenaz li nataklan saꞌ xbe̱neb li eunuco quixcꞌameb riqꞌuin li rey Nabucodonosor.

¹⁹ Ut li rey quia̱tinac riqꞌuineb. Ut quisahoꞌ xchꞌo̱l riqꞌuineb laj Daniel, laj Ananías, laj Misael ut laj Azarías ut ma̱ jun chic quixtau joꞌ eb li ca̱hib aꞌan. Joꞌcan nak queꞌcana saꞌ li palacio chi cꞌanjelac chiru.

²⁰ Chixjunil li cꞌaꞌru queꞌpatzꞌeꞌ reheb xban li rey, li ca̱hib chi cui̱nk aꞌin kꞌaxal cha̱bil queꞌxsume. Kꞌaxal cuiꞌchic cha̱bil queꞌxsume chiruheb chixjunileb li cuanqueb rubel xcuanquil li rey joꞌ laj kꞌe ut eb li nequeꞌtzoloc chirix li chahim.

²¹ Ut laj Daniel quicana chi cꞌanjelac saꞌ li palacio toj saꞌ li xbe̱n chihab nak cuan chokꞌ rey laj Ciro.