Colosenses 4 - Li Santil hu

¹ Ex patrón, chexcua̱nk saꞌ usilal riqꞌuineb laj cꞌanjel che̱ru ut saꞌ xya̱lal chetaklaheb xban nak la̱ex nequenau nak cuan e̱patrón saꞌ choxa.

² Me̱canab tijoc. Chextijok chi anchal e̱chꞌo̱l ut junelic chexbantioxi̱nk chiru li Dios.

³ Ut nak yo̱kex chi tijoc, chextijok ajcuiꞌ chak chikix la̱o re nak tixqꞌue ke li Dios xyebal resil li colba-ib saꞌ xcꞌabaꞌ li Cristo. Li xya̱lal li colba-ib, aꞌin mukmu nak quicuan chak. La̱ex nequenau nak cuanquin chi pre̱xil xban xyebal resil li colba-ib.

⁴ Ut chextijok ajcuiꞌ chak chicuix re nak tinru̱k chixchꞌolobanquil chi tzꞌakal lix ya̱lal joꞌ naraj li Dios.

⁵ Chexcua̱nk saꞌ xya̱lal riqꞌuineb li ma̱cuaꞌeb aj pa̱banel ut yalak bar cua̱nkex chi kꞌek chi cutan junelic te̱chꞌolob xya̱lal li colba-ib chiruheb.

⁶ Junelic cha̱bil chex-a̱tinak. Sicꞌomak chanru tex-a̱tinak riqꞌuineb re nak teꞌxqꞌue xchꞌo̱l chirabinquil. Ut chenauhak chanru xsumenquil li cꞌaꞌru teꞌxpatzꞌ e̱re.

Xqꞌuebal xsahileb xchꞌo̱l laj pa̱banel

⁷ Li hermano Tíquico raro kaban ut cha̱bil aj cꞌanjel chiru li Dios cuochben la̱in. Aꞌan ta̱yehok resil e̱re chanru cuanquin arin.

⁸ Aꞌan aj e nak tintakla e̱riqꞌuin. Tixye e̱re chanru nak cuanco arin ut tixqꞌue ajcuiꞌ xcacuil e̱chꞌo̱l saꞌ le̱ pa̱ba̱l.

⁹ Ta̱xic ajcuiꞌ li kaherma̱n Onésimo rochben. Aꞌan e̱rech tenamitil. Aꞌan ti̱c xchꞌo̱l ut raro kaban. Ut aꞌaneb teꞌyehok resil e̱re li cꞌaꞌru yo̱co chixcꞌulbal arin.

¹⁰ Laj Aristarco li cuochben nak cuanco saꞌ tzꞌalam naxtakla ajcuiꞌ xsahil e̱chꞌo̱l. Naxtakla ajcuiꞌ xsahil e̱chꞌo̱l laj Marcos li rechꞌalal laj Bernabé. Ac xintakla xyebal e̱re nak ta̱cuulak laj Marcos e̱riqꞌuin. Nak ta̱cuulak e̱riqꞌuin, checꞌulak saꞌ xya̱lal chi sa saꞌ e̱chꞌo̱l.

¹¹ Ut naxtakla xsahil e̱chꞌo̱l laj Justo. Aj Jesús ajcuiꞌ nayeman re. Caꞌaj eb cuiꞌ li oxib aꞌan saꞌ xya̱nkeb laj pa̱banel aj judío li yo̱queb chi tenkꞌa̱nc cue chixyebal resil li colba-ib. Ut nequeꞌxcꞌojob inchꞌo̱l.

¹² Joꞌcan ajcuiꞌ laj Epafras naxtakla ajcuiꞌ xsahil e̱chꞌo̱l. Aꞌan e̱rech tenamitil ut aꞌan aj cꞌanjel chiru li Cristo. Junelic yo̱ chi tijoc che̱rix re nak texcua̱nk saꞌ xya̱lal ut cauhak e̱chꞌo̱l saꞌ le̱ pa̱ba̱l chixba̱nunquil chi tzꞌakal joꞌ naraj li Dios.

¹³ La̱in nacuaj nak te̱nau nak laj Epafras junelic nequexcꞌoxla ut junelic yo̱ chi tijoc che̱rix. Ut natijoc ajcuiꞌ chirixeb li cuanqueb Laodicea joꞌqueb ajcuiꞌ li cuanqueb aran Hierápolis.

¹⁴ Naxtakla ajcuiꞌ xsahil e̱chꞌo̱l laj Lucas, laj banonel li kꞌaxal raro kaban. Joꞌcan ajcuiꞌ laj Demas naxtakla xsahil e̱chꞌo̱l.

¹⁵ Cheqꞌue xsahil xchꞌo̱leb laj pa̱banel li cuanqueb aran Laodicea. Ut cheqꞌue ajcuiꞌ xsahil xchꞌo̱l li xNinfas, joꞌqueb ajcuiꞌ laj pa̱banel li nequeꞌxchꞌutub rib saꞌ li rochoch chixlokꞌoninquil li Dios.

¹⁶ Nak acak xeril xsaꞌ li hu aꞌin la̱ex, te̱takla riqꞌuineb laj pa̱banel li cuanqueb Laodicea, re nak teꞌril ajcuiꞌ xsaꞌ li hu eb aꞌan. Ut nacuaj nak la̱ex te̱ril xsaꞌ li hu li xintakla riqꞌuineb aꞌan.

¹⁷ Ut cheyehak ajcuiꞌ re laj Arquipo nak chixqꞌuehak xchꞌo̱l chixba̱nunquil li cꞌanjel li quiqꞌueheꞌ re xban li Ka̱cuaꞌ Dios.

¹⁸ La̱in laj Pablo. Riqꞌuin cuukꞌ yo̱quin chixtzꞌi̱banquil li cuib oxib chi a̱tin aꞌin re xqꞌuebal xsahil saꞌ e̱chꞌo̱l. Nintzꞌa̱ma che̱ru nak misach saꞌ e̱chꞌo̱l nak cuanquin chi pre̱xil. Aꞌ taxak li Ka̱cuaꞌ Dios chi-osobtesi̱nk e̱re. Joꞌcan taxak.