Cantares 6 - Li Santil hu

¹ At ixk, li kꞌaxal chꞌinaꞌusat saꞌ xya̱nkeb chixjunileb li ixk, ¿bar xco̱ li cui̱nk li nacara? ¿Bar xcꞌam nak xco̱ re nak naru toxic cha̱cuix chixsicꞌbal?

Li ixk:

² Li cui̱nk li ninra xco̱ saꞌ xnaꞌaj li racui̱mk. Xco̱ saꞌ li naꞌajej li cꞌajoꞌ xsununcal. Co̱ chirilbaleb lix queto̱mk ut chixsicꞌbaleb li utzꞌuꞌuj.

³ Li cui̱nk li ninra, aꞌan cue la̱in ut la̱in rehin aꞌan. Yo̱ chixqꞌuebal xcuaheb lix queto̱mk saꞌ xnaꞌajeb li utzꞌuꞌuj.

Li roꞌ bich Li cui̱nk:

⁴ At ixk, nacatinra. Cꞌajoꞌ la̱ chꞌinaꞌusal joꞌ xchꞌinaꞌusal li tenamit Tirsa ut li tenamit Jerusalén. Xacue̱chani li cua̱m. Chanchan nak eb li soldado nequeꞌre̱chani junak li tenamit.

⁵ Canab cuilbal xban nak incꞌaꞌ chic nincuy rilbal lix chꞌinaꞌusal li xnakꞌ a̱cuu. Li rismal a̱jolom nalemtzꞌun. Chanchan jun chꞌu̱tal chi chiba̱t li yo̱queb chi cubec saꞌ li tzu̱l Galaad.

⁶ Cꞌajoꞌ lix chꞌinaꞌusal li ruch a̱cue ut tzꞌakal re ru. Ma̱ jun isinbil. Chanchan xsakal li carner li nequeꞌtususnac chak chi e̱lc saꞌ li naꞌajej li nequeꞌchꞌajeꞌ cuiꞌ.

⁷ Lix co a̱cue nalemtzꞌun. Chanchan li granada, usta tzꞌaptzꞌo riqꞌuin la̱ tꞌicr.

⁸ Cuanqueb oxcꞌa̱l li ixk sumsu̱quin cuiꞌ. Ut cuanqueb ca̱cꞌa̱l li ixk li ma̱cuaꞌeb tzꞌakal cuixakil. Ut nabaleb li tukꞌ ixk cuanqueb saꞌ li cuochoch.

⁹ Abanan jun ajcuiꞌ li kꞌaxal ninra. Aꞌan xsum li cua̱m. Aꞌan ma̱cꞌaꞌ xpaltil. Chanchan jun li mucuy. Aꞌan jun ajcuiꞌ chiru lix naꞌ ut kꞌaxal naraheꞌ xban. Ut eb li ixk li cuanqueb saꞌ li cuochoch nequeꞌxye “us xak re” chanqueb, ut nequeꞌxqꞌue xlokꞌal.

Coro:

¹⁰ ¿Ani li ixk aꞌan li kꞌaxal chꞌinaꞌus? Aꞌan chanchan xchꞌinaꞌusal li sakꞌe nak nasake̱u. Ut chanchan xchꞌinaꞌusal li po. Aꞌan xre̱chani li ra̱m li rey. Chanchan nak eb li soldados nequeꞌre̱chani junak li tenamit.

Li ixk:

¹¹ La̱in co̱in chirilbal li cheꞌ nogal ut li ru li cheꞌ li cuan saꞌ li ru takꞌa. Quicuaj rilbal li ratzꞌum li acui̱mk uvas ut li granadas.

¹² Nak cuanquin chak saꞌ xya̱nkeb li utzꞌuꞌuj quin-oc chixcꞌoxlanquil lix sum cua̱m. Ut quicuaj cua̱nc rochben saꞌ lix carruaje.

Coro:

¹³ Sukꞌin chak, sukꞌin chak, at sulamita. Sukꞌin chak. La̱o takaj rilbal a̱cuu. ¿Cꞌaꞌut nak te̱raj rilbal cuu? Nakaj rilbal nak tatxajok joꞌ nequeꞌxba̱nu saꞌ xya̱nkeb li soldados.