Cantares 5 - Li Santil hu

¹ At xsum cua̱m, la̱in nacatinra. La̱in xin-oc saꞌ lix naꞌaj li cuacui̱mk. Yo̱quin chixsicꞌbal li mirra ut li sununquil ban. Yo̱quin chixloubal li xyaꞌal cab ut yo̱quin chirucꞌbal li vino ut li leche. Cuaꞌinkex, ex kas ki̱tzꞌin, ut ucꞌankex, la̱ex li nequexkara. Tzacahomak li joꞌ qꞌuial te̱raj.

Coro: Li xca̱ bich Li ixk:

² Usta yo̱quin chi cua̱rc, abanan quicuabi nak li cui̱nk li ninra yo̱ chixtꞌochbal li puerta. Quixye cue: —At, inraro̱quil ixakil, te li puerta. At xsum cua̱m, la̱at chanchanat jun li mucuy xban nak ma̱cꞌaꞌ a̱paltil. Xtꞌaka li cuismal xban li xchuꞌque ut yo̱ chi tꞌuluc xyaꞌal.—

³ Ut la̱in quinye re: —Ac xcuisi li cuakꞌ chicuix. ¿Cꞌaꞌut nak tincuocsi cuiꞌchic? Ac xinchꞌaj li cuok. Incꞌaꞌ naru tintzꞌajni cuiꞌchic.—

⁴ Li cui̱nk li ninra quixchꞌic chak li rukꞌ saꞌ xhopolal li puerta re nak tixte. Ut cꞌajoꞌ nak quiyotꞌeꞌ inchꞌo̱l.

⁵ La̱in quincuacli re nak tincuocsi li cui̱nk li ninra. Nak quicuisi lix tzꞌapbal li puerta, li mirra quitzꞌukuc chiru li cuukꞌ.

⁶ Xinte li puerta re nak tincuocsi li cui̱nk li ninra. Abanan ma̱ ani chic. Ac xco̱. Xyotꞌeꞌ raj chic inchꞌo̱l chirix nak xinra̱tina. La̱in quin-oc chixsicꞌbal. Quinbok, abanan incꞌaꞌ quichakꞌoc.

⁷ Eb li cui̱nk li yo̱queb chi cꞌacꞌale̱nc re li tenamit quineꞌxtau. Quineꞌxsacꞌ ut quineꞌxtacuasi. Eb li cui̱nk li yo̱queb chi cꞌacꞌale̱nc re li oqueba̱l re li tenamit queꞌxmakꞌ chicuu lin tꞌicr li nintzꞌap cuiꞌ li cuu.

⁸ Ex tukꞌ ixk aj Jerusalén, nintzꞌa̱ma jun usilal che̱ru. Cui te̱ril ru li cui̱nk li ninra, yehomak re nak tincuaj ru ra̱tinanquil.

Coro:

⁹ La̱at li chꞌinaꞌusat saꞌ xya̱nkeb chixjunileb li ixk. ¿Ma kꞌaxal cha̱bil li cui̱nk li nacara chiruheb li jun chꞌol chic? ¿Ma kꞌaxal cha̱bil ta biꞌ li cui̱nk li nacara la̱at nak nacaye ke nak takaba̱nu aꞌin?

Li ixk:

¹⁰ Li cui̱nk li ninra, aꞌan sak xtibel ut cꞌajoꞌ xchakꞌal ru. Caꞌaj cuiꞌ aꞌan li mas cha̱bil saꞌ xya̱nkeb laje̱b mil chi cui̱nk.

¹¹ Lix jolom chanchan li cha̱bil oro. Li rismal coloch ut nalemtzꞌun ut lix kꞌekal chanchan xkꞌekal rix li tzꞌok.

¹² Cꞌajoꞌ xchꞌinaꞌusal saꞌ li xnakꞌ ru. Saꞌ xnaꞌaj tzꞌakal cuanqueb. Chanchan li paloma chire li nimaꞌ ut chanchan chꞌajbil saꞌ leche.

¹³ Cꞌajoꞌ xchꞌinaꞌusal lix co re. Chanchan xnaꞌaj li sununquil ban ut li utzꞌuꞌuj. Lix tzꞌu̱mal re chanchaneb li utzꞌuꞌuj azucena nak tꞌaktꞌak riqꞌuin li sununquil mirra.

¹⁴ Cꞌajoꞌ xchꞌinaꞌusal li rukꞌ. Chanchan li matkꞌab oro yi̱banbil riqꞌuin li cha̱bil pec topacio. Ut li ru xsaꞌ chanchan li cha̱bil marfil qꞌuebil xsahob ru riqꞌuin li cha̱bil pec zafiro.

¹⁵ Li raꞌ chanchan li okech yi̱banbil riqꞌuin mármol xakabanbil saꞌ cha̱bil oro. Li cui̱nk li ninra, chꞌinaꞌus rilbal. Chanchan xchꞌinaꞌusal li naꞌajej Líbano. Sicꞌbil ru joꞌ li cheꞌ chacalteꞌ.

¹⁶ Kꞌaxal kꞌun naa̱tinac. Cꞌajoꞌ xcha̱bilal li cui̱nk aꞌan. Aꞌan lin be̱lom, li ninra, ex tukꞌ ixk aj Jerusalén.